Shine Tom Chacko Arrested: ഷൈൻ ടോം ചാക്കോയ്ക്കെതിരെ നടപടി; ലഹരി ഉപയോഗത്തിനും ഗൂഢാലോചനയ്ക്കും കേസ്

Actor Shine Tom Chacko Arrested: കൊച്ചി: ലഹരിക്കേസിൽ നടൻ ഷൈൻ ടോം ചാക്കോ അറസ്റ്റിൽ. ലഹരി ഉപയോഗം, ഗൂഢാലോചന ഉൾപ്പെടെയുള്ള വകുപ്പുകൾ ചുമത്തിയാണ് നടനെ അറസ്റ്റു ചെയ്തത്. നർകോട്ടിക് ഡ്രഗ്സ് ആൻഡ് സൈക്കോട്രോപിക് സബ്സ്റ്റൻസസ് (എൻഡിപിഎസ്) ആക്ടിലെ 27, 29 വകുപ്പുകൾ പ്രകാരം നടനെതിരെ കേസെടുത്തത്.

ഇന്നു നടന്ന മണിക്കൂറുകൾ നീണ്ട ചോദ്യം ചെയ്യലിനൊടുവിലാണ് ഷൈൻ അറസ്റ്റിലാകുന്നത്. നിർണായക വിവരങ്ങൾ പൊലീസിന് ലഭിച്ചിട്ടുണ്ടെന്നാണ് വിവരം. ഷൈനെ ഉടൻ വൈദ്യ പരിശോധനയ്ക്ക് വിധേയനാക്കും. നടന്റെ കുറ്റസമ്മത മൊഴിയുടെ അടിസ്ഥാനത്തിലാണ് നിലവിൽ കേസെടുത്തിരിക്കുന്നത്.

അതേസമയം, ഹോട്ടലിൽ ആരോ തന്നെ ആക്രമിക്കാൻ വന്നതാണെന്ന് കരുതി ഭയന്നാണ് താൻ ഓടിയതെന്നാണ് ഷൈൻ ടോം ചാക്കോ പൊലീസിനോട് പറഞ്ഞതെന്നും വിവരമുണ്ട്. പൊലീസാണെന്ന് അറിയില്ലായിരുന്നുവെന്ന് ഷൈൻ ചോദ്യം ചെയ്യലിൽ പൊലീസിനോട് പറഞ്ഞതായി വാർത്താ ചാനലുകൾ റിപ്പോർട്ട് ചെയ്തു.

ലഹരി പരിശോധനയ്ക്കിടെ ഹോട്ടലിൽനിന്ന് ഇറങ്ങി ഓടിയതിന്റെ കാരണം നേരിട്ട് ഹാജരായി വിശദീകരിക്കണമെന്ന് ആവശ്യപ്പെട്ട് നടന് പൊലീസ് നോട്ടീസ് നൽകിയിരുന്നു. ഇന്ന് രാവിലെ 10.30ന് നോർത്ത് പൊലീസ് സ്റ്റേഷനിൽ ഹാജാരാകാനായിരുന്നു നൽകിയിരുന്ന നിർദേശം. ഇതനുസരിച്ച് ഇന്നു 10 മണിയോടെ നടൻ സ്റ്റേഷനിൽ ഹാജരായത്.

കൊച്ചിയിലെ ഒരു ഹോട്ടലിൽ കഴിഞ്ഞ ദിവസം പൊലീസ് നടത്തിയ ലഹരി പരിശോധനയ്ക്കിടെയാണ് നടൻ ഓടി രക്ഷപ്പെട്ടത്. പൊലീസ് മുറിയിൽ പരിശോധനയ്ക്ക് എത്തുന്നതിനിടെ ജനൽവഴി താഴെയിറങ്ങി ഹോട്ടൽ റിസപ്ഷൻ വഴി ഓടി രക്ഷപ്പെടുന്ന നടന്റെ സിസിടിവി ദൃശ്യങ്ങൾ പുറത്തുവന്നിരുന്നു. ഹോട്ടലിൽ ലഹരി ഉപയോഗമുണ്ടെന്ന വിവരത്തിന്റെ അടിസ്ഥാനത്തിലയിരുന്നു ഡാൻസാഫ് പരിശോധനക്കെത്തിയത്. കൊച്ചി നാർക്കോട്ടിക്‌സ് എസിപിയുടെ നിർദേശപ്രകാരമായിരുന്നു പരിശോധന. 

Read More

• പൊലീസാണെന്ന് അറിഞ്ഞില്ല, ആരോ അക്രമിക്കാൻ വന്നതാണെന്ന് കരുതി പേടിച്ചോടിയതെന്ന് ഷൈൻ ടോം ചാക്കോ
• ചട്ട ലംഘനം നടത്തി; ദിവ്യ എസ്. അയ്യർക്കെതിരെ പരാതിയുമായി യൂത്ത് കോൺഗ്രസ്
• Drugs in Cinema: സിനിമ സെറ്റിന് പവിത്രതയൊന്നുമില്ല; ലഹരി പരിശോധന എല്ലായിടത്തും ഉണ്ടാകും: എം.ബി.രാജേഷ്
• നടി വിൻസി അലോഷ്യസിന്റെ മൊഴിയെടുക്കാൻ അനുമതി തേടി എക്‌സൈസ്
• വയനാട് ടൗൺ ഷിപ്പ്: ഭൂമി ഏറ്റെടുക്കൽ തടയണം, എൽസ്റ്റൺ എസ്റ്റേറ്റ് സുപ്രീം കോടതിയിൽ