Jupiter Transit: വ്യാഴം ഉച്ചരാശിയിലേക്ക്; അശ്വതി മുതൽ രേവതി വരെ

Astrology Predictions for Jupiter Transit 2025: 2025 ഒക്ടോബർ 18 ന് / 1201 തുലാം 1 ന് വ്യാഴം ഉച്ചരാശിയായ കർക്കടകം രാശിയിലേക്ക് പ്രവേശിക്കുന്നു. ഗ്രഹങ്ങളിൽ ഈശ്വരതുല്യനാണ് വ്യാഴം (Jupiter). ബൃഹസ്പതി, ഗുരു, ആംഗിരസ്സ്, ദേവമന്ത്രി തുടങ്ങിയ പേരുകളിലും അറിയപ്പെടുന്നു. സാധാരണ രീതിയിൽ പന്ത്രണ്ടുരാശികളിൽ ഒരോന്നിലും വ്യാഴം ഒരുകൊല്ലം വീതം സഞ്ചരിക്കും. പന്ത്രണ്ടുവർഷം കൊണ്ട് രാശിചക്രഭ്രമണം  പൂർത്തീകരിക്കും. ഇതിനെ സാങ്കേതികമായി 'വ്യാഴവട്ടം' എന്നുപറയും. 

വ്യാഴത്തിൻ്റെ സ്വക്ഷേത്രം ധനു, മീനം രാശികൾ. ഒരു ഗ്രഹത്തിൻ്റെ ശക്തി മുഴുവൻ പ്രകടമാവുന്നത്  ഉച്ചക്ഷേത്രത്തിലൂടെ ( Exalted House) സഞ്ചരിക്കുമ്പോഴാണ്. കർക്കടകം രാശിയാണ് വ്യാഴത്തിൻ്റെ ഉച്ചരാശി. ഇപ്പോൾ മിഥുനം രാശിയിലാണ് വ്യാഴം.

തുലാം ഒന്നിന്/ഒക്ടോബർ പതിനെട്ടിന് കർക്കടകം രാശിയിൽ പ്രവേശിക്കുന്ന വ്യാഴം ചുരുങ്ങിയ കാലം (അമ്പതു ദിവസം) മാത്രമാണ്  ആ രാശിയിൽ സഞ്ചരിക്കുന്നത്. ഡിസംബർ 5 ന്/വൃശ്ചികം 19ന് വക്രഗതിയിൽ വീണ്ടും മിഥുനം രാശിയിൽ പ്രവേശിക്കും. നവംബർ 14/ തുലാം 28 മുതൽ വക്രഗതി അഥവാ തിരിച്ചുപോക്ക് തുടങ്ങുകയും ചെയ്യും. 

വ്യാഴത്തിൻ്റെ കർക്കടകം രാശിയിലേക്കുള്ള മാറ്റം പന്ത്രണ്ടുകൂറിൽ ജനിച്ചവരെ എങ്ങനെയൊക്കെ സ്വാധീനിക്കന്നു? ഗുണവും ദോഷവും ആർക്കൊക്കെയാണ്? ഈ അന്വേഷണം ആ വഴിക്കാണ് നീങ്ങുന്നത്.

Also Read: ചൊവ്വ തുലാം രാശിയിൽ, അശ്വതി മുതൽ രേവതിവരെ

മേടക്കൂറിന് (അശ്വതി, ഭരണി, കാർത്തിക ഒന്നാം പാദം)

