Weekly Horoscope Oct 05-Oct 11: വാരഫലം, മകം മുതൽ തൃക്കേട്ട വരെ

ആദിത്യൻ കന്നിരാശിയിൽ അത്തം ഞാറ്റുവേലയിലാണ്. ചന്ദ്രൻ വാരാദ്യം വെളുത്തപക്ഷത്തിൽ. തിങ്കളും ഭാഗികമായി ചൊവ്വാഴ്ചയും ആയി 'ആശ്വിനപൗർണമി' വരും. തുടർന്ന്  കൃഷ്ണപക്ഷം ആരംഭിക്കുന്നു. ചതയം മുതൽ രോഹിണി വരെ നക്ഷത്രമണ്ഡലങ്ങളിലാണ് ചന്ദ്രസഞ്ചാരം.

ചൊവ്വ തുലാം രാശിയിൽ ചോതി നക്ഷത്രത്തിലാണ്. ബുധനും തുലാം രാശിയിൽ ചിത്തിര-ചോതി നക്ഷത്രങ്ങളിൽ സഞ്ചരിക്കുന്നു. ശുക്രൻ ചിങ്ങം രാശിയിലാണ്. ഒക്ടോബർ 9 ന് നീചക്ഷേത്രമായ കന്നിരാശിയിൽ പ്രവേശിക്കും. 

ശനി മീനം രാശിയിൽ വക്രഗതി തുടരുന്നു. പൂരൂരുട്ടാതി നക്ഷത്രത്തിലാണ് ശനി. വ്യാഴം മിഥുനം രാശിയിൽ പുണർതം നക്ഷത്രത്തിലാണ്. രാഹുവും കേതുവും യഥാക്രമം കുംഭം-ചിങ്ങം രാശികളിൽ തുടരുന്നു. ഈ ഗ്രഹനിലയെ മുൻനിർത്തി മകം മുതൽ തൃക്കേട്ട വരെയുള്ള നാളുകാരുടെ വാരഫലം വിശകലനം ചെയ്യുന്നു.

Also Read: ചൊവ്വ തുലാം രാശിയിൽ, അശ്വതി മുതൽ രേവതിവരെ

മകം

അനുകൂല സാഹചര്യങ്ങളാണ് എല്ലാമെന്ന് പറയാനാവില്ല. അധ്വാനം കൂടുന്നതാണ്. മേലധികാരികളെ ചിലതൊക്കെ ബോധിപ്പിക്കേണ്ടി വരുന്നതായിരിക്കും. പുതിയ കാര്യങ്ങൾ തുടങ്ങുന്നതിന് അല്പം കൂടി കാത്തിരിക്കുകയാവും ഉത്തമം. സാമ്പത്തിക ഇടപാടുകൾക്ക് കണക്ക് സൂക്ഷിക്കുക ഉചിതമായിരിക്കും. എതിർചോദ്യങ്ങൾക്ക് മൗനം അവലംബിക്കേണ്ടി വന്നേക്കും. ശുപാർശകൾക്ക് പ്രതീക്ഷിച്ച ഫലം കിട്ടുന്നതാണ്. തിങ്കൾ, ചൊവ്വ ദിവസങ്ങളിൽ അഷ്ടമരാശിക്കൂറിൽ ചന്ദ്രൻ സഞ്ചരിക്കുകയാൽ ദേഹാസ്വാസ്ഥ്യം അനുഭവപ്പെട്ടേക്കാം.

പൂരം

അനുകൂല സാഹചര്യം പ്രയോജനപ്പെടുത്തേണ്ടതുണ്ട്. കർമ്മരംഗത്ത് ഉണർവ്വുണ്ടാവും. ഔദ്യോഗിക ചുമതലകൾ കൂടുന്നതാണ്. പുതിയ സഹായികളെ ലഭിക്കുന്നതിനാൽ കുറച്ചാശ്വാസം പ്രതീക്ഷിക്കാം. ഗവേഷണത്തിൽ കൂടുതൽ ശ്രദ്ധിക്കാനാവും. നിഗമനങ്ങൾ 
എഴുതി സൂക്ഷിക്കും. ഉറ്റവരുടെ പ്രശ്നങ്ങൾ കണ്ടറിയും. അവസരോചിത നീക്കങ്ങൾ ഗുണം ചെയ്യും. പ്രശംസിക്കപ്പെടാം. ആവശ്യത്തിനുപരി ആഡംബരത്തിനും പണച്ചെലവുണ്ടാവും. ചൊവ്വ, ബുധൻ ദിവസങ്ങളിൽ പുതുകാര്യങ്ങൾ തുടങ്ങരുത്.

