Weekly Horoscope June 01-June 07: സമ്പൂർണ വാരഫലം, അശ്വതി മുതൽ രേവതി വരെ

Weekly Horoscope and Astrology: ആദിത്യൻ ഇടവം രാശിയിൽ രോഹിണി ഞാറ്റുവേലയിൽ. ചന്ദ്രൻ വെളുത്തപക്ഷത്തിലാണ്. ആയില്യം മുതൽ ചിത്തിര - ചോതി നക്ഷത്രങ്ങൾ വരെ സഞ്ചരിക്കുന്നു. വ്യാഴം മിഥുനം രാശിയിൽ മകയിരം നക്ഷത്രത്തിൽ. ശനി മീനം രാശിയിൽ ഉത്രട്ടാതിയിലാണ്. രാഹു കുംഭം രാശിയിൽ പൂരൂരുട്ടാതിയിലും കേതു ചിങ്ങം രാശിയിൽ ഉത്രത്തിലും സഞ്ചരിക്കുന്നു. ചൊവ്വ ജൂൺ 6 ന് അർദ്ധരാത്രി ഇടവം രാശിയിൽ നിന്നും ചിങ്ങം രാശിയിലേക്ക്, ആയില്യം നക്ഷത്രത്തിൽ നിന്നും മകം നക്ഷത്രത്തിലേക്ക് സംക്രമിക്കുകയാണ്. 

ബുധൻ ശനിയാഴ്ച വരെ ഇടവം രാശിയിലും തുടർന്ന് മിഥുനം രാശിയിലും പ്രവേശിക്കുന്നു. ബുധൻ  വ്യാഴത്തിനൊപ്പം മകയിരം നക്ഷത്രത്തിലാണ്. ബുധൻ ഈയാഴ്ച മുഴുവൻ മൗഢ്യത്തിൽ തുടരുന്നു എന്നതും പ്രസ്താവ്യം. ശുക്രൻ മേടം രാശിയിൽ അശ്വതി നക്ഷത്രത്തിലാണ്. ഈ ഗ്രഹനിലയെ അവലംബിച്ച് അശ്വതി മുതൽ രേവതി വരെയുള്ള നാളുകാരുടെ സമ്പൂർണ വാരഫലം ഇവിടെ വിശദീകരിക്കുന്നു.

അശ്വതി

ശുക്രൻ ജന്മരാശിയിൽ, ജന്മനക്ഷത്രത്തിലാണ്. ദേഹസുഖമുണ്ടാവും. മനക്ളേശങ്ങൾക്ക് അവധി കൊടുക്കുന്നതാണ്. ഇഷ്ടജനങ്ങളുമായി സാമീപ്യസല്ലാപാദികൾ സാധ്യമാകും. ബുധൻ രണ്ടാമെടത്തുള്ളതിനാൽ വാക്കുകൾ കൃത്യമായിരിക്കും. കണക്കുകളുടെയോ വിവരരേഖകളുടെയോ സഹായത്തോടെ ചിലരുടെ 'പുറംപൂച്ച്' പൊളിക്കുന്നതാണ്.  രഹസ്യവിവരങ്ങൾ കൈവശമുണ്ടാവും. ന്യായമായ ആവശ്യങ്ങൾ ഭംഗിയായി നിർവഹിക്കുന്നതാണ്. അന്തരീക്ഷം വിപരീതമാകയാൽ യാത്ര മാറ്റിവെക്കും. ബിസിനസ്സിൽ സംതൃപ്തി തോന്നുന്നതാണ്. മനപ്പൂർവ്വം ആശയക്കുഴപ്പങ്ങൾക്ക് ഒരുമ്പെടുന്ന സഹപ്രവർത്തകരെ ശാസിക്കേണ്ടി വന്നേക്കും.

