/indian-express-malayalam/media/agency_attachments/RBr0iT1BHBDCMIEHAeA5.png)
Follow Us/indian-express-malayalam/media/media_files/GTDfl6nfyed3zIE1uIcG.jpg)
Weekly Horoscope: ഈ ആഴ്ച നിങ്ങൾക്കെങ്ങനെ?
ആദിത്യൻ മിഥുനം രാശിയിൽ പുണർതം ഞാറ്റുവേലയിലാണ്. ചന്ദ്രൻ വെളുത്തപക്ഷത്തിൽ പൂയം മുതൽ അത്തം വരെയുള്ള നക്ഷത്രങ്ങളിൽ സഞ്ചരിക്കുന്നു. ചൊവ്വ മേടം രാശിയിൽ ഭരണി- കാർത്തിക നക്ഷത്രങ്ങളിലാണ്.
ജൂലൈ 12 ന് ഇടവത്തിലേക്ക് സംക്രമിക്കുന്നു. ബുധൻ്റെ സഞ്ചാരം കർക്കടകം രാശിയിൽ പൂയം - ആയില്യം നാളുകളിലാണ്. ശുക്രൻ കർക്കടകം രാശിയിൽ, പുണർതം നാലാംപാദത്തിലും പൂയത്തിലുമായി സഞ്ചരിക്കുന്നു.
ശനി കുംഭം രാശിയിൽ പൂരൂരുട്ടാതിയിലാണ്. എന്നാൽ വക്രഗതിയിൽ സഞ്ചരിക്കുന്നു. വ്യാഴം ഇടവം രാശിയിൽ രോഹിണിയിലാണ്. രാഹു മീനം രാശിയിൽ രേവതിയിലുണ്ട്. എന്നാൽ ജൂലൈ 8 ന് പിൻഗതിയായി ഉത്രട്ടാതിയിൽ പ്രവേശിക്കും.
കേതു കന്നിരാശിയിൽ അത്തം നക്ഷത്രത്തിലാണ്. (അത്തം മൂന്നാം പാദത്തിൽ നിന്നും രണ്ടാം പാദത്തിൽ). ഈ ആഴ്ചയിലെ അഷ്ടമരാശിക്കൂറ് നോക്കാം. ഞായറും തിങ്കളും ചൊവ്വാഴ്ച പ്രഭാതം വരെയും ധനുക്കൂറുകാർക്കാണ്. തുടർന്ന് വ്യാഴാഴ്ച സന്ധ്യവരെ മകരക്കൂറുകാർക്കാവും അഷ്ടമരാശിക്കൂറ്. അനന്തരം ശനിയാഴ്ച വരെ കുംഭക്കൂറുകാർക്കായിരിക്കും അഷ്ടമചന്ദ്രസ്ഥിതി ഭവിക്കുന്നത്.
ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി വരെയുള്ള 27 നാളുകാരുടെയും സമ്പൂർണ്ണ വാരഫലം ഇവിടെ അപഗ്രഥിക്കുന്നു.
അശ്വതി
വാരാദ്യം ചന്ദ്രൻ സ്വക്ഷേത്ര ബലത്തോടെ നാലാം ഭാവത്തിൽ നിൽക്കുകയാൽ സുഹൃൽ സമാഗമം, ഉല്ലാസം, ലഘുയാത്രകൾ എന്നിവ പ്രതീക്ഷിക്കാം. ഭക്ഷണ സുഖം ഉണ്ടാവും. മറ്റു ദിവസങ്ങളിൽ ആലോചനാപൂർവ്വം തീരുമാനം കൈക്കൊള്ളേണ്ട വിഷയങ്ങൾ വന്നു ചേരുന്നതാണ്. സഹപ്രവർത്തകരുടെ വാക്കുകൾ അംഗീകരിക്കേണ്ടതായി വരുന്നതാണ്. സ്വേച്ഛ പോലെ എല്ലാക്കാര്യവും ചെയ്യുന്നതായി ആക്ഷേപം ഉയരാം. വെള്ളി, ശനി ദിവസങ്ങളിൽ സമ്മർദ്ദമകലുന്നതാണ്. സഹജരീത്യാ പറയാനും പ്രവർത്തിക്കാനുമാകും.
