Happy Navaratri 2025: തിന്മയുടെ മേൽ നന്മ നേടിയ വിജയത്തിൻ്റെ ആഘോഷരാവിൽ ആശംസകൾ നേരാം

Happy Navaratri 2025: നവരാത്രി ഉത്സവത്തിൻ്റെ ഒരു പ്രധാന ദിവസമാണ്  മഹാ നവമി. തിന്മയുടെ മേൽ നന്മ നേടിയ വിജയത്തെ ഈ ദിവസം അനുസ്മരിക്കുന്നു. ദുർഗ്ഗാദേവി മഹിഷാസുരനുമായി ഒമ്പത് ദിവസം നീണ്ടുനിന്ന യുദ്ധം ചെയ്ത്, ഒമ്പതാം ദിവസം അസുരനെ വധിക്കാൻ തയ്യാറെടുത്തതിൻ്റെ ഓർമ്മയാണ് മഹാ നവമി. ഭാരതമെമ്പാടും ഈ ദിവസം വലിയ പ്രാധാന്യത്തോടെ ആഘോഷിക്കുന്നു.

Also Read: ഭക്തിസാന്ദ്രമായ നവരാത്രി ദിനങ്ങളിൽ ആശംസകൾ നേരാം

ഇന്ത്യയുടെ വിവിധ ഭാഗങ്ങളിൽ മഹാ നവമി പല രൂപത്തിൽ ആഘോഷിക്കപ്പെടുന്നു. പൊതുവായി, ഈ ദിവസം ദുർഗ്ഗാദേവിയെ മഹിഷാസുരമർദ്ദിനിയായി ആരാധിക്കുന്നു. ദുർഗ്ഗാ പൂജയുടെ ഭാഗമായി കിഴക്കൻ സംസ്ഥാനങ്ങളിൽ, പ്രത്യേകിച്ച് പശ്ചിമ ബംഗാളിൽ, മഹാ നവമി പ്രധാനമാണ്. അവിടെ മഹാ സ്നാനം, ഷോഡശോപചാര പൂജ എന്നിവ നടത്തുന്നു.

Also Read: ഭക്തിയുടെ നിറവിൽ ഇനി നവരാത്രി ദിനങ്ങൾ; പ്രിയപ്പെട്ടവർക്ക് ആശംസകൾ കൈമാറാം

വടക്കേ ഇന്ത്യയിൽ, ഒമ്പത് യുവതികളെ ദേവിയുടെ രൂപങ്ങളായി കണ്ട് പൂജിക്കുന്ന കന്യാ പൂജ പ്രധാനമാണ്. ഈ ദിനം ഉപവാസത്തിനും, ഹവനങ്ങൾക്കും, വിശിഷ്ട ഭോജ്യങ്ങൾക്കും പ്രാധാന്യം നൽകുന്നു. അറിവിൻ്റെയും ജ്ഞാനത്തിൻ്റെയും ദേവിയായ സരസ്വതീ ദേവിയേയും ഈ ദിനത്തിൽ ആരാധനയ്ക്കുന്നു.

Also Read: ഭക്തിസാന്ദ്രമായ നവരാത്രി ദിനങ്ങളിൽ ആശംസകൾ നേരാം

ദക്ഷിണേന്ത്യൻ സംസ്ഥാനങ്ങളിലും കേരളത്തിലും മഹാ നവമി ആയുധ പൂജ എന്ന പേരിലാണ് കൂടുതൽ അറിയപ്പെടുന്നത്. ഈ ദിവസം, പണിയായുധങ്ങൾ, വാഹനങ്ങൾ, പുസ്തകങ്ങൾ, ഉപകരണങ്ങൾ, സംഗീത ഉപകരണങ്ങൾ എന്നിവയെല്ലാം ശുദ്ധിയാക്കി പൂജിക്കുന്നു. തൊഴിലിനും അറിവിനും നാം ഉപയോഗിക്കുന്ന വസ്തുക്കളെ ശക്തിയുടെ പ്രതീകമായി കണ്ട് ആരാധിക്കുന്ന ചടങ്ങാണത്. 

കേരളത്തിൽ, നവരാത്രിയുടെ അവസാന മൂന്ന് ദിവസങ്ങളായ ദുർഗ്ഗാഷ്ടമി, മഹാ നവമി, വിജയദശമി എന്നിവ വിദ്യാഭ്യാസപരമായി പ്രാധാന്യമുള്ളതാണ്. മഹാ നവമി ദിവസം സരസ്വതീ പൂജ കഴിഞ്ഞ് പുസ്തകങ്ങൾ പൂജവെക്കുന്നു. വിജയദശമി ദിനത്തിലാണ് വിദ്യാരംഭം കുറിക്കുന്നത്. കേരളീയർ ഈ ദിനത്തിൽ ക്ഷേത്ര ദർശനങ്ങളും പ്രാർത്ഥനകളുമായി ഒത്തുചേരുന്നു.

Also Read: നവരാത്രി ആഘോഷങ്ങൾ വർണ്ണാഭമാക്കാം ആശംസകൾ കൈമാറാം

മഹാ നവമി ആചാരങ്ങളിലൂടെ ഭക്തർ ദുർഗ്ഗാദേവിയുടെ അനുഗ്രഹം തേടുകയും, അറിവ്, ധൈര്യം, ഐശ്വര്യം എന്നിവക്കായി പ്രാർത്ഥിക്കുകയും ചെയ്യുന്നു. തിന്മയെ തകർത്ത്, ജീവിതത്തിൽ വിജയം നേടാനുള്ള ശക്തി ഈ ആഘോഷം പ്രദാനം ചെയ്യുന്നു.

Read More: അറിവിൻ്റെയും വിജയത്തിൻ്റെയും ദിനം, മഹാനവമി ആശംസകൾ നേരാം