നവീൻ ബാബുവിന്റെ മരണത്തിൽ അന്വേഷണം; പി.പി.ദിവ്യയുടെ മൊഴിയെടുക്കും

പത്തനംതിട്ട: എഡിഎം നവീൻ ബാബുവിന്റെ മരണത്തിൽ അന്വേഷണം. കണ്ണൂർ പൊലീസാണ് കേസ് അന്വേഷിക്കുക. ഇതിനായി കണ്ണൂർ പൊലീസ് പത്തനംതിട്ടയിലേക്ക് എത്തും. കേസുമായി ബന്ധപ്പെട്ട് കണ്ണൂർ ജില്ലാ പഞ്ചായത്ത് പ്രസിഡന്റ് പി.പി.ദിവ്യയുടെ മൊഴി എടുക്കും. എഡിഎമ്മിനെതിരെ ദിവ്യ അഴിമതി ആരോപണം ഉന്നയിച്ചിരുന്നു.

അതേസമയം, നവീൻ ബാബുവിന്റെ മൃതദേഹം ഇന്ന് പത്തനംതിട്ടയിലെ മലയാലപ്പുഴയിലെ വീട്ടുവളപ്പിൽ സംസ്കരിക്കും. കലക്ടറേറ്റിൽ മൃതദേഹം പൊതുദർശനത്തിനുവച്ചശേഷം വീട്ടിലേക്ക് കൊണ്ടുപോകും. ഉച്ചയ്ക്കുശേഷം പത്തിശേരിയിലെ വീട്ടിലാണ് സംസ്കാര ചടങ്ങുകൾ നടക്കുക. 

എഡിഎമ്മിന്റെ മരണത്തിൽ കുടുംബം പരാതി നൽകിയിരുന്നു. സഹോദരൻ കെ.പ്രവീൺ ബാബുവാണ് കണ്ണൂർ സിറ്റി പൊലീസിൽ പരാതി നൽകിയത്. പിപി ദിവ്യ, എഡിഎം നവീൻ ബാബുവിനെ ഭീഷണിപ്പെടുത്തിയെന്നും ജില്ലാ പഞ്ചായത്ത് പ്രസിഡന്റിനെതിരെ ആത്മഹത്യ പ്രേരണക്കുറ്റം ചുമത്തണമെന്നും പ്രവീൺ ബാബുവിന്റെ പരാതിയിൽ ആവശ്യപ്പെടുന്നു. എഡിഎമ്മിന്റെ മരണത്തിൽ ദിവ്യയുടെയും പെട്രോൾ പമ്പിന് അപേക്ഷ നൽകിയ പ്രശാന്തിന്റെയും പങ്ക് അന്വേഷിക്കണമെന്നും ആവശ്യപ്പെട്ടിട്ടുണ്ട്.

കഴിഞ്ഞ ചൊവ്വാഴ്ചയാണ് കണ്ണൂർ എഡിഎം നവീൻ ബാബുവിനെ പള്ളിക്കുന്നിലെ വീട്ടിൽ മരിച്ച നിലയിൽ കണ്ടെത്തിയത്. കണ്ണൂരിൽ നിന്നും സ്ഥലം മാറ്റം വാങ്ങി പത്തനംതിട്ടയിലേക്ക് പോകാനിരിക്കെയാണ് എഡിഎമ്മിനെ മരിച്ച നിലയിൽ കണ്ടെത്തിയത്. തിങ്കളാഴ്ച കളക്ടറേറ്റിൽ ജില്ലാ കളക്ടറുടെ അധ്യക്ഷതയിൽ എഡിഎമ്മിന് യാത്രയയപ്പ് നൽകിയിരുന്നു. യോഗത്തിൽ കണ്ണൂർ ജില്ലാ പഞ്ചായത്ത് പ്രസിഡന്റ് പി.പി.ദിവ്യ എഡിഎമ്മിനെതിരെ വിമർശനം ഉന്നയിച്ചിരുന്നു. ജില്ലാ പഞ്ചായത്ത് പ്രസിഡന്റിന്റെ വിമർശനം ചർച്ചയായതിന് പിന്നാലെ ചൊവ്വാഴ്ചയാണ് എഡിഎമ്മിനെ മരിച്ച നിലയിൽ കണ്ടെത്തിയത്. 

തിങ്കളാഴ്ച രാത്രി നാട്ടിലേക്ക് തിരിക്കുമെന്നാണ് എഡിഎം വീട്ടുകാരോട് പറഞ്ഞത്. അതനുസരിച്ച് നവീൻ ബാബുവിനെ വീട്ടിലേക്ക് കൂട്ടിക്കൊണ്ടുപോകാൻ ഭാര്യ ചൊവ്വാഴ്ച രാവിലെ ചെങ്ങന്നൂർ റെയിൽവേ സ്‌റ്റേഷനിൽ എത്തിയിരുന്നു. എന്നാൽ പുലർച്ചെയുള്ള ട്രെയിനിൽ നവീൻ ബാബുവിനെ കാണാത്തതിനെ തുടർന്ന് ബന്ധുക്കൾ അറിയിച്ചതനുസരിച്ച് സമീപത്തുള്ളവർ വീട്ടിൽ പരിശോധന നടത്തിയപ്പോഴാണ് എഡിഎമ്മിനെ മരിച്ച നിലയിൽ കണ്ടെത്തിയത്. നേരത്തെ കാസർകോട് എഡിഎമ്മായിരുന്ന നവീൻ ബാബു ലോക്‌സഭാ തിരഞ്ഞെടുപ്പ് കാലത്താണ് കണ്ണൂരിലേക്ക് എത്തിയത്.

പത്തനംതിട്ട മലയാലപ്പുഴ സ്വദേശിയാണ് മരിച്ച നവീൻ ബാബു. വിരമിക്കാൻ എട്ട് മാസം മാത്രം ബാക്കി നിൽക്കെയാണ് നവീൻ ബാബുവിന്റെ മരണം. കോന്നി തഹസിൽദാർ മഞ്ജുവാണ് നവീൻ ബാബുവിന്റെ ഭാര്യ. 

Read More

• എസ്.അരുൺകുമാർ നമ്പൂതിരി ശബരിമല മേൽശാന്തി, വാസുദേവൻ നമ്പൂതിരി മാളികപ്പുറം മേൽശാന്തി
• പാലക്കാട് പി.സരിൻ ഇടത് സ്വതന്ത്ര സ്ഥാനാർത്ഥിയായേക്കും; വന്നാൽ ചേർത്തു പിടിക്കുമെന്ന് സിപിഎം
• അപകടം സംഭവിച്ചാല്‍ ആദ്യ മണിക്കൂറുകള്‍ പ്രധാനം; സമഗ്ര ട്രോമ കെയര്‍ സംവിധാനം എല്ലാ ജില്ലകളിലേക്കുമെന്ന് മന്ത്രി
• ദിവ്യയുടെ പെരുമാറ്റം അപക്വം; സിപിഎം പത്തനംതിട്ട ജില്ലാ കമ്മറ്റി