ഭരണി
ദേഹസുഖവും മനസ്സന്തോഷവും ഭവിക്കുന്നതാണ്. ബന്ധുസമാഗമത്തിന് സാധ്യതയുണ്ട്. പാരിതോഷികങ്ങൾ ലഭിക്കാം. ആതിഥ്യമര്യാദ പ്രശംസിക്കപ്പെടും. ശുഭവാർത്തകൾ കേൾക്കുന്നതാണ്. വാരമധ്യത്തിൽ കാര്യതടസ്സമോ വിളംബമോ ഉണ്ടാകും. തൊഴിലിടത്തിൽ സമാധാനക്കുറവ് ഉണ്ടായേക്കാം. ക്രയവിക്രയങ്ങളിൽ ജാഗ്രതയുണ്ടാവണം. വെള്ളി, ശനി ദിവസങ്ങളിൽ സ്വസ്ഥതയും സാമ്പത്തികമായ സമാശ്വാസവും വന്നെത്തുന്നതാണ്. സംഘടനകളിൽ അഭിപ്രായം വിലമതിക്കപ്പെടും.
കാർത്തിക
വാക്കുകൾ കൊണ്ട് മാത്രമല്ല, പ്രവൃത്തികൊണ്ടും സഹായിക്കാൻ ആളുണ്ടാവും. സൗഹൃദങ്ങൾ ഗുണകരമാവും. പൊതുക്കാര്യങ്ങളിൽ ഇടപെടുമ്പോൾ കരുതലുണ്ടാവണം. സംരംഭങ്ങൾ വിപുലീകരിക്കും. വിദ്യാർത്ഥികൾക്ക് ഏകാഗ്രത വർദ്ധിക്കുന്നതാണ്. ദുർഗ്രഹ വിഷയങ്ങൾക്ക് അധിക ക്ളാസ്സുകൾ ലഭിച്ചേക്കാം. മംഗള കർമ്മങ്ങളിലോ പൂജാദി കാര്യങ്ങളിലോ പങ്കെടുക്കാനാവും. ചൊവ്വ ജന്മനക്ഷത്രത്തിലേക്ക് സംക്രമിക്കുകയാൽ പൊതുവേ കരുതൽ വേണ്ട കാലമാണ്. വാഹനം, വൈദ്യുതി ഇവയുടെ ഉപയോഗത്തിൽ ജാഗ്രതയുണ്ടാവണം.
രോഹിണി
മനസ്സിൽ നിന്നും വിഷാദ ഭാവങ്ങൾ അകലും. പ്രസരിപ്പ് വീണ്ടെടുക്കുന്നതാണ്. പ്രണയികൾക്ക് ആഹ്ളാദിക്കാൻ അവസരമുണ്ടാവും. കലാകാരന്മാർക്ക് കൂടുതൽ അവസരങ്ങൾ ലഭിച്ചേക്കും. സാഹിത്യ പ്രവർത്തനം സുഗമമായി മുന്നേറും. കുടുംബാന്തരീക്ഷം മെച്ചപ്പെടാം. പുതുതലമുറയെ മനസ്സിലാക്കാൻ ശ്രമിക്കുന്നതാണ്. ബിസിനസ്സിൽ ഏർപ്പെട്ടിട്ടുള്ളവർക്ക് പുതിയ കാലത്തിൻ്റെ സാങ്കേതിക രീതികൾ സ്വീകരിക്കേണ്ടി വരുന്നതാണ്. ഉദ്യോഗസ്ഥർക്ക് തെല്ല് ജോലിഭാരം വർദ്ധിച്ചേക്കാം.
മകയിരം
മാനസികമായി കൂടുതൽ കരുത്തുനേടും. മുഖം നോക്കാതെ അഭിപ്രായം പ്രകടിപ്പിക്കുന്നതിനാൽ ശത്രുക്കളെ സമ്പാദിക്കും. വിദ്യാർത്ഥികളെ പ്രചോദിപ്പിക്കും വിധം മോട്ടിവേഷണൽ ക്ളാസ്സുകൾ നടത്തും. സൗഹാർദ്ദം വളരുവാനുള്ള സാഹചര്യമുണ്ടാവും. തൊഴിലിൽ ശ്രദ്ധ കുറയുന്നതായി വേണ്ടപ്പെട്ടവർ ഓർമ്മപ്പെടുത്തും. അവധിക്കാല യാത്രകൾ ആസൂത്രണം ചെയ്യുന്നതാണ്. കുടുംബാംഗങ്ങളുടെ ആവശ്യങ്ങൾ നിറവേറ്റും. സാമ്പത്തികമായി സുസ്ഥിതിയുണ്ടാവും. ആരോഗ്യകാര്യങ്ങളിൽ ശ്രദ്ധയുണ്ടാവണം.
