സമ്പൂർണ്ണ വാരഫലം, അശ്വതി മുതൽ രേവതി വരെ; February 25-March 02, 2024, Weekly Horoscope

ആദിത്യൻ കുംഭം രാശിയിൽ ചതയം ഞാറ്റുവേലയിൽ സഞ്ചരിക്കുന്നു. ശനിയും കുംഭം രാശിയിൽ ചതയം നക്ഷത്രത്തിലാണ്. ശനിക്ക് സൂര്യസാമീപ്യത്താൽ മൗഢ്യാവസ്ഥയുമുണ്ട്. ബുധനും കുംഭം രാശിയിൽ ചതയം നക്ഷത്രത്തിൽ സഞ്ചരിക്കുന്നു. ബുധനും മൗഢ്യാവസ്ഥയിലാണ്. ഇപ്രകാരം മൂന്ന് ഗ്രഹങ്ങൾ  ഒരേ രാശിയിൽ  ഒരേ നക്ഷത്രത്തിൽ സഞ്ചരിക്കുകയാണ്, അതിൽ ഇരുഗ്രഹങ്ങൾക്കും മൗഢ്യം ഉണ്ടെന്നതും സവിശേഷതയാണ്; കൗതുകകരവുമാണ്.

വ്യാഴം മേടം രാശിയിൽ ഭരണി നക്ഷത്രത്തിൽ സഞ്ചരിക്കുന്നു. ശുക്രനും കുജനും മകരം രാശിയിൽ തിരുവോണം നക്ഷത്രത്തിലാണ്. രാഹു മീനം രാശിയിൽ രേവതിയിൽ തുടരുന്നു. കേതു കന്നി രാശിയിൽ ചിത്തിര ഒന്നാം പാദത്തിൽ അപ്രദക്ഷിണഗതിയായി നീങ്ങുന്ന അവസാന ആഴ്ചയാണ്. അടുത്ത വാരം കേതു അത്തം നക്ഷത്രത്തിൽ പ്രവേശിക്കും. 

ചന്ദ്രൻ ഫെബ്രുവരി 25 ന് കൃഷ്ണ/ കറുത്ത പക്ഷത്തിലേക്ക് കടക്കുന്നു. അന്നു പൂരം നക്ഷത്രമാണ്. വാരാന്ത്യത്തിൽ വിശാഖം നക്ഷത്രത്തിലാണ് ചന്ദ്രൻ്റെ സഞ്ചാരം. ഈയാഴ്ചയിലെ  അഷ്ടമരാശി ആർക്കൊക്കെ എന്നുനോക്കാം. ഞായറും മുഴുവനും തിങ്കൾ പ്രഭാതം വരെയും മകരക്കൂറുകാർക്കാണ് ചന്ദ്രൻ അഷ്ടമരാശിയിൽ സഞ്ചരിക്കുന്നത്. തുടർന്ന് ബുധനാഴ്ച സായാഹ്നം വരെ കുംഭക്കൂറുകാർക്കും അതിനുശേഷം ശനിയാഴ്ച പ്രഭാതം വരെ മീനക്കൂറുകാർക്കും ചന്ദ്രൻ അനിഷ്ടരാശിയായ എട്ടാം കൂറിലാണ്.

ശനി പ്രഭാതം മുതൽ അടുത്ത ആഴ്ചയുടെ തുടക്കത്തിലേക്ക്  മേടക്കൂറുകാരുടെ അഷ്ടമരാശി തുടരുന്നു. ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി  വരെയുള്ള 27 നക്ഷത്രത്തിൽ ജനിച്ചവരുടെയും സമ്പൂർണ്ണ വാരഫലം ഇവിടെ അവതരിപ്പിക്കുന്നു. 

അശ്വതി

വാരത്തിൻ്റ തുടക്കവും വാരാന്ത്യവും ആശങ്കയ്ക്ക് വഴിവെക്കും. സംരംഭങ്ങൾ തടസ്സപ്പെടുമോ എന്ന് സന്ദേഹിക്കും. സുലഭവസ്തുക്കൾ കിട്ടാൻ യത്നിക്കേണ്ടി വരുന്നതാണ്. പണം നിയന്ത്രണമില്ലാതെ ചെലവാക്കുന്നതും ക്ലേശത്തിനിടയാക്കും. ചൊവ്വ മുതൽ വ്യാഴം വരെയാവും കൂടുതൽ അനുകൂല ഫലങ്ങൾ ഉണ്ടാവുന്നത്. ദാമ്പത്യത്തിലെ അസ്വാരസ്യങ്ങൾ അനുരഞ്ജനത്തിലാവും. സുഹൃത്തുക്കളുടെ സ്നേഹം അനുഭവിക്കാനാവും. സുഖഭോജനമുണ്ടാവും. ഭോഗസിദ്ധി പ്രതീക്ഷിക്കാം. 

