Weekly Horoscope Oct 12-Oct 18: സമ്പൂർണ വാരഫലം, അശ്വതി മുതൽ രേവതിവരെ

ആദിത്യൻ കന്നി - തുലാം രാശികളിലായി സഞ്ചരിക്കുന്നു. ഒക്ടോബർ 17 ന്/കന്നി 31 ന്  വെള്ളിയാഴ്ച ഉച്ചതിരിഞ്ഞാണ് ആദിത്യൻ്റെ തുലാസംക്രമം. ചിത്തിര ഞാറ്റുവേലക്കാലമാണ്. ചന്ദ്രൻ കറുത്ത പക്ഷത്തിൽ ഷഷ്ഠി മുതൽ ദ്വാദശി വരെ തിഥികളിൽ സഞ്ചരിക്കുന്നു. മകയിരം മുതൽ പൂരം വരെ നക്ഷത്രങ്ങളിലൂടെയും കടന്നുപോകുകയാണ്.

വ്യാഴം രാശിമാറുന്നു എന്നതാണ് ഈ വാരത്തിലെ മുഖ്യസംഭവം. ഒക്ടോബർ 18 ശനിയാഴ്ച (തുലാം ഒന്നിന്) രാത്രി 7:47ന് വ്യാഴം കർക്കടകം രാശിയിൽ പ്രവേശിക്കുന്നു. വ്യാഴത്തിൻ്റെ അതിചാരമാണിത്. ഡിസംബർ 5 വരെ വ്യാഴം കർക്കടകം രാശിയിൽ തുടരും. ശനി മീനം രാശിയിൽ പൂരൂരുട്ടാതിയിൽ വക്രസഞ്ചാരത്തിലാണ്. രാഹു കുംഭം രാശിയിൽ പൂരൂരുട്ടാതിയിലും, കേതു കന്നിയിൽ പൂരത്തിലും പിൻഗതി തുടരുന്നു. ചൊവ്വ തുലാം രാശിയിൽ ചോതി നാളിലാണ്. ബുധനും തുലാത്തിലുണ്ട്. ശുക്രൻ നീചരാശിയായ കന്നിയിലാണ്. 

ഈ ഗ്രഹസ്ഥിതിയെ അവലംബിച്ച് അശ്വതി മുതൽ രേവതി വരെയുള്ള നാളുകളിൽ ജനിച്ചവരുടെ സമ്പൂർണ്ണ വാരഫലം അപഗ്രഥിക്കുന്നു.

Read More: കന്നി മാസത്തെ സമ്പൂർണ നക്ഷത്രഫലം, അശ്വതി മുതൽ രേവതി വരെ

അശ്വതി

വാരാദ്യദിവസങ്ങളിൽ ഉന്മേഷമുണ്ടാവും. തീരുമാനങ്ങൾ ബുദ്ധിപൂർവ്വം കൈക്കൊള്ളും. കാര്യങ്ങളുടെ സൂക്ഷ്മമായിട്ടുള്ള ചിത്രം മനസ്സിലുദിക്കും. സുഹൃൽബന്ധം സന്തോഷത്തിന് കാരണമാകുന്നതാണ്. തീരുമാനിച്ചവ പ്രാവർത്തികമാക്കുന്നതിൽ ചില തടസ്സങ്ങൾ ഉയരുന്നതാണ്. ആറാമെടത്ത് ശുക്രൻ സഞ്ചരിക്കുകയാൽ ദേഹസുഖം കുറയുവാനിടയുണ്ട്. സ്ത്രീകളുടെ അനിഷ്ടം നേടാം. ഇഷ്ടവസ്തുക്കൾ വാങ്ങാൻ പണം തികയാതെ വരുന്നതാണ്. പകരക്കാരെ ചുമതലകൾ ഏല്പിക്കുമ്പോൾ കരുതൽ വേണം. ചന്ദ്രന് കേതുബന്ധം വരികയാൽ വെള്ളി, ശനി ദിവസങ്ങളിൽ സ്വാസ്ഥ്യം കുറയുന്നതാണ്.

ഭരണി

നക്ഷത്രാധിപനായ ശുക്രന് നീചം ഭവിച്ചിരിക്കുന്നതും അനിഷ്ടഭാവമായ ആറാമെടത്തിൽ സഞ്ചരിക്കുന്നതും അനുകൂലമല്ല. ആത്മവിശ്വാസം കുറയാം. തെറ്റായ തീരുമാനങ്ങൾ കൈക്കൊള്ളാനിടയുണ്ട്. കരുതൽ വേണം. ഔദ്യോഗികമായ  തിരക്കേറുന്ന കാലമാണ്. സഹപ്രവർത്തകൻ അവധിയിൽ പ്രവേശിച്ചതിനാൽ ആ കടമ കൂടി ഏറ്റെടുക്കേണ്ടിവരും. അപ്രസക്ത കാര്യങ്ങളെക്കുറിച്ച് വെറുതെ ചിന്തിച്ചു കൂട്ടും. ചിലരുടെ നല്ലവാക്കുകൾ മനസ്സിൽ ഊർജ്ജം നിറയ്ക്കും. ഗാർഹസ്ഥ്യം സാമാന്യം തൃപ്തികരമായിരിക്കും. വാരമദ്ധ്യത്തിലെ ദിവസങ്ങൾക്ക് കൂടുതൽ ഗുണം പ്രതീക്ഷിക്കാം.

