2024 മാർച്ച് മാസത്തിലെ സമ്പൂർണ്ണ നക്ഷത്രഫലം, അശ്വതി മുതൽ രേവതി വരെ: March 2024 Horoscope

മാർച്ച് 13 വരെ കുംഭമാസമാകയാൽ ആദിത്യൻ കുംഭം രാശിയിലും തുടർന്ന് മീനമാസമാകയാൽ ആദിത്യൻ മീനം രാശിയിലും സഞ്ചരിക്കും. ചതയം, പൂരൂരുട്ടാതി, ഉത്രട്ടാതി എന്നീ ഞാറ്റുവേലകൾ മാർച്ചിലുണ്ട്. മാർച്ച് 31 ന് രേവതി ഞാറ്റുവേല തുടങ്ങും.

ചന്ദ്രൻ മാർച്ച് ഒന്നിന് കൃഷ്ണപക്ഷ ഷഷ്ഠി ചോതി നക്ഷത്രത്തിലാണ്. മാർച്ച് 31 നും കൃഷ്ണപക്ഷ ഷഷ്ഠി തന്നെയാണ്. നക്ഷത്രം തൃക്കേട്ടയും. മാർച്ച് 10 ന് ആണ് അമാവാസി അഥവാ കറുത്തവാവ്; മാർച്ച് 25 ന് പൗർണമി അഥവാ വെളുത്തവാവും. 

മാർച്ച് 15 ന് ചൊവ്വ കുംഭം രാശിയിൽ പ്രവേശിക്കുന്നു. ബുധൻ മാർച്ച് 7 ന് മീനത്തിലും മാർച്ച് 25 ന് മേടത്തിലും സംക്രമിക്കും. മാർച്ച് 15 ന് ബുധൻ്റെ മൗഢ്യം തീരുന്നു. മീനം രാശി ബുധൻ്റെ നീച ക്ഷേത്രമാണ്. വ്യാഴം മേടം രാശിയിൽ ഭരണി നക്ഷത്രത്തിലാണ് തുടരുന്നത്.

ശുക്രൻ മാർച്ച് 7 ന് കുംഭത്തിലും മാർച്ച് 18 ന് മീനത്തിലും പകരുന്നു. മീനം ശുക്രൻ്റെ ഉച്ചരാശിയാണ്. ശനി കുംഭം രാശിയിൽ ചതയം നക്ഷത്രത്തിൽ തുടരുന്നു. മാർച്ച് 18 ന് ശനിയുടെ വാർഷികമായ മൗഢ്യം തീരുകയുമാണ്.

രാഹു മീനം രാശിയിൽ രേവതി നക്ഷത്രത്തിൻ്റെ രണ്ടാം പാദത്തിലാണ്. കേതു കന്നിരാശിയിൽ ചിത്തിര നക്ഷത്രത്തിൽ സഞ്ചരിക്കുന്നു. മാർച്ച് 6-ാം തീയതി മുതൽ കേതു അത്തം നാളിലാണ് സഞ്ചരിക്കുക. രാഹുകേതുക്കളുടെ സഞ്ചാരം പിന്നിലേക്കാണ്. ഇതിനെ 'അപസവ്യഗതി'  (Anti Clockwise) എന്ന് വിളിക്കുന്നു.

ഈ ഗ്രഹനിലയുടെ പശ്ചാത്തലത്തിൽ 2024 മാർച്ച് മാസത്തിലെ അശ്വതി മുതൽ രേവതി വരെയുള്ള  27  നക്ഷത്രങ്ങളുടെ സമ്പൂർണ്ണ നക്ഷത്രഫലം ഇവിടെ അവതരിപ്പിക്കുന്നു.

അശ്വതി

മാസത്തിൻ്റെ ആദ്യപകുതിയിൽ സർക്കാർ സംബന്ധിച്ച കാര്യങ്ങളിൽ നേട്ടവും കാര്യസാദ്ധ്യവും പ്രതീക്ഷിക്കാം. ഉദ്യോഗസ്ഥർക്ക് പലതരത്തിൽ മെച്ചമുണ്ടാവുന്നതാണ്. രണ്ടാം പകുതിയിൽ ഗുണാനുഭവങ്ങൾക്ക് മങ്ങലുണ്ടാവും. സാമ്പത്തിക സ്ഥിതി മോശമാവില്ല.

ഭൂമി വാങ്ങാനോ വിൽക്കാനോ കഴിയുന്നതാണ്. ലാഭം പ്രതീക്ഷിച്ചതിലധികമാവും. ബിസിനസ്സ് രംഗം പുഷ്ടിപ്പെടും. വിദേശത്ത് പഠനം, ജോലി എന്നിവയ്ക്ക് ശ്രമിക്കുന്നവർക്ക് കാലം അനുകൂലമാണ്. അവസാനിക്കാതെ നീണ്ടുപോകുന്ന വ്യവഹാരങ്ങൾ അനുരഞ്ജനത്തിലാവും. അവസരോചിത തീരുമാനങ്ങളുടെ പേരിൽ അഭിനന്ദിക്കപ്പെടും. പാദരോഗങ്ങൾ, വാതം, പകർച്ചവ്യാധി ഇവ ഉപദ്രവിക്കാം.

ഭരണി

കർമ്മരംഗത്തിൽ ശുഷ്കാന്തി തുടരും. സമൂഹമദ്ധ്യത്തിൽ ആദരവ് ലഭിക്കുന്നതാണ്. സ്വന്തം ആദർശത്തിൽ ഉറച്ചുനിൽക്കും. പദവിയിൽ കയറ്റമോ വേതന വർദ്ധനവോ  ശക്തമായ സാധ്യതയാണ്. രാഷ്ട്രീയക്കാർക്ക് / പൊതുപ്രവർത്തകർക്ക് പോരാട്ട വീര്യം ഉണ്ടാവും. ജോലിക്ക് ശ്രമിക്കുന്നവർക്ക് നിരാശപ്പെടേണ്ടി വരില്ല.