ഭരണി

വാഗ്ദാനങ്ങൾ പാലിക്കാൻ ക്ലേശിക്കും. കളവ് പറയേണ്ടി വരുന്നതാണ്. കാര്യസാധ്യത്തിന് തടസ്സങ്ങളുള്ളതായി മനസ്സിലാക്കും. തർക്കത്തിന് ഒരുമ്പെടും. തന്മൂലം പ്രിയപ്പെട്ടവരെ വേദനിപ്പിക്കേണ്ടി വന്നേക്കും.  പഠനത്തിൽ ശ്രദ്ധിക്കാൻ കഴിയാത്ത സ്ഥിതി വരാം. വാരമധ്യത്തിൽ എന്നാൽ ഗുണാനുഭവങ്ങൾ ഉണ്ടാവുന്നതാണ്. ദാമ്പത്യത്തിലെ സ്വച്ഛത വീണ്ടെടുത്തേക്കും. നല്ലവാക്കുകൾ പറയാനാവും. കർമ്മരംഗത്ത് സോത്സാഹം മുഴുകും. ആത്മവിശ്വാസം വ്യക്തമാവും.

കാർത്തിക

ന്യായമായ ആഗ്രഹങ്ങൾ നിറവേറപ്പെടും. വിദ്യാർത്ഥികൾ ആത്മവിശ്വാസത്തോടെ പരീക്ഷയ്ക്ക് തയ്യാറാകും. തൊഴിൽ കരാറുകൾ ഉപാധികളോടെ പുതുക്കപ്പെടുന്നതാണ്. ഏജൻസി / കമ്മീഷൻ വ്യാപാരത്തിൽ നേട്ടങ്ങളുണ്ടാവും.  ജീവിതപങ്കാളിയുടെ പിന്തുണ ശക്തിപകരും. പന്ത്രണ്ടിൽ വ്യാഴസ്ഥിതി വരികയാൽ  നല്ലകാര്യങ്ങൾക്ക് ചെലവേർപ്പെടുന്നതാണ്. ചെറുയാത്രകൾ ഗുണകരമാവും. കടബാധ്യതകൾ പരിഹരിക്കുന്നതിന്  കൂടിയാലോചനകൾ പ്രയോജനം ചെയ്യുന്നതായിരിക്കും.

രോഹിണി

കർമ്മഗുണവും അതോടൊപ്പം കർമ്മപരാങ്മുഖത്വവും കലരും. അതിനാൽ അനുഭവത്തിൽ സമ്മിശ്രത ഉണ്ടാകുന്ന വാരമാണ്. വാരാദ്യത്തിൽ ചിന്തകൾ കൂടും. ബുധൻ മുതൽ പ്രായോഗികതയിൽ മുഴുകാനാവും. കലാപ്രവർത്തനം നന്നായി മുന്നോട്ടുപോകും. സാങ്കേതിക വിഷയങ്ങളിൽ പുതിയ അറിവ് സമ്പാദിക്കും. വേനലവധിയിൽ വിനോദയാത്രക്കുള്ള മുന്നൊരുക്കങ്ങൾ നടത്തും. ഊഹക്കച്ചവടം, ചിട്ടി ഇവയിൽ നിന്നും പണം വന്നുചേരുന്നതാണ്. മിതവ്യയം നടപ്പാക്കും.

മകയിരം

നക്ഷത്രനാഥനായ ചൊവ്വയുടെ ഉച്ചത്വം തുടരുന്നതിനാൽ ഉന്മേഷവും കർമ്മതൽപരതയും വർദ്ധിക്കും. കുട്ടികൾ ധിക്കാര വാസന കാട്ടുന്നതായി മാതാപിതാക്കൾക്ക് തോന്നിയേക്കാം. പതിവായി ചെയ്യുന്ന പ്രവർത്തനങ്ങൾക്ക് മുടക്കം വരുന്നതല്ല. സുഹൃത്തുക്കളുടെ വാക്കുകൾക്ക് ചെവികൊടുക്കും.  ഭൂമിയിൽ നിന്നും ചെറിയ ആദായമെങ്കിലും വന്നുചേരുന്നതാണ്. സംഘടനകളിൽ സജീവമാകും. രാഷ്ട്രീയ ചർച്ചകളിൽ നിലപാടുകൾ ആവർത്തിക്കും. കുടുംബകാര്യങ്ങളിൽ ശ്രദ്ധ കുറയുന്നതാണ്. ഉഷ്ണരോഗങ്ങൾക്ക് സാധ്യതയുണ്ട്.