അനിഷ്ടഭാവമായ മൂന്നാമെടത്തിലായിരുന്നു, കഴിഞ്ഞ അഞ്ചുമാസക്കാലമായി വ്യാഴം. ഇനി സാമാന്യമായി ഗുണം ലഭിക്കുന്ന നാലാം ഭാവത്തിൽ വ്യാഴം സഞ്ചരിക്കുന്നതാണ്. ഉച്ചരാശിയാകയാൽ ഗൃഹസുഖമുണ്ടാവും. പകുതിയിൽ നിന്നുപോയ കെട്ടിടം പണി പൂർത്തിയാക്കാനാവും. വസ്തുതർക്കങ്ങൾ പരിഹൃതമാകുന്നതാണ്. മനസ്സിനെ അലട്ടിയിരുന്ന ചില ദീർഘകാല പ്രശ്നങ്ങൾക്ക് പോംവഴി ലഭിക്കുന്നതാണ്. സുഹൃൽബന്ധം ദൃഢമാകും. പ്രണയകാര്യങ്ങളിലെ തടസ്സം നീങ്ങാം. പുതിയ വാഹനം വാങ്ങിക്കൂടായ്കയില്ല. കർമ്മമേഖലയിൽ സ്ഥാനോന്നതിക്ക് സാധ്യതയുണ്ട്.  സാമ്പത്തികമായ സമ്മർദങ്ങൾക്ക് അയവുണ്ടാവുന്നതായിരിക്കും. ബന്ധുത്വം ഗുണത്തിനായി വരാം. നവീന ആശയങ്ങളോ വിദ്യയോ ഭാഷയോ പഠിക്കാൻ വഴിതുറക്കപ്പെടും. അന്യദേശത്ത് കഴിവിനിണങ്ങുന്ന  അവസരങ്ങൾ കണ്ടെത്തും. ചെലവുകൾ നിയന്ത്രിക്കാൻ കഴിയുന്നതാണ്. എന്നാൽ സൽകർമ്മങ്ങൾ നിർവഹിക്കാൻ പണം തടസ്സമാവുകയുമില്ല. ദാമ്പത്യത്തിൽ സ്വൈരം ലഭിക്കാം. നിലപാടുകൾക്ക് സ്വീകാര്യത കൈവരുന്നകാലമാണ്. വ്യാഴം അഷ്ടമഭാവത്തിൽ ദൃഷ്ടി ചെയ്യുന്നതിനാൽ ചില അപ്രതീക്ഷിത തടസ്സങ്ങളേയും കൂടി അഭിമുഖീകരിക്കാൻ സാധ്യത കാണുന്നു.

ഇടവക്കൂറിന് (കാർത്തിക 2,3,4 പാദങ്ങൾ, രോഹിണി, മകയിരം 1,2 പാദങ്ങൾ)

അനുകൂല ഭാവമായ രണ്ടാമെടത്തിലായിരുന്നു കഴിഞ്ഞ അഞ്ചരമാസക്കാലമായി വ്യാഴം. ഇപ്പോൾ മൂന്നാമെടത്തേക്ക് മാറുന്നതിനാൽ സമ്മിശ്രഫലങ്ങളാവും ഉണ്ടാവുന്നത്. അധികാരത്തെ ആരെങ്കിലും ചോദ്യം ചെയ്യാം. അല്ലെങ്കിൽ അധികാരം പങ്കിടുന്ന സ്ഥിതിഭവിച്ചേക്കും. പൊതുപ്രവർത്തകർ ദുരാരോപണങ്ങളെ നേരിടുന്നതാണ്. വിദ്യാർത്ഥികൾക്ക് ഏകാഗ്രത കുറയുവാനിടയുണ്ട്. കളികളിൽ താത്പര്യമേറുകയും ചെയ്യും. രക്ഷിതാക്കളുടെ ശ്രദ്ധയുണ്ടാവണം.ജോലി തേടുന്നവർക്ക് കഴിവുകൾക്കൊത്ത അവസരം ലഭിച്ചേക്കില്ല. വസ്തു ഇടപാടുകൾ സ്തംഭനാവസ്ഥയിലെത്തും. മൊബൈൽ വിനോദങ്ങളിലൂടെയും സൈബർ തട്ടിപ്പുകളിലൂടെയും ധനം നഷ്ടമാകാനിടയുണ്ട്. സഹോദരരുടെ സഹായം ലഭിക്കുന്നതാണ്. താത്കാലികമായ വരുമാനമാർഗത്തിന് സാധ്യത കാണുന്നു. ദിവസവേതനം തടസ്സപ്പെടുകയില്ല. വ്യാഴം ഏഴാം ഭാവത്തിലേക്ക് നോക്കുകയാൽ പ്രണയാനുഭവങ്ങൾ മൊട്ടിടാം. ദാമ്പത്യത്താൽ കുറശ്ശേ സ്വൈരം ഭവിക്കുന്നതാണ്. ന്യായമായ ആവശ്യങ്ങൾ നടന്നുകിട്ടുന്നതാണ്.