തിരുവാതിര
മധുരമായി സംസാരിക്കുവാനാവും. ഒപ്പം വാക്കുകൾ പണ്ഡിതോചിതമാവും. പുതിയ കാര്യങ്ങൾ പഠിക്കാനും മനസ്സിലാക്കാനും സന്നദ്ധത കാട്ടും. സഹോദരരുമായി ചേർന്ന് നടത്തുന്ന വ്യാപാരത്തിൽ ലാഭം വർദ്ധിക്കുന്നതാണ്. സ്വകാര്യ സ്ഥാപനത്തിൽ ജോലിക്കുളള ശ്രമം ഫലം കാണും. ഉപഭോക്താവിനെ ആകർഷിക്കുന്ന തന്ത്രങ്ങൾ മെനയും. അന്യദേശത്ത് കഴിയുന്നവർക്ക് നാട്ടിലേക്ക് മടങ്ങാൻ അപ്രതീക്ഷിത സാധ്യതകൾ വന്നെത്തും. കിടപ്പ് രോഗികൾക്ക് ആശ്വസിക്കാനാവും. സ്വതസ്സിദ്ധമായ കഴിവുകൾ പ്രകാശിപ്പിക്കാൻ കഴിയുന്നതാണ്.
പുണർതം
ഔദ്യോഗികമായി മെച്ചമുണ്ടാവും. ചുമതലകൾ വീഴ്ച വരാതെ നിർവഹിക്കും. സഹപ്രവർത്തകരുടെ സഹകരണമുണ്ടാവും. വിദ്യാർത്ഥികൾക്ക് പഠനത്തിൽ ശ്രദ്ധിക്കാൻ കഴിയും. ചർച്ചകൾ, സിമ്പോസിയങ്ങൾ ഇവയിൽ പങ്കെടുക്കാൻ അവസരം കിട്ടും. ഓൺലൈൻ ബിസിനസ്സിൽ മുന്നേറാൻ സാധിക്കുന്നതാണ്. വിപുലീകരണത്തിനുള്ള സാധ്യതകൾ ആരായും. കലാപ്രവർത്തകർക്ക് നല്ല അവസരങ്ങൾ പ്രതീക്ഷിക്കാം. കുടുംബ ജീവിതത്തിലെ പ്രശ്നങ്ങൾ പരിഹരിക്കുവാൻ ആത്മാർത്ഥമായ ശ്രമം നടത്തുന്നതാണ്. ചെലവ് ഉയരുന്നതായി തോന്നാം.
പൂയം
വാരാദ്യം സുഖാനുഭവങ്ങൾ ഉണ്ടാകും. സുഖഭക്ഷണ യോഗം, ഭോഗസുഖം, പാരിതോഷികലബ്ധി ഇവയുണ്ടാവും. മറ്റു ദിവസങ്ങളിൽ തൊഴിലിടത്തിൽ സമ്മിശ്രമായ അനുഭവങ്ങൾ ഉണ്ടാവും. ഉദ്യോഗസ്ഥർക്ക് ജോലിഭാരം കൂടാനാണ് സാധ്യത. മേലധികാരികളുടെ അപ്രീതിയുണ്ടായേക്കാം. ഗൃഹനിർമ്മാണത്തിന് കാലാവസ്ഥ തടസ്സമാകാം. വരവ് തൃപ്തികരമെങ്കിലും ചെലവ് വർദ്ധിക്കാം. മക്കളുടെ പഠനത്തിനുള്ള തുകയ്ക്കായി കൈ വായ്പ വാങ്ങിയേക്കും. പിണങ്ങിയവർ ഇണങ്ങാം. സ്ത്രീകളുടെ പിന്തുണ ലഭിക്കുന്നതാണ്.