കാർത്തിക

സമ്മിശ്രാനുഭവങ്ങൾ വന്നെത്തുന്നതാണ്. പ്രവൃത്തിരംഗത്ത് ചുമതലകളേറുന്നതാണ്. സ്വകാര്യ സ്ഥാപനത്തിൽ പദവി ഉയരാനിടയുണ്ട്. ബിസിനസ്സ് വളർച്ചയുടെ പാതയിലാണെന്നത് ആശ്വാസം നൽകും. വായ്പക്കുള്ള അപേക്ഷയിൽ ഫലമുണ്ടാവും. പുതിയ ജോലിക്കാരെ നിയമിക്കും. രാഷ്ട്രീയരംഗത്ത് മുന്നേറാൻ തടസ്സങ്ങളനുഭവപ്പെടും. ഇടവക്കൂറുകാർക്ക് പ്രണയാനുഭവങ്ങൾ ഭംഗപ്പെടാം. ബന്ധുക്കളുടെ പ്രശ്നങ്ങളിൽ ഇടപെടുന്നത് കരുതലോടെ വേണം. സിവിൽ വ്യവഹാരം  അവസാനിപ്പിക്കാനുള്ള ശ്രമം നീളാം. ഞായർ, തിങ്കൾ, വെള്ളി ദിവസങ്ങൾക്ക് മേന്മ കുറയുന്നതാണ്.

Also Read: ഈ ആഴ്‌ച നിങ്ങൾക്കെങ്ങനെ?

രോഹിണി

നക്ഷത്രനാഥനായ ചന്ദ്രൻ്റെ പരിക്ഷീണതയാൽ മനക്ലേശം, ഉന്മേഷരാഹിത്യം എന്നിവ അനുഭവപ്പെടുന്നതാണ്. തൊഴിലിടത്തിൻ ഇല്ലാത്ത വിരോധികൾ ഉള്ളതായി ഭാവന ചെയ്യും. അവർക്കുനേരെ നിഴൽയുദ്ധം നടത്തുന്നതാണ്. സഹോദരാനുകൂല്യം ഉണ്ടാവും. സഹായം ലഭിച്ചേക്കും. ബന്ധുക്കളെ സന്ദർശിക്കുന്നതാണ്. വായ്പകളുടെ അടവ് മുടങ്ങുകയില്ല. കലാപ്രവർത്തനത്തിന് ക്ഷീണം വരും. അവസരങ്ങൾ പ്രതീക്ഷിക്കും. ഗവേഷകർക്ക് വസ്തുതാസമാഹരണത്തിന് യാത്രകൾ വേണ്ടിവരുന്നതാണ്. ബുധൻ, വ്യാഴം ദിവസങ്ങൾക്ക് ശുഭത്വമേറും.

മകയിരം

മനസ്സിൻ്റെ ഉന്മേഷം കുറയുന്നതായി അനുഭവപ്പെടും. ജോലിഭാരം കൂടാനിടയുണ്ട്. പുതിയ കാര്യങ്ങൾ പഠിക്കാൻ ആഗ്രഹിക്കും. എന്നാൽ അതിനായി ശ്രമിക്കുകയില്ല. കലഹബുദ്ധി നിയന്ത്രിക്കപ്പെടണം. സ്വാഭിപ്രായം വെട്ടിത്തുറന്നു പറയുന്നത് എതിർസ്വരം ഉയരുന്നതിന് കാരണമാകും. നവസംരംഭത്തിന് രജിസ്ട്രേഷൻ കിട്ടുന്നതാണ്. തന്മൂലം കൂടുതൽ പ്രവർത്തന നിരതരാവേണ്ടതായി വന്നേക്കും. കാമുകീ കാമുകന്മാർക്കിടയിൽ 'സൗന്ദര്യപ്പിണക്കം' കൂടുന്നതാണ്. വിദ്യാർത്ഥികൾ കലാകായിക മത്സരങ്ങളിൽ പരിശീലനമാരംഭിക്കും. ചൊവ്വ, ബുധൻ ദിവസങ്ങൾക്ക് മേന്മ കുറയുന്നതാണ്.