മാസത്തിൻ്റെ രണ്ടാം പകതിയിൽ കനിഷ്ഠസഹോദരരെക്കൊണ്ട് ഗുണാനുഭവങ്ങൾ പ്രതീക്ഷിക്കാം. വസ്തു/വീട് ഇവ സംബന്ധിച്ച കാര്യങ്ങളിൽ മേന്മ വന്നു ചേരുന്നതാണ്. കലാകാരന്മാർക്ക് നല്ല അവസരങ്ങൾ സംജാതമാകും.  പഠന വിഷയകമായി ശ്രദ്ധ വേണം. യാത്ര ചെയ്യുമ്പോൾ നല്ല ജാഗ്രത അനിവാര്യമാണ്. സാംക്രമിക രോഗങ്ങൾ ഉപദ്രവിച്ചേക്കാം.

കാർത്തിക

സാധാരണ ചെയ്യുന്ന പ്രവർത്തനങ്ങൾ മുടക്കം കൂടാതെ നിർവഹിക്കും.  തൊഴിൽ സംബന്ധിച്ച കരാറുകളിൽ ഒപ്പിടുന്നതിന് മുൻപ് വ്യവസ്ഥകൾ മനസ്സിലാക്കാൻ ശ്രമിക്കേണ്ടതുണ്ട്. ഔദ്യോഗിക യാത്രകൾ ഉണ്ടാവുന്നതാണ്.  സ്ഥാനക്കയറ്റത്തിന് സാധ്യത കാണുന്നു.  'ഡെപ്യൂട്ടേഷൻ' കഴിഞ്ഞ് പഴയ ലാവണത്തിലേക്ക് മടങ്ങേണ്ടിവരാം. ഗാർഹികമായി സംതൃപ്തിയുണ്ടാവും.

ജീവിത പങ്കാളിയുടെ പിന്തുണ പ്രതീക്ഷിക്കാം. ഊഹക്കച്ചവടത്തിൽ നിന്നും ചെറിയ ലാഭമുണ്ടാകും. പണയ വസ്തുക്കൾ തിരിച്ചെടുക്കാൻ കഴിഞ്ഞേക്കും. വേനലവധിക്ക് വിനോദയാത്ര ചെയ്യാൻ തയ്യാറെടുക്കും. വിദ്യാർത്ഥികളുടെ പരീക്ഷാ തയ്യാറെടുപ്പിന് ആവശ്യമായ പ്രോൽസാഹനം അനിവാര്യമാണ്. സാംക്രമിക രോഗങ്ങൾ, ഉഷ്ണരോഗങ്ങൾ ഇവയ്ക്കെതിരെ മുൻകരുതൽ വേണ്ടതാണ്.

രോഹിണി

ഏജൻസി / ഡിലർഷിപ്പ് ഇത്യാദി ബിസിനസ്സുകൾ നടത്തുന്നവർക്ക്  വിപണിയിൽ വിജയിക്കാനാവും.  സ്വകാര്യ സ്ഥാപനത്തിലെ ജീവനക്കാർക്ക് കൂടുതൽ അദ്ധ്വാനിക്കേണ്ട നില വരുന്നതാണ്. സാങ്കേതിക വിദഗ്ദ്ധർക്ക് വിദേശത്തുനിന്നും  വാഗ്ദാനങ്ങൾ ലഭിച്ചേക്കും. കലാപ്രവർത്തനത്തിലൂടെ ഉപജീവനം കണ്ടെത്തുന്നവർക്ക് പുതിയ അവസരങ്ങൾ സംജാതമാകുന്നതാണ്.

മാസത്തിൻ്റെ രണ്ടാം പകുതിയ്ക്ക്  മെച്ചം കൂടുവാൻ സാധ്യതയുണ്ട്. വായ്പകൾക്കുള്ള അപേക്ഷകൾ അംഗീകരിക്കപ്പെടും. ഏഴാം ഭാവാധിപനായ ചൊവ്വയ്ക്ക് ബലം ഉള്ളതിനാൽ പ്രണയം വിജയിക്കുന്നതാണ്. വളഞ്ഞ വഴികളിൽ കൂടി പണം സമ്പാദിക്കാൻ സാധിക്കും. നല്ല കാര്യങ്ങൾക്ക് ചെലവേർപ്പെടും.

മകയിരം

സമ്മിശ്രഫലം അനുഭവപ്പെടുന്ന കാലമാണ്. അതിനാൽ നേട്ടമെന്നോ കോട്ടമെന്നോ പറയാനാവില്ല. എന്തിനെക്കുറിച്ചും മനസ്സിൽ രണ്ടഭിപ്രായം ജനിക്കും. അനായാസം നേടാൻ കഴിയുമെന്ന് കരുതിയ കാര്യങ്ങൾ തടസ്സപ്പെടാം. ഉദ്യോഗസ്ഥർക്ക് ദുർഘടപ്രശ്നങ്ങൾ പരിഹരിക്കേണ്ട സ്ഥിതി വന്നുചേരും.

കുടുംബാംഗങ്ങളുടെ പിന്തുണ കുറയുന്നതാണ്. അമിതമായ ഉൽക്കണ്ഠ ആരോഗ്യപ്രശ്നങ്ങൾക്ക് വഴിതെളിച്ചേക്കാം. അന്യനാട്ടിൽ കഴിയുന്നവർക്ക് ജന്മനാട്ടിലേക്ക് മടങ്ങാൻ കാലവിളംബം വരുന്നതാണ്. ധനവരവ് മോശമാവില്ല. ഗൂഢമാർഗങ്ങളിലൂടെയും ധനാഗമം പ്രതീക്ഷിക്കാം. തൊഴിൽ തേടുന്നവർക്ക് മാസത്തിൻ്റെ രണ്ടാം പകുതിമുതൽ മെച്ചപ്പെട്ട കാലമാവും.