ഉത്രം

ചുറുചുറുക്കും സന്നദ്ധതയും കർമ്മമേഖലയിൽ ഗുണാനുഭവങ്ങൾ സൃഷ്ടിക്കാം. എന്നാൽ സഹപ്രവർത്തകർക്ക് ഒപ്പമെത്താൻ കഴിഞ്ഞേക്കില്ല. വ്യാപാരികൾക്ക് ആദായത്തിൽ കുറവുണ്ടാവില്ല. എന്നാൽ അധികം മുതൽമുടക്കിന് ഇപ്പോൾ മുതിരരുത്. ഉദ്യോഗാർത്ഥികൾ അഭിമുഖങ്ങളിൽ ശോഭിക്കുന്നതാണ്. ചെറുയാത്രകൾ പ്രയോജനകരമാവും. പ്രണയികളുടെ ഹൃദയബന്ധം ദൃഢമാകുന്നതാണ്. ദാമ്പത്യത്തിൽ സംതൃപ്തിയുണ്ടാവും. സാഹിത്യ പ്രവർത്തനം മുന്നോട്ടുപോകും. ഭാവികാര്യങ്ങൾ ചിന്തിക്കും. ആഴ്ചയുടെ മധ്യഭാഗത്തിന് മേന്മ കുറയാം.

Also Read: ഒക്ടോബർ മാസഫലം, അശ്വതി മുതൽ രേവതി വരെ

അത്തം

ആത്മവിശ്വാസം കുറയില്ല. ഉപജീവനരംഗം ഉന്മേഷമുള്ളതാവും. മനസ്സിൽ പുതിയ ആശയങ്ങൾ നിറയും. അവ അതേ ആവേശത്തോടെ ഒപ്പമുള്ളവർ സ്വീകരിക്കണമെന്നില്ല. ചെറുതടസ്സങ്ങളിൽ വ്യാകുലരാവും. ഗാർഹികസൗഖ്യം പ്രതീക്ഷിക്കാം. ജീവിതപങ്കാളിക്ക് വീട്ടിനടുത്ത് ജോലികിട്ടാം. വസ്ത്രാഭരണങ്ങൾ പാരിതോഷികമായി ലഭിച്ചേക്കാം. ചെറുകിട സംരംഭങ്ങൾ പുഷ്ടിപ്പെടുന്നതാണ്. കടബാധ്യത ഗഡുക്കളായി തീർക്കാൻ സാധിക്കും. വ്യാഴം, വെള്ളി ദിവസങ്ങൾക്ക് ഗുണം കുറയുന്നതാണ്.

ചിത്തിര

മത്സരബുദ്ധിയുണ്ടാവും. പ്രവർത്തനങ്ങളിൽ ആത്മാർത്ഥത പുലർത്തുന്നതാണ്. കരിയർ ഗ്രാഫ് ഉയരാത്തതിൽ വിഷമിക്കും. മേലധികാരികളുടെ അപ്രീതി തുടരന്നതാണ്. കുടുംബാന്തരീക്ഷം മോശമാവില്ല. മകൻ്റെ ശാഠ്യശീലം കൊണ്ട് പുതിയ ബൈക്ക് വാങ്ങാൻ തീരുമാനിക്കുന്നതാണ്. ഏജൻസി/ ഡീലെർഷിപ്പ് മെച്ചപ്പെടും. ഉപഭോക്താക്കളെ സ്വാധീനിക്കാനാവും. ഗ്രഹങ്ങൾ ജന്മനക്ഷത്രത്തിലും മുന്നിലും പിന്നിലുമായി സഞ്ചരിക്കുകയാൽ സമ്മർദ്ദം ഉണ്ടായിക്കൊണ്ടിരിക്കും. സ്വയം ശാന്തരാവേണ്ടതുണ്ട്. വാരാദ്യദിനങ്ങൾ കൂടുതൽ മെച്ചപ്പെട്ടതാവും.

