സരിൻ തന്നെ; പാലക്കാട് എൽഡിഎഫ് സ്വതന്ത്രനായി മത്സരിക്കും

പാലക്കാട്: ട്വിസ്റ്റുകൾ മാറിമറിയുന്ന പാലക്കാട് ഉപതിരഞ്ഞെടുപ്പിൽ ഡോ പി സരിൻ ഇടതുപക്ഷ സ്ഥാനാർഥിയാകും. വെള്ളിയാഴ്ച ചേർന്ന ജില്ലാ സെക്രട്ടറിയേറ്റ് യോഗത്തിലാണ് ഇത് സംബന്ധിച്ചുള്ള തീരുമാനം ഉണ്ടായത്. ഔദ്യോഗിക പ്രഖ്യാപനം ഇന്ന് വൈകീട്ടോടെ ഉണ്ടാകുമെന്ന് സിപിഎം കേന്ദ്രകമ്മറ്റിയംഗം എകെ ബാലൻ മാധ്യമങ്ങളോട് പറഞ്ഞു.

സിപിഎം സ്വതന്ത്രനായാകും പി സരിൻ പാലക്കാട് ജനവിധി തേടുകയെന്നതാണ് വിവരം. ഇത് സംബന്ധിച്ച് സിപിഎമ്മിന്റെ ഔദ്യോഗീക തീരുമാനം വന്നാലെ വ്യക്തത ഉണ്ടാകു.  

രാഹുൽ മാങ്കൂട്ടത്തിലിനെ പാലക്കാട് സ്ഥാനാർത്ഥിയായി യുഡിഎഫ് പ്രഖ്യാപിച്ചതിന് പിന്നാലെയാണ് കെപിസിസി മീഡിയാ സെൽ ചെയർമാനായിരുന്ന സരിൻ കോൺഗ്രസ് നേതൃത്വവുമായി ഇടയുന്നത്. കോൺഗ്രസിനെതിരെയും പ്രതിപക്ഷനേതാവ് വിഡി സതീശനെതിരെയും ആരോപണങ്ങൾ ഉയർത്തിയാണ് സരിൻ പാർട്ടിയിൽ നിന്നിറങ്ങിയത്. ഇനി ഇടതുപക്ഷത്തിനൊപ്പം നിൽക്കുമെന്നും സ്ഥാർത്ഥിത്വം വിഷയമല്ലെന്നും സിപിഎം മത്സരിക്കണമെന്ന് പറഞ്ഞാൽ അതിന് തയ്യാറാണെന്നും സരിൻ നേരത്തെ വ്യക്തമാക്കിയിരുന്നു.

പി സരിനെ സ്ഥാനാർഥിയാക്കുന്നതിലൂടെ കോൺഗ്രസിലെ അതൃപ്തരുടെ വോട്ട് കൂടി സമാഹരിക്കാമെന്ന് ലക്ഷ്യത്തിലാണ് സിപിഎമ്മും എൽഡിഎഫും. രാഹുൽ മാങ്കൂട്ടത്തിലിനെ സ്ഥാനാർഥിയാക്കിയതിലൂടെ നിരവധി കോൺഗ്രസ് പ്രവർത്തകർ അതൃപ്തരാണെന്നാണ് സിപിഎം കണക്ക് കൂട്ടൽ. ഇതിനൊപ്പം പാർട്ടി വോട്ടുകൾ കൂടി സമാഹരിക്കാനായാൽ വിജയിക്കാനാകുമെന്നുമാണ് ജില്ലാ സെക്രട്ടറിയേറ്റിന്റെ വിലയിരുത്തൽ. 

ബിജെപി-കോൺഗ്രസ് ഡീൽ ഉയർത്തികാണിക്കാനും സിപിഎം ശ്രമിക്കുന്നുണ്ട്. ബിജെപിയും കോൺഗ്രസും തമ്മിലുള്ള ഡീൽ തെരഞ്ഞെടുപ്പിൽ ചർച്ചയാകുമെന്നും വലിയ രാഷ്ട്രീയമാണ് സരിൻ ഉയർത്തിക്കൊണ്ട് വരുന്നതെന്നും നേരത്തെ എകെ ബാലൻ പറഞ്ഞിരുന്നു.

എൽഡിഎഫ്, യുഡിഎഫ് സ്ഥാനാർഥികളുടെ ചിത്രം തെളിഞ്ഞതോടെ ബിജെപിയും വൈകാതെ സ്ഥാനാർഥിയെ പ്രഖ്യാപിക്കും. ബിജെപി സംസ്ഥാന അധ്യക്ഷൻ കെ സുരേന്ദ്രൻ, മുതിർന്ന നേതാവ് ശോഭാ സുരേന്ദ്രൻ, സി കൃഷ്ണകുമാർ എന്നിവരുടെ പേരുകളാണ് പ്രധാനമായും പരിഗണിക്കുന്നത്. 

Read More

• റോഡ് ഷോയോടെ രാഹുൽ മാങ്കൂട്ടത്തലിന്റെ പ്രചാരണത്തിന് തുടക്കം
• യുആർ പ്രദീപ് ചേലക്കരയിൽ എൽഡിഎഫ് സ്ഥാനാർഥിയാകും
• വയനാട്ടിൽ സത്യൻ മൊകേരി ഇടത് സ്ഥാനാർഥി
• കോൺഗ്രസ് പുറത്താക്കി, സിപിഎം പറഞ്ഞാൽ മത്സരിക്കുമെന്ന് സരിൻ
• കണ്ണൂർ എഡിഎം നവീൻ ബാബുവിന്റെ മരണം: പി.പി.ദിവ്യക്കെതിരെ കേസ്
• നവീൻ ബാബുവിന്റെ മരണത്തിൽ അന്വേഷണം; പി.പി.ദിവ്യയുടെ മൊഴിയെടുക്കും