ഭരണി

ശുക്രൻ, ബുധൻ, രാഹു തുടങ്ങിയ ഗ്രഹങ്ങളുടെ അനുകൂലസ്ഥിതി ഉള്ളതിനാൽ ഭൗതികമായി സംതൃപ്തിയുണ്ടാവും. നിലവിലെ സാഹചര്യങ്ങൾ അത്രയധികം പ്രതികൂലമല്ലെന്ന് വ്യക്തമായേക്കും.  ലക്ഷ്യം നേടാനുള്ള പ്രവർത്തനങ്ങളിൽ കൂടുതൽ ശ്രദ്ധാപൂർവ്വം മുഴുകുന്നതാണ്. സ്ത്രീകളുടെ പിന്തുണ ഒട്ടൊക്കെ പ്രതീക്ഷിക്കാം. ആഴ്ചയിലെ ആദ്യദിവസങ്ങളിൽ അല്പം മാനസിക സമ്മർദ്ദം വരാനിടയുണ്ട്. മകൻ്റെ കാര്യത്തിൽ നേരിയ ചില ഇച്ഛാഭംഗങ്ങൾ ഭവിക്കാം. ബുധൻ മുതൽ കാര്യങ്ങൾ ശരിയായ ദിശയിലാവുന്നതാണ്. ആവശ്യമായ വിശ്രമം ലഭിക്കും.

കാർത്തിക

സ്വതസ്സിദ്ധമായ കഴിവുകൾ പ്രകടിപ്പിക്കാൻ കഴിഞ്ഞേക്കില്ല. നേട്ടങ്ങൾ വരിക പതുക്കെയാവും. ആത്മവിശ്വാസത്തിന് മങ്ങലേൽക്കാം. വാഗ്ദാനങ്ങൾ പാലിക്കാൻ കഴിയാത്തവരെ നേരിൽ വിളിച്ച് അതൃപ്തി അറിയിക്കുന്നതാണ്. പ്രൈവറ്റ് സ്ഥാപനങ്ങളിൽ ജോലിയുടെ ഷിഫ്റ്റ് അനുകൂലമാവും. കരാർപണികളിൽ ചേരും മുന്നേ അവയുടെ എല്ലാവശങ്ങളും കണക്കിലെടുക്കാൻ മറക്കരുത്. വാഹനം മാറ്റിവാങ്ങാനുള്ള ശ്രമം വിജയിച്ചേക്കും. ചെലവ് കുറയ്ക്കാൻ തീരുമാനിക്കും. വായ്പകളുടെ തിരിച്ചടവുകൾ മുടങ്ങില്ല. ചൊവ്വ, ബുധൻ, ശനി ദിവസങ്ങൾക്ക് മേന്മ കുറയാം.

Also Read: ശുക്രൻ മേടം രാശിയിലേക്ക്; അശ്വതി മുതൽ രേവതി വരെ

രോഹിണി

സൂര്യൻ ജന്മനക്ഷത്രത്തിൽ സഞ്ചരിക്കുകയാൽ ക്ഷോഭശീലം ഉണ്ടാവുന്നതായിരിക്കും. കാര്യസാധ്യം സുഗമമാവില്ല. അലച്ചിലും ദേഹക്ലേശവും വന്നേക്കും. ശുക്രനും വ്യാഴവും മുൻപിൻ രാശികളിലായി സഞ്ചരിക്കുകയാൽ സംരക്ഷിക്കാൻ സുഹൃത്തുക്കളുണ്ട് എന്ന തോന്നൽ ശക്തമാവുന്നതാണ്. ബന്ധുസമാഗമം സന്തോഷം നൽകും. പുതിയ കാര്യങ്ങൾ മനസ്സിലാക്കാൻ ശ്രമിക്കുന്നതാണ്. ഉപരിപഠനത്തിനാവശ്യമായ വിവരങ്ങൾ തേടിയറിയും. വാഹന യോഗം കാണുന്നു. എന്നാൽ കരുതൽ വേണ്ടതുണ്ട്. കുടുംബത്തോടൊപ്പം ലഘുസഞ്ചാരം. ധനപരമായ സംതൃപ്തി, എന്നിവ പ്രതീക്ഷിക്കാം.