ചോതി

ജന്മനക്ഷത്രത്തിലൂടെ ചൊവ്വ കടന്നുപോവുന്നതിനാൽ കാര്യനിർവഹണത്തിൽ ശ്രദ്ധയുണ്ടാവണം. ലാഘവബുദ്ധി ഉപേക്ഷിക്കപ്പെടേണ്ടതുണ്ട്. ക്ഷോഭവും മുൻകോപവും നിയന്ത്രിക്കാൻ ശ്രമിക്കണം. ഭാഗ്യാനുഭവങ്ങൾ വഴിമാറുന്നതായി തോന്നിയേക്കാം. ആദിത്യൻ പന്ത്രണ്ടിൽ സ്ഥിതി ചെയ്യുകയാൽ അധികാരികളുടെ സമ്മതം കിട്ടാതെ വരും. സ്വാശ്രയമായ ജോലികളിൽ ലാഭം വർദ്ധിക്കാനിടയുണ്ട്. സുഹൃത്തിന് സമയോചിതമായ ഉപദേശം നൽകുന്നതാണ്. പ്രണയത്തിലും ദാമ്പത്യത്തിലും വിട്ടുവീഴ്ച ഉണ്ടാവേണ്ടതുണ്ട്.

Also Read: ശുക്രൻ നീചരാശിയിൽ; ദോഷം ആർക്കൊക്കെ? അശ്വതി മുതൽ രേവതിവരെ

വിശാഖം

വിദ്യാഭ്യാസം, ഗവേഷണം, ലേഖനമെഴുത്ത് ഇവകളിൽ ശോഭിക്കുന്നതാണ്. പൊതുവേ ബൗദ്ധികമായി മെച്ചമുണ്ടാവുന്ന കാലമാണ്. ഉദ്യോഗസ്ഥർക്ക് അല്പം പിരിമുറുക്കം അനുഭവിക്കാറാകും. വിദേശജോലിക്കായുള്ള പരിശ്രമത്തിൽ തടസ്സങ്ങളേർപ്പെടും. ശുക്രൻ കന്നിയിൽ നീചസ്ഥിതിയിലാകയാൽ ഭൗതിക കാര്യങ്ങളിൽ അസംതൃപ്തി വരുന്നതാണ്. ആത്മീയ സാധനകൾ നടത്താനാവും. കൂട്ടുകച്ചവടം ലാഭത്തിലെത്തും. സന്താനങ്ങളെക്കൊണ്ട് മനക്ലേശം വരാം.  ഭൂമിവിൽപ്പന തടസ്സപ്പെടുന്നതാണ്.

അനിഴം

ആദരിക്കേണ്ടവരെ ആദരിക്കും. നിലപാടുകളിൽ മയമുണ്ടാവില്ല. പുതിയ കാര്യങ്ങൾ ഉൾക്കൊള്ളുമ്പോഴും പാരമ്പര്യത്തെ തള്ളിപ്പറയില്ല. വാരാദ്യം ആശയക്കുഴപ്പം നേരിടും. കർമ്മപരാങ്മുഖത്വം ഭവിക്കാം. ദേഹസുഖക്കുറവ് അനുഭവപ്പെടുന്നതാണ്. ക്രമേണ കാര്യസിദ്ധിയുണ്ടാവും. വരുമാനം ന്യായമായ ആവശ്യങ്ങൾക്ക് ചെലവഴിക്കും. കുടുംബകാര്യങ്ങളിൽ കൂടുതൽ ശ്രദ്ധ പുലർത്തുന്നതാണ്. ഉദ്യോഗസ്ഥർക്ക് സുഗമമായ തൊഴിൽ സാഹചര്യം ഉണ്ടാവും. ഭോഗസുഖമുണ്ടായിരിക്കും. പ്രണയം അഭംഗുരമായി മുന്നേറുന്നതാണ്.

തൃക്കേട്ട

ആസൂത്രണ വൈഭവം ചിലപ്പോൾ വേണ്ടത്ര ഫലവത്തായില്ലെന്ന് വരാം. പരാശ്രയത്വം ഉണ്ടായേക്കും. എന്നാൽ തൊഴിലിടത്തിൽ സമാധാനമുണ്ടാവും. സഹപ്രവർത്തകരുടെ പിൻബലം  പ്രതീക്ഷിക്കാം. സന്താനങ്ങളുടെ വിദ്യാഭ്യാസം സുഗമമാവുന്നതിൽ തൃപ്തിയുണ്ടാവും. പുതിയ വ്യാപാരത്തെപ്പറ്റി ഗാഢമായ ആലോചനയിൽ ഏർപ്പെടും. ഗാർഹികമായ അന്തരീക്ഷം സുഖകരമാവും. ഗൃഹനിർമ്മാണം തടസ്സപ്പെടാതെ മുന്നേറിയേക്കും. വാരാദ്യത്തിലെ സ്വസ്ഥതക്കുറവൊഴിച്ചാൽ പൊതുവേ മെച്ചപ്പെട്ട വാരമാവും.

Read More: കന്നി മാസത്തെ സമ്പൂർണ നക്ഷത്രഫലം, അശ്വതി മുതൽ രേവതി വരെ