മിഥുനക്കൂറിന് (മകയിരം 3,4 പാദങ്ങൾ, തിരുവാതിര, പുണർതം 1,2,3 പാദങ്ങൾ)

ജന്മരാശിയിലാണ് വ്യാഴം തുടർന്നിരുന്നത്. ജന്മവ്യാഴത്തെ അശുഭഫലദാതാവായിട്ടാണ് കണക്കാക്കുക. ഇനി ശുഭഭാവമായ രണ്ടാമെടത്തിലാണ് വ്യാഴം സഞ്ചരിക്കുന്നത്. വാക്കുകൊണ്ട് വിളങ്ങാനാവും. വിദ്യയിൽ തിളക്കമേറും. ഗവേഷകർക്ക് പുരസ്കാരങ്ങൾ ലഭിക്കുന്നതായിരിക്കും. അദ്ധ്യാപകർക്ക് ക്ളാസ്സ്മുറികളിൽ ശോഭിക്കാൻ കഴിയും. ബിസിനസ്സ് നടത്തുന്നവർക്ക് വിപണിയിൽ മുന്നേറ്റം കൈവരുന്നതാണ്. കലാപ്രവർത്തനം, സാഹിത്യ രചന എന്നിവ അഭംഗുരമാവും. ഉദ്യോഗസ്ഥർക്ക് കർമ്മമേഖലയിൽ സ്വാധികാരം നിലനിർത്താൻ കഴിയുന്നതാണ്. ജോലിയില്ലാത്തവർക്ക് നല്ല അവസരങ്ങൾ വന്നെത്തുന്നതായിരിക്കും. സമ്പാദ്യം ഉയർത്താൻ കഴിയും. കുടുംബ ബന്ധങ്ങൾ കൂടുതൽ ഹൃദ്യമാവും. അനുരാഗികൾക്ക് ഭാവിസംബന്ധിച്ച ശുഭതീരുമാനത്തിൽ എത്തിച്ചേരാൻ കഴിഞ്ഞേക്കും. പുതിയ വീടിൻ്റെ നിർമ്മാണം തുടങ്ങിക്കിട്ടും. വ്യാഴദശ, വ്യാഴ അപഹാരം ഇവയിലൂടെ കടന്നുപോകുന്നവർക്ക് ഗുണാധിക്യം പ്രതീക്ഷിക്കാം.

കർക്കടകക്കൂറിന് (പുണർതം നാലാം പാദം, പൂയം, ആയില്യം)

വ്യാഴം പന്ത്രണ്ടിൽ നിന്നും ജന്മരാശിയിലേക്ക് പകരുന്നു. പന്ത്രണ്ടും ജന്മരാശിയും ഒരുപോലെ അശുഭഫലങ്ങൾ നൽകുന്ന ഭാവങ്ങളാണ്, വ്യാഴത്തെ സംബന്ധിച്ചിടത്തോളം. അതിനാൽ കർക്കടകക്കൂറുകാർക്ക് കഴിഞ്ഞ അഞ്ചുമാസത്തിലധികമായി തുടരുന്ന ഫലങ്ങളുടെ ആവർത്തനം തന്നെയാവും ഈ വ്യാഴമാറ്റത്തിലൂടെയും വരിക.  തൊഴിൽ രംഗത്ത് സ്വസ്ഥത കുറയുന്നതാണ്. വ്യക്തിപരമായി ധാരാളം പ്രശ്നങ്ങളെ അഭിമുഖീകരിക്കേണ്ടി വരും. തിടുക്കത്തിലെടുക്കുന്ന തീരുമാനങ്ങൾ തെറ്റാം. ഉറ്റവർ തന്നെ തള്ളിപ്പറയുന്ന സ്ഥിതി സംജാതമാകും. ആരോഗ്യസൗഖ്യത്തിന് ഭംഗം വരാനിടയുണ്ട്. ലക്ഷ്യപ്രാപ്തിക്ക് കൂടുതൽ പരിശ്രമം ആവശ്യമാവും. ദുരാരോപണങ്ങൾക്ക് ശരവ്യരായേക്കും. പുതുസംരംഭങ്ങൾ തുടങ്ങുന്നതിന് അത്ര അനുകൂല സമയമല്ല. സാമ്പത്തിക വഞ്ചനകൾ ഭവിക്കാനിടയുണ്ട്. പ്രത്യേക കരുതൽ വേണ്ടതുണ്ട്. ഗൃഹനിർമ്മാണം തടസ്സപ്പെടാം. വ്യാഴം ഏഴാം ഭാവത്തിലേക്ക് നോക്കുകയാൽ പ്രണയാനുഭയങ്ങൾ തളിർക്കുന്നതാണ്. ദാമ്പത്യത്തിലും സംതൃപ്തി വന്നേക്കും. കൂട്ടുകച്ചവടം മോശമാവില്ല. യാത്രകൾ ഫലവത്താകുന്നതാണ്.

