സമ്പൂർണ്ണ വാരഫലം, അശ്വതി മുതൽ രേവതി വരെ; March 03-March 09, 2024, Weekly Horoscope

Weekly Horoscope: ആദിത്യൻ കുംഭം രാശിയിൽ ചതയം, പൂരൂരുട്ടാതി എന്നീ ഞാറ്റുവേലകളിലായി സഞ്ചരിക്കുന്നു. മാർച്ച് 7 ന് ബുധൻ കുംഭത്തിൽ നിന്നും തൻ്റെ നീചക്ഷേത്രമായ മീനത്തിലേക്ക് സംക്രമിക്കുകയാണ്. ബുധൻ്റെ മൗഢ്യസ്ഥിതി തുടരുന്നുമുണ്ട്. മാർച്ച് 7 ന് തന്നെ ശുക്രൻ മകരത്തിൽ നിന്നും കുംഭത്തിലേക്ക് പ്രവേശിക്കുന്നു. 

വ്യാഴം മേടം രാശിയിൽ ഭരണിയിൽ സഞ്ചാരം തുടരുകയാണ്. ശനി കുംഭം രാശിയിൽ ചതയം നക്ഷത്രത്തിൽ മൗഢ്യം പ്രാപിച്ച നിലയിൽ തുടരുന്നു. ചൊവ്വ ഉച്ചക്ഷേത്രമായ മകരം രാശിയിലാണ്. രാഹു അപസവ്യ ഗതിയിൽ മീനം രാശിയിലും കേതു കന്നി രാശിയിലും സഞ്ചരിക്കുന്നു. ചന്ദ്രൻ കൃഷ്ണ അഥവാ കറുത്ത പക്ഷത്തിലാണ്. സപ്തമി മുതൽ ചതുർദ്ദശി വരെയുള്ള തിഥികളാണ് ഈയാഴ്ച.  

അനിഴം മുതൽ അവിട്ടം - ചതയം വരെയുള്ള നക്ഷത്രങ്ങളിലൂടെയാണ് ചന്ദ്രസഞ്ചാരം. ഞായറും തിങ്കൾ വൈകിട്ട് വരെയും മേടക്കൂറുകാരുടെ അഷ്ടമരാശിക്കൂറാണ്. തുടർന്ന് ബുധനാഴ്ച രാത്രിവരെ ഇടവക്കൂറുകാരുടെയും, തദനന്തരം വെള്ളിയാഴ്ച അർദ്ധരാത്രി വരെ മിഥുനക്കൂറുകാരുടെയും അഷ്ടമരാശിക്കൂറ് ഭവിക്കുന്നു. ശനിയാഴ്ചയും കടന്ന് അടുത്ത ആഴ്ചയിലേക്ക് കർക്കടകക്കൂറുകാരുടെ  അഷ്ടമരാശിക്കൂറ് തുടരപ്പെടുന്നുണ്ട്.

ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി  വരെയുള്ള 27 നക്ഷത്രങ്ങളിൽ ജനിച്ചവരുടെ സമ്പൂർണ്ണ വാരഫലം ഇവിടെ വായിക്കാം.

അശ്വതി 

ആദ്യത്തെ രണ്ട് ദിവസങ്ങൾക്ക് ശോഭ കുറയാം. കാര്യതടസ്സം ഏർപ്പെടാനിടയുണ്ട്. അലച്ചിലിനും വഴിയൊരുങ്ങാം. മറ്റു ദിവസങ്ങൾ ഉന്മേഷകരമാവും. മുൻ തീരുമാനങ്ങൾക്ക് അനുസൃതമായിത്തന്നെ പ്രവർത്തിക്കാൻ കഴിയുന്നതായിരിക്കും.ന്യായമായ ആവശ്യങ്ങൾക്ക് പണം തടസ്സമാവുകയില്ല. തൊഴിൽ രംഗത്ത് ആശാവഹമായ പുരോഗതി ദൃശ്യമാകുന്നതാണ്. എതിരാളികളുടെ ഉപജാപങ്ങളെ ചെറുക്കാൻ കഴിയും. കലാപ്രവർത്തനം കൊണ്ട് പൊതുജനമധ്യത്തിൽ സ്വീകാര്യതയും അംഗീകാരം നേടിയെടുക്കുന്നതാണ്.