തിരുവാതിര

തീരുമാനങ്ങൾ ക്രിയാപഥത്തിലെത്താൻ കാലതാമസം ഉണ്ടായേക്കും. അഥവാ നേരത്തെ എത്തുകയാണെങ്കിൽ തന്നെയും മനസ്സില്ലാമനസ്സോടെയാവും പ്രവർത്തിക്കുക. രാശിനാഥനായ ബുധന് മൗഢ്യാവസ്ഥ ഉള്ളതിനാൽ  പ്രധാനകാര്യങ്ങൾ, അവയുടെ തീയതി, സ്ഥലം, സമയം തുടങ്ങിയവ വിട്ടുപോകാം. അഥവാ തെറ്റായി ധരിക്കാം. കൂട്ടുകച്ചവടത്തിൽ ലാഭം നാമമാത്രമാകും.   കുടുംബകാര്യത്തിൽ ബന്ധുക്കളുടെ വിയോജിപ്പ് വിഷമിപ്പിച്ചേക്കും. വിദ്യാർത്ഥികൾ പഠന-പരീക്ഷകളിൽ തികഞ്ഞ ജാഗ്രത പുലർത്തണം.

പുണർതം

വ്യാഴം പതിനൊന്നിലാകയാൽ പൊതുവേ അഭീഷ്ടങ്ങൾ സാധിക്കുന്ന കാലമാണ്. സാമ്പത്തിക ഞെരുക്കത്തിന്  വേഗം  പരിഹാരമുണ്ടാവും. സജ്ജനങ്ങളുടെ സഹായം പ്രതീക്ഷിക്കാം. എന്നാൽ ശനി- സൂര്യയോഗം മൂലം  ഉദ്യോഗസ്ഥർക്ക് അർഹമായ സ്ഥാനക്കയറ്റം വൈകുന്നതാണ്. സംരംഭങ്ങൾക്ക് അനുമതി എളുപ്പം ലഭിച്ചേക്കില്ല. അനിഷ്ടനായ ചൊവ്വ ആരോഗ്യപ്രശ്നങ്ങളുണ്ടാക്കും. പഠനത്തിന്  അനുകൂലമായ അന്തരീക്ഷം ഉണ്ടാവണമെന്നില്ല. ചെറിയ കാര്യങ്ങൾ ഭംഗിയായി നടന്നുകിട്ടും.

പൂയം

നക്ഷത്രനാഥനായ ശനി മൗഢ്യത്തിലാണ്. അതിനാൽ ആത്മശക്തി ചോരുന്നതായി തോന്നും. കാര്യങ്ങൾ മന്ദഗതിയിലായേക്കും. തീരുമാനങ്ങൾ നടപ്പിലാക്കാനാവാതെ കുഴങ്ങുന്നതാണ്. പ്രതീക്ഷിച്ച പിന്തുണ കിട്ടിയേക്കില്ല. കുടുംബ ജീവിതത്തിൽ സന്തോഷം നാമമാത്രമായിരിക്കും. സഹോദരാനുകൂല്യം ആശ്വാസമേകും. ഭൂമിയിൽ നിന്നും ചെറിയ ആദായം പ്രതീക്ഷിക്കാം. കടം വാങ്ങുന്നതിൽ നിയന്ത്രണം വേണം. തിങ്കൾ, ചൊവ്വ, വ്യാഴം ദിവസങ്ങൾക്കാവും ഗുണാധിക്യം.

• ദാമ്പത്യത്തിൽ തൃപ്തി കുറയും, സ്വകാര്യജോലിയിൽ പിരിമുറുക്കം കൂടും; കുംഭമാസത്തിലെ 6 നാളുകാരുടെ നക്ഷത്രഫലം
• ആരോഗ്യത്തിൽ ശ്രദ്ധ വേണം, പണച്ചെലവിന് സാധ്യത; കുംഭമാസത്തിലെ 6 നാളുകാരുടെ നക്ഷത്രഫലം
• തൊഴിലിടങ്ങളിൽ സ്ഥാനക്കയറ്റം, സാമ്പത്തിക നേട്ടം; കുംഭമാസത്തിൽ ഈ 6 നാളുകാർക്ക് ഗുണകരം