Read More: കന്നി മാസത്തെ സമ്പൂർണ നക്ഷത്രഫലം, അശ്വതി മുതൽ രേവതി വരെ

ചിങ്ങക്കൂറിന് (മകം, പൂരം, ഉത്രം ഒന്നാം പാദം)

ഏറ്റവും അനുകൂലമായ പതിനൊന്നാം ഭാവത്തിലായിരുന്നു കഴിഞ്ഞ അഞ്ചുമാസത്തിലധികമായി വ്യാഴം. ഇപ്പോൾ കർക്കടകത്തിൽ പന്ത്രണ്ടാം ഭാവത്തിലേക്ക് മാറുന്നു. പന്ത്രണ്ടാം വ്യാഴം ചെലവുണ്ടാക്കും. അവയിൽ ഒരുപക്ഷേ നല്ലതിനായും ഭാവിക്കുവേണ്ടിയും ഉള്ള ചിലവും ഉൾപ്പെടാം. യാത്രകൾ വേണ്ടിവരുന്നതാണ്. ചിലതൊക്കെ വ്യർത്ഥയാത്രകളായും ഭവിക്കും. തൊഴിലിനോ പഠിപ്പിനോ വിദേശത്ത് പോകാൻ കാത്തിരിക്കുന്നവർക്ക് ഇപ്പോൾ  അവസരം സംജാതമാകും. കടം വാങ്ങിയ തുക തിരികെക്കൊടുക്കാൻ നിർബന്ധിതരാവും. കുടുംബാന്തരീക്ഷം അല്പം പ്രക്ഷുബ്ധമായേക്കും. കൂട്ടുകെട്ടിൽ കരുതൽ വേണം. ദുശ്ശീലങ്ങളുണ്ടെങ്കിൽ അവ നിയന്ത്രിക്കപ്പെടണം. അറിഞ്ഞോ അറിയാതെയോ ബഹുമാന്യരെ പിണക്കുന്നതാണ്. വീടുവിട്ടുനിൽക്കുന്നവർക്ക് ആ സ്ഥിതിയിൽ തന്നെ തുടരേണ്ടിവരും. കച്ചവടത്തിൽ വരുമാനം ഉയരും. എന്നാൽ ചെലവ് നിയന്ത്രിക്കാനാവാതെ കുഴങ്ങും. യാത്രയിൽ വഴിതെറ്റാനോ, പണം കവർച്ചചെയ്യപ്പെടാനോ സാധ്യതയുണ്ട്. ജീവിതശൈലീരോഗങ്ങൾ തലപൊക്കാം. ആരോഗ്യപരിശോധനകളിൽ അമാന്തമരുത്. ഒരുതരത്തിലുള്ള സാഹസങ്ങൾക്കും മുതിരരുത്.

കന്നിക്കൂറിന് (ഉത്രം 2, 3, 4, അത്തം, ചിത്തിര 1,2 പാദങ്ങൾ)