ഭരണി

നക്ഷത്രാധിപനായ ശുക്രൻ പതിനൊന്നിലേക്ക് സംക്രമിക്കുകയാൽ ന്യായമായ ആഗ്രഹങ്ങൾ നിറവേറപ്പെടും. ഉദ്യോസ്ഥർക്ക് അധികാരം നിലനിർത്താനാവും. പുതുപദവികൾ / ചുമതലകൾ ലഭിച്ചേക്കാം. നിക്ഷേപങ്ങളിൽ നിന്നും ലാഭം ഉയരുന്നതാണ്. ചെലവുകൾ നിയന്ത്രിക്കാൻ സാധിക്കും. സുഖഭോഗങ്ങൾ ഉണ്ടാവും. മറ്റുളളവരുടെ പ്രശംസ നേടുന്ന വിധം കഴിവുകൾ പുറംലോകം അറിയുന്നതാണ്. പരീക്ഷയ്ക്കായി നല്ല തയ്യാറെടുപ്പ് നടത്തും. വാരാദ്യത്തിൽ സുഖക്കുറവുണ്ടാകും.

കാർത്തിക

നല്ലകാര്യങ്ങൾ മനസ്സിലുണ്ടാവും. എന്നാൽ പ്രായോഗികമാവാൻ ക്ലേശിച്ചേക്കും. പ്രതീക്ഷിച്ച കേന്ദ്രങ്ങളിൽ നിന്നും സഹായം ലഭിക്കണമെന്നില്ല. വെറുതെയായല്ലോ എന്ന തോന്നലും ഉണ്ടായേക്കും. എന്നാലും 10,11 ഭാവങ്ങളിലെ ഗ്രഹാനുകൂല്യത്താൽ ചില നേട്ടങ്ങളെങ്കിലും കരഗതമാവാതിരിക്കില്ല. തൊഴിൽ തേടുന്നവർക്ക് ശുഭവാർത്ത പ്രതീക്ഷിക്കാം. ധനപരമായി ആശ്വസിക്കാറാവും. പഠിതാക്കൾ ആത്മവിശ്വാസത്തോടെ പരീക്ഷയെ നേരിടുന്നതാണ്. 

രോഹിണി

സർഗപരമായ കഴിവുകൾ വളർത്താനാവും. ഗാനം, ചിത്രകല, സാഹിത്യം മുതലായ മേഖലകളിൽ കൂടുതൽ പഠനം നടത്തും. അതിന്നൊപ്പം തന്നെ ലോകവിജ്ഞാനം സമ്പാദിക്കുന്നതിന് സമയം കണ്ടെത്തുന്നതാണ്. ചൊവ്വ, ബുധൻ ദിവസങ്ങളിൽ ശുഭകാര്യാരംഭം ഉചിതമല്ല. കൊടുക്കൽ വാങ്ങലുകളിൽ ശ്രദ്ധ വേണം. വാക്കുകൾക്ക് പാരുഷ്യം ഏറുന്നതായി പരാതി കേൾക്കുന്നതാണ്. മകൻ്റെ പരീക്ഷയ്ക്ക് മാനസിക പിന്തുണ നൽകാൻ ലീവെടുക്കും. സഹപ്രവർത്തകർ അധികച്ചുമതല ഏറ്റെടുക്കുന്നതാണ്.

മകയിരം

ഗുണദോഷങ്ങൾ മാറി മാറി അനുഭവപ്പെടുന്ന ആഴ്ചയാണ്. അഷ്ടമരാശിക്കൂറ് വരുന്നതിനാൽ മനസ്സ് ഇടയ്ക്ക് വ്യാകുലമാകും. ചിന്ത കൂടുന്നതാണ്. എന്നാൽ കർമ്മരംഗത്ത് ഉദാസീനത പ്രകടമാവും. കുടുംബാംഗങ്ങളുടെ രോഗമോ വിഷമതകളോ തന്നെയും ബാധിച്ചേക്കും. വസ്തുവിൻ്റെ വില്പന കുറച്ചുകൂടി നീളുന്നതാണ്. സർക്കാരിൽ നിന്നും ലഭിക്കേണ്ട അനുമതി അവസാനനിമിഷം വന്നെത്തിയേക്കും. തട്ടകത്തിൻ്റെ ആഘോഷങ്ങളിൽ മുഴുമനസ്സോടെ പങ്കെടുക്കാൻ സാഹചര്യം അനുകൂലമല്ലെന്ന് വരാം.