മകയിരം

ജന്മനക്ഷത്രത്തിൽ വ്യാഴം, ബുധൻ എന്നീ ഗ്രഹങ്ങൾ സഞ്ചരിക്കുന്നു. ഇടവക്കൂറുകാർക്ക് വൃദ്ധജനങ്ങളുടെ പിന്തുണയുണ്ടാവും. മിഥുനക്കൂറുകാർക്ക് ഭോഗസുഖവും എതിർലിംഗത്തിൽ പെട്ടവരുടെ സ്നേഹവും കിട്ടുന്നതാണ്. ആദിത്യൻ അനുകൂലനല്ലാത്തതിനാൽ സർക്കാർ ഓഫീസുകളിൽ നിന്നും നേടേണ്ട കാര്യങ്ങൾ തടസ്സപ്പെടാം. പുനർ ശ്രമം ആവശ്യമാവും. സാംക്രമിക രോഗങ്ങൾ ബാധിക്കാനിടയുണ്ട്. ബിസിനസ്സിൽ ശരാശരി ലാഭം പ്രതീക്ഷിച്ചാൽ മതിയാകും. കുടുംബകാര്യങ്ങളിൽ കൂടിയാലോചനകൾ അനിവാര്യമാവും. കൈവായ്പകൾ മടക്കിക്കിട്ടുന്നതാണ്.

തിരുവാതിര

ദൗത്യങ്ങൾ ഭംഗിയായി നിറവേറ്റുമെങ്കിലും മനസ്സിന് തൃപ്തിക്കുറവ് അനുഭവപ്പെടും. കുടുംബ പ്രശ്നങ്ങൾക്ക് പരിഹാരം കണ്ടെത്തുവാൻ കഴിയുന്നതാണ്. പാർട്ണർഷിപ്പ് ബിസിനസ്സിൽ തൃപ്തി കുറയുവാനിടയുണ്ട്. പകരക്കാരെ കണ്ടെത്താൻ ശ്രമിച്ചാലോ എന്ന ആലോചനയുണ്ടാവും. പ്രതീക്ഷിക്കാത്ത ചില കേന്ദ്രങ്ങളിൽ / വ്യക്തികളിൽ നിന്നും സഹായം ലഭിക്കുന്നതാണ്. അനുരാഗം വിടരും; വിടർന്നിട്ടുണ്ടെങ്കിൽ സഫലമാവും. പഴയകാല സുഹൃത്തുക്കളെ കാണാനായേക്കും. മകൻ്റെ പിടിവാശികൾ തളർത്താം. ജീവിതശൈലീ രോഗങ്ങളിൽ കരുതൽ വേണ്ട സമയമാണ്. 

പുണർതം

ഔദ്യോഗിക കാര്യങ്ങളിൽ സഹപ്രവർത്തകരുടെ പിന്തുണ വേണ്ടത്ര ലഭിക്കുന്നതാണ്. സ്വകാര്യ ആവശ്യങ്ങൾ ഭംഗിയായി നടന്നുകിട്ടും. പുതിയതായി ചേർന്ന ജോലിയിൽ കൃതഹസ്തതയുണ്ടാവുന്നതാണ്. വിദ്യാർത്ഥികൾക്ക് പാരിതോഷികം ലഭിക്കാം. ബന്ധങ്ങൾ പുതുക്കാനാവും. വിവാദങ്ങളിൽ നിന്നും ഒഴിഞ്ഞുനിൽക്കുന്നത് ഉത്തമം. ഹ്രസ്വയാത്രകൾ മനസ്സന്തോഷം പകരുന്നതായിരിക്കും. മംഗളകർമ്മങ്ങളിൽ പങ്കെടുക്കും. എഴുതിക്കൊണ്ടിരിക്കുന്ന രചന പൂർത്തിയാക്കുവാനാവും. ഇൻക്രിമെൻ്റിലൂടെ കൈവന്ന തുക വാഹനം വാങ്ങാനായി കരുതിവെച്ചേക്കും.