ആയില്യം

നക്ഷത്രനാഥനായ ബുധൻ്റെ ദുർബല സ്ഥിതി തുടരുകയാൽ കാര്യസാധ്യം എളുപ്പമാവില്ല. ശത്രു പുറത്തല്ല, അകത്താണെന്ന് മനസ്സിലാവും. അതായത് സ്വന്തം ദൗർബല്യങ്ങൾ തന്നെയാവും തടസ്സം സൃഷ്ടിക്കുന്നത്. പണമിടപാടുകളിൽ സുഗമത കുറയുന്നതാണ്. ദാമ്പത്യത്തിൽ അസ്വാരസ്യങ്ങൾ തലയുയർത്താം. അക്ഷരത്തെറ്റോ ഉച്ചാരണ വൈകല്യമോ ആരെങ്കിലും ചൂണ്ടിക്കാട്ടിയേക്കാം. ബന്ധുജനങ്ങൾ ചെറിയ കാരണം കണ്ടെത്തി പിണങ്ങിയേക്കും. ആഴ്ചമധ്യം വരെ ഗുണപ്രധാനമാണ്.

മകം

സന്തോഷാനുഭവങ്ങൾ വർദ്ധിക്കുന്നതാണ്. ഇച്ഛാശക്തിയോടെ ഏതുകാര്യവും ചെയ്യുവാൻ കഴിയും. എതിർപ്പിനെ അവഗണനകൊണ്ട് നിസ്സാരമാക്കും.  ഭാഗ്യാധിപനായ ചൊവ്വ ഉച്ചത്തിൽ നിൽക്കുന്നതിനാൽ പിതാവിന് നല്ല അനുഭവങ്ങൾ ഉണ്ടാവുന്നതാണ്.  മകൻ്റെ / മകളുടെ വിവാഹം തീരുമാനിക്കപ്പെടാം. പെൻഷൻ തുക, കിട്ടാനുള്ള ഇൻഷ്വറൻസ് ആനുകൂല്യം മുതലായവ ലഭിക്കുന്നതാണ്.  ഉന്നതോദ്യോഗസ്ഥരുടെ പ്രശംസ ലഭിച്ചേക്കും.  കച്ചവടം തൃപ്തികരമാം വിധം പുരോഗമിക്കും.

പൂരം

ജന്മനക്ഷത്രത്തോടെയാണ് വാരം ആരംഭിക്കുന്നത്.  മനസ്സിനെ ആഹ്ളാദിപ്പിക്കുന്ന അനുഭവങ്ങൾക്കാവും മുൻതൂക്കം ഉണ്ടാവുക. പിണക്കം മറന്ന് സുഹൃത്തുക്കൾ ഇണങ്ങുന്നതാണ്. സഹോദരരുടെ പിന്തുണ ശക്തമായിരിക്കും. ക്രിയാശക്തി മുന്നിട്ട് നിൽക്കുന്നതാണ്. മുൻപ് അസാധ്യമെന്ന് ഉപേക്ഷിച്ച ദൗത്യങ്ങൾ ഏറ്റെടുക്കാനും വിജയിക്കാനും കഴിയും.  പ്രവർത്തനങ്ങളിൽ മനുഷ്യത്വം മുന്തി നിൽക്കും.  വരവുചെലവുകളെ ഭംഗിയായി സന്തുലനം ചെയ്യും. പരീക്ഷാർത്ഥികൾക്ക് ഏകാഗ്രതയുണ്ടാവും.

ഉത്രം

പലതരത്തിലുള്ള വിജ്ഞാനം നേടിയെടുക്കുന്നതിൽ സംതൃപ്തിയുണ്ടാവും. വെല്ലുവിളികളെ കരുതലോടെ നേരിടേണ്ടതുണ്ട്. വൈകാരിക പ്രതികരണം ഗുണകരമായേക്കില്ല. ഉദ്യോഗപരമായി വളർച്ചയുണ്ടാവുന്നില്ല എന്ന തോന്നൽ കൂടിവരും. സ്വന്തം തൊഴിലിൽ സാമ്പത്തിക നിക്ഷേപത്തിന് അനുകൂലത കുറവായ കാലമാണിപ്പോൾ. പൊതുപ്രവർത്തകർക്ക് സമൂഹത്തിൻ്റെ പിന്തുണ വേണ്ടത്ര ലഭിച്ചെന്ന് വരുന്നതല്ല.