തിരുവാതിര

ഉദ്യോഗസ്ഥർക്ക് മടുപ്പനുഭവപ്പെടും. ക്രിയാശക്തി നിർജീവമായേക്കും.ഒന്നും ചെയ്യാനില്ലെന്ന തോന്നൽ ശക്തമാകുന്നതാണ്. ചിന്തകൾ കാടുകയറും.സുഹൃത്തുക്കളുമൊത്ത് സമയം ചെലവഴിക്കാൻ കഴിയുന്നതിനാൽ മനസ്സന്തോഷം ഭവിക്കും. അപ്രതീക്ഷിത സഹായം കിട്ടുന്നതാണ്. മകനെച്ചൊല്ലി ഉത്കണ്ഠകൾ തുടരും. നാലിലെ ശുക്രൻ പ്രേമാഭിലാഷം നിറയ്ക്കുന്നതാണ്. കാമുകീ കാമുകന്മാർക്കിടയിൽ ദൃഢബന്ധം സംജാതമാകും. ബിസിനസ്സിൽ ലാഭം കുറയില്ല. പുതിയ ശാഖ തുടങ്ങാനുള്ള പദ്ധതികൾ പുരോഗമിക്കാം.

പുണർതം

ഔദോഗികമായി പ്രധാനപ്പെട്ട തീരുമാനങ്ങളുണ്ടാവും. കാര്യനിർവഹണത്തിന് അധികം ഊർജ്ജം ചെലവഴിക്കപ്പെടും. സാങ്കേതികമായ അറിവുകൾ മനസ്സിലാക്കുന്നതിൽ ആർജ്ജവം പുലർത്തും. വിമർശകരെ അവഗണിക്കുകയാവും ഉചിതം. ബുധനും ചൊവ്വയും പഞ്ചമ ഭാവത്തിൽ യോഗം ചെയ്യുന്നത് മാനസികക്ലേശത്തിന് കാരണമാകാം.ചിന്തകൾക്ക് സമന്വയം കുറയും. പ്രണയാനുഭവങ്ങൾ പുഷ്കലമായേക്കും. ഗൃഹനവീകരണം തുടരപ്പെടുന്നതാണ്. വാഹനം വാങ്ങുന്നതിൽ തടസ്സം ഭവിക്കാം. വ്യാപാരത്തിൽ ലാഭം ശോഷിക്കില്ല. വാരാദ്യ ദിവസങ്ങളിൽ അലച്ചിലുണ്ടാവും.

പൂയം

നക്ഷത്രാധിപനായ ശനി വക്രഗതി തുടരുകയാൽ കാര്യങ്ങൾ അല്പം മന്ദഗതിയിലാവും. പുതിയ സംരംഭങ്ങൾ തുടങ്ങരുത്. സാമ്പത്തിക കാര്യങ്ങൾ മോശമാവില്ല. പൂജയും വഴിപാടും തുടരും. ന്യായം പറഞ്ഞ് ചിലതൊക്കെ നേടിയെടുക്കേണ്ട സ്ഥിതി ഭവിച്ചേക്കാം. പ്രതീക്ഷിച്ച വ്യക്തികൾ സഹായിക്കില്ല. സ്ത്രീകളിൽ നിന്നും പിന്തുണയും അനുഭാവവും ഉണ്ടാവുന്നതാണ്. പണയ സ്വർണം വീണ്ടെടുക്കാനാവും. പഠനത്തിൽ ഏകാഗ്രത കുറയില്ല. മത്സരങ്ങൾക്ക് തയ്യാറെടുക്കും. യാത്രകൾ വേണ്ടി വരാം. ഗൃഹത്തിൽ സമാധാനം കുറയും. ഞായർ, ബുധൻ, വ്യാഴം ഉത്തമഫലങ്ങൾ.

ആയില്യം

നക്ഷത്രാധിപനായ ബുധൻ കേന്ദ്രഭാവത്തിലിരിക്കയാൽ കാര്യവിജയം പ്രതീക്ഷിക്കാം. പഠനത്തിൽ മുന്നേറാനാവും. ഏകോപനം സുഗമമായി നിർവഹിക്കും. എന്നാലും ശത്രുക്കളുടെ പ്രവർത്തനത്തിൽ കരുതൽ വേണം. രോഗപീഢിതർക്ക് ചികിൽസാമാറ്റം ഫലപ്രദമാവും. നിശ്ചയദാർഢ്യം ലക്ഷ്യപ്രാപ്തിയെ വേഗത്തിലാക്കും. സഹോദരർക്ക് സഹായം നൽകും. ബിസിനസ്സിനായി അപേക്ഷിച്ച വായ്പ കരഗതമാവുന്നതാണ്. സുഹൃത്തുക്കൾക്കായി സന്ധിസംഭാഷണം നടത്തും. സാമൂഹിക മാധ്യമങ്ങളിൽ സജീവമാവും. ഭാവികാര്യങ്ങളെക്കുറിച്ച് ചിന്തിക്കും. പ്രണയം പുഷ്ടിപ്പെടുന്നതാണ്.