തിരുവാതിര

പൊതുവേ ആശയക്കുഴപ്പവും ആശങ്കയും അധികരിക്കുന്നതാണ്. പലപ്പോഴും മുന്നോട്ടു വെച്ച കാൽ പിന്നോട്ടെടുത്തേക്കും. ഗാർഹികമായ പ്രശ്നങ്ങൾക്ക് പോംവഴി വിദൂരതയിലാണെന്ന് തോന്നും. ആത്മവിശ്വാസം കുറയുന്നതാണ്. വിദ്യാർത്ഥികൾക്കും ഗവേഷകർക്കും കൂടുതൽ പരിശ്രമം വേണ്ടി വരുന്നതാണ്. ചിലരെ മടിയും മടുപ്പും ബാധിച്ചേക്കാം.

ആത്മീയ സാധനകളിൽ മനസ്സർപ്പിക്കാൻ കഴിഞ്ഞെന്നു വരില്ല. മാസത്തിൻ്റെ രണ്ടാം പകുതി മുതൽ സ്ഥിതഗതികൾ അനുകൂലമായേക്കാം. മകളുടെ വിവാഹകാര്യത്തിൽ ശുഭതീരുമാനം ഉണ്ടാവുന്നതാണ്. രാഷ്ട്രീയകാര്യങ്ങൾക്ക് ഏറെ സമയം ചെലവഴിച്ചേക്കും. പെൻഷൻ സംബന്ധിച്ച രേഖകൾ സമർപ്പിക്കാനും നടപടി സത്വരമാക്കാനും കഴിയുന്നതാണ്.

പുണർതം

ലാഘവബുദ്ധി ഉപേക്ഷിക്കേണ്ടതുണ്ട്.  കഠിനാദ്ധ്വാനം കൊണ്ടുമാത്രമേ ഇപ്പോൾ നേട്ടങ്ങൾ ഉണ്ടാക്കാനാവുകയുള്ളു എന്ന വസ്തുത തിരിച്ചറിയപ്പെടണം. കാര്യങ്ങൾ മുൻകൂട്ടി ആസൂത്രണം ചെയ്യുകയും വേണം. ചൊവ്വയുടെ അനിഷ്ടസ്ഥിതി മനക്ലേശങ്ങൾക്കും ആരോഗ്യപ്രശ്നങ്ങൾക്കും ഇടവരുത്തിയേക്കാം. പത്തിലെ രാഹു  കർമ്മവിമുഖതയരുളും.  

ക്രയവിക്രയങ്ങളിൽ പറ്റിക്കപ്പെടാനിടയുണ്ട്. മാസത്തിൻ്റെ രണ്ടാം പകുതി മുതൽ സ്ഥിതിഗതികൾ മെച്ചപ്പെടാം. വ്യാപാരത്തിൽ ലാഭം ഉണ്ടാകുന്നതാണ്. സഹപ്രവർത്തകരുടെ സഹകരണം ലഭിക്കും. കുടുംബ ബന്ധങ്ങളിൽ ദാർഢ്യം വന്നു ചേരും. മകളുടെ വിവാഹകാര്യത്തിൽ നല്ല തീരുമാനം പ്രതീക്ഷിക്കാം.

• തൊഴിലിടങ്ങളിൽ സ്ഥാനക്കയറ്റം, സാമ്പത്തിക നേട്ടം; കുംഭമാസത്തിൽ ഈ 6 നാളുകാർക്ക് ഗുണകരം
• ആരോഗ്യത്തിൽ ശ്രദ്ധ വേണം, പണച്ചെലവിന് സാധ്യത; കുംഭമാസത്തിലെ 6 നാളുകാരുടെ നക്ഷത്രഫലം

പൂയം

ഗ്രഹങ്ങളുടെ അനിഷ്ടസ്ഥിതി തുടരുകയാണ്. അതിനാൽ കാര്യനേട്ടത്തിന് ഒരുപാട് വിയർപ്പൊഴുക്കേണ്ടി വന്നേക്കും. കൂട്ടുകച്ചവടം തുടരണോ എന്ന കാര്യത്തിൽ സംശയം ഉണ്ടാകുന്നതാണ്. ഉദ്യോഗസ്ഥർക്ക് സൂര്യൻ്റെ വിപരീതസ്ഥിതിയാൽ സ്ഥലംമാറ്റം, പദവിതാഴ്ത്തൽ ഇവ സാധ്യതകളാണ്. ഭാഗ്യവും ഗുണാനുഭവങ്ങളും ഒക്കെ പലപ്പോഴും കപ്പിനും ചുണ്ടിനുമിടയിൽ വഴുതുന്ന സ്ഥിതി വരാം.

പൊതുപ്രവർത്തനത്തിൽ തിരിച്ചടിയുണ്ടാകാം. ജീവിതപങ്കാളിയുമായി അനൈക്യത്തിന് സാഹചര്യം ഒരുങ്ങാം. ക്ഷമയും അവധാനതയും വിട്ടുവീഴ്ചയും ഒപ്പം നിരന്തര പരിശ്രമവും ആണ് ഈ പ്രതികൂലതയെ മറികടക്കാനുള്ള മന്ത്രങ്ങൾ. ആരോഗ്യപരമായ ജാഗ്രതയും വേണം.

ആയില്യം

നക്ഷത്രനാഥനായ ബുധന് മാസമധ്യത്തോളം മൗഢ്യം തുടരുകയാൽ പഠനത്തിൽ ഏറ്റവും ജാഗ്രതയുണ്ടാവണം.  മനസ്സാന്നിദ്ധ്യത്തോടെ വേണം പരീക്ഷയിൽ പങ്കെടുക്കാൻ. ബിസിനസ്സിൽ വലിയ മുതൽമുടക്കുകൾക്കോ നവസംരംഭങ്ങൾക്കോ  ഇപ്പോൾ കാലത്തിൻ്റെ പിന്തുണയില്ല. പിതാവിൻ്റെ ആരോഗ്യത്തിൽ നല്ല ജാഗ്രത വേണം. ദാമ്പത്യപ്രശ്നങ്ങൾ പെട്ടെന്ന് വഷളാകാം. 