Also Read: Edavam Month Horoscope: ഇടവ മാസത്തെ നക്ഷത്രഫലം, അശ്വതി മുതൽ രേവതിവരെ

പൂയം

ചെയ്യണമെന്ന് കരുതിയവയിൽ ചിലതെങ്കിലും നിർവഹിക്കും. ഔദ്യോഗികമായി തടസ്സങ്ങളുണ്ടാവില്ല. മുന്നോട്ടുവെച്ച  നിർദ്ദേശങ്ങൾ മേലധികാരികൾക്ക് സ്വീകാര്യമായേക്കും.  പിതാവിൻ്റെ ഇഷ്ടങ്ങൾ സാധിച്ചു കൊടുക്കുവാനാവും. സ്വകാര്യസ്ഥാപനത്തിൽ ജോലി ചെയ്യുന്നവർക്ക് വേതനത്തിൽ ചെറിയ വർദ്ധനവ് പ്രതീക്ഷിക്കാം. ജീവകാരുണ്യ പ്രവർത്തനത്തിന് ധനസഹായം ചെയ്യുന്നതാണ്. ഹ്രസ്വകാല കോഴ്സുകളിൽ വിജയിക്കുവാനാവും. ഇടക്കിടെ മാനസിക സമ്മർദ്ദം അനുഭവിക്കും. ഞായർ, ബുധൻ, വ്യാഴം ദിവസങ്ങൾക്ക് ഗുണം കൂടും.

ആയില്യം

പതിനൊന്നിൽ സഞ്ചരിക്കുന്ന ആദിത്യൻ അഭിപ്രായങ്ങളിൽ ഉറച്ചുനിൽക്കാൻ പ്രേരണയേകും. സർക്കാർ ഓഫീസുകളിൽ നിന്നും ലഭിക്കേണ്ടതായ സർട്ടിഫിക്കറ്റുകൾ കിട്ടുന്നതാണ്. ബന്ധങ്ങൾ കൂടുതൽ ദൃഢമാവും. ചൊവ്വ ജന്മനക്ഷത്രത്തിൽ സഞ്ചരിക്കുകയാൽ ക്ഷോഭം നിയന്ത്രിക്കാൻ ക്ലേശിച്ചേക്കും. രണ്ടിലെ കേതു ചെറിയ കുടുംബ പ്രശ്നങ്ങൾ ഉയർത്തുന്നതാണ്. ജീവകാരുണ്യത്തിന് കൈയയച്ച് സംഭാവന ചെയ്യും. വസ്തുതർക്കങ്ങളിൽ സംയമം പാലിക്കണം. ഉപാസനാദികൾക്ക് തടസ്സം വരാവുന്നതാണ്. ഞായർ, ബുധൻ, വ്യാഴം ദിവസങ്ങളിൽ ക്ഷിപ്രകാര്യസിദ്ധി ഭവിക്കാം.

മകം

ലാഘവത്വത്തോടെ ഒരു കാര്യത്തിലും ഏർപ്പെടരുത്. ബിസിനസ്സുകാർ പുതിയ ഏജൻസികൾ സ്വീകരിച്ചേക്കും. സന്ധി സംഭാഷണങ്ങൾ വിജയം കാണണമെന്നില്ല. അനാവശ്യമായ തിടുക്കം ഉണ്ടാവും. ദാമ്പത്യത്തിലെ നുണകൾ തിരിച്ചറിയപ്പെടും. ട്രാഫിക് നിയമങ്ങൾ തെറ്റിക്കാനിടയുണ്ട്. തന്മൂലം പിഴയൊടുക്കുന്നതാണ്. ഓഫീസിലെ കാര്യാലോചനകളിൽ വ്യക്തമായ അഭിപ്രായം പറയും. ശത്രുക്കൾ കൂടാനിടയുണ്ട്. മകളുടെ ഉപരിപഠനച്ചെലവുകൾ മനസ്സിൽ അമ്പരപ്പുണ്ടാക്കാം. ഞായർ, ബുധൻ, വ്യാഴം ദിവസങ്ങളിൽ കരുതലുണ്ടാവണം.