പത്താം ഭാവത്തിൽ നിന്നും പതിനൊന്നാം ഭാവത്തിലേക്കാണ് വ്യാഴത്തിൻ്റെ രാശിമാറ്റം. ഒക്ടോബർ 18 മുതൽ ഡിസംബർ 5-ാം തീയതി വരെയാണ് വ്യാഴം പതിനൊന്നിലുണ്ടാവുക.  ഇതൊരു കുറഞ്ഞ കാലയളവാണ്. എങ്കിലും വ്യാഴം 11-ാം ഭാവത്തിൽ സഞ്ചരിക്കുന്നത് കന്നിക്കൂറുകാർക്ക് നാനാപ്രകാരേണ ഗുണമുണ്ടാക്കും. തടസ്സം നീങ്ങി ന്യായമായ കാര്യങ്ങൾ നടന്നുകിട്ടും. കടബാധ്യത  ഭാഗികമായിട്ടെങ്കിലും പരിഹരിക്കും. നവസംരംഭങ്ങൾ തുടങ്ങാനായേക്കും. കൃത്യനിഷ്ഠയോടെയുള്ള പ്രവർത്തനം  മേലധികാരികളുടെ ഇഷ്ടം നേടും. സ്ഥാനക്കയറ്റം/ അനുകൂലമായ ദിക്കിലേക്ക് സ്ഥലംമാറ്റം/ വേതന വർദ്ധനവ് ഇവ സാധ്യതകളാണ്. ബിസിനസ്സിൽ പുഷ്ടിയുണ്ടാവും. സാഹിത്യ- കലാ രംഗങ്ങളിലുള്ളവർക്ക് പുരസ്കാരം ലഭിക്കുന്നതാണ്. പ്രണയാനുഭവങ്ങൾ ദൃഢപ്പെടും. അവിവാഹിതർക്ക് വിവാഹത്തിൽ പ്രവേശിക്കാൻ സാഹചര്യം അനുകൂലമാവും. ദാമ്പത്യത്തിൽ സംതൃപ്തിയുണ്ടാവുന്നതാണ്. സന്താനങ്ങൾക്ക് പലതരം ശ്രേയസ്സുകൾ വരാം. ഗൃഹനിർമ്മാണം തുടങ്ങാനോ/ പൂർത്തിയാക്കാനോ സാധിച്ചേക്കും. വാഹനം വാങ്ങും. സാമ്പത്തിക ലാഭം, കർമ്മവിജയം, ഭോഗസുഖം ഇവയെല്ലാം പ്രതീക്ഷിക്കാം. 

തുലാക്കൂറിന് (ചിത്തിര 3,4 പാദങ്ങൾ, ചോതി, വിശാഖം 1,2,3 പാദങ്ങൾ)

അനുകൂലമായ ഭാഗ്യസ്ഥാനത്താണ് വ്യാഴം സഞ്ചരിക്കുന്നത്. അവിടെ നിന്നും അത്ര അനുകൂലതയില്ലാത പത്താമെടത്തിൽ / കർക്കടകം രാശിയിലെത്തുമ്പോൾ ഗുണാനുഭവങ്ങൾ പൂർണ്ണമായും ഇല്ലതാവില്ല. എന്നാൽ അല്പം കുറയാനാണ് സാധ്യത. ചില സന്ദിഗ്ദ്ധതകൾ ജീവിതത്തിൽ ഉണ്ടായേക്കാം. വേണോ വേണ്ടയോ എന്ന ചിന്ത നിഴൽപോലെ എല്ലായ്പ്പോഴും പിന്തുടർന്നുകൊണ്ടിരിക്കും. രോഗഗ്രസ്തർക്ക് ചെറിയ ആശ്വാസം ലഭിക്കുന്നതാണ്. ധനമാർഗം തെളിയും. മത്സരാധിഷ്ഠിത കരാറുകൾ നേടും. മത്സരങ്ങളിൽ വളരെ വിയർത്തിട്ടാവും വിജയം നേടുവാൻ കഴിയുന്നത്. എതിരാളികളെ നിസ്സാരമായി കാണരുത്. സർക്കാരിൽ നിന്നുള്ള അനുമതിപത്രം ലഭിക്കാൻ പ്രയത്നമുണ്ടാവും. പലകാര്യങ്ങൾ തുടങ്ങുന്നതാണ്. എന്നാൽ ഒന്നും കൃത്യസമയത്ത് പൂർത്തീകരിക്കാൻ സാധിക്കാത്ത സ്ഥിതിയുണ്ടാവും. മനസ്സിനെ അലട്ടുന്ന ചില ചോദ്യങ്ങൾക്ക് വ്യക്തമായ ഉത്തരം കിട്ടാനുമിടയില്ല. വലിയ മുതൽമുടക്കിയുള്ള സംരംഭങ്ങൾക്ക് ഇത് അത്ര ഇണക്കമുള്ള കാലഘട്ടമല്ല. ചെയ്തുപോരുന്ന തൊഴിൽ ഉപേക്ഷിക്കുന്നത് വളരെ ആലോചിച്ചിട്ടാവണം! മൗനവും നിഷ്ക്രിയതയും ഗുണകരമാവുന്ന കാലഘട്ടമാവാം.