വ്യവഹാരാദികൾക്ക് മുതിരാതിരിക്കുക ഉചിതം. പഠനം, തൊഴിൽ മുതലായവക്കായി വിദേശ യാത്രക്ക് ശ്രമിക്കുന്നവർക്ക് അതിനുള്ള അവസരം തെളിയും. ഇൻഷ്വറൻസ്, ചിട്ടി ഇവ മൂലം ചില സാമ്പത്തിക ഗുണങ്ങൾ ഉണ്ടാകും. കൈവായ്പകളിലൂടെ അത്യാവശ്യച്ചിലവുകൾ പരിഹരിക്കാനാവും. സാമ്പത്തിക അച്ചടക്കം അനിവാര്യം.

മകം

റിയൽ എസ്റ്റേറ്റ് ബിസിനസ്സ് ഗുണകരമാവും. ഉദ്യോഗസ്ഥർക്ക് സമ്മർദ്ദമേറുന്നതാണ്. ' മേലധികാരിയുടെ അപ്രീതി നേടും. മടിയും ലക്ഷ്യബോധമില്ലായ്മയും പിടികൂടാം. പുതിയ ആദായമാർഗങ്ങൾക്കുള്ള ശ്രമം തുടരുന്നതാണ്. കുടുംബാംഗങ്ങൾ / സഹോദരന്മാർ എന്നിവരുമായി ഒത്തുചേർന്ന് പുതുബിസിനസ്സ് തുടങ്ങിയേക്കും.  ആരോഗ്യപ്രശ്നങ്ങളിൽ ജാഗ്രത വേണം. ദാമ്പത്യത്തിൽ പൊരുത്തക്കേടുകൾ വരാം. 

മക്കളുടെ ഉപരിപഠനത്തിൽ വ്യത്യസ്തമായ അഭിപ്രായം ഉണ്ടായേക്കും. വായ്പാ തിരിച്ചടവിന് കൂടുതൽ അവധി ചോദിക്കേണ്ടി വരാം. പൂജാദികർമ്മങ്ങൾക്കും തീർത്ഥാടനാദികൾക്കും സമയം കണ്ടെത്തും. ഉഷ്ണരോഗങ്ങൾ ഉപദ്രവിച്ചേക്കാം. ധനം ചെലവു ചെയ്യുന്നതിൽ നിയന്ത്രണം അനിവാര്യം.

പൂരം

ചെറുകിട കച്ചവടക്കാർക്കും ഏജൻസികൾ നടത്തുന്നവർക്കും സാമ്പത്തികമായി തരക്കേടില്ലാത്ത കാലമാണ്. എന്നാൽ സർക്കാരിൽ നിന്നും ലഭിക്കേണ്ട അനുമതികൾക്ക് കാലതാമസം വരാം. നക്ഷത്രാധിപനായ ശുക്രൻ ആറാം ഭാവത്തിൽ തുടരുന്നതിനാൽ ശത്രുക്കളുടെ ഉപദ്രവം ഉണ്ടാവുന്നതാണ്. ദാമ്പത്യത്തിൽ അനുരഞ്ജനത്തിന് സ്ഥാനമില്ലെന്ന് തോന്നും. പല കാര്യങ്ങളിൽ താല്പര്യമുണ്ടാകുന്നതാണ്. 

പല ദൗത്യങ്ങളും ഏറ്റെടുക്കും. എന്നാൽ പൂർത്തിയാക്കാൻ കഴിയുക ഒന്നോ രണ്ടോ കാര്യങ്ങളാവും. അന്യനാട്ടിൽ കഴിയുന്നവർക്ക് നാട്ടിലേക്ക് വരാൻ തൽകാലം കഴിഞ്ഞേക്കില്ല. ആരോഗ്യകാര്യത്തിൽ ശ്രദ്ധയുണ്ടാവണം.

ഉത്രം

അന്യനാട്ടിൽ മക്കളുടെ വീട്ടിൽ താമസിക്കേണ്ടിവരും. ഉദ്യോഗസ്ഥർക്ക് തൊഴിൽപരമായ യാത്രകൾ ഉണ്ടാവുന്നതാണ്. കന്നിക്കൂറുകാർക്ക് ശത്രുവിജയം, വ്യവഹാരങ്ങളിൽ അനുകൂലത എന്നിവ പ്രതീക്ഷിക്കാം. കിടപ്പ് രോഗികൾക്ക് ആശ്വസിക്കാനാവും. കടബാധ്യത പരിഹരിക്കാനുള്ള ശ്രമം ഭാഗികമായി വിജയിക്കും. ചിങ്ങക്കൂറുകാരായ ഉത്രം നാളുകാർക്ക് വസ്തുവില്പന നേട്ടത്തിൽ കലാശിക്കും. 