 പൂരം

ഉച്ചരാശിയിൽ സഞ്ചരിച്ചിരുന്ന നക്ഷത്രാധിപനായ ശുക്രൻ ഇനി ചൊവ്വയുടെ രാശിയിൽ ഭാഗ്യഭാവത്തിൽ സഞ്ചരിക്കും. അതിനാൽ ഗുണാനുഭവങ്ങൾ കുറയില്ല. ക്ഷേത്രാടനത്തിൻ് അവസരം വന്നുചേരുന്നതാണ്. ജോലിസ്ഥലത്ത് സമാധാനമുണ്ടാവും. സഹപ്രവർത്തകർക്കിടയിൽ സ്വീകാര്യത പ്രതീക്ഷിക്കാം. ധനവരവ് കരുതിയതിലും കുറയാനിടയില്ല. കമ്മീഷൻ ഇനത്തിൽ മോശമല്ലാത്ത തുക കൈവരുന്നതായിരിക്കും. ആരംഭിച്ച കാര്യങ്ങൾ തടസ്സപ്പെടാനുള്ള സാധ്യതയില്ല. ദാമ്പത്യത്തിൻ്റെ സുഗമതയ്ക്ക് അനുരഞ്ജനം വേണ്ടതായേക്കും. തിങ്കൾ, ചൊവ്വ, വെള്ളി നല്ല ദിവസങ്ങൾ.

ഉത്രം

കേതുഗ്രഹം ഉത്രം നക്ഷത്രത്തിൽ സഞ്ചരിക്കുകയാൽ ജാഗ്രത വേണം. സാഹസകർമ്മങ്ങൾ ഒഴിവാക്കപ്പെടണം. തൊഴിലിടത്തിൽ കൂടുതൽ സമയം ചെലവഴിച്ചേക്കും.  ബിസിനസ്സുകാർ ലോണിനായി ശ്രമിക്കുന്നതാണ്. അകാരണമായി മനസ്സിനെ ഗ്ലാനി ബാധിക്കാം.  പ്രണയികൾക്കിടയിൽ കലഹങ്ങൾ ഉണ്ടാവും. കലാപ്രവർത്തനത്തിനുള്ള സാഹചര്യങ്ങൾ പൂർണ്ണമായി അനുകൂലമാണെന്ന് പറയുകവയ്യ. വാഹനത്തിൻ്റെ അറ്റകുറ്റപ്പണിക്ക് ചെലവുണ്ടാവും. ബന്ധുസമാഗമം സന്തോഷമേകും. വാരമധ്യാന്ത്യങ്ങളിൽ കൂടുതൽ ഗുണം പ്രതീക്ഷിക്കാം.

അത്തം

പതിവുകാര്യങ്ങൾ ഒക്കെ ഒരുവിധം നടന്നുപോകുന്നതാണ്. എന്നാൽ പുതുകാര്യങ്ങൾ തുടങ്ങാൻ തടസ്സമേറും. വേണോ വേണ്ടയോ എന്ന സന്ദിഗ്ദ്ധത മനസ്സിനെ മഥിക്കും.. സാങ്കേതിക കാര്യങ്ങൾ അറിയേണ്ടതായി വന്നേക്കും. ബന്ധുസമാഗമം സന്തോഷമേകുന്നതാണ്.  ഭാവിയെക്കുറിച്ച് ധാരാളം പ്രതീക്ഷകളുണരും. അമിതാദ്ധ്വാനം ഒഴിവാക്കുകയാവും ഉചിതം. ജന്മദിനത്തിന് ഇഷ്ടവ്യക്തിയുടെ സന്ദേശം  ലഭിക്കാം. ആത്മവിശ്വാസം വന്നും പോയുമിരിക്കും. രാഷ്ട്രീയ താത്പര്യം കുറയുന്നതാണ്. പെൻഷൻ പറ്റിയവർക്ക് കുടിശ്ശിക തുകയ്ക്കായി കാത്തിരിക്കേണ്ടി വരും.