ആയില്യം
അനുകൂല ഫലങ്ങൾക്ക് മുൻതൂക്കമുള്ള വാരമാണ്. ലഘുപ്രയത്നം കൊണ്ടുതന്നെ നേട്ടങ്ങൾ ഉണ്ടാവും. സുഹൃൽസമാഗമം കുടുംബ സംഗമം ഇവകളിൽ പങ്കെടുക്കുവാനാവും. ആടയാഭരണങ്ങൾ സമ്മാനമായി ലഭിക്കാം. ഈശ്വര സമർപ്പണങ്ങൾക്ക് നേരം കണ്ടെത്തും. ചിട്ടി, ലോൺ മുതലായവയിലൂടെ ധനം വന്നെത്തും. ഭോഗസുഖം ഉണ്ടാവും. ഗവേഷകർക്ക് പഠനത്തിൽ മുഴുകാൻ സാധിക്കുന്നതാണ്. തൊഴിലന്വേഷണത്തിൽ തടസ്സങ്ങളുണ്ടാവാം. കഫജന്യ രോഗങ്ങൾ ഉപദ്രവിക്കാനിടയുണ്ട്.
മകം
പ്രതിബന്ധങ്ങളെ അതിജീവിച്ചുകൊണ്ടു മുന്നേറാനാവും. പരീക്ഷണോത്സുകമാവും മനസ്സ്. രാഷ്ട്രീയ കാര്യാലോചനകളിൽ സക്രിയമായി പങ്കെടുക്കും. കാര്യങ്ങൾ തുറന്നു പറയുന്നതു മൂലം ശത്രുക്കൾ വർദ്ധിക്കാം. ചെലവ് വർദ്ധിക്കുന്നതിൽ ആശങ്കയുണ്ടായേക്കും. അതിന്മേൽ ചെറിയ കുടുംബ കലഹം ഉണ്ടാവാം. പുണ്യകർമ്മങ്ങളിൽ പങ്കെടുക്കാനവസരം സിദ്ധിക്കുന്നതാണ്. വാരാദ്യം യാത്രകൾ ഉണ്ടായേക്കാം. ബുധൻ, വ്യാഴം ദിവസങ്ങൾ കൂടുതൽ മികച്ചതായിരിക്കും. ആഹ്ളാദിക്കാനും ആശ്വസിക്കാനും അവസരം ഭവിക്കുന്നതാണ്.
പൂരം
വാരാദ്യം എല്ലാക്കാര്യങ്ങളിലും സുഗമത കുറയാം. നിഷ്പ്രയോജന യാത്രകളും സാധ്യതകളാണ്. കരുതി വെച്ച ധനം മറ്റാവശ്യങ്ങൾക്കായി ചിലവഴിക്കേണ്ടി വന്നേക്കും. ചില കാര്യങ്ങളിൽ അവ്യക്തതയുണ്ടാവും. ക്രമേണ സ്ഥിതി മാറും. ഉദ്യോഗസ്ഥരുടെ പ്രവർത്തന മികവും പരിചയസമ്പത്തും അംഗീകരിക്കപ്പെടും. ബിസിനസ്സിൽ മുതൽ മുടക്കിന് അത്ര അനുകൂലമായ കാലമാണെന്ന് പറയുക വയ്യ. സാങ്കേതിക കോഴ്സുകൾ പഠിക്കാൻ അവസരം സിദ്ധിക്കും. കുടുംബത്തിൽ വിവാഹ നിശ്ചയം നടന്നേക്കും.
ഉത്രം
സാധാരണ ചെയ്യുന്ന പ്രവൃത്തികൾ തടസ്സം കൂടാതെ നിർവഹിക്കുവാനാവും. കുറച്ചു നാളായി അനുഭവപ്പെട്ടിരുന്ന മാനസിക പിരിമുറുക്കത്തിന് അയവു വരുന്നതാണ്. സുഹൃത്തുക്കളുടെ വാഗ്ദാനങ്ങൾ ഒട്ടൊക്കെ ഫലവത്താകും. പുതിയ സംരംഭങ്ങളുടെ കാര്യത്തിൽ വിദ്ഗ്ദ്ധോപദേശം തേടുന്നത് ഉചിതമായിരിക്കും. വ്യവഹാരങ്ങൾ ഒഴിവാക്കി അനുരഞ്ജനത്തിൻ്റെ പാത സ്വീകരിക്കുകയാവും കരണീയം. സ്വതസ്സിദ്ധമായ കഴിവുകൾ പ്രയോജനപ്പെടുത്തുന്നതിൽ വിജയം വരിക്കും.