ഗൃഹനിർമ്മാണത്തിൽ പുരോഗതിയുണ്ടാകും. നവസംരംഭങ്ങളിൽ ലാഭം വന്നുചേരും. 
പഴയ സുഹൃത്തുക്കളെ കാണാനവസരമുണ്ടാകുന്നതാണ്. ഇലക്ട്രോണിക് വസ്തുക്കൾ, ശീതീകരണ ഉപകരണങ്ങൾ ഇവ വാങ്ങുന്നതിന് ചെലവുണ്ടാകുന്നതാണ്

അത്തം

ആദിത്യനും ശനിയും അനുകൂല ഭാവത്തിലാകയാൽ നേട്ടങ്ങൾക്കാവും മുൻതൂക്കം. ബിസിനസ്സിൽ മുന്നേറാൻ കഴിയും. സാമ്പത്തിക ഞെരുക്കം നീങ്ങുന്നതായിരിക്കും. സർക്കാർ/സർക്കാരിതര ഉദ്യോഗസ്ഥർക്ക് ജോലിയിൽ സ്ഥാനക്കയറ്റമോ വേതനവർദ്ധനവോ പ്രതീക്ഷിക്കാം. പിതാവിൻ്റെ രോഗകാര്യത്തിലെ ആശങ്ക ഒഴിയുന്നതാണ്. പാരമ്പര്യസ്വത്തിന്മേൽ അവകാശം സിദ്ധിക്കും. 

മക്കളുടെ പഠിപ്പോ തൊഴിൽകാര്യമോ അല്പം മനപ്രയാസത്തിന് കാരണമായേക്കാം. അവിവാഹിതരുടെ വിവാഹകാര്യത്തിൽ തടസ്സങ്ങൾ തുടരും. വാഹനം ഉപയോഗിക്കുന്നതിൽ ഏറ്റവും ജാഗ്രത വേണ്ടതുണ്ട്. പ്രതീക്ഷിച്ച സഹായം ലഭിക്കുന്നതാണ്.

ചിത്തിര

മാസമധ്യം വരെ നക്ഷത്രനാഥനായ ചൊവ്വ ഉച്ചത്തിലാണ്. പ്രശ്നങ്ങളെ അതിജീവിച്ച് മുന്നേറാൻ തന്മൂലം വഴിയൊരുങ്ങും. കന്നിക്കൂറുകാർക്ക് മാസത്തിൻ്റെ ആദ്യപകുതി കൂടുതൽ ഗുണകരമാണ്. അധ്വാനം അംഗീകരിക്കപ്പെടും. ഉദ്യോഗസ്ഥന്മാർക്ക് സ്ഥാനക്കയറ്റം സാധ്യതയാണ്. സഹപ്രവർത്തകരുടെ നല്ല പിന്തുണ ലഭിക്കും. കലാകാരന്മാർക്ക് സമൂഹത്തിൻ്റെ അംഗീകാരം ഉണ്ടാകുന്നതാണ്. 

തുലാക്കൂറുകാർക്ക് മാസത്തിൻ്റെ രണ്ടാം പകുതിയിൽ ക്ഷേമവും സൗഖ്യവും അധികരിക്കുന്നതാണ്. എതിർക്കുന്നവരുടെ മുന്നിൽ തലയുയർത്തി നടക്കാനാവും. കുടുംബ ബന്ധങ്ങളുടെ സ്വാച്ഛന്ദ്യം തുടരപ്പെടും. കൂട്ടുകച്ചവടത്തിൽ ഉയർച്ചയുണ്ടാവും.

• വാരഫലം, അശ്വതി മുതൽ ആയില്യം വരെ; February 25-March 02, 2024, Weekly Horoscope
• Daily Horoscope February 22, 2024: നിങ്ങളുടെ ഇന്നത്തെ ദിവസം, രാശി ഫലം

ചോതി

നാലിലെ ചൊവ്വയും അഞ്ചിലെ രവിശനിമാരും മാസാദ്യം സ്വൈരമേകില്ല. ഇഷ്ടവ്യക്തികൾ പിണക്കം ഭാവിച്ചകലാം. വിദ്യാർത്ഥികൾക്ക് കഠിനകാലമാണ്. ഇരട്ടി അദ്ധ്വാനം ആവശ്യമായി വരും. വസ്തുതർക്കങ്ങൾ ഒരു സാധ്യതയാണ്. ചിലപ്പോൾ അത് അയൽതർക്കമായി മാറാം. വാഹനത്തിൻ്റെ അറ്റകുറ്റത്തിന് പ്രതീക്ഷിച്ചതിലും ചെലവുണ്ടായേക്കും. മാസത്തിൻ്റെ രണ്ടാം പകുതിയിൽ ആശ്വസിക്കാനും ആഹ്ളാദിക്കാനും സന്ദർഭം വർദ്ധിക്കുന്നതാണ്.

കുടുംബത്തിൽ മംഗളകർമ്മങ്ങൾ നടക്കും. മൂന്നാം തലമുറയെ ലാളിക്കാൻ ഭാഗ്യം ഭവിക്കാം. നല്ല കാര്യങ്ങൾക്കായി യാത്രകൾ ഉണ്ടാകുന്നതാണ്. സംരംഭങ്ങൾ നിർബാധം മുന്നോട്ടു പോകും. പിണങ്ങിയവർ ഇണങ്ങിയേക്കും.

വിശാഖം

പലവട്ടം ചിന്തിച്ചശേഷം പ്രധാന കാര്യങ്ങൾ ചെയ്യുകയാവും ഉചിതം. ചിലരുടെ ഉപദേശം നേർവഴി കാട്ടണമെന്നില്ല. ബുധൻ്റെ ദുർബലത പഠനത്തെ ബാധിക്കാനിടയുണ്ട്. ചില രഹസ്യങ്ങൾ പരസ്യമായേക്കും. അതിനാൽ അല്പം അഭിമാനക്ഷയം വരാം. പിതൃബന്ധുക്കളുടെ സഹകരണം കുറയുന്നതായി മനസ്സിലാക്കും. അന്യനാട്ടിൽ മകൻ്റെ/മകളുടെ വീട്ടിൽ പോയി നിൽക്കേണ്ടി വന്നേക്കും.  