അത്തം

അത്തത്തിൻ്റെ വേധനക്ഷത്രമായ ചതയത്തിൽ മൂന്ന് ഗ്രഹങ്ങൾ സഞ്ചരിക്കുകയാൽ ഗുണാനുഭവങ്ങൾ കുറയുന്ന സാഹചര്യമാണുള്ളത്. ലഘുവായ നേട്ടങ്ങൾക്ക് പോലും അത്യധ്വാനം വേണ്ടി വരും. ശാരീരിക / മന ക്ലേശങ്ങൾ അനുഭവപ്പെടുന്നതാണ്. ക്ഷോഭം കൂടുകയാൽ വീട്ടിലും പുറത്തും ശത്രുക്കളേറുന്നതാണ്. കടം വാങ്ങി ചെലവു ചെയ്യാനുള്ള ഉൾപ്രേരണ നിയന്ത്രിക്കപ്പെടണം. ദാമ്പത്യത്തിൽ സ്വൈരക്കേടിന് മുൻതൂക്കം ഉണ്ടാവും. വാരാന്ത്യദിനങ്ങൾ മെച്ചമുള്ളതാവും.

ചിത്തിര

നക്ഷത്രനാഥനായ ചൊവ്വയുടെ ഉച്ചാധിപത്യം തുടരുകയാൽ ജീവിതത്തിൻെറ സ്വാഭാവികമായ ഒഴുക്ക് തടസ്സപ്പെടില്ല. ആർക്കും അവഗണിക്കാനും കഴിയില്ല. ഒരുപാട് വിയർക്കാതെ തന്നെ നേട്ടങ്ങൾ കരഗതമാവും. അധ്വാനം അർത്ഥപൂർണമാകും. ചെറുതാകട്ടെ, വലുതാകട്ടെ ജോലി ഏതായാലും മികവു പുലർത്തും. വസ്തുവിൽ / ഭൂമിയിൽ നിന്നും ആദായം വന്നുചേരും. പ്രതികൂലമായ സാഹചര്യം ഉണ്ടായാലും അനായാസം അതിനെ തരണം ചെയ്യുന്നതാണ്. സാമ്പത്തിക ഞെരുക്കത്തിന് അയവുണ്ടാകും.

ചോതി

വ്യാഴത്തിൻ്റെ നോട്ടം പതിയുന്നതിനാൽ ജീവിതത്തിൽ മുന്നേറാനാവും.  വാരാദ്യം തന്നെ  അനുകൂലാവസ്ഥ സംജാതമാകും. ഇഷ്ടപ്പെട്ടവരുടെ പിന്തുണ കരുത്തുപകരും.  ചൊവ്വ, ബുധൻ ദിവസങ്ങളിൽ ചെലവ് കൂടുന്നതായി തോന്നാം. സഹപ്രവർത്തകരോട്  ശബ്ദമുയർത്തേണ്ടതായി വന്നേക്കാം. മറ്റു ദിവസങ്ങളിൽ സ്വസ്ഥതയുണ്ടാവും. മറ്റാരുടെയും ദുഷ്പ്രേരണ തൻ്റെ വാക്കുകളേയും ചിന്തകളേയും സ്വാധീനിക്കുന്നില്ലെന്ന് ഉറപ്പിക്കാനാവും. സുഖഭക്ഷണം, സുഖനിദ്ര ഇവ പ്രതീക്ഷിക്കാം.

വിശാഖം

ഗാർഹികമായി പ്രശ്നങ്ങളുണ്ടാവാം.  കുടുംബാംഗങ്ങൾക്കിടയിൽ അനൈക്യത്തിന് സാധ്യതയുണ്ട്. അല്ലെങ്കിൽ വീടുപണിയിൽ തടസ്സങ്ങൾ ഏർപ്പെടാം. ചിലർക്ക് വീടുവിട്ട് താമസിക്കേണ്ട സ്ഥിതയുണ്ടാവാം. പ്രതീക്ഷിച്ച ധനം കൈയ്യിൽ വന്നെത്തുവാൻ വൈകുന്നതാണ്. പ്രവൃത്തിയിൽ സമയനിഷ്ഠ കുറയുന്നത് പ്രശ്നങ്ങൾ ഉണ്ടാക്കിയേക്കും. മക്കളുടെ പഠനാദികളിൽ കൂടുതൽ ഉൽക്കണ്ഠ പുലർത്തും. ഇടത്തരം കച്ചവടക്കാർക്ക് അനുകൂലമായ കാലമാണ്.