തിരുവാതിര

പങ്കുകച്ചവടത്തിൽ നിന്നും തരക്കേടില്ലാത്ത നേട്ടങ്ങളുണ്ടാകും. വ്യാപാരയാത്രകൾ ഗുണകരമാവുന്നതാണ്. വായ്പയുടെ തിരിച്ചടവ് സാധ്യമാകും. സാമ്പത്തിക കാര്യങ്ങൾ അനുകൂലമായേക്കും. ദാമ്പത്യത്തിൽ സംതൃപ്തി ഉണ്ടാകുന്നതാണ്. കുടുംബത്തോടൊപ്പം വിനോദയാത്രകൾ, വിശിഷ്ട ഭോജ്യം, ബന്ധുസന്ദർശനം ഇവയ്ക്കവസരം ഉണ്ടാകും. കർമ്മമേഖലയിൽ ഉണർവ്വനുഭവപ്പെടും. ഗതകാലസ്മരണകൾ മനസ്സിനെ ആർദ്രമാക്കുന്നതാണ്. വ്യാഴം, വെള്ളി ദിവസങ്ങൾക്ക് മേന്മ കുറയാം. വാഹനം ഉപയോഗിക്കുന്നതിൽ ജാഗ്രതയുണ്ടാവണം.

പുണർതം

ശുഭകാര്യങ്ങൾ നടക്കുന്നതാണ്. മകളുടെ കല്യാണക്കാര്യം ഏതാണ്ട് തീരുമാനിച്ചേക്കും. സാമ്പത്തിക ആവശ്യങ്ങൾക്ക് നാട്ടിലെ വസ്തുവിൽക്കാൻ ശ്രമം തുടങ്ങുന്നതാണ്. കിടപ്പ് രോഗികൾക്ക് ആശ്വാസം കിട്ടുന്നതായിരിക്കും. തൊഴിലിടത്തിൽ കാര്യങ്ങൾ ഭംഗിയായി മുന്നോട്ടുപോകും. അധികച്ചുമതലകൾ സഹപ്രവർത്തകർ ഏറ്റെടുക്കുന്നതാണ്. പരീക്ഷക്കൊരുങ്ങുന്നവർ ആലസ്യം ഉപേക്ഷിക്കണം. വ്യാഴം, വെള്ളി ദിവസങ്ങളിൽ പുതുകാര്യങ്ങൾ തുടങ്ങാതിരിക്കുന്നത് ഉത്തമം.

പൂയം

ഗാർഹിക സുഖം അനുഭവപ്പെടുന്നതാണ്. വീടിൻ്റെ പുതുക്കിപ്പണി പൂർത്തിയായേക്കും. വിലകൂടിയ എന്നാൽ അത്യാവശ്യം ആയ ചില ഗൃഹോപകരണങ്ങൾ വാങ്ങാനിടയുണ്ട്. സുഹൃത്തുക്കളുടെ പിന്തുണ വേണ്ടുവോളം ലഭിക്കുന്നതാണ്. പ്രണയികൾക്ക് സ്വാതന്ത്ര്യം അനുഭവിക്കാനാവും. മകൻ്റെ പഠനത്തിലും പരീക്ഷാ തയ്യാറെടുപ്പുകളിലും തൃപ്തി തോന്നാം. ജീവകാരുണ്യ പ്രവർത്തനങ്ങളിൽ സ്വയമേവ മുന്നോട്ടിറങ്ങിയേക്കും. ശനിയാഴ്ച അഷ്ടമരാശിക്കൂറ് ആകയാൽ മനോവാക്കർമ്മങ്ങളിൽ ജാഗ്രത പുലർത്തണം.

ആയില്യം

നക്ഷത്രാധിപനായ ബുധൻ  മൗഢ്യത്തിലാണ്. ഈയാഴ്ച പകുതി മുതൽ നീചത്തിലും പ്രവേശിക്കുന്നു. അതിനാൽ സമയത്തിൻ്റെ അനുകൂലത കുറയാം. എളുപ്പത്തിൽ നേടാം എന്ന് കരുതിയവ അങ്ങനെയല്ലെന്ന് വരുന്നതാണ്. വേണ്ടപ്പെട്ടവരുടെ വിരഹ - വിയോഗ വാർത്ത മനസ്സിനെ മ്ളാനമാക്കും.  വീടുവിട്ടു നിൽക്കേണ്ട സാഹചര്യം ഒരു സാധ്യതയാണ്. ന്യായമായ ആവശ്യങ്ങൾക്ക് പണം തടസ്സമാവില്ല. ഉദ്യോഗസ്ഥർക്ക് മുഷിഞ്ഞ് ജോലി ചെയ്യേണ്ടിവരും. ഒരിക്കൽ പൂർത്തിയാക്കിയ ജോലി പിന്നെയും ആദ്യം മുതൽ തുടരപ്പെടുന്നതാണ്.