സമൂഹമാധ്യമങ്ങളിലെ പ്രവർത്തനത്തിലൂടെ പ്രതീക്ഷിച്ചത്ര വരുമാനം ഉണ്ടായേക്കില്ല. കച്ചവടത്തിൽ ലാഭം കുറയും. വായ്പക്കുള്ള ശ്രമം നീളുന്നതാണ്. പൊതുപ്രവർത്തനത്തിൽ ശത്രുക്കളെ സമ്പാദിച്ചേക്കും. അധിക വരുമാനത്തിന് വഴി തേടുന്നതാണ്. ജീവിതപങ്കാളിയുടെ ഉപദേശം ചെവിക്കൊള്ളും.

അനിഴം

രാശിനാഥൻ്റെ ഉച്ചാധിപത്യം തുടരുകയാൽ ആത്മവിശ്വാസത്തോടെ മുന്നോട്ടു പോകും. പ്രതിബന്ധങ്ങളിൽ തളരില്ല. വസ്തുവാങ്ങാൻ / ഗൃഹനിർമ്മാണം തുടങ്ങാൻ നല്ലരീതിയിൽ പരിശ്രമിക്കും. കുടുംബാന്തരീക്ഷം സമ്മിശ്രമായി തുടരുന്നതാണ്. പരസ്യമായ അഭിപ്രായപ്രകടനം വീട്ടിലും പുറത്തും ശത്രുക്കളെ സൃഷ്ടിച്ചേക്കാം. നക്ഷത്രനാഥനായ ശനിക്ക് മാസപ്പകുതി വരെ മൗഢ്യം തുടരുകയാൽ മറവി മൂലം വല്ല കുഴപ്പവും വരാനിടയുണ്ട്.  

മംഗളകർമ്മങ്ങൾക്ക് നേതൃത്വം വഹിക്കും. ഇൻഷ്വറൻസ്, ചിട്ടി, പെൻഷൻ തുക, നിക്ഷേപങ്ങളുടെ പലിശ ഇവ മൂലം സാമ്പത്തിക സ്ഥിതി ഉയരാം. മകൻ്റെ / മകളുടെ വിവാഹാലോചനയിൽ തീരുമാനം നീണ്ടേക്കും.

തൃക്കേട്ട

വിജയിക്കാനും ലക്ഷ്യം നേടാനും കഠിന പരിശ്രമമല്ലാതെ മറ്റു കുറുക്കുവഴികൾ ഒന്നുമില്ലെന്ന് ബോധ്യമാകും. വിദ്യാർത്ഥികൾക്കും തൊഴിൽ തേടുന്നവർക്കും എല്ലാം ഇത് സംഗതമാണ്. പ്രതീക്ഷിച്ച പ്രൊമേഷൻ വൈകുന്നത് ഉദ്യോഗസ്ഥരെ അസ്വസ്ഥരാക്കാം. കുടുംബത്തിൽ നിന്നും, വിശിഷ്യാ ജീവിതപങ്കാളിയിൽ നിന്നും ഉള്ള പിന്തുണ കരുത്തേകും. തീർത്ഥാടനയോഗമുണ്ട്. ധാർമ്മിക കർമ്മങ്ങളിൽ താല്പര്യമേറാം. 

നാലാം ഭാവത്തിലെ പാപഗ്രഹയോഗം മനസ്സിൻ്റെ സ്വസ്ഥതയെ ബാധിക്കാം. ഏജൻസി/കമ്മീഷൻ ഏർപ്പാടുകൾ ഗുണകരമാവുന്നതാണ്. ജാമ്യം നിൽക്കുക, തർക്കത്തിൽ മാധ്യസ്ഥം വഹിക്കുക എന്നിവ ദോഷകരമായേക്കും. ആദർശം ഉപേക്ഷിക്കാൻ സന്നദ്ധരാവും.

മൂലം

കാലം താരതമ്യേന അനുകൂലമാണ്. സഹായസ്ഥാനത്ത് ആദിത്യനും ശനിയും ഉള്ളതിനാൽ ഒറ്റയ്ക്കല്ല എന്നും, പിന്തുണയ്ക്ക് ആളുണ്ടെന്നും ബോധ്യമാകും. പ്രവർത്തനങ്ങൾക്ക് സ്വീകാര്യത ലഭിക്കുന്നതാണ്. സാമ്പത്തിക ഇടപാടുകൾ ലാഭകരമായേക്കും. പണയവസ്തു തിരിച്ചെടുക്കാൻ കഴിയുന്നതാണ്.  

കുടുംബത്തിലെ വൃദ്ധജനങ്ങളുടെ ആരോഗ്യസ്ഥിതിയിലെ ആശങ്ക ഒഴിയും. വാഗ്ദാനം പാലിക്കാനായേക്കും. അന്യനാട്ടിൽ കഴിയുന്നവർക്ക് ജന്മദേശത്തേക്ക് മടങ്ങാൻ സാധിക്കുന്നതാണ്. പുതുകച്ചവടം തുടങ്ങാൻ കടയ്ക്ക് അഡ്വാൻസ് നൽകാനാവും. ഇടയ്ക്കിടെ ആലസ്യം, വാക്കുകൾ പരുഷമായിത്തീരുക തുടങ്ങിയ അനുഭവങ്ങളും സാധ്യതകൾ.

പൂരാടം

നിലവിലെ തൊഴിലിൽ അസംതൃപ്തി തുടരും. എന്നാൽ ഇപ്പോഴത്തെ ജോലി ഉപേക്ഷിച്ച് പുതിയത് തേടുന്നത് അല്പം സാഹസമായിരിക്കും. മുതിർന്നവരുടെ വാക്കുകൾ സ്വീകരിച്ചേക്കില്ല. വിലകൂടിയ ആഭരണങ്ങൾ വാങ്ങുന്നതാണ്. വിദ്യാർത്ഥികൾക്ക് പ്രൊഫഷണൽ കോഴ്സുകൾക്ക് പ്രവേശനം ലഭിക്കും.