Also Read: ചൊവ്വ തുലാം രാശിയിൽ, അശ്വതി മുതൽ രേവതിവരെ

മകം

ചെയ്യുന്ന കർമ്മങ്ങൾക്ക് തൊഴിലധിപന്മാരിൽ നിന്നും ആദരം ലഭിക്കുന്നതാണ്. വാക്കുകൊടുത്ത കാര്യങ്ങൾ കൃത്യമായി പൂർത്തിയാക്കും. സമയനിഷ്ഠ പുലർത്തും. ഇഷ്ടജനങ്ങളുടെ സാമീപ്യം സന്തോഷമുണ്ടാക്കുന്നതാണ്. സുഖഭക്ഷണയോഗമുണ്ട്. ബിസിനസ്സിൽ നിന്നുള്ള വരവ് മോശമാവില്ല. എന്നാൽ ബുധനും വ്യാഴനും ചെലവുകൂടിയ ദിവസങ്ങളായിരിക്കും. അനാവശ്യമായ ബാഹ്യ ഇടപെടലുകൾ ക്ഷോഭത്തിനിടവരുത്താം. മനസ്സ് ചഞ്ചലമാവുന്നതാണ്.  വെള്ളി, ശനി ദിവസങ്ങളിൽ സ്വാസ്ഥ്യം പ്രതീക്ഷിക്കാം. ഗൃഹസൗഖ്യമുണ്ടാവും.

പൂരം

സമ്മിശ്രമായ ഫലങ്ങളുണ്ടാവും. ആഴ്ചയുടെ തുടക്കത്തിൽ സന്തോഷാനുഭവങ്ങൾ വർദ്ധിക്കും. കർമ്മമേഖലയിൽ നിന്നും തൃപ്തിയുണ്ടാവും.  ഗ്രൂപ്പ് ചർച്ചകളിൽ കൃത്യമായ നിലപാടുകൾ കൈക്കൊള്ളുന്നതായിരിക്കും. ബുധൻ, വ്യാഴം ദിവസങ്ങളിൽ അലച്ചിലുണ്ടാവും. അപ്രസക്ത കാര്യങ്ങളാൽ മനക്ലേശം ഭവിക്കുന്നതാണ്. സഹപ്രവർത്തകർ സഹകരിച്ചേക്കില്ല.  മറ്റു ദിവസങ്ങളിൽ മൃഷ്ടാന്നഭോജനം, ന്യായമായ വിശ്രമം, പാരിതോഷിക ലബ്ധി ഇവയുണ്ടാവും. ധനാഗമത്തിന് സാധ്യത കാണുന്നു. അനുരാഗികളുടെ പിണക്കം തീരാം. ഇ. എൻ. ടി വിഭാഗത്തിൽ വരുന്ന രോഗങ്ങൾ ഉപദ്രവിക്കാം.

ഉത്രം

ദിവസവേതനക്കാർക്ക് എന്നും ജോലി ലഭിച്ചേക്കും. കരാർപണിയുടെ കുടിശികയിൽ ഒരുഭാഗം കിട്ടാനിടയുണ്ട്. കുടുംബത്തിൽ മംഗളകർമ്മങ്ങൾ നടക്കും.  ജീവകാരുണ്യത്തിന് നേരം കണ്ടെത്തുന്നതാണ്. കൃതാർത്ഥത തോന്നുന്ന സന്ദർഭങ്ങളുണ്ടാവും. പാരമ്പര്യതൊഴിലിൽ നവീകരണം കൊണ്ടുവരാൻ യത്നിക്കും. വിദ്യാർത്ഥികൾക്ക് ഏകാഗ്രതയുണ്ടാവും.  കലാപരിശീലനം പുരോഗമിക്കും. സംഘടനാ പ്രവർത്തനത്തോട് വിരക്തി തോന്നുന്നതാണ്.  ചിങ്ങക്കൂറുകാർക്ക് എല്ലാക്കാര്യങ്ങളിലും വലിയ പിന്തുണ ലഭിക്കും. കന്നിക്കൂറുകാർക്ക് സുഖാനുഭവങ്ങളുണ്ടാവും.

അത്തം

ന്യായമായ അഭിലാഷങ്ങൾ കൈവരുന്ന കാലമാണ്. പ്രവർത്തനങ്ങളിൽ അത്മവിശ്വാസം പ്രതിഫലിക്കും. പുതിയ കാര്യങ്ങൾ നടപ്പിലാക്കുന്നതിൽ അദ്ധ്വാനമേറിയാലും കാര്യവിജയം ഭവിക്കുന്നതാണ്. ധനാഗമം പുഷ്ടിപ്പെടും. വായ്പകളുടെ തിരിച്ചടവ് സുഗമമാവും. ശുക്രൻ ജന്മനക്ഷത്രത്തിലൂടെ കടന്നുപോവുകയാൽ ഭോഗസുഖം ഭവിക്കും. പ്രണയത്തിൽ തടസ്സങ്ങളുണ്ടാവില്ല. സൗഹൃദം ഊഷ്മളമാവും. പണ്ഡിതോചിതമായി സംസാരിക്കും. ചർച്ചകളിൽ തിളങ്ങാൻ കഴിയുന്നതാണ്. ഗ്രന്ഥപാരായണം, കലാസ്വാദനം, പാചക പരീക്ഷണം എന്നിവക്കെല്ലാം നേരം കണ്ടെത്തും.