മകം

മനസ്സില്ലാ മനസ്സോടെ ചില സഹായഹസ്തങ്ങൾ സ്വീകരിക്കേണ്ടിവരും. സാധാരണ ചെയ്യുന്ന പ്രവൃത്തികൾ തടസ്സം കൂടാതെ നിർവഹിക്കാനായേക്കും. പ്രിയസുഹൃത്തുക്കളെ കാണാനാവും. തൊഴിലിടം സംതൃപ്തി ദായകമാവില്ല. സഹപ്രവർത്തകരുടെ ഗൂഢാലോചന തിരിച്ചറിയും. പരീക്ഷാർത്ഥികൾക്ക് നല്ല സമയമാണ്. ദാമ്പത്യത്തിൽ സ്വച്ഛത അനുഭവപ്പെടണമെന്നില്ല. രാഷ്ട്രീയ സംഭാഷണം എതിരാളികളെ സൃഷ്ടിച്ചേക്കും. കരാറുകളിലും വ്യവസ്ഥകളിലും ഏർപ്പെടുമ്പോൾ നിയമാവലിയെക്കുറിച്ച് മനസ്സിലാക്കാൻ മറക്കരുത്.

• ദാമ്പത്യത്തിൽ തൃപ്തി കുറയും, സ്വകാര്യജോലിയിൽ പിരിമുറുക്കം കൂടും; കുംഭമാസത്തിലെ 6 നാളുകാരുടെ നക്ഷത്രഫലം
• ആരോഗ്യത്തിൽ ശ്രദ്ധ വേണം, പണച്ചെലവിന് സാധ്യത; കുംഭമാസത്തിലെ 6 നാളുകാരുടെ നക്ഷത്രഫലം
• തൊഴിലിടങ്ങളിൽ സ്ഥാനക്കയറ്റം, സാമ്പത്തിക നേട്ടം; കുംഭമാസത്തിൽ ഈ 6 നാളുകാർക്ക് ഗുണകരം

പൂരം

ഗുണാനുഭവങ്ങൾ കുറച്ചൊക്കെ ഉണ്ടാവും. കരുതിയ കാര്യങ്ങൾ ചെയ്യാൻ സാഹചര്യം അനുകൂലമാവും. ജീവിതത്തിൽ 'അടുക്കും ചിട്ടയും' വരുത്താൻ വൃഥാശ്രമം നടത്തുന്നതാണ്. പൊയ്മുഖങ്ങളെ പെട്ടെന്ന് തിരിച്ചറിയാൻ കഴിഞ്ഞേക്കില്ല. ചെറിയ കാര്യങ്ങൾ മൂലം കുടുംബ ജീവിതം ഇടയ്ക്കിടെ കലങ്ങിമറിയുന്നതാണ്. ബന്ധുക്കൾ 'എരിതീയിൽ എണ്ണ ഒഴിക്കാൻ' മടിക്കില്ല. കലാപ്രവർത്തനം മന്ദീഭവിച്ചേക്കും. സാമ്പത്തിക പിരിമുറുക്കം ഒഴിയുന്നതാണ്. ന്യായമായ വിധം ചെലവുചെയ്തേക്കും.

ഉത്രം

ചിന്തിച്ച് പ്രവർത്തിക്കാൻ കഴിയും. സ്വന്തം ബലഹീനതകളെ തിരിച്ചറിയുന്നതാണ്. പൊതുപ്രവർത്തനത്തിൽ വിജയിക്കാനും സ്വാധീനം നേടാനുമാവും.  സ്വജനങ്ങളുടെ ആവശ്യം നിറവേറ്റിക്കൊടുക്കും. അതിനായി  വളഞ്ഞ വഴികൾ സ്വീകരിച്ചെന്ന് വരാം. പഠനാർത്ഥികൾക്ക് പരീക്ഷയിൽ നന്നായി എഴുതാനായേക്കും. തന്മൂലം ആത്മവിശ്വാസം വർദ്ധിക്കുന്നതാണ്. വേനലവധിയിൽ  യാത്രകളുടെ പദ്ധതി സൃഷ്ടിക്കും. ചില സുഹൃത്തുക്കളോട് സാമ്പത്തിക സഹായം ആവശ്യപ്പെടുന്നതാണ്.