പൊതുവിഷയങ്ങളിൽ ഖണ്ഡിതമായ അഭിപ്രായം പറയുന്നത് ശത്രുക്കളെ സൃഷ്ടിക്കാനിടയുണ്ട്. നാലാമെടത്തിലെ രാഹു ഗാർഹിക ക്ലേശങ്ങൾക്ക് കാരണമാകുന്നതാണ്. മാതൃബന്ധുക്കളുടെ സഹകരണം കുറയാം. നാട്ടിലെ ഉത്സവനടത്തിപ്പിൽ ഭാഗഭാക്കാകും. കലാപരമായ കഴിവുകൾ ജനങ്ങളുടെ അംഗീകാരം നേടും.

ഉത്രാടം

നക്ഷത്രാധിപൻ ആയ ആദിത്യന് പാപയോഗം വരുന്നതിനാൽ കൂട്ടുകെട്ടുകൾ ദോഷത്തിന് കാരണമാകാം. പ്രവർത്തനങ്ങളുടെ മുൻഗണന തീർപ്പുകല്പിക്കുന്നതിൽ പാളിച്ച സംഭവിച്ചേക്കാം. ഗാർഹിക കാര്യങ്ങളിൽ അലംഭാവം വരുന്നതാണ്. വേണ്ടപ്പെട്ടവരോട് ശത്രുതാ മനോഭാവം പുലർത്തും. ധനപരമായി ഞെരുക്കം അനുഭവപ്പെടുന്നതാണ്. സാമൂഹികമായ അംഗീകാരം കിട്ടിയേക്കില്ല. 

മാസത്തിൻ്റെ രണ്ടാം പകുതിയിൽ സാമ്പത്തിക ഗുണം പ്രതീക്ഷിക്കാം. പുതിയ അവസരങ്ങൾ തേടി വരുന്നതാണ്. ചെലവുകൾ നിയന്ത്രിക്കാനുള്ള ആത്മാർത്ഥ ശ്രമം ഫലിച്ചേക്കും. സാങ്കേതിക കാര്യങ്ങൾ പഠിക്കാനുള്ള ശ്രമം നടത്തുന്നതാണ്

തിരുവോണം

ജന്മരാശിയിൽ ചൊവ്വ തുടരുകയാൽ മാനസിക സംഘർഷമുണ്ടാവും. വൈകാരിക പ്രതികരണമേറും. എല്ലാക്കഴിവുകളും ചിലപ്പോൾ പ്രയോജനപ്പെടുത്താൻ കഴിഞ്ഞേക്കില്ല. ചിന്തിക്കാതെ തീരുമാനങ്ങൾ കൈക്കൊള്ളാനിടയുണ്ട്. പതിവ് രോഗപരിശോധനകൾ മുടക്കരുത്. മാസത്തിൻ്റെ രണ്ടാം പകുതി മുതൽ മെച്ചപ്പെട്ട ഫലങ്ങൾ ഉണ്ടാവും.

രാഷ്ട്രീയത്തിൽ ആത്മവിശ്വാസപൂർവ്വം പ്രവർത്തിക്കും. ഉദ്യോഗസ്ഥർക്ക് അധികാരമുള്ള പദവി ലഭിക്കുന്നതാണ്. ബിസിനസ്സിൽ നേട്ടങ്ങൾ സ്വാഭാവികമായി വന്നുചേരും. കുടുംബത്തിൻ്റെ ആവശ്യങ്ങൾ ഭംഗിയായി നിറവേറ്റുന്നതാണ്. സാമ്പത്തിക മെച്ചം കരഗതമാവും.

അവിട്ടം

പന്ത്രണ്ട്, ജന്മരാശി, രണ്ടാമെടം എന്നീ ഭാവങ്ങളിൽ രണ്ടോ അതിലധികമോ ഗ്രഹങ്ങൾ വരുന്നുണ്ട്.  സാഹചര്യങ്ങളുടെ സമ്മർദ്ദം സ്വാതന്ത്ര്യത്തെ ഹനിച്ചേക്കാം. ആലോചനാ ശൂന്യതയുണ്ടാവും. ഇഷ്ടമുള്ളവർ മറുചേരിയിലായതിൻ്റെ വൈക്ലബ്യം വന്നുചേരും. സ്വതന്ത്രമായി പ്രവർത്തിക്കാൻ പലതടസ്സങ്ങൾ ഉള്ളതായി അനുഭവപ്പെടുന്നതാണ്.

കഴിവതും ഊഹക്കച്ചവടം, കടം വാങ്ങി കച്ചവടം വിപുലീകരിക്കുക തുടങ്ങിയ സാമ്പത്തിക സാഹസങ്ങൾക്ക് മുതിരരുത്. അപരിചിതരുമായുള്ള സൗഹൃദം ദോഷകാരിയായേക്കാം. സാധാരണ കാര്യങ്ങൾ മുടങ്ങില്ല. ധനവരവ് സാമാന്യമായിരിക്കും. ജീവിത പങ്കാളിയുടെ പിന്തുണ കരുത്തേകും.

ചതയം

ശനിയും സൂര്യനും  ജന്മനക്ഷത്രത്തിൽ തന്നെയുണ്ട്.  മുന്നിലും പിന്നിലും രാഹുവും ചൊവ്വയുമുണ്ട്. സങ്കീർണ്ണമായ അനുഭവങ്ങൾ ഉണ്ടാവാം. പലതിനും ഉത്തരം കിട്ടുക എളുപ്പമാവില്ല. മനോവാക്കർമ്മങ്ങളിൽ ശ്രദ്ധ വേണം. സാമ്പത്തിക കാര്യങ്ങളിൽ ദുഷ്പേരുണ്ടാവാൻ ഇടയുണ്ട്.