വൃശ്ചികക്കൂറിന് (വിശാഖം നാലാംപാദം, അനിഴം, തൃക്കേട്ട)

ഏറ്റവും അശുഭ ഭാവമായ അഷ്ടമത്തിലാണ് വ്യാഴം ഇപ്പോഴുള്ളത്. ഭാഗ്യഭാവത്തിലേക്ക് ഒക്ടോബർ 18 ന് വ്യാഴം മാറുമ്പോൾ വൃശ്ചികക്കൂറുകാരുടെ ജീവിതത്തിൽ വലിയ തോതിൽ അഭ്യുദയം വന്നെത്തുന്നതാണ്. ഭാഗ്യാനുഭവങ്ങൾ വർദ്ധിക്കും. കഴിവുണ്ടായിട്ടും അവഗണിക്കപ്പെട്ടെങ്കിൽ ഇനി കഴിവുകൾക്കും അർഹതയ്ക്കും അംഗീകാരം തേടിവരുന്നതാണ്. ജീവിതത്തിന് ദിശാബോധം കൈവരും. അദ്ധ്വാനം പാഴാവുകയില്ല. പഠനത്തിൽ ഏകാഗ്രത പുലർത്താനാവും. പാതിനിർത്തിയ പഠനം പുനരാരംഭിക്കും. തൊഴിൽ തേടുന്നവർക്ക് നിരാശപ്പെടേണ്ടി വരികയില്ല. അർഹതക്കനുസരിച്ചുള്ള സ്ഥാനം / ജോലി ലഭിക്കുന്നതാണ്. മാതാപിതാക്കളുടെയും ഗുരുക്കന്മാരുടെയും സന്തോഷത്തിനും അനുഗ്രഹത്തിനും പാത്രമാവും. രോഗഗ്രസ്തർക്ക് ആരോഗ്യം വീണ്ടെടുക്കാൻ കഴിഞ്ഞേക്കും. വസ്തു വങ്ങുന്നതിന് അവസരം സംജാതമാകുന്നതാണ്. അനുരാഗികൾക്ക് ഒന്നിക്കാൻ കുടുംബത്തിൻ്റെ ആശിർവ്വാദം ലഭിക്കാം. മക്കളില്ലാത്തവരുടെ കാത്തിരിപ്പിന് ശുഭാന്ത്യമുണ്ടാവും. നിർമ്മാണ പ്രവർത്തനങ്ങൾ അഭംഗുരമായേക്കാം. സാമ്പത്തിക സമ്മർദ്ദങ്ങൾക്ക് അറുതി വരുന്നതാണ്.

Also Read: ശുക്രൻ നീചരാശിയിൽ; ദോഷം ആർക്കൊക്കെ? അശ്വതി മുതൽ രേവതിവരെ

ധനുക്കൂറിന് (മൂലം, പൂരാടം, ഉത്രാടം ഒന്നാം പാദം)

വ്യാഴം അനുകൂലമായ ഏഴാം ഭാവത്തിൽ നിന്നും അനിഷ്ടകരമായ അഷ്ടമത്തിലേക്ക് മാറുന്നു. ഉച്ചരാശിയാകയാൽ ദോഷഫലങ്ങൾ കുറയും; ചില ഗുണാനുഭവങ്ങൾ ഉണ്ടാവുന്നതുമാണ്. ധനുരാശിയുടെ അധിപനാകയാൽ വ്യാഴത്തിൻ്റെ ഉച്ചസ്ഥിതി ആത്മവിശ്വാസം വളർത്താനും ഇടവരുത്തും. വിലയേറിയ വസ്തുക്കൾ നഷ്ടപ്പെടാനോ കളവ് പോകാനോ സാധ്യതയുണ്ട്. വാഹനയാത്രയിൽ കരുതലുണ്ടാവണം. രോഗികൾക്ക് തുടർന്നുവരുന്ന ചികിൽസ ഫലപ്രദമായേക്കില്ല. അമിതമായി മറ്റുള്ളവരെ വിശ്വസിക്കുന്നത് ദോഷം ചെയ്യുന്നതാണ്. സ്വന്തബന്ധുക്കൾ വാഗ്ദാനം പാലിക്കാത്തതിനാൽ കോപമുണ്ടാവും. പുതിയ ജോലിക്ക് ശ്രമിക്കുന്നവർക്ക് കാത്തിരിപ്പ് തുടരേണ്ടതായി വരും. സാമ്പത്തിക സമ്മർദ്ദത്തിന് സാധ്യത കാണുന്നു. കടബാധ്യതകൾ ശല്യപ്രദമാവാം. പ്രതീക്ഷിച്ച വരുമാനം, പദവി എന്നിവ 'കപ്പിനും ചുണ്ടിനുമിടയിൽ' ചോർന്നുപോകാം. സഹപ്രവർത്തകർ വേണ്ടത്ര സഹകരിച്ചേക്കില്ല. നവസംരംഭങ്ങൾ തുടങ്ങുവാൻ തടസ്സങ്ങളുണ്ടാവും. പന്ത്രണ്ടിൽ വ്യാഴദൃഷ്ടി വരികയാൽ നല്ലകാര്യങ്ങൾക്കായി ചെലവേർപ്പെടും. രണ്ടാമെടത്താൽ നോക്കുകയാൽ വിദ്യാഗുണം, കുടുംബ സൗഖ്യം എന്നിവയും നാലാമെടത്തിൽ ദൃഷ്ടിചെയ്യുകയാൽ ഗൃഹത്തിൽ സമാധാനവും ഭവിക്കുന്നതാണ്.