അത്തം

കുടുംബ കലഹങ്ങൾ വർദ്ധിച്ചേക്കാം. ഏഴിലെ രാഹുവും വാരമധ്യത്തോടെ അവിടേക്കെത്തുന്ന ബുധനും ദാമ്പത്യത്തെ അശാന്തമാക്കുന്നതാണ്. ഗവൺമെൻ്റിൽ നിന്നും ലഭിക്കേണ്ട അനുമതിപത്രം ലഭിച്ചേക്കും. ഉദ്യോഗസ്ഥർക്ക് ആശ്വാസം കൈവരുന്ന വാരമാണ്. ക്ഷേത്രാടനത്തിന് ഒരുങ്ങും. ചെറുപ്പക്കാരുടെ കൂട്ടുകെട്ടിനെച്ചൊല്ലി വീട്ടിൽ നിയന്ത്രണം ഉണ്ടായേക്കും. അപവാദത്തിന് പാത്രമാകുന്നതാണ്. ബന്ധുക്കളിൽ ചിലരെ വിരോധികളുടെ സ്ഥാനത്ത് കണ്ടെത്തും.

ചിത്തിര

നക്ഷത്രനാഥനായ ചൊവ്വയ്ക്ക് ബലമുള്ളതിനാൽ തൊഴിൽ പ്രതിസന്ധികളോ, ദേഹക്ലേശമോ ഉണ്ടായാലും മറികടക്കുവാനാവും. ആത്മവിശ്വാസം തരിമ്പും കുറയില്ല. വാഹനം വാങ്ങാൻ തീരുമാനിക്കുന്നതാണ്. കുടുംബത്തിലെ ഇളം തലമുറയുടെ വിവാഹം സംബന്ധിച്ച് ശുഭകരമായ തീരുമാനം ഉണ്ടായേക്കും.  പ്രണയപരവശർക്ക് ഐക്യപ്പെടാനും ഉറച്ച ചുവടുവെയ്പ് നടത്താനും സാധിച്ചേക്കും. വാഗ്ദാനങ്ങൾ പാലിക്കാൻ കഴിയും. അതുസംബന്ധിച്ച ആക്ഷേപങ്ങൾ അവസാനിക്കുന്നതാണ്.

ചോതി

നേർവഴി മാത്രമല്ല വളഞ്ഞവഴിയും കാര്യസാധ്യത്തിന് വേണ്ടിവരും. ബിസിനസ്സ് യാത്രകൾ പതിവിലും കൂടുതൽ ഉണ്ടാവുന്നതാണ്. സഹപ്രവർത്തകർ സഹകരിച്ചേക്കും. സ്വദേശത്തേക്ക്  സ്ഥലം മാറ്റത്തിനുള്ള ശ്രമം വിജയിക്കണമെന്നില്ല. രഹസ്യ നീക്കങ്ങൾ ചിലർ മുൻകൂട്ടി അറിയാനിടവരുന്നതാണ്. സംഘടനാ പ്രവർത്തനത്തിന് കൂടുതൽ സമയം ചെലവഴിച്ചേക്കും. ബൗദ്ധിക വിനോദങ്ങളിൽ താല്പര്യമേറുന്നതാണ്. സഹോദരിയുടെ വിവാഹകാര്യത്തിൽ അനുകൂലമായ തീരുമാനം ഉണ്ടാകും.

വിശാഖം

പണച്ചെലവിൽ നിയന്ത്രണം ഉണ്ടാവില്ല.  ആഢംബര വസ്തുക്കൾ വാങ്ങുന്നതാണ്.  കരാർപണികളിൽ പറയത്തക്ക ഗുണം കണ്ടേക്കില്ല. തൊഴിൽ ഉപേക്ഷിച്ചാലോ എന്ന ചിന്ത ഉയർന്നേക്കും. സുഹൃത്തിൻ്റെ നിർബന്ധത്താൽ അന്യനാട്ടിൽ ജോലിക്ക് ശ്രമിക്കുന്നതാണ്. രാഷ്ട്രീയ ചർച്ചകളിൽ ആവേശപൂർവ്വം മുഴുകുന്നതായിരിക്കും. സമൂഹമാധ്യമങ്ങളിലെ പ്രസ്താവനകൾ ശത്രുക്കളെ സൃഷ്ടിക്കാം. ഗവേഷകർക്ക് പുതുമയുള്ള കണ്ടുപിടുത്തങ്ങളിലേക്ക് ജനശ്രദ്ധയെ ആകർഷിക്കാനാവും.