ഉദ്യോഗസ്ഥർക്ക് പ്രതീക്ഷിച്ച സ്ഥാനക്കയറ്റം വൈകാം. കച്ചവടത്തിൽ ലാഭം നാമമാത്രമാവും. പണയവസ്തുക്കൾ ലേലത്തിന് വെക്കുന്നതായി അറിയിപ്പ് കിട്ടും.  കൈവായ്പകളെ ആശ്രയിച്ചേക്കും . പഠനത്തിൽ ഏകാഗ്രത കുറയുന്നതാണ്. പരീക്ഷാർത്ഥികൾക്ക് മാനസിക പിൻബലം അനിവാര്യം. പ്രാർത്ഥനകളിൽ അഭയം തേടും.

പൂരൂരുട്ടാതി

 ഗ്രഹാനുകൂല്യം കുറയുന്ന കാലമാണ്. ചെറിയ നേട്ടങ്ങൾക്കുപോലും അത്യദ്ധ്വാനം ആവശ്യമായി വരും. വാഗ്ദാനങ്ങൾ പാലിക്കപ്പെടില്ല. തർക്കങ്ങളിൽ ഏർപ്പെടാൻ ദുഷ്പ്രേരണയുണ്ടാവും. ബന്ധുത്വം ചിലപ്പോൾ ശത്രുത്വത്തിനും കാരണമാകാം. അലസതയും നിരുന്മേഷതയും കൂടുന്നതായി തോന്നും.

ബിസിനസ്സ് യാത്രകൾ കൊണ്ട് ഉദ്ദേശിച്ചത്ര ഫലം കിട്ടിയേക്കില്ല. കമ്മീഷൻ / ഏജൻസി ഏർപ്പാടുകൾ ഗുണകരമാവുന്നതാണ്. ചെറുപ്പക്കാരുടെ വിവാഹകാര്യത്തിൽ തീരുമാനം നീളാം. ഇൻഷ്വറൻസ്, പെൻഷൻ തുക ഇത്യാദികൾ സാമ്പത്തിക ഞെരുക്കത്തിൽ നിന്നും ആശ്വാസമായേക്കാം. വസ്തുകരം സംബന്ധിച്ച് പ്രാദേശിക ഭരണകൂടവുമായി പക്ഷഭേദം ഉണ്ടാവാം.

ഉത്രട്ടാതി

പന്ത്രണ്ടിലും ജന്മരാശിയിലും ആദിത്യൻ സഞ്ചരിക്കുന്നതിനാൽ ദേഹക്ലേശവും മനക്ലേശവും ഏർപ്പെടും. വീടുവിട്ട് നിൽക്കാനുള്ള സാഹചര്യം ഉണ്ടാവും. നാട്ടിലേക്ക് മടങ്ങാൻ ആഗ്രഹിക്കുന്നവർക്ക് തടസ്സങ്ങൾ അനുഭവപ്പെടും. അശുഭവാർത്തകൾ കേൾക്കേണ്ടി വരുന്നതാണ്. നിക്ഷേപങ്ങൾ പിൻവലിച്ച് ചെലവ് നടത്തേണ്ട സാഹചര്യം ഒരു സാധ്യതയാണ്.

മാസത്തിൻ്റെ ആദ്യപകുതി താരതമ്യേന മെച്ചപ്പെട്ടതായിരിക്കും. മത്സരങ്ങളിൽ / പരീക്ഷകളിൽ  നല്ല പ്രകടനം നടത്താനാവുന്നതാണ്. കലാപരമായ സിദ്ധികൾ വർദ്ധിക്കും. ഭൂമിയിടപാടുകളിൽ ലാഭം നേടുന്നതാണ്. സഹോദരരുടെ സാമ്പത്തിക പിന്തുണ ലഭിച്ചേക്കും.

രേവതി

ജന്മരാഹു ആലസ്യമേകും. പ്രശ്നങ്ങളെ നേരെ നിന്ന് നേരിടുന്നതിനു പകരം വളഞ്ഞ വഴികൾ തേടാൻ പ്രേരിപ്പിക്കാം. പന്ത്രണ്ടിലെയും ജന്മത്തിലെയും ആദിത്യൻ കടബാധ്യതകൾ വരുത്താം. ലഘുവായ കാര്യങ്ങൾ പോലും പല ശ്രമങ്ങളിലൂടെ മാത്രം നേടാനാവൂകയുള്ളൂ എന്ന സ്ഥിതി വരാം. ഉദ്യോഗസ്ഥർക്ക് അമിതമായ അധ്വാനഭാരം ഉണ്ടാവും. സഹപ്രവർത്തകരുടെ സഹകരണം കിട്ടിയേക്കില്ല.

മാർച്ച് 15 വരെ അല്പം മെച്ചപ്പെട്ട രീതിയിൽ കാര്യങ്ങൾ നടന്നേക്കും. പ്രണയികൾക്ക് ഹൃദയൈക്യം ഉണ്ടാവും. കെട്ടിട നിർമ്മാണത്തിന് തദ്ദേശസ്ഥാപനത്തിൻ്റെ അനുമതി ലഭിക്കുന്നതാണ്. കുടുംബത്തിൻ്റെ ആവശ്യങ്ങൾക്ക് പണം വന്നുചേരും. സുഹൃത് സമാഗമം സന്തോഷമേകും.

Read More

• Weekly Horoscope (February 18– February 24, 2024): ഈ ആഴ്‌ച നിങ്ങൾക്കെങ്ങനെ?
• ഈ ആഴ്ച നിങ്ങളെ കാത്തിരിക്കുന്നതെന്ത്? സംഖ്യാശാസ്ത്ര ഫലങ്ങളിങ്ങനെ: Numerology Predictions 2024 February 19 to February 25
• സമ്പൂർണ്ണ വാരഫലം, അശ്വതി മുതൽ രേവതി വരെ; February 18-24, 2024, Weekly Horoscope
• കുംഭമാസത്തെ സമ്പൂർണ്ണ നക്ഷത്രഫലം, അശ്വതി മുതൽ രേവതി വരെ: 1199 Monthly Horoscope for Kumbham