ചിത്തിര

തുലാക്കൂറുകാർക്ക് അല്പം ഗുണം കൂടുതലുള്ള സമയമാണ്. തടസ്സങ്ങളുണ്ടാവില്ല. കാര്യസാധ്യത്തിന് അധികാരികളുടെ പിന്തുണയുണ്ടാവും. കടം കൊടുത്ത തുക ഭാഗികമായി മടക്കിക്കിട്ടും. ചടുലമായ നീക്കങ്ങൾ നടത്തുന്നതിലൂടെ എതിരാളികൾ നിഷ്പ്രഭരാവുന്നതാണ്. കന്നിക്കൂറുകാർക്ക് കാര്യപ്രാപ്തിക്ക് പരാശ്രയത്വം വേണ്ടിവന്നേക്കും. ജോലിഭാരം കൂടും. തന്മൂലം വീട്ടിലെത്താൻ വൈകുന്നതാണ്. തർക്കങ്ങളിൽ ഒഴിഞ്ഞു നിൽക്കുന്നതാവും നല്ലത്. ദാമ്പത്യത്തിൽ സംതൃപ്തി കുറയും. ചൊവ്വ, ബുധൻ, ശനി ദിവസങ്ങളിൽ ദേഹാലസ്യം അനുഭവപ്പെടാം.

Also Read: Vishu Phalam 2025: വിഷു ഫലം; അശ്വതി മുതൽ രേവതി വരെ

ചോതി

ഞായർ മുതൽ ചൊവ്വ വരെ അനുകൂലം. ബുധനും വ്യാഴവും അല്പം മങ്ങൽ. വെള്ളിയും ശനിയും മെച്ചം - ഈ വിധത്തിൽ സാമാന്യമായ ഒരു വിശകലനം പറയാം. ധനവിഷയത്തിൽ സംതൃപ്തിയുണ്ടാവും. ചെലവുകളിൽ മിതത്വം പാലിക്കേണ്ടതുണ്ട്. ഔദ്യോഗികമായി അംഗീകാരമുണ്ടാവും. ജോലിസ്ഥലത്ത് പ്രാധാന്യം കൂടുന്നതാണ്. ബിസിനസ്സ് ആശയങ്ങളുമായി മുന്നോട്ടുപോകും. എടുത്തുചാട്ടം ദോഷം ചെയ്തേക്കും. വസ്തുവിൽപ്പനയിലെ തടസ്സം നീങ്ങിയേക്കും. ആരോഗ്യകാര്യത്തിൽ ശ്രദ്ധയുണ്ടാവണം. 
ശുക്രൻ ഏഴിൽ സഞ്ചരിക്കുന്നതിനാൽ മനസ്സ് പ്രണയനിർഭരമാവും.

വിശാഖം

ഇണക്കത്തിൽ തന്നെ പിണക്കവും, മറിച്ചും അനുഭവപ്പെടാം. യാത്രകൾ വേണ്ടിവരുന്നതാണ്. ബിസിനസ്സിൽ കൂടുതൽ ശ്രദ്ധിക്കേണ്ട സന്ദർഭമാണ്. ദൗത്യങ്ങൾ പകരക്കാരെ ഏല്പിക്കരുത്. പുതിയ ശാഖ തുടങ്ങുന്നത് ഒന്നുകൂടി അലോചിച്ചു മതി. ചില ദൗത്യങ്ങൾ സ്വയം ഏറ്റെടുക്കുകയാവും ഉചിതം.  വ്യക്തിജീവിതത്തിൽ സാമാന്യമായ സുഖം ഉണ്ടാവുന്നതാണ്. മകളുടെ വിവാഹലോചന ഫലവത്തായേക്കും. രോഗചികിത്സയിൽ മാറ്റം അനിവാര്യം. വിദേശത്തു പോകുവാൻ ആഗ്രഹിക്കുന്നവർക്ക് അനുമതി ലഭിക്കാം.

അനിഴം

ആത്മപരിശോധന നടത്തും. പുതുയത്നങ്ങൾ ഫലപ്രദമാവാൻ കൂടുതൽ ഊർജ്ജം ചെലവഴിക്കേണ്ട സ്ഥിതിവരാം. സർക്കാരുമായി ബന്ധപ്പെട്ട കാര്യങ്ങളിൽ തടസ്സത്തിന് സാധ്യത കാണുന്നു. മകന് സാങ്കേതിക നൂതനത്വമുള്ള കോഴ്സുകളിൽ പ്രവേശനം കിട്ടും. വരവ് തടസ്സപ്പെടില്ല. ന്യായമായ ആവശ്യങ്ങൾ നിർവഹിക്കാനാവും. എന്നാൽ പ്രതീക്ഷിച്ച വേതന വർദ്ധനവ് ഉണ്ടാവണമെന്നില്ല. ജോലിയിൽ നിന്നും വിട്ടുനിൽക്കുന്നവർക്ക് വീണ്ടും ജോലിയിൽ പ്രവേശിക്കാനാവും. മാനസിക പിരിമുറുക്കത്തിന് അയവുണ്ടാവും.