ചിത്തിര

പ്രതീക്ഷിച്ച നേട്ടങ്ങൾ കരഗതമാവുന്നതാണ്. വിശ്വസിച്ചേല്പിച്ച കാര്യങ്ങൾ അഭംഗുരമായി നടത്താനാവും. പുതിയവയോട് ഭ്രമം തോന്നുമ്പോഴും പാരമ്പര്യത്തെ തള്ളിപ്പറയുകയില്ല. തീർത്ഥാടനം, ദൈവിക സമർപ്പണങ്ങൾ എന്നിവ നടക്കാം. ചെയ്തുപോരുന്ന തൊഴിലിൽ ലാഭം കുറയില്ല. നവീകരിക്കാൻ കൂടിയാലോചനകൾ ഉണ്ടാവും. സർക്കാരിൽ നിന്നും ലഭിക്കേണ്ട രജിസ്ട്രേഷൻ വൈകുന്നതാണ്. കുടുംബത്തിൻ്റെ ആവശ്യങ്ങൾ നിർവഹിക്കാൻ താമസമുണ്ടാവില്ല. പൊതുപ്രവർത്തകർ എതിർപ്പുകളെ അവഗണിക്കും. സുഹൃത്തുക്കൾക്കൊപ്പം ഉല്ലസിക്കാൻ നേരം കണ്ടെത്തുന്നതാണ്.

ചോതി

വാരാദ്യദിവസങ്ങളിൽ മനക്ലേശമുണ്ടാവും. അലച്ചിലിന് സാധ്യതയുണ്ട്.  ചൊവ്വ മുതൽ അനുകൂല ഫലങ്ങൾ പ്രതീക്ഷിക്കാം. പുത്തൻ സൗഹൃദങ്ങൾ ഉണ്ടാവുന്നതാണ്. പ്രണയികൾക്ക് സന്തോഷ സന്ദർഭങ്ങൾ സംജാതമാകും. പഠനത്തിൽ ഉത്സാഹമേറുന്നതാണ്. പ്രോജക്ടുകൾ അംഗീകരിക്കപ്പെടും. തൊഴിലിടത്തിൽ സ്വാതന്ത്ര്യം അനുഭവിക്കും. ഒപ്പമുള്ളവരുടെ സഹകരണം തൃപ്തികരമായിരിക്കും. രോഗപീഡിതർക്ക് ചികിൽസാമാറ്റം ഫലവത്താകും. ജന്മനക്ഷത്രത്തിൽ ചൊവ്വ സഞ്ചരിക്കുന്നതിനാൽ ക്ഷോഭമുണ്ടാവും. വാഹനം ഉപയോഗിക്കുന്നതിൽ ജാഗ്രത കുറയരുത്.

വിശാഖം

വാരാദ്യ ദിവസങ്ങളിൽ അഷ്ടമരാശിക്കൂറ് ആകയാൽ കാര്യവിളംബത്തിന് സാധ്യത കാണുന്നു. കർമ്മരംഗത്ത് തിരിച്ചടികൾ വരാം. തെറ്റായ തീരുമാനങ്ങൾ കൈക്കൊള്ളും. ബുധനാഴ്ച മുതൽ അനുകൂലമായ സാഹചര്യം ഉരുവാകുന്നതാണ്.  ധനതടസ്സം മാറിക്കിട്ടും. ബിസിനസ്സിൽ ഉണർവ്വുണ്ടാവും. ഉപഭോക്താക്കളെ ആകർഷിക്കുവാൻ പരസ്യങ്ങളുടെ സാധ്യത പ്രയോജനപ്പെടുത്തുന്നതാണ്. പ്രണയികൾക്കിടയിൽ ഐക്യം ദൃഢമാകും.  നിലച്ചുപോയ  ഗൃഹനിർമ്മാണം പുനരാരംഭിക്കും. നിയമ പ്രശ്നങ്ങളിൽ പ്രായോഗികമായ ഉപദേശം കിട്ടുന്നതാണ്.