അത്തം
ചന്ദ്രസഞ്ചാരം പതിനൊന്നാം ഭാവത്തിലാകയാൽ ഞായർ, തിങ്കൾ ദിവസങ്ങൾക്ക് മേന്മ കൂടും. വാക്കുകൾ ബഹുമാനിക്കപ്പെടും. ലഘുയത്നത്താൽ കൂടുതൽ നേട്ടങ്ങൾ കൈവരിക്കും. ഭോഗസുഖം, ഭക്ഷണ സംതൃപ്തി എന്നിവയുണ്ടാവും. മറ്റു ദിവസങ്ങളിൽ സമ്മിശ്രമായ ഫലം പ്രതീക്ഷിക്കാം. കാര്യസാധ്യത്തിന് യാത്രകൾ വേണ്ടി വന്നേക്കും. ഗാർഹിക കാര്യങ്ങൾക്ക് ചെലവേർപ്പെടും. സഹപ്രവർത്തകർ നിസ്സഹകരിക്കുന്നതായി തോന്നും. ബിസിനസ്സിൽ നിരുന്മേഷത അനുഭവപ്പെടുന്നതാണ്. സമയനിഷ്ഠ പാലിക്കാൻ കഴിഞ്ഞേക്കില്ല.
ചിത്തിര
ഏറ്റെടുത്ത ഉത്തരവാദിത്വങ്ങൾ തൃപ്തികരമായി നിറവേറ്റും. മാറ്റങ്ങളെ ഉൾക്കൊള്ളാൻ മനസ്സുകൊണ്ട് സന്നദ്ധമാകും. സംഘടനാ പ്രവർത്തനത്തിൽ കൂടുതൽ താത്പര്യമുണ്ടാവും. നേതൃപദവി ലഭിച്ചേക്കാം. വ്യാപാരത്തിൽ നിന്നും കൂടുതൽ വരുമാനം പ്രതീക്ഷിക്കും. അഭിമുഖ പരീക്ഷയ്ക്ക് തയ്യാറെടുപ്പ് നടത്തും. കുടുംബ ക്ഷേത്രത്തിൻ്റെ ജീർണ്ണോദ്ധാരണ പ്രവർത്തനങ്ങളിൽ മുൻകൈയെടുക്കും. ബാല്യകാല സുഹൃത്തുക്കളെ കാണും. ചരിത്രത്തിൽ ആധികാരിക അറിവ് സമ്പാദിക്കും.
ചോതി
ഒട്ടൊക്കെ ഗുണാനുഭവങ്ങൾക്ക് മുൻതൂക്കമുണ്ടാവുന്ന വാരമാണ്. ന്യായമായ കാര്യങ്ങൾ തടസ്സമില്ലാതെ നടന്നുകിട്ടും. തൊഴിൽ രംഗം ഉന്മേഷകരമാവുന്നതാണ്. യാത്രകൾ കൊണ്ട് ഗുണമുണ്ടാവും. ഊഹക്കച്ചവടത്തിൽ നിന്നും ലാഭം വന്നെത്തുന്നതാണ്. മനസ്സന്തോഷം വർദ്ധിക്കുന്ന വാർത്തകൾ കേൾക്കും. പ്രണയ ബന്ധം ദൃഢമായേക്കും. ദാമ്പത്യ ജീവിതത്തിലെ കയ്പുരസത്തിന് വിരാമം വരുന്നതാണ്. ഏജൻസി പ്രവർത്തനം വിപുലീകരിച്ചേക്കും. കുടുംബത്തിലെ മുതിർന്നവരെ സന്ദർശിക്കുന്നതാണ്. .
വിശാഖം
സഹജ സിദ്ധികൾ തിരിച്ചറിയാനും അവ പ്രയോജനപ്പെടുത്താനും കഴിയുന്നതാണ്. കുടുംബ ജീവിതം സമാധാനപൂർണ്ണമാവും. യുവാക്കളുടെ വിവാഹാലോചനകൾ ഫലം കാണുന്നതാണ്. കൊതിച്ച വസ്തുക്കൾ മോഹവില കൊടുത്തു വാങ്ങിയേക്കും. എന്നാൽ സാമ്പത്തിക സമ്മർദ്ദങ്ങൾ തുടരപ്പെടാം. വ്യക്തിപരമായ പ്രശ്നങ്ങൾ പരിഹരിക്കാൻ അനുരഞ്ജനത്തിൻ്റെ പാത സ്വീകരിക്കുന്നതാണ്. ബന്ധുസമാഗമം സന്തോഷമേകും. തൊഴിലിടത്തിലെ അലോസരങ്ങളെ അവഗണിച്ചേക്കും. ഊഹക്കച്ചവടത്തിൽ നേട്ടങ്ങൾ ഉണ്ടാവും.