മകരക്കൂറിന്ന് (ഉത്രാടം 2,3,4 പാദങ്ങൾ, തിരുവോണം, അവിട്ടം 1,2)

വ്യാഴം പ്രതികൂലഭാവമായ ആറാമെടത്തിൽ നിന്നും ഗുണഫലപ്രദമായ ഏഴാമെടത്തിലാണ് മാറുന്നത്. വ്യാപാരം, വിശേഷിച്ചും കൂട്ടുകച്ചവടം മെച്ചപ്പെടുന്നതാണ്. യാത്ര മൂലം ജീവിതപുരോഗതി കൈവരും. പഠനം,തൊഴിൽ എന്നിവയ്ക്കായി വിദേശയാത്ര സാധ്യമാകുന്നതാണ്. ഏഴാമെടം പ്രണയം, ദാമ്പത്യം, രതിസുഖം എന്നിവയുടെ ഭാവം കൂടിയാകുന്നു. പ്രണയബന്ധം പൊട്ടിവിടരാം. പ്രണയികൾ ഭാവിതീരുമാനത്തിലെത്തും. വിഘ്നങ്ങളെ മറികടക്കുന്നതാണ്. അവിവാഹിതർക്ക് അനുരൂപമായ വിവാഹബന്ധം കൈവരാം.  ദാമ്പത്യത്തിൽ പാരസ്പര്യം ദൃഢമാകുന്നതാണ്. അന്യദിക്കിൽ കഴിഞ്ഞിരുന്ന ഭാര്യാഭർത്താക്കന്മാർക്ക് ഒരുമിക്കാനവസരം കിട്ടും. പുതിയ ഗൃഹോപകരണങ്ങൾ വാങ്ങും. വാഹനം വാങ്ങാനുള്ള സാധ്യത കാണുന്നു. ധനപരമായി പിരിമുറുക്കം വരില്ല. കടം വാങ്ങാതെ കാര്യം നടത്താനാവും. കലാപരമായ കഴിവുകൾ തിരിച്ചറിയപ്പെടും. പുത്തൻ ആശയങ്ങൾ മനസ്സിലുണ്ടാവും. മംഗളകർമ്മങ്ങളുടെ അമരക്കാരനാവാൻ കഴിയും. പൊതുവേ ജീവിതക്ലേശങ്ങൾ മറയുന്ന കാലമായിരിക്കും.

കുംഭക്കൂറിന് (അവിട്ടം 3,4 പാദങ്ങൾ, ചതയം, പൂരൂരുട്ടാതി 1,2,3 പാദങ്ങൾ)