അനിഴം

തൊഴിലിൽ ചാഞ്ചല്യമുണ്ടാവും. മടുപ്പനുഭവപ്പെടും. ചിലരുടെ ഉപദേശം തെറ്റായ വഴിയിലേക്ക് നയിച്ചതായി മനസ്സിലാക്കും. ആദ്യരണ്ടുമൂന്നു ദിവസങ്ങൾ ഇതൊക്കെയാവും അവസ്ഥ. ബുധനാഴ്ച മുതൽ കൂടുതൽ സ്വസ്ഥത പ്രതീക്ഷിക്കാം. പഠനത്തിൽ ഏകാഗ്രത പുലർത്തും. വസ്തുവിൽപ്പനയിൽ ചില അനുകൂല പ്രതികരണങ്ങൾ കിട്ടുന്നതാണ്. വായ്പയുടെ തിരച്ചടവിൽ മുടക്കമുണ്ടാവില്ല. കുടുംബത്തിൻ്റെ ആവശ്യങ്ങൾ മനസ്സിലാക്കി പ്രവർത്തിക്കും.  വിട്ടുവീഴ്ചയുടെ സൗഖ്യം തിരിച്ചറിയും. വിദേശത്തുള്ളവർക്ക് അവധി അപേക്ഷ അനുവദിച്ചുകിട്ടാം.

തൃക്കേട്ട

കാര്യസാധ്യത്തിന് കൂടുതൽ പരിശ്രമം ആവശ്യമായി വരും. പന്ത്രണ്ടിലെ ബുധകുജയോഗം ചെലവധികരിപ്പിക്കും.  തൊഴിലിടത്തിൽ പ്രവർത്തന സ്വാതന്ത്ര്യം കുറയാം. ഉദ്യോഗസ്ഥന്മാർക്ക് ദുർഘട പ്രശ്നങ്ങൾക്ക് പോംവഴി കണ്ടെത്തേണ്ടി വരും. വസ്തുവിന് വേലികെട്ടുക, കെട്ടിട നികുതി അടയ്ക്കുക എന്നീവിധത്തിൽ ചെലവുണ്ടാവും. വാരമദ്ധ്യം മുതൽ സമ്മർദ്ദങ്ങൾ കുറയുന്നതാണ്. ശുക്രനും ആദിത്യനും പതിനൊന്നിലാകയാൽ പിതാവിൽ നിന്നും ധനം കൈവരും. ഭോഗസുഖം ഭവിക്കുന്നതാണ്. കായിക പരിശീലനം, വ്യായാമം ഇത്യാദികൾക്ക് നേരം കണ്ടെത്തും. കുടുംബകാര്യങ്ങളിൽ സ്നേഹോദാരത്വം കൈവരുന്നതാണ്.

Also Read: വ്യാഴം ഉച്ചരാശിയിലേക്ക്; അശ്വതി മുതൽ രേവതി വരെ

മൂലം

സന്താനങ്ങളാൽ സന്തോഷം ഭവിക്കുന്നതാണ്. പുതിയ തുടക്കങ്ങൾക്ക് സാഹചര്യം അനുകൂലമായി വരും. ഭൂമിവിൽപ്പനയ്ക്ക് അഡ്വാൻസ് വാങ്ങിക്കുന്നതാണ്. വിദ്യാഭ്യാസത്തിൽ പുരോഗതി ദൃശ്യമാകും. സ്വകാര്യ സ്ഥാപനത്തിൽ ജോലിചെയ്യുന്നവർക്ക് പ്രൊമോഷനോ വേതനവർദ്ധനവോ കിട്ടുന്നതാണ്. സംഘടനയ്ക്കുള്ളിൽഅനുകൂലമായ അഭിപ്രായം രൂപപ്പെടും. പ്രണയികൾക്ക് കുടുംബത്തിൻ്റെ പ്രതികൂലതയെ നേരിടേണ്ടി വന്നേക്കും.  മതാചാരപ്രകാരമുള്ള കർമ്മങ്ങൾ നിർവഹിക്കാൻ നേരം കണ്ടെത്തുന്നതാണ്. ബുധനും വ്യാഴനും ഉത്തമ ദിവസങ്ങളാവില്ല.

പൂരാടം

സർക്കാരിൽ നിന്നും കിട്ടേണ്ട മുൻകാല ആനുകൂല്യങ്ങൾ കിട്ടാനിടയുണ്ട്. ആശയവിനിമയ ശേഷി മെച്ചപ്പെടുന്നതാണ്. പുതുമയോട് കൂറുപുലർത്തുമ്പോഴും പഴമയെ തള്ളിപ്പറയുകയില്ല. വസ്തുവിൽ നിന്നും ആദായം ലഭിക്കുന്നതാണ്. വീടിന് വാടകക്കാരെ കിട്ടാം. ചർച്ചകളിൽ സ്വാഭിപ്രായത്തിന് കൈയ്യടി പ്രതീക്ഷിക്കാം. കലാപരിശീലനത്തിന് കൂടുതൽ നേരം കണ്ടെത്തുന്നതായിരിക്കും. പിതാവിൻ്റെ ആരോഗ്യസ്ഥിതി തൃപ്തികരമാവും. ബിസിനസ്സിൽ നിന്നുള്ള സാമ്പത്തികം വർദ്ധിക്കുന്നതാണ്. വിവാഹകാര്യത്തിൽ ഉത്സാഹം കുറയാം. തുറന്നുള്ള അഭിപ്രായം പറയാത്തതിനാൽ മാതാപിതാക്കൾക്ക് ആശങ്കയുയരും.