അനിഴം
പല നിലയ്ക്കും മെച്ചപ്പെട്ട വാരമാണ്. ആത്മവിശ്വാസം വർദ്ധിക്കുന്നതാണ്. കരുതിയ കാര്യങ്ങൾ പൂർത്തീകരിക്കാനാവും. ധനപരമായി മെച്ചമുണ്ടാവുന്നതാണ്. സ്വതന്ത്ര നിലപാടുകൾക്കും സൃഷ്ടിപരമായ ആശയങ്ങൾക്കും സമൂഹത്തിൻ്റെ സ്വീകാര്യത ലഭിക്കും. വിദേശത്ത് കഴിയുന്നവർക്ക് നാട്ടിലേക്ക് വരാനുള്ള അവധി അനുവദിച്ചു കിട്ടുന്നതാണ്. ക്ഷേത്രാടനത്തിന് യോഗമുണ്ട്. വിദ്യാഭ്യാസ ലോണിന് രേഖകൾ സമർപ്പിക്കും. ഇലക്ട്രിക് / ഇലക്ട്രോണിക്സ് ഉപകരണങ്ങൾ വാങ്ങുന്നതാണ്.
തൃക്കേട്ട
നയചാതുരി ബിസിനസ്സിൽ ഗുണം ചെയ്യും. ഉദ്യോഗസ്ഥർ പുതിയ ദൗത്യങ്ങൾ മനസ്സില്ലാമനസ്സോടെ ഏറ്റെടുക്കുന്നതാണ്. ഉന്നത പഠനത്തിന് ആശിച്ച വിധം തന്നെ അവസരം ലഭിക്കും. പഴയ കടബാധ്യതകൾ ഘട്ടം ഘട്ടമായി കൊടുത്തു തീർക്കാൻ വ്യവസ്ഥയാവും. വാഹനം അറ്റകുറ്റപ്പണി കഴിഞ്ഞ് ഉപയോഗിക്കാനാവും. പ്രണയികൾക്ക് നല്ല വാരമാണ്. പ്രണയാഭ്യർത്ഥന സ്വീകരിക്കപ്പെടും. സഞ്ചാരശീലർക്ക് പുതിയ മേച്ചിൽപ്പുറങ്ങൾ കണ്ടെത്താനാവും. കൂട്ടു ബിസിനസ്സുകൾ തുടരാനാഗ്രഹിക്കും. ചെലവുകൾ കൂടുന്നതായി തോന്നും. ആരോഗ്യപുഷ്ടി ഉണ്ടാവും. .
മൂലം
മുഖ്യ തൊഴിലിനൊപ്പം ചില അനുബന്ധ കാര്യങ്ങൾ കൂടി ചെയ്യുവാൻ ആലോചിക്കും. സാമ്പത്തിക ഞെരുക്കത്തിന് അയവ് കണ്ടേ മതിയാവൂ എന്നിടത്തോളം കാര്യങ്ങളെത്താം. കൂട്ടുകച്ചവടത്തിൽ പറയത്തക്ക ഗുണം ഉണ്ടായേക്കില്ല. പുതിയ പാർട്ണർമാരെ ചേർക്കുന്നത് നന്നെന്ന നിലയിലെത്തും. വ്യായാമ ചര്യകൾക്ക് തടസ്സം നേരിടാം. കുടുംബസൗഖ്യം സാമാന്യമായ തോതിലാവും. പുതുതലമുറയുടെ വാക്കുകളോടും പ്രവർത്തന രീതികളോടും വിയോജിച്ചേക്കും. യാത്രകൾ ബിസിനസ്സ് വിപുലീകരണത്തിന് ഉതകിയേക്കും.
പൂരാടം
ഞായർ, തിങ്കൾ ദിവസങ്ങളിൽ ശുഭാരംഭങ്ങൾ ഗുണവത്തായേക്കില്ല. കൊടുക്കൽ വാങ്ങലുകളിൽ ശ്രദ്ധയുണ്ടാവണം. സമയനിഷ്ഠ പാലിക്കുവാൻ ക്ലേശിക്കും. മറ്റു ദിവസങ്ങളിൽ സാമാന്യേന ഗുണാനുഭവങ്ങൾ പ്രതീക്ഷിക്കാം. ആർത്ഥിക ക്ലേശങ്ങൾക്ക് അയവുണ്ടാവും. അനുരഞ്ജന സംഭാഷണം വിജയിക്കുന്നതാണ്. ബന്ധുഗൃഹം സന്ദർശിക്കും. മനസ്സന്തോഷമുണ്ടാവുന്ന വാർത്തകൾ ശ്രവിക്കുന്നതാണ്. വിദ്യാർത്ഥികൾക്ക് പഠനത്തിൽ ശ്രദ്ധിക്കാൻ കഴിയും.