അനിഴം

നക്ഷത്രനാഥനായ ശനിക്ക് മൗഢ്യം തുടരുന്നതിനാൽ തീരുമാനങ്ങൾ കൈക്കൊള്ളാൻ സന്ദിഗ്ദ്ധതയുണ്ടാവും. പരസ്പരവിരുദ്ധമായ  കാര്യങ്ങൾ പറയുന്നതാണ്. പ്രവൃത്തിയും അങ്ങനെ വരാം. വയോജനങ്ങൾ ആരോഗ്യപരമായി കൂടുതൽ ശ്രദ്ധിക്കണം. രാശിനാഥനായ ചൊവ്വയുടെ ബലത്താൽ തടസ്സമില്ലാതെ എല്ലാക്കാര്യങ്ങളും പൂർത്തിയാക്കുവാൻ കഴിയും. വാരാദ്യ ദിവസങ്ങളിൽ വരവധികരിക്കുന്നതാണ്. സ്ത്രീകളുടെ പിന്തുണ ലഭിക്കും. അമ്മ/ഭാര്യ /മകൾ ഇവർക്ക്  ക്ഷേമകാലമായിരിക്കും.

തൃക്കേട്ട

സാമ്പത്തികമായി മെച്ചമുണ്ടാവുന്നതാണ്. കൈവായ്പ മടക്കിക്കിട്ടാനിടയുണ്ട്. ഏഴാം നക്ഷത്രത്തിൽ പാപഗ്രഹങ്ങൾ സഞ്ചരിക്കുന്നത് ഗുണഹാനിയുണ്ടാക്കും. വിദ്യാർത്ഥികൾക്ക് പഠനത്തിൻ്റെ സമ്മർദ്ദം ഏറുന്നതായിരിക്കും. വാഹനം ഉപയോഗിക്കുമ്പോൾ നല്ല ജാഗ്രത വേണ്ടതുണ്ട്. കലാപ്രവർത്തനത്തിന് പുതിയ ഊർജ്ജം ലഭിച്ചേക്കാം. ബുധമൗഢ്യം തുടരുകയാൽ അക്ഷരത്തെറ്റ്, വ്യാകരണപ്പിഴ, ഉച്ചാരണവൈകല്യം എന്നിവ സാധ്യതകൾ.  ഭക്ഷണകാര്യത്തിൽ ആസ്ഥ കുറഞ്ഞേക്കും. സ്വന്തം സംരംഭങ്ങളിൽ മുന്നേറാൻ സാധിക്കുന്നതാണ്.

മൂലം

താരതമ്യേന ഗുണകരമായ വാരമാണ്. തിങ്കൾ മുതൽ വെള്ളി വരെ നല്ല അനുഭവങ്ങൾക്ക് മുൻതൂക്കം ഉണ്ടാവും. സാമ്പത്തികമായ പരാധീനതകൾക്ക് അയവുണ്ടായേക്കും. സുഭിക്ഷത പ്രതീക്ഷിക്കാം. ഇഷ്ടവസ്തുക്കൾ പാരിതോഷികമായി കൈവശമെത്തും. ഉദ്യോഗസ്ഥർക്ക്  അധികാരമുള്ള ചുമതലകൾ ലഭിക്കുന്നതാണ്. ഊഹക്കച്ചവടത്തിൽ നിന്നും ആദായം വർദ്ധിക്കും.  കുടുംബബന്ധങ്ങൾ ദൃഢമാകും. കുഞ്ഞുങ്ങൾക്കായി കരുതൽ നിക്ഷേപം തുടങ്ങാനാവും.

പൂരാടം

അനുകൂലമായ ജീവിത സാഹചര്യമുണ്ടാവും. നക്ഷത്രനാഥനായ ശുക്രൻ ചൊവ്വയോടൊപ്പമാണ്. അതിനാൽ  മനക്കരുത്തുകാട്ടും. നയചാതുര്യത്തോടെ എതിരാളികളോട് പെരുമാറും. ധനപരമായി ഉയർച്ചയുടെ പാതയിലായിരിക്കും. തൊഴിൽ രംഗത്തെ  മ്ളാനത നീങ്ങുന്നതാണ്. ആഢംബരത്തിൽ താല്പര്യമേറും. എന്നാൽ മിതവ്യയത്തിൽ നിന്നും വ്യതിചലിച്ചേക്കില്ല. മകൻ്റെ ശ്രേയസ്സിൽ സംതൃപ്തി അനുഭവപ്പെടുന്നതാണ്. സാമൂഹികമായ ആദരം സിദ്ധിക്കും. ബന്ധുസമാഗമത്തിന് തയ്യാറെടുക്കും.

