KN Balagopal in Varthamanam: മദ്യത്തിന്റെ വിലകൂട്ടില്ല, അത് ലഹരിവ്യാപനത്തിന് കാരണമാകും: കെഎൻ ബാലഗോപാൽ

സംസ്ഥാനത്ത് നികുതിവരുമാനം വർധിപ്പിക്കുന്നതിനായി മദ്യത്തിന്റെ വില വർധിപ്പിക്കുന്നത് നിരവധി പ്രശ്‌നങ്ങൾക്ക് ഇടയാക്കുമെന്നും നാലുവർഷമായി സർക്കാർ മദ്യത്തിന്റെ വില വർധിപ്പിച്ചിട്ടില്ലെന്നും ധനമന്ത്രി കെഎൻ ബാലഗോപാൽ. ഇന്ത്യൻ എക്‌സ്പ്രസ് മലയാളം പോഡ്കാസ്റ്റ് പരിപാടി വർത്തമാനത്തിലാണ് മന്ത്രി ഇക്കാര്യം വ്യക്തമാക്കിയത്. 

Also Read:സമാനതകളില്ലാത്ത പ്രതിസന്ധിയുണ്ട്; എന്തിനെയും കേരളം അതിജീവിക്കും: കെഎൻ ബാലഗോപാൽ

നിലവിൽ സംസ്ഥാന സർക്കാരിന് നികുതിയിൽ നിന്ന് നേട്ടം കൈവരിക്കാനാകുന്നത് രണ്ട് കാര്യങ്ങളിൽ നിന്നാണ്. മദ്യത്തിൽ നിന്നും മറ്റൊന്ന് പെട്രോളിൽ നിന്നുമാണ്. മദ്യത്തിന് വിലകൂട്ടിയാൽ അത് രാസലഹരി ഉൾപ്പടെയുള്ളവയുടെ വ്യാപനത്തിന് കാരണമാകും. കഴിഞ്ഞ നാലുവർഷമായി സർക്കാർ മദ്യത്തിന്റെ വില വർധിപ്പിച്ചിട്ടില്ല. പെട്രോളിന്റെ നികുതി വർധിപ്പിക്കുന്നതിനും ചില പ്രശ്‌നങ്ങളുണ്ട്- കെഎൻ ബാലഗോപാൽ പറഞ്ഞു. 

Also Read:സിപിഎമ്മല്ല കോൺഗ്രസ്; രാഹുൽ മാങ്കൂട്ടത്തിലിനെതിരായ നടപടി അനിവാര്യം: രമേശ് ചെന്നിത്തല

രാജ്യത്ത് ധനകാര്യ രംഗത്ത് നടത്തിയ പരിഷ്‌കാരങ്ങൾ സംസ്ഥാനങ്ങളുടെ അധികാരങ്ങളെ ഇല്ലാതാക്കുന്നതാണെന്നും ധനമന്ത്രി പറഞ്ഞു. കേന്ദ്ര സർക്കാർ നടപ്പിലാക്കിയ പലപരിഷ്‌കാരങ്ങളും സംസ്ഥാനങ്ങളുടെ വിഭവസമാഹാരത്തെ കുറച്ചു. സംസ്ഥാനങ്ങൾക്ക് വരുമാനം കണ്ടെത്തുന്നതിനുള്ള വിഭവങ്ങൾ ഇല്ലാത്ത സ്ഥിതിയാണ്. മുതലാളിത്ത രാജ്യമായ അമേരിക്കയിൽ പോലും സംസ്ഥാനങ്ങളുടെ ധനസമാഹരണത്തിൽ കേന്ദ്രം കൈകടത്തുന്നില്ലെന്ന് ബാലഗോപാൽ കുറ്റപ്പെടുത്തി. 

Also Read:വീണ്ടും എൽഡിഎഫ് അധികാരത്തിലെത്തും; വിഡി സതീശൻ പിണറായിയുടെ ഐശ്വര്യം: വെള്ളാപ്പള്ളി നടേശൻ

കഴിഞ്ഞ നാല് വർഷത്തിനിടെ സാമ്പത്തിക പ്രതിസന്ധികൾക്കിടയിലും സർക്കാർ ശമ്പളപരിഷ്‌കരണം ഉൾപ്പടെയുള്ളവ നടത്തിയെന്നും ബാലഗോപാൽ അവകാശപ്പെട്ടു. ക്ഷേമപെൻഷൻ ഉൾപ്പടെയുള്ള എല്ലാ സഹായങ്ങളും കൃത്യമായി നടപ്പിലാക്കിയെന്നും ധനമന്ത്രി പറഞ്ഞു. 

ബിജെപിയുടെ നേതൃത്വത്തിലുള്ള കേന്ദ്രസർക്കാരിനെ ധനമന്ത്രി രൂക്ഷമായി വിമർശിച്ചു. തങ്ങളുടെ സർക്കാരുകൾ ഭരണത്തിൽ ഇല്ലാത്ത സംസ്ഥാനങ്ങളോട് ചിറ്റമ്മ നയമാണ് ബിജെപി വെച്ചുപുലർത്തുന്നത്. സംസ്ഥാനങ്ങൾക്ക് അവരുടെ കാര്യങ്ങൾ നടപ്പിലാക്കാൻ കേന്ദ്രത്തിന്റെ ഔദാര്യത്തിന് കാത്തിരിക്കേണ്ട ഗതിയാണ്. ഭരണഘടന പോലും ഒറ്റദിവസം കൊണ്ട് മാറ്റാൻ ശ്രമിക്കുന്നവരുടെ പക്കൽ നിന്നും കുടുതലൊന്നും പ്രതീക്ഷിക്കേണ്ടെന്നും ബാലഗോപാൽ പറഞ്ഞു.

Read More:പച്ചവെള്ളത്തിന് തീപിടിക്കുന്ന വർഗീയത കേരളത്തിലുണ്ട്; വിഡി സതീശൻ