ഉത്രാടം
ആലോചനാശൂന്യമായ തീരുമാനങ്ങൾ കൈക്കൊള്ളാൻ ഇടയുണ്ട്. സാമ്പത്തിക മുതൽമുടക്കിന് ഈ വാരം അത്രകണ്ട് അനുകൂലമല്ല. കൃത്യനിഷ്ഠ കുറയുന്നതിൻ്റെ പേരിൽ അധികാരികളുടെ അപ്രീതിയുണ്ടാവും. ധനുക്കൂറുകാർക്ക് വാരത്തിൻ്റെ തുടക്കവും മകരക്കൂറുകാർക്ക് ചൊവ്വ, ബുധൻ ദിവസങ്ങളും അനുകൂലമായിരിക്കില്ല. മറ്റു ദിവസങ്ങളിൽ കുടുംബ സൗഖ്യം, സുഖഭക്ഷണ യോഗം, സുഹൃൽ സമാഗമം മൂലമുള്ള ആഹ്ളാദം എന്നിവയുണ്ടാവും. ധനാഗമത്തിലെ തടസ്സങ്ങൾ നീങ്ങും. ബിസിനസ്സിലെ നിരുന്മേഷതയ്ക്ക് വിരാമമാവും.
തിരുവോണം
ഭാവികാര്യങ്ങൾ ചിലതൊക്കെ ആലോചനയിലൂടെ തീരുമാനിക്കും. പഴമയോട് മടുപ്പാവും. മാറ്റം ആഗ്രഹിക്കുന്നതാണ്. ഉദ്യോഗാർത്ഥികൾക്ക് മുന്നിൽ പുതിയ വാതിലുകൾ തുറക്കപ്പെടാം. ജീവിത പങ്കാളിയുടെ ബിസിനസ്സിൽ പുരോഗതിയുണ്ടാവും. മംഗളകർമ്മങ്ങളിൽ ഭാഗഭാക്കാവാൻ കഴിയുന്നതാണ്. ദൈവിക സമർപ്പണങ്ങൾക്ക് അവസരമുണ്ടാവും. തിമിരത്തിന് നടത്തിയ ശസ്ത്രക്രിയ ഫലപ്രദമാവും. വയോധികരുടെ ആരോഗ്യകാര്യത്തിൽ ശ്രദ്ധയുണ്ടാവണം. ബുധൻ, വ്യാഴം ദിവസങ്ങൾക്ക് മേന്മ കുറയുന്നതാണ്.
അവിട്ടം
പുതിയ ആശയങ്ങൾ, ഭാവനകൾ എന്നിവ മനസ്സിലുദയം ചെയ്യും. കലാകാരന്മാർക്കും സാഹിത്യകാരന്മാർക്കും അനുകൂലമായ കാലഘട്ടമാണ്. ബിസിനസ്സിൽ നിന്നും പ്രതീക്ഷിച്ച ആദായം ഉണ്ടാവുന്നതാണ്. സാങ്കേതികമായ വിപുലീകരണം സാധ്യമാവും. നവീനമായ ഇലക്ട്രോണിക് ഉല്പന്നങ്ങൾ വാങ്ങിയേക്കും. ഉദ്യോഗസ്ഥർക്ക് ചുമതലകൾ കൂടുന്നതായിരിക്കും. ഒപ്പമുള്ളവരുടെ പിന്തുണ വേണ്ടത്ര കിട്ടുന്നില്ലെന്നത് വിഷമിപ്പിക്കും. സുഹൃത്തുക്കൾക്കൊപ്പം വിനോദയാത്ര നടത്തിയേക്കും.
