എംഎല്‍എയുടെ മകന് എങ്ങനെ ആശ്രിത നിയമനം നല്‍കാനാകും? ഹർജി തള്ളി സുപ്രീം കോടതി

ഡൽഹി: അന്തരിച്ച മുൻ എംഎൽഎയുടെ മകന്റെ ആശ്രിത നിയമനം റദ്ദാക്കിയതിനെതിരായ ഹര്‍ജി തള്ളി സുപ്രീം കോടതി. ചെങ്ങന്നൂർ എംഎൽഎയായിരുന്ന കെ. കെ. രാമചന്ദ്രൻ നായരുടെ മകൻ ആർ. പ്രശാന്തിന് പൊതുമരാമത്ത് വകുപ്പിൽ അസിസ്റ്റൻഡ് എൻജിനീയറായി നൽകിയ നിയമനം റദ്ദാക്കിയതിനെതിരായ ഹര്‍ജിയാണ് സുപ്രീം കോടതി തള്ളിയത്.

എംഎൽഎയുടെ മകന് എങ്ങനെ ആശ്രിത നിയമനം നൽകാനാകുമെന്ന് ചീഫ് ജസ്റ്റിസ് അധ്യക്ഷനായ ബെഞ്ച് ചോദിച്ചു. ആശ്രിത നിയമനം റദ്ദാക്കിയ ഹൈക്കോടതി വിധി സുപ്രീം കോടതി ശരിവച്ചു. സര്‍വീസില്‍ ഇരുന്ന കാലത്ത് പ്രശാന്ത് കൈപ്പറ്റിയ ശമ്പളവും മറ്റു ആനുകൂല്യങ്ങളും തിരിച്ചു പിടിക്കരുതെന്ന് കോടതി നിർദേശിച്ചു.

ആശ്രിത നിയമനം സർക്കാർ ജീവനക്കാരുടെ മക്കൾക്ക് അർഹതപ്പെട്ടതാണെന്നും എംഎൽഎ സർക്കാർ ജീവനക്കനക്കാരനല്ലെന്നും ചൂണ്ടിക്കാട്ടി പാലക്കാട് നെന്മാറ സ്വദേശിയായ എം. അശോക് കുമാർ സമർപ്പിച്ച പൊതുതാത്പര്യ ഹർജിയിൽ, നിയമനം റദ്ദാക്കി ഹൈക്കോടതി ഉത്തരവിറക്കിയിരുന്നു. ഇത് ചോദ്യം ചെയ്ത് സംസ്ഥാന സര്‍ക്കാര്‍ സമര്‍പ്പിച്ച ഹര്‍ജിയാണ് സുപ്രീം കോടതി തള്ളിയത്.

പ്രശാന്തിന് പൊതുമരാമത്ത് വകുപ്പില്‍ ആശ്രിത നിയമനം നൽകാൻ ജനുവരി 24ന് ചേർന്ന മന്ത്രിസഭായോഗത്തിലാണ് തീരുമാനം ഉണ്ടായത്. കേരള സബോഡിനേറ്റ് സര്‍വീസ് ചട്ടം പ്രകാരം തസ്തിക സൃഷ്ടിച്ച് നിയമനം നടത്താന്‍ മന്ത്രിസഭയ്ക്ക് കഴിയുമോയെന്ന കാര്യവും സുപ്രീം കോടതി പരിശോധിച്ചു. പൊതുതാത്പര്യ ഹര്‍ജിയില്‍ നിയമനം റദ്ദാക്കാന്‍ ഹൈക്കോടതിക്ക് അധികാരമില്ലെന്നായിരുന്നു സംസ്ഥാന സർക്കാരിന്റെ പ്രധാന വാദം.

Read More

• ഒരു കോടിയും 300 പവനും ഒളിപ്പിച്ചത് കട്ടിലിനടിയിലെ പ്രത്യേക അറയിൽ, കുടുക്കിയത് വിരലടയാളം
• സംസ്ഥാനത്ത് വൈദ്യുതി നിരക്ക് കൂടിയേക്കും, നിരക്ക് വർധന പരിഗണനയിലെന്ന് മന്ത്രി
• ശബരിമല തീർത്ഥാടകർക്ക് മുന്നറിയിപ്പ്; രാത്രി പമ്പയിൽ ഇറങ്ങരുത്
• ഇന്ന് അതിശക്തമായ മഴ; 5 ജില്ലകളിലെ വിദ്യാഭ്യാസ സ്ഥാപനങ്ങൾക്ക് അവധി
• 'അടുപ്പില്‍ വെച്ച വെള്ളം വാങ്ങി വെച്ചോളൂ;' മുന്നണി വിടുമെന്ന വാർത്ത വ്യാജമെന്ന് ജോസ് കെ. മാണി