ഉത്രാടം

കരുതിയതു പോലെ കാര്യനിർവഹണം എളുപ്പമാകും. എതിർപ്പുകളിൽ തളരാത്ത മനശ്ശക്തി പ്രകടിപ്പിക്കും. പുതുസംരംഭങ്ങൾ ആരംഭിക്കുമ്പോൾ സാമ്പത്തിക ജാഗ്രത അനിവാര്യമാണെന്നത് വിസ്മരിക്കരുത്. ബാങ്ക് വഴി ലോൺ ലഭിച്ചേക്കാം. കലാകാരന്മാർക്ക് പ്രതീക്ഷിച്ച അവസരങ്ങൾ കിട്ടുന്നതാണ്. ഓൺലൈൻ ബിസിനസ്സിൽ നേട്ടങ്ങൾ കുറയില്ല. വിദ്യാർത്ഥികളുടെ ഏകാഗ്രത ഭംഗപ്പെടാം. സുഹൃത്തുക്കൾ തമ്മിലുള്ള പ്രശ്നങ്ങളിൽ ഇടപെട്ട് സന്ധിയുണ്ടാക്കും. ആരോഗ്യകാര്യത്തിൽ അലംഭാവമരുത്. വാരമദ്ധ്യത്തിലെ ദിവസങ്ങൾക്ക് ശുഭത്വം കുറയാം.

തിരുവോണം

തീരുമാനങ്ങൾ സുചിന്തിതമായിരിക്കണം. സ്വാശ്രയ വ്യാപാരത്തിൻ്റെ പുരോഗതിക്കായി പരസ്യങ്ങളെ ആശ്രയിക്കേണ്ടി വന്നേക്കാം. പഴയ ഓർമ്മകൾ മനസ്സിലിടം പിടിക്കും. അവ കരുണവും സന്തോഷവും സൃഷ്ടിക്കുന്നതാണ്. ധനപരമായ പിരിമുറുക്കത്തിന് അയവുണ്ടാവും. എതിർപ്പുകളെ തൃണവൽഗണിക്കും. സത്യസന്ധതയും ആത്മാർത്ഥതയും മേലധികാരികളുടെ പ്രശംസ നേടും. ഇൻഷ്വറൻസ് പുതുക്കുക, കരം ഒടുക്കുക  ഇവയ്ക്ക് നേരം കണ്ടെത്തുന്നതാണ്. ആസന്നമായ തീർത്ഥാടനത്തിന്  തയ്യാറെടുപ്പുകൾ തുടരും. വാരാന്ത്യദിവസങ്ങളിൽ കൂടുതൽ കരുതലുണ്ടാവണം.

അവിട്ടം

നിസ്സാര കാര്യങ്ങൾ മനസ്സിനെ വിഷമിപ്പിക്കാം. എന്നാൽ വലിയ കാര്യങ്ങൾ ഉത്തരവാദിത്വബോധത്തോടെ നിർവഹിക്കുകയും ചെയ്യും. തൊഴിലിടത്തിൽ ശത്രുക്കളുണ്ടെന്ന് വിചാരിക്കും. വാസ്തവം അതാകണമെന്നില്ല. മാനസിക സംഘർഷം വർദ്ധിക്കാം. കുടുംബകാര്യങ്ങളിൽ വിട്ടുവീഴ്ച ചെയ്യേണ്ടതുണ്ട്. നിർബന്ധശീലം കൂടുതൽ കുഴപ്പങ്ങൾ വരുത്താം. ബന്ധുക്കളുടെ സഹകരണം അവസരോചിതമാവും. ഊഹക്കച്ചവടത്തിൽ കരുതൽ വേണ്ടതുണ്ട്. സാമൂഹിക മാധ്യമങ്ങൾ കാണുന്നതിന് കൂടുതൽ നേരം ചെലവഴിക്കും. ഗവേഷകർക്ക് ഉപാദാനങ്ങൾ സമാഹരിക്കുവാൻ യാത്രകൾ വേണ്ടിവരുന്നതാണ്.