ഉത്രാടം

വാരാദ്യത്തിന് പകിട്ട് കുറയും. വാക്കും കർമ്മവും ഇണങ്ങിയേക്കില്ല. ദേഹസുഖം തെല്ല് കുറയാം. മകനുമായി കലഹിക്കാനിടയുണ്ട്. തുടർദിനങ്ങളിൽ കുടുംബസമാധാനം പുലരുന്നതാണ്. രാഷ്ട്രീയ കാര്യങ്ങൾക്ക് സമയം നീക്കിവെക്കും. വിലകൂടിയ വസ്തുക്കൾ വാങ്ങുന്നതാണ്. സഹപ്രവർത്തകരുടെ തർക്കങ്ങൾക്ക് ഉചിതമായ പോംവഴി നിർദ്ദേശിക്കാനാവും. മുതൽ മുടക്കിനു തക്ക  ലാഭം വ്യാപാരത്തിൽ കിട്ടിത്തുടങ്ങും. വിരുന്നുകാരുടെ ഭക്ഷണാഭിരുചിയെ സന്തോഷിപ്പിക്കും.

തിരുവോണം

ജന്മനക്ഷത്രത്തിൽ ചൊവ്വ സഞ്ചരിക്കുകയാൽ ക്ഷോഭശീലമേറും. ചെറിയ കാര്യങ്ങൾക്ക് പോലും ശബ്ദമുയർത്തി സംസാരിച്ചേക്കും. ഞായർ, തിങ്കൾ ദിവസങ്ങളിൽ അഷ്ടമരാശിക്കൂറ് ആകയാൽ ശുഭകാര്യങ്ങൾ തുടങ്ങരുത്. തീരുമാനിച്ച കാര്യങ്ങളിൽ തടസ്സം ഏർപ്പെടാം. ചൊവ്വാഴ്ച മുതൽ അനുകൂലത ദൃശ്യമാകും.  പഠനം, തൊഴിൽ എന്നിവയിൽ ഏകാഗ്രതയുണ്ടാവും. സ്വതസ്സിദ്ധമായ പ്രവർത്തന ശൈലി ഗുണം ചെയ്യും.  മാതാപിതാക്കളുടെ പരിരക്ഷയിൽ കൂടുതൽ ശ്രദ്ധ കാട്ടും.

അവിട്ടം

മുന്നിലേയും പിന്നിലേയും നക്ഷത്രങ്ങളിൽ പാപഗ്രഹങ്ങൾ സഞ്ചരിക്കുകയാൽ സമ്മർദ്ദങ്ങളുടെ കാലമായിരിക്കും. നിസ്സാരമെന്ന് കരുതുന്നവനേടാൻ ബഹുദൂരം സഞ്ചരിക്കേണ്ടതായി വന്നേക്കാം. വാക്കും കർമ്മവും പൊരുത്തപ്പെടുകയില്ല. വാരത്തിൻ്റെ പകുതി മുതൽ ചില ഗുണാനുഭവങ്ങൾ പ്രതീക്ഷിക്കാം. ന്യായമായ ആവശ്യങ്ങൾക്ക് പണം തടസ്സമായേക്കില്ല. അധികാരികളുടെ സൗഹൃദം നേടും. ഗൃഹാന്തരീക്ഷം സ്വച്ഛമാകുന്നതാണ്. ദേശോത്സവത്തിൽ സക്രിയമായ പങ്കെടുക്കലുണ്ടാവും.

ചതയം

ശനിയും ആദിത്യനും ബുധനും ചതയം നക്ഷത്രത്തിൽ സഞ്ചരിക്കുന്ന കാലമാണ്. സമ്മർദ്ദമുണ്ടാക്കുന്ന ഗ്രഹനിലയാണത്.  മനോവാക്കർമ്മങ്ങളിൽ ജാഗ്രത വേണം. കർമ്മഗുണം കുറയാം.  സ്വതസിദ്ധമായ കഴിവുകൾ പുറത്തെടുക്കാൻ കഴിഞ്ഞേക്കില്ല.  ചെറിയ കാര്യങ്ങൾ നിർവഹിക്കാൻ കൂടുതൽ സമയം വേണ്ടിവരും.  സാമ്പത്തികമായി മോശം സമയമാവില്ല. ആത്മീയസാധനകൾക്ക് നേരം കണ്ടെത്തുന്നതാണ്. കുടുംബജീവിതത്തിൽ സമാധാനമുണ്ടാവും. പൊതുക്കാര്യങ്ങളോട് വിമുഖത തുടർന്നേക്കും.

