ചെമ്പരത്തി കൊണ്ട് തലമുടിക്ക് പരിചരണം, ഈ രഹസ്യക്കൂട്ട് പരീക്ഷിക്കൂ

ചർമ്മ സംരക്ഷണം എന്നതു പോലെ തന്നെ പ്രധാനപ്പെട്ടതാണ് തലമുടിയുടെ പരിപാലനവും. നമ്മൾ എത്രത്തോളം കരുതലോടെ മുടിയുടെ പ്രശ്നങ്ങളെ സമീപിക്കുന്നുവോ അത്രത്തോളം അനുകൂലമായ ഫലം ലഭ്യമാകും. പാർശ്വഫലങ്ങൾ ഇല്ലാത്ത പരിചരണ ഉത്പന്നങ്ങാളാണ് ഏവരും തേടുക. പാർലറുകളിലും കടകളിലും ലഭ്യമായ വ്യത്യസ്ത ഹെയർ സ്പാ ഒരു പരിധി വരെ നിങ്ങളുടെ മുടിയും പ്രശ്നങ്ങൾക്ക് പരിഹാരം നൽകിയേക്കാം. എങ്കിലും അധികവും പ്രകൃതിദത്തമായ രീതികൾ സ്വീകരിക്കുന്നതാണ് ഉചിതം. കെമിക്കൽ രഹിത ഉത്പന്നങ്ങൾ തിരഞ്ഞെടുക്കാം. 

തലമുടി സംരക്ഷണം എന്നു പറയുമ്പോൾ ആദ്യം ഓർമ്മ വരിക തൊടിയിൽ പൂത്തു നിൽക്കുന്ന ചുവപ്പൻ ചെമ്പരത്തി പൂക്കളാണോ?. എങ്കിൽ വൈകേണ്ട കുറച്ച് ചെമ്പരത്തി പൂക്കളും, തളിർ ഇലകളും പറിച്ചെടുത്തോളൂ. വീട്ടിൽ തന്നെ ഒരു കെമിക്കൽ ഫ്രീ ഷാമ്പൂ തയ്യാറാക്കാം. ചെമ്പരത്തി കൊണ്ടുള്ള താളി ഏറെക്കാലമായി മുടി പരിപാലനത്തിൽ ഉപയോഗിത്തിലുണ്ട്. 

തലയോട്ടി വരണ്ടു പോകുന്നതു തടഞ്ഞ് മുടി കൊഴിച്ചിൽ തടയുന്നു. കൂടാതെ ശരീരത്തെ മൊത്തത്തിൽ തണുപ്പിക്കുന്നതിനും ഇത് ഗുണം ചെയ്യും. 
കേശ പരിപാലനത്തിനായി വ്യത്യസ്ത രീതിയിൽ ചെമ്പരത്തി ഉപയോഗിക്കാവുന്നതാണ്.

ചെമ്പരത്തി തലമുടിക്കായി എങ്ങനെയൊക്കെ ഉപയോഗിക്കാം

• ചെമ്പരത്തി പൂവിൻ്റെ ഇതളുകൾ അരച്ചെടുത്തത് രണ്ടു ടേബിൾസ്പൂൺ. അതിലേക്ക് രണ്ടു ടേബിൾസ്പൂൺ തേങ്ങാപ്പാൽ, രണ്ടു ടേബിൾസ്പൂൺ തേൻ, രണ്ടു ടേബിൾസ്പൂൺ തൈര്, നാല് ടേബിൾസ്പൂൺ കറ്റാർവാഴ ജെൽ എന്നിവ ഇളക്കി യോജിപ്പിച്ചെടുക്കുക. ഈ മിശ്രിതം തലയോട്ടിയിലും മുടിയിഴകളിലും പുരട്ടി മസാജ് ചെയ്യുക. 30 മിനിറ്റ് വിശ്രമിക്കുക. ശേഷം കഴുകി കളയാം. ആഴ്ചയിൽ ഒരു തവണയെങ്കിലും ഇങ്ങനെ ചെയ്യുന്നത് തലമുടി വരണ്ടു പോകുന്നത് തടയുന്നു.

• രണ്ട് മുട്ടയുടെ വെള്ളയിലേക്ക് മൂന്ന് ടേബിൾസ്പൂൺ ചെമ്പരത്തി പൂവ് അരച്ചതു ചേർത്തിളക്കി യോജിപ്പിക്കുക. ഈ മിശ്രിതം പുരട്ടി 20 മിനിറ്റ് വിശ്രമിക്കുക. ശേഷം കട്ടി കുറഞ്ഞ ഷാമ്പൂ ഉപയോഗിച്ച് കഴുകി കളയാം. ആഴ്ചയിൽ രണ്ടു തവണ ഇങ്ങനെ ചെയ്യുന്നത് മുടി കൊഴിച്ചിൽ തടയാൻ സഹായിക്കും. 
• മൂന്ന് ടേബിൾസ്പൂൺ ഇഞ്ചി നീരിലേക്ക് രണ്ടു ടേബിൾസ്പൂൺ ചെമ്പരത്തി പൂവ് അരച്ചതും ഇളക്കി യോജിപ്പിക്കുക. തലയോട്ടിയിലും മുടിയിഴകളിലും പുരട്ടി മസാജ് ചെയ്യുക. 20 മിനിറ്റിനു ശേഷം ചൂടുവെള്ളം ഉപയോഗിച്ച് കഴുകി കളയുക. ആഴ്ചയിൽ രണ്ടു തവണ ഇങ്ങനെ ചെയ്യുന്നത് തലമുടിക്ക് കരുത്ത പകരും. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• മങ്ങിയ മുഖം തിളങ്ങട്ടെ; ഈ തക്കാളി വിദ്യ ട്രൈ ചെയ്തോളൂ
• കറിവേപ്പിലയും കഞ്ഞിവെള്ളവും കൊണ്ടൊരു ഹെയർ മാജിക്
• ഉള്ളി നീര് ഉണ്ടെങ്കിൽ മുടി കൊഴിച്ചിൽ പമ്പ കടക്കും
• തലമുടി കൊഴിച്ചിൽ തടയാം, ചില കാര്യങ്ങൾ ശ്രദ്ധിച്ചോളൂ
• കഞ്ഞി വെള്ളം വെറുതെ കളയേണ്ട, തലമുടിയിൽ ഇങ്ങനെ ഉപയോഗിച്ചു നോക്കൂ