ചതയം

വിവാദങ്ങളിൽ നിന്നും, കലഹങ്ങളിൽ നിന്നും പിൻവാങ്ങുന്നത് നന്നായിരിക്കും. വ്യവഹാരം നീളുന്നതിൽ സങ്കടമുണ്ടാവും. അപ്രതീക്ഷിത തടസ്സങ്ങൾ മാനസികോർജ്ജത്തെ ബാധിച്ചേക്കാം. രണ്ടാം നക്ഷത്രത്തിൽ ശനിയും രാഹുവും സഞ്ചരിക്കുകയാൽ ധനാഗമം തടസ്സപ്പെടാനിടയുണ്ട്. മനപ്പൂർവ്വമല്ലാതെ നുണപറയേണ്ടി വരുന്നതാണ്. ഭാവനാത്മകമായ കാര്യങ്ങളിൽ വളർച്ച പ്രതീക്ഷിക്കാം. രോഗ ക്ലേശിതർക്ക് ചികിൽസാമാറ്റം ഗുണകരമാവും. മകളുടെ ജോലിസ്ഥലത്ത് താമസിക്കാൻ സമ്മർദ്ദം വന്നേക്കും. പ്രണയികൾക്കും ദമ്പതികൾക്കും തൃപ്തികരമായ കാലമാണ്.

പൂരൂരുട്ടാതി

ജന്മനക്ഷത്രത്തിൽ ശനിയും രാഹുവും സഞ്ചരിക്കുകയാൽ മനോവാക്കർമ്മങ്ങളിൽ ജാഗ്രതയുണ്ടാവണം. ഇഷ്ടമില്ലെങ്കിലും പരാശ്രയത്വം വേണ്ടിവരും. ആലസ്യം പിടികൂടുന്നതാണ്. കൃത്യനിഷ്ഠ പാലിക്കാനാവാതെ വിഷമിക്കും. സുഹൃത്തുക്കളോട് എല്ലാം തുറന്നുപറയുന്നത് കരുതലോടെ വേണം. വ്യാപാരത്തിൽ നിന്നും അല്പലാഭം  പ്രതീക്ഷിക്കാം. ദിവസവേതനം മുടങ്ങില്ല. കുടിശികത്തുക ഭാഗികമായി ലഭിച്ചേക്കാം. വിദ്യാർത്ഥികൾക്ക് പാരിതോഷികം കിട്ടാനിടയുണ്ട്. ജീവിതശൈലീ രോഗങ്ങൾക്കുള്ള മരുന്നുകൾ മുടക്കരുത്. ദൈവീക സമർപ്പണങ്ങൾ  പിന്നീടത്തേക്കാക്കും.

ഉത്രട്ടാതി

കഠിനാദ്ധ്വാനത്തിലൂടെ മാത്രമേ ചെറിയ ലക്ഷ്യങ്ങൾ പോലും നേടുകയുള്ളൂ എന്ന സ്ഥിതിയുണ്ടാവും. പുതിയ സംരംഭങ്ങൾ തുടങ്ങുന്നതിന് മുൻപ് നിയമവശങ്ങൾ പരിശോധിക്കേണ്ടതുണ്ട്. കുടുംബാന്തരീക്ഷം അത്ര അനുകൂലമാവില്ല.  എതിർപ്പുകൾക്ക് ചെവികൊടുക്കേണ്ടി വന്നേക്കും. ഉത്തരവാദിത്വങ്ങൾ മടുപ്പിച്ചേക്കാം. ബുധാനുകൂല്യം ഉള്ളതിനാൽ പഠനത്തിന് സമയം കണ്ടെത്തും. സാഹിത്യപ്രവർത്തനത്തിന് അനുകൂലത സംജാതമായേക്കും. അഷ്ടമത്തിലെ ചൊവ്വ വീഴ്ച, മുറിവ് ഇവയ്ക്കു കാരണമാകാമെന്നതിനാൽ കരുതൽ വേണ്ടതുണ്ട്. ക്ഷേത്രാടനാദികൾ മാറ്റിവെക്കേണ്ടി വന്നേക്കും.

രേവതി

സമ്മിശ്ര ഫലങ്ങൾ പ്രതീക്ഷിക്കാവുന്ന ആഴ്ചയാണ്. ഉദ്യോഗസ്ഥർക്ക് ഫയലുകളിൽ നിന്നും ഫയലുകളിലേക്ക് നിരന്തരം ശ്രദ്ധചെലുത്തേണ്ടിവരുന്നതായിരിക്കും. സ്വകാര്യ സ്ഥാപനത്തിൽ ജോലി തേടുന്നവർ നിരാശപ്പെടില്ല. കടബാധ്യതകൾ പരിഹരിക്കാൻ വീണ്ടും കടം വാങ്ങുന്ന പ്രവണതക്ക് വിരാമമിടണം. മകൻ്റെ കൂട്ടുകെട്ടുകൾ നിരീക്ഷിക്കുന്നത് നന്നായിരിക്കും. പഠനസഹായ ഗ്രന്ഥങ്ങൾ വാങ്ങി നൽകുന്നത് ഗുണം ചെയ്യും. ഏറെ നാളുകൾക്കുശേഷം സഹോദരരെ കാണാനവസരം സംജാതമാകുന്നതാണ്. ദൈവീക വഴിപാടുകൾക്ക് സമയം കണ്ടെത്തും.

Read More: ഒക്ടോബർ മാസഫലം, അശ്വതി മുതൽ രേവതി വരെ