വ്യാഴം പഞ്ചമഭാവത്തിൽ നിന്നും അതിചാരമായി ആറാമെടത്തിലേക്ക് മാറുന്നു. പ്രതിലോമ ഭാവങ്ങളാണ് ആറാമെടം കൊണ്ട് ചിന്തിക്കപ്പെടുന്നത്. രോഗം, ശത്രു, കടബാധ്യത, ചോരശല്യം, വിഘാതം ഇവയെല്ലാം ആറാംഭാവവുമായി ഇണങ്ങിനിൽക്കുന്നു. വ്യാഴം ഉച്ചസ്ഥനായി ആറാമെടത്തിൽ സഞ്ചരിക്കുകയാൽ ഇക്കാര്യങ്ങൾ ശല്യകാരികളാവില്ലെന്ന് കരുതാം. എങ്കിലും കടം വാങ്ങാനുള്ള പ്രവണത നിയന്ത്രിക്കപ്പെടണം. നമ്മുടെ ഉള്ളിലെ ദുർവാസനകൾ തന്നെയാണ് നമ്മുടെ ശത്രുക്കളെന്ന് വരാം. അവയെ നിയന്ത്രിക്കേണ്ടതുണ്ട്. ആരോഗ്യസംരക്ഷണത്തിൽ ആലസ്യം ഭവിക്കരുത്. മനോവാക്കർമ്മങ്ങളിൽ ജാഗ്രത വേണം. ഒന്നും കൂട്ടിച്ചേർക്കാനും പണം പുഷ്ടിപ്പെടുത്താനും കഴിഞ്ഞെന്നു വരില്ല.  ചെലവേറാനുമിടയുണ്ട്. എങ്കിലും പൂർവ്വികമായ സ്വത്തും സമ്പാദ്യവും മറ്റും വിറ്റുകളയാതെ സംരക്ഷിക്കാനാവുന്നത് ശ്രേഷ്ഠതയാണ്. യാത്രകൾ പ്രയോജനപ്പെടുത്താൻ സാധിക്കും. കർമ്മരംഗത്ത് അത്ര വലിയ തിരിച്ചടിയൊന്നും ഉണ്ടാവുകയില്ല. ധനവരവ് തീരെ ശുഷ്കിക്കില്ല. വിദ്യാർത്ഥികളല്ലാത്ത വർക്കും എന്തെങ്കിലും പുതുതായി പഠിച്ചറിയാനാവും.

മീനക്കൂറിന് (പൂരുരുട്ടാതി നാലാംപാദം, ഉത്രട്ടാതി, രേവതി)

നാലാമെടത്തിൽ നിന്നും അഞ്ചാമെടത്തിലേക്കാണ് വ്യാഴത്തിൻ്റെ മാറ്റം. സൃഷ്ടിപരമാവും, മനസ്സ്. ഭാവനാത്മകത പടർന്ന് പന്തലിക്കുന്നതാണ്. സന്താനങ്ങളില്ലാത്തവർക്ക് സന്താനപ്രാപ്തിക്ക് സാധ്യതയുണ്ട്. പൊതുവേ മക്കൾക്ക് ശ്രേയസ്സ് വന്നെത്തുന്ന കാലമായിരിക്കും. പഠന വൈകല്യം പരിഹരിക്കപ്പെടും. ജോലി തേടുന്നവർക്ക് അവസരങ്ങൾ ലഭിക്കുന്നതാണ്. മകളുടെ നടക്കാനോ വിവാഹാലോചന ഉറയ്ക്കാനോ വിവാഹം നടക്കാനോ സാധ്യത കാണുന്നു. കാവ്യരചന, ഗാനാലാപനം, ചിത്രംവര, അഭിനയം, പ്രസംഗം ഇവയിൽ ശോഭിക്കുന്നതാണ്. പുതിയ കാര്യങ്ങളോട് പുറം തിരിഞ്ഞ് നിൽക്കുകയില്ല. ഭാഗ്യാനുഭവങ്ങൾ ഉണ്ടാവും. പിതാവിൻ്റെ വാത്സല്യം ലഭിക്കുന്നതാണ്. ബന്ധുക്കൾക്ക് ഒത്തുചേരുവാൻ അവസരം കൈവരും. കിട്ടാക്കടങ്ങൾ വലിയ സമ്മർദ്ദം കൂടാതെ തന്നെ കിട്ടാം. ഭോഗസുഖമുണ്ടാവും. ഭൗതിക നേട്ടങ്ങൾക്കൊപ്പം ആത്മികമായ ഔന്നത്യവും പ്രതീക്ഷിക്കാവുന്ന കാലഘട്ടമാണ്. തീർത്ഥാടനം മനസ്സന്തോഷമേകും.

Also Read: ഒക്ടോബർ മാസഫലം, അശ്വതി മുതൽ രേവതി വരെ