ചതയം
പരിശ്രമങ്ങൾ സഫലമാവുന്നത് സന്തോഷത്തിന് കാരണമാകുന്നതാണ്. സുഹൃത്തുക്കളുടെ പിന്തുണ വേണ്ടുവോളം ലഭിക്കും. സ്വതസ്സിദ്ധമായ കഴിവുകൾ പ്രകടിപ്പിക്കാനവസരം കിട്ടുന്നതാണ്. പ്രധാനപ്പെട്ട തീരുമാനങ്ങൾ കൈക്കൊള്ളുന്ന വാരമാവും. മകൻ്റെ വിദ്യാഭ്യാസത്തിലെ തടസ്സം നീങ്ങുന്നതാണ്. ശത്രുക്കളുടെ പ്രവർത്തനം തിരിച്ചറിയുവാനാവും. വായ്പ തവണകൾ തടസ്സം കൂടാതെ അടയ്ക്കും. വാഹനത്തിൻ്റെ അറ്റകുറ്റപ്പണി പൂർത്തിയാവുന്നതാണ്. സുഹൃത്തിൻ്റെ മകളുടെ വിവാഹത്തിൽ പങ്കെടുക്കും.
പൂരൂരുട്ടാതി
പ്രതിസന്ധികളിൽ നിർഭയമായി മുന്നോട്ടു നീങ്ങും. ദൗത്യങ്ങൾ ക്ലേശകരമാണെന്ന് വന്നാലും പിൻവാങ്ങില്ല. രാഷ്ട്രീയ പ്രവർത്തകർക്ക് ജനപിന്തുണയുണ്ടാവും. സാമ്പത്തിക കാര്യങ്ങൾ ശ്രദ്ധയോടെ വിനിമയം ചെയ്യേണ്ടതുണ്ട്. തദ്വിഷയകമായി അമളികൾ പിണയാനിടയുണ്ട്. ബിസിനസ്സിൽ പുതിയ ശാഖകൾ ആരംഭിക്കാൻ പദ്ധതി തയ്യാറാക്കും. ഭൂമി വിൽപ്പനയിൽ സാധ്യതകൾ തുടരപ്പെടും. അയൽ തർക്കങ്ങൾക്ക് പരിഹാരം കണ്ടെത്തും. കുടുംബകാര്യങ്ങളിൽ ശ്രദ്ധ കുറയുന്നതായി പരാതി ഉയരാം. വെള്ളി, ശനി ദിവസങ്ങൾക്ക് മേന്മ കുറയാം.
ഉത്രട്ടാതി
ഉയർന്ന ചിന്താഗതിയുണ്ടായാലും പ്രായോഗികതയും അനിവാര്യമാണ്, കാര്യസാധ്യത്തിനെന്ന് തിരിച്ചറിയും. ചിലരുടെ വിയോജിപ്പുകൾ കണ്ടില്ലെന്ന് നടിക്കേണ്ടിവരും. സ്വയം നിശ്ചയിക്കുന്ന ലക്ഷ്യത്തിലെത്താൻ ക്ലേശിച്ചേക്കും. എന്നാലും പിന്തിരിയില്ല. ബിസിനസ്സിലെ നവീകരണത്തിന് തിടുക്കം കാട്ടും. മകന്റെ വിദ്യാഭ്യാസച്ചെലവുകൾക്ക് വായ്പാ സഹായം തേടുന്നതാണ്. ഔദ്യോഗികമായി ജോലിഭാരം കൂടും. ദുർഘട ദൗത്യങ്ങളിൽ ആത്മശക്തി ചോരില്ല. ന്യായമായ ആവശ്യങ്ങൾക്ക് ധനം തടസ്സമാകില്ല.
രേവതി
പരിചയം ഹൃദയബന്ധമായി വളരാം. പുതിയ കാര്യങ്ങൾ പഠിച്ചറിയുന്നതിൽ ഔൽസുക്യമേറും. തൊഴിലന്വേഷണം ഫലവത്താകും. സമൂഹമാധ്യമങ്ങളിൽ സക്രിയ സാന്നിധ്യമാകും. നിയമ പ്രശ്നങ്ങൾക്ക് വിദ്ഗ്ദ്ധോപദേശം തേടുന്നതാണ്. വ്യാപാരത്തിൽ നേട്ടമുണ്ടാവും. ഉപഭോക്താക്കളുടെ ആവശ്യങ്ങളറിയുന്നതിൽ വിജയിക്കും. ഔദ്യോഗിക ജീവിതത്തിൽ നിന്നും വിരമിച്ചവർ ചില പദ്ധതികൾ ആവിഷ്കരിക്കും. ചെറുകിട സംരംഭങ്ങൾ ഗുണകരമാവും. കിടപ്പ് രോഗികൾക്ക് ആശ്വാസം ഭവിക്കും.
Read More
Stay updated with the latest news headlines and all the latest Lifestyle news. Download Indian Express Malayalam App - Android or iOS.