അനിഴം

ആരോഗ്യം അല്പാല്പമായി വീണ്ടെടുക്കാനാവും. കുത്തഴിഞ്ഞുകിടന്ന തൊഴിലിടം പുനർക്രമീകരിക്കാനുള്ള ഊർജ്ജിത ശ്രമം തുടരുന്നതാണ്. കുടുംബാംഗങ്ങളുടെ വിശിഷ്യാ സഹോദരരുടെ നിർലോഭമായ സഹായ സഹകരണം ലഭിച്ചേക്കും. സുഹൃത്തുക്കളും ബന്ധുക്കളും നിസ്സാരകാര്യങ്ങളിലുള്ള വിരോധം തുടരുന്നതാണ്. വിദ്യാർത്ഥികളുടെ പഠനത്തിൽ രക്ഷാകർത്താക്കൾ 'പ്രത്യേക ശ്രദ്ധ പതിപ്പിക്കേണ്ടതുണ്ട്. ജാമ്യം നിൽക്കുക തുടങ്ങിയ കാര്യങ്ങളിൽ കരുതൽ പുലർത്തണം.

തൃക്കേട്ട

നക്ഷത്രനാഥനായ ബുധൻ ഈയാഴ്ച നീചരാശിയിൽ പ്രവേശിക്കുകയാണ്. അകാരണമായ ഭയം, അവഹേളനം, അംഗീകാരക്കുറവ് ഇവ ഇതിൻ്റെ ഫലമായി അനുഭവപ്പെട്ടേക്കാം. ലക്ഷ്യത്തിലെത്താൻ കൂടുതൽ അധ്വാനിക്കേണ്ടിവരും. ഏറ്റവും അടുത്ത വ്യക്തികൾ പോലും തെറ്റിദ്ധരിച്ചേക്കും. മനസ്സമാധാനവും തെല്ല് കുറയുന്നതാണ്. ഗാർഹികാന്തരീക്ഷം അത്ര മെച്ചപ്പെട്ടതാവില്ല. വിദ്യാർത്ഥികൾ പാഠഭാഗങ്ങൾ മറന്നുപോകാനിടയുണ്ട്. സാമ്പത്തികമായി സ്ഥിതി മോശമല്ല. ന്യായമായ ആവശ്യങ്ങൾ ഒരുവിധം ഭംഗിയായിത്തന്നെ നിർവഹിക്കപ്പെടുന്നതാണ്.

മൂലം

ഗൃഹത്തിൽ സ്വൈരക്കേടുണ്ടാകും. അംഗങ്ങളിൽ പരസ്പരം ഉള്ള സ്നേഹം നഷ്ടപ്പെടാം. വാഹനത്തിന് കേടുപാടുകൾ വരാനിടയുണ്ട്. പാഴ്ച്ചെലവുകൾ നിയന്ത്രിക്കാനാവില്ല. സഹോദരിയിൽ നിന്നും നല്ല പിന്തുണ ലഭിക്കുന്നതാണ്. പരുഷവാക്കുകൾ ശത്രുക്കളെ സൃഷ്ടിച്ചേക്കും. തീർത്ഥാടനത്തിന് പെട്ടെന്ന് തീരുമാനിച്ച് പോകാനാവുന്നതാണ്. നല്ല ചിന്തകൾ മനസ്സിൽ നിറയാൻ തന്മൂലം സാധിച്ചേയ്ക്കും. സർട്ടിഫിക്കേറ്റ് / അനുമതിപത്രം ഇവ സർക്കാരിൽ നിന്നും ഈയാഴ്ച ലഭിക്കുവാനിടയുണ്ട്.

പൂരാടം

ശരാശരിക്കാലമാണ്. ഒരു ഗുണത്തിന് ഒരു ദോഷം എന്ന നിലയിലാവും കാര്യം. മകൻ്റെ പഠന നിലവാരം പ്രതീക്ഷക്കൊത്ത് ഉയരണമെന്നില്ല. മനസ്സമാധാനം കുറയുന്നതാണ്. വിരുന്നുകാർക്കൊപ്പം ചുറ്റിക്കറങ്ങാൻ കൂടേണ്ടിവരും. മുന്തിയ ഗാർഹികോപകരണം വാങ്ങിയേക്കും. തൊഴിൽപരമായി ചിലർക്ക് യാത്രകൾ വേണ്ടിവരുന്നതാണ്. സാമ്പത്തിക ഞെരുക്കത്തിന് അയവുണ്ടാവും. ചിട്ടി, ലോൺ മുതലായവ പ്രയോജനപ്പെടുത്തും. സാധാരണ ചെയ്യുന്ന കാര്യങ്ങൾ മുടക്കം വരാതെ നടന്നുകിട്ടും. വസ്തു വാങ്ങുന്ന കാര്യത്തിൽ തീരുമാനം എടുത്തേക്കും.