പൂരൂരുട്ടാതി

കുംഭരാശിയിൽ ത്രിഗ്രഹങ്ങൾ സഞ്ചരിക്കുന്നതിനാൽ മാനസിക പിരിമുറുക്കം തുടരുന്നതായിരിക്കും. വ്യക്തത ആലോചനയ്ക്കും കൃത്യത കർമ്മങ്ങൾക്കും ഉണ്ടാവണമെന്നില്ല. കച്ചവട വിപുലീകരണത്തിനോ കൂടുതൽ നിക്ഷേപത്തിനോ അനുകൂലമായ സമയമല്ല. ഊഹക്കച്ചവടത്തിൽ നേട്ടം പ്രതീക്ഷിക്കരുത്.
ലഭിക്കേണ്ട ധനം ഭാഗികമായി വന്നുചേരും. വായ്പാ തിരിച്ചടവിന് ക്ലേശിക്കുന്നതാണ്. ദാമ്പത്യത്തിൽ സ്വച്ഛത വന്നും പോയുമിരിക്കും. 
ഉപദേശം അസ്വീകാര്യമാവും.

ഉത്രട്ടാതി

ഗ്രഹങ്ങളുടെ അനുകൂല - പ്രതികൂല സ്ഥിതി തുടരപ്പെടും. നേട്ടങ്ങളും  കോട്ടങ്ങളും ആവർത്തിതമായിക്കൊണ്ടിരിക്കും. സ്ത്രീകളുടെ പിന്തുണ പ്രതീക്ഷിക്കാം. സൽകർമ്മങ്ങളെ സർവ്വാത്മനാ പ്രോൽസാപ്പിക്കുന്നതാണ്. കമ്മീഷൻ/ഏജൻസി ഏർപ്പാടുകൾ ചെറിയ ലാഭമുണ്ടാക്കും. തൊഴിൽ യാത്രകൾ മുന്നത്തെക്കാളും  അധികമാകും.  ആഘോഷങ്ങളിൽ സക്രിയ പങ്കാളിത്തം ഉണ്ടാവുന്നതാണ്. വസ്തുസംബന്ധിച്ച തർക്കങ്ങളിൽ അനുരഞ്ജനം സാധ്യമാകും. വ്യാഴം, വെള്ളി ദിവസങ്ങൾക്ക് ഗുണം കുറയാം.

രേവതി

നക്ഷത്രനാഥനായ ബുധൻ മൗഢ്യസ്ഥിതിയിൽ തുടരുകയാണ്.  പാപഗ്രഹങ്ങൾ  പ്രതിലോമത സൃഷ്ടിച്ചേക്കാം. അതിനെ മറികടക്കാൻ ഗ്രഹങ്ങൾ നൽകുന്ന ശുഭത്വം തന്നെയാണ് ഒരു പരിധിവരെയെങ്കിലും തുണയാവുക. ധനപരമായി മെച്ചപ്പെട്ട കാലമാണ്. ഒന്നിലധികം മാർഗങ്ങളിലൂടെ ആദായമുണ്ടാകും.  ധനവ്യയം ധൂർത്താവാതിരിക്കാൻ നല്ല ശ്രദ്ധ വേണ്ടതുണ്ട്. വിദ്യാർത്ഥികൾ ജാഗരൂകരാകണം. നിരന്തരമാവണം പ്രവൃത്തി. എങ്കിലെ ലക്ഷ്യപ്രാപ്തി സാധ്യമാവുകയുള്ളൂ.
സുഹൃത്തുക്കളുടെ സഹകരണം മനോബലം നൽകും.

Read More

• വാരഫലം, അശ്വതി മുതൽ ആയില്യം വരെ; February 25-March 02, 2024, Weekly Horoscope
• വാരഫലം, മകം മുതൽ തൃക്കേട്ട വരെ; February 25-March 02, 2024, Weekly Horoscope
• 2024 മാർച്ച് മാസത്തിലെ സമ്പൂർണ്ണ നക്ഷത്രഫലം, അശ്വതി മുതൽ രേവതി വരെ: March 2024 Horoscope
• കുംഭമാസത്തെ സമ്പൂർണ്ണ നക്ഷത്രഫലം, അശ്വതി മുതൽ രേവതി വരെ
• ഈ ആഴ്ച നിങ്ങളെ കാത്തിരിക്കുന്നതെന്ത്? സംഖ്യാശാസ്ത്ര ഫലങ്ങളിങ്ങനെ