ഉത്രാടം

കൂട്ടുകാർക്കൊപ്പം ഉല്ലസിക്കാനാവും. എല്ലാക്കാര്യങ്ങളിലും ഉന്മേഷമുണ്ടാവും. അകലങ്ങളിൽ കഴിയുന്ന സഹോദരരെ കാണാനിടവരുന്നതാണ് പുതുമുറക്കാരെ ഉപദേശിച്ചേക്കും വേതനമോ ന്യായമായി ലഭിക്കേണ്ട ധനമോ യഥാസമയം വന്നുചേരുന്നതാണ്. കൈവായ്പകൾ മടക്കിക്കൊടുക്കും. വിദ്യാർത്ഥികൾ പ്രധാന പരീക്ഷകൾ നന്നായിത്തന്നെ എഴുതുന്നതാണ്. പിതാവിൻ്റെ ആരോഗ്യകാര്യത്തിലെ ആശങ്കകൾ ഒഴിയുന്നതായിരിക്കും. വാരാന്ത്യദിവസങ്ങളിൽ ചിലവേറും. അലച്ചിലുണ്ടാവുന്നതാണ്.

തിരുവോണം

കുടുംബകാര്യത്തിൽ തികഞ്ഞ യാഥാസ്ഥിതിക നിലപാടെടുത്തേക്കും. വാക്പാരുഷ്യം കൂട്ടുകാരെ വേദനിപ്പിക്കുന്നതാണ്. അകത്തും പുറത്തുമുള്ള എതിർപ്പുകൾക്ക് നേരെ ജാഗ്രത പുലർത്തും. ഉദ്യോഗസ്ഥർക്ക് പ്രതീക്ഷിച്ച സ്ഥാനലബ്ധി ഉണ്ടായേക്കില്ല. തറവാട്ടിലെ പൂജാദികർമ്മങ്ങൾക്ക് മുൻകൈയെടുക്കും. വാരാദ്യ ദിവസങ്ങളിൽ അപ്രതീക്ഷിത ധനാഗമം ഉണ്ടാവുന്നതാണ്. ബന്ധുക്കളുടെ കാര്യത്തിൽ ഇടപെടുന്നത് ജാഗ്രതയോടെ വേണം. വാദി പ്രതിയാവാൻ സാധ്യതയുണ്ട്.

അവിട്ടം

ജന്മനക്ഷത്രത്തിലും മുന്നേയും ആയി പാപഗ്രഹങ്ങൾ സഞ്ചരിക്കുന്നതിനാൽ മനസ്സംഘർഷം അനുഭവപ്പെടുന്നതായിരിക്കും. പലതിനും വ്യക്തമായ കാരണം ഉണ്ടാവണം എന്നില്ല. നിലവിലെ ആരോഗ്യപ്രശ്നങ്ങൾ അധികരിക്കുന്നതായി അനുഭവപ്പെടുന്നതാണ്. തൊഴിൽ വിപുലീകരണത്തിന് / വലിയ മുതൽമുടക്കിന് കാലം അനുകൂലമല്ല. തൊഴിൽ ഉപേക്ഷിച്ചാൽ പുതിയ ജോലി ഉടനെ ലഭിക്കണമെന്നുമില്ല. ജീവിത പങ്കാളിയുടെ ഹിതോപദേശം സ്വീകരിച്ചേക്കില്ല. ഞായർ മുതൽ വ്യാഴം വരെ കൂടുതൽ ഗുണകരമായ ദിവസങ്ങളാണ്.

ചതയം

മൗഢ്യം വന്ന ശനി ജന്മനക്ഷത്രത്തിൽ തുടരുന്നതിനാൽ പലതരം അസ്വസ്ഥതകളുണ്ടാവും. എന്താണ് യഥാർത്ഥ കാരണമെന്ന് വ്യക്തമാവുകയുമില്ല. എളുപ്പത്തിൽ നേടാമെന്ന് കരുതിയവ അങ്ങനെയാവില്ല. വരവുണ്ടാകുന്നതാണ്. ഉദ്യോഗസ്ഥർക്കും കച്ചവടക്കാർക്കും സാമ്പത്തികമായ ഗുണം പ്രതീക്ഷിക്കാം. പക്ഷേ ഊഹക്കച്ചവടം നഷ്ടത്തിൽ കലാശിക്കും. ഭൂമിസംബന്ധിച്ച പൊല്ലാപ്പുകൾ സ്വൈരം കെടുത്തിയേക്കും. കുടുംബ ബന്ധങ്ങളുടെ താളം നിലനിർത്താൻ വ്യക്തിപരമായ ഇഷ്ടങ്ങൾ വേണ്ടെന്നുവെച്ചേക്കാം.

പൂരൂരുട്ടാതി

വാരാന്ത്യത്തിലൊഴികെ മെച്ചപ്പെട്ട ആഴ്ചയാണ്. ചെയ്യുന്ന കാര്യങ്ങൾക്ക് പൂർണമായ അംഗീകാരം കിട്ടും. കച്ചവടത്തിൽ ലാഭത്തിനാവും മുൻതൂക്കം ഉണ്ടാവുക. ഏജൻസി / കമ്മീഷൻ ഏർപ്പാടുകൾ ശക്തിപ്പെടുന്നതാണ്. പുതുപദവികളോ ചുമതലകളോ ലഭിക്കാം. സജ്ജനങ്ങളുടെ സൗഹൃദവും ഗുണോപദേശവും ചെവിക്കൊള്ളും. ദാമ്പത്യത്തിൽ സമാധാനം നിലനിൽക്കും. ഗൃഹനിർമ്മാണത്തിൽ ഏർപ്പെട്ട ഇഴച്ചിൽ മാറും. കുംഭക്കൂറുകാർ ആരോഗ്യപരമായി ഏറ്റവും ജാഗ്രത പുലർത്തേണ്ടതുണ്ട്.

ഉത്രട്ടാതി

കർമ്മഗുണം ഉള്ള വാരമാണ്. ആത്മാർത്ഥത ആദരിക്കപ്പെടും. സഹപ്രവർത്തകരുടെ പിന്തുണ ലഭിക്കുന്നതായിരിക്കും. തൊഴിലുമായി ബന്ധപ്പെട്ട് വാരാന്ത്യത്തിൽ യാത്രയുണ്ടാവുന്നതാണ്. ചെറുകിട സംരംഭകർക്കും ചില നേട്ടങ്ങൾ വരുന്നതാണ്. കുടുംബകാര്യങ്ങളിൽ കർക്കശ നിലപാട് കൈക്കൊള്ളുന്നതുമൂലം ചില ആത്മസംഘർഷങ്ങൾ ഉണ്ടാവാം. ബന്ധുക്കളുടെ പ്രശ്നങ്ങളിൽ ഇടപെടുന്നത് ദുഷ്കീർത്തിക്ക് കാരണമാകുന്നതാണ്. വിദ്യാർത്ഥികൾക്ക് തൃപ്തികരമാം വണ്ണം പരീക്ഷയെഴുതാൻ കഴിഞ്ഞേക്കും.

രേവതി

ജന്മരാഹു ഉത്സാഹത്തിൻ്റെ കനൽക്കട്ടക്കു മേൽ അലസതയുടെ വെള്ളമൊഴിക്കും. സമയബന്ധിതമായി പൂർത്തിയാക്കേണ്ട ഉത്തരവാദിത്വങ്ങൾ പ്രത്യേക കാരണം കൂടാതെ തന്നെ പിന്നീടത്തേക്ക് മാറ്റിവെക്കുന്നതാണ്. ചില വാക്കുകൾ മറ്റുള്ളവരുടെ ഹൃദയത്തിൽ മുറിവുണ്ടാക്കും. ന്യായമായ രീതിയിൽ വരവുണ്ടാകുന്നതാണ് ഊഹക്കച്ചവടത്തിൽ ലാഭം പ്രതീക്ഷിക്കാം. ചൊവ്വ മുതൽ വെള്ളി വരെയുള്ള ദിവസങ്ങളിൽ ഗുണാനുഭവങ്ങൾക്കാവും മേൽക്കൈ. വാരാന്ത്യത്തിൽ വ്യക്തിപരമോ തൊഴിൽ പരമോ ആയിട്ടുള്ള യാത്രകൾ ഉണ്ടാവുന്നതാണ്.

Read More: 

• ബുധൻ ദുർബലനാകുമ്പോൾ, അശ്വതി മുതൽ രേവതി വരെയുള്ളവരുടെ നക്ഷത്രഫലം
• 2024 മാർച്ച് മാസത്തിലെ സമ്പൂർണ്ണ നക്ഷത്രഫലം, അശ്വതി മുതൽ രേവതി വരെ: March 2024 Horoscope
• കുംഭമാസത്തെ സമ്പൂർണ്ണ നക്ഷത്രഫലം, അശ്വതി മുതൽ രേവതി വരെ
• പ്രണയിക്കുന്നവർക്ക് അനുകൂലമല്ല, ജോലിസ്ഥലത്ത് സമ്മർദം ഉണ്ടാവാം; കുംഭമാസത്തിലെ 6 നാളുകാരുടെ നക്ഷത്രഫലം