തൃക്കേട്ട

ഉന്മേഷമുണ്ടാവും, പ്രവർത്തനങ്ങളിൽ. തൊഴിലിടത്തിൽ സമാധാനം പ്രതീക്ഷിക്കാം. സ്വകാര്യ സ്ഥാപനത്തിൽ ജോലി ചെയ്യുന്നവർക്ക് ജോലിഭാരം മുന്നത്തെ അപേക്ഷിച്ച് കുറയാം. മേലധികാരികളുടെ പ്രീതിയുണ്ടാവും. അന്യദേശത്തുള്ളവർക്ക് നാട്ടിലേക്ക് വരാൻ അവധി ലഭിച്ചേക്കും. ഗൃഹത്തിന് അറ്റകുറ്റപ്പണി വരാനിടയുണ്ട്. ഊഹക്കച്ചവടത്തിൽ ആദായമുണ്ടാവും. കമ്മീഷൻ / ഏജൻസി വ്യാപാരത്തിൽ താത്പര്യം ജനിക്കും. മംഗളകർമ്മങ്ങളിൽ പങ്കെടുക്കുന്നതാണ്. ലഘുയാത്രകൾ സന്തോഷമേകും. സുഹൃത്തുക്കളുടെ വാക്കുകൾ അപ്പടി ചെവിക്കൊള്ളരുത്. സ്വന്തം വിവേക / വിവേചനങ്ങൾ പ്രയോജനപ്പെടുത്തണം.

മൂലം

വാരാദ്യ ദിവസങ്ങൾക്ക് മികവ് കുറയുന്നതാണ്. തീരുമാനങ്ങൾ നടപ്പിലാക്കാനായേക്കില്ല. ചൊവ്വ മുതൽ ന്യായമായ ആഗ്രഹങ്ങൾ നിറവേറ്റപ്പെടും. കർമ്മരംഗത്ത് നന്നായി ശോഭിക്കാനാവും. നിർദ്ദേശങ്ങൾ സഹപ്രവർത്തകർ ഉൾക്കൊള്ളുന്നതാണ്. മകളുടെ പഠനാവശ്യത്തിന് വേണ്ടുന്ന ധനം സ്വരൂപിക്കാൻ വഴിതെളിഞ്ഞേക്കും. കലാപ്രവർത്തകർക്ക് അർഹതയ്ക്കനുസരിച്ചുള്ള അവസരം ലഭിക്കാം. മുടങ്ങിയ ഉപാസനാദികൾ പുനരാരംഭിക്കുന്നതാണ്. ഏഴാം ഭാവത്തിലെ വ്യാഴം ദാമ്പത്യത്തെ സുഖകരമാക്കും. ബന്ധുക്കൾക്ക് ഉദാരമായ സഹായം ചെയ്യും.

പൂരാടം

മക്കളെക്കുറിച്ചോർത്ത് അഭിമാനിക്കാനാവും. പഠന മികവിനിണങ്ങിയ പാരിതോഷികം നൽകി അനുമോദിക്കും. പ്രധാനകാര്യങ്ങളിൽ തീരുമാനമെടുക്കാൻ ഞായറും തിങ്കളും ഒഴിവാക്കുക ഉചിതം. ഈ ദിവസങ്ങളിൽ ജോലിഭാരം അധികരിക്കാം. പഴയ കടബാധ്യത ഭാഗികമായി വീട്ടുന്നതാണ്.  പുരപ്പണിയിലെ തടസ്സങ്ങൾ  നീങ്ങിക്കിട്ടും. ജോലിയിൽ ഉത്കർഷം പ്രതീക്ഷിക്കാം. സഹപ്രവർത്തകർക്കിടയിൽ സ്വീകാര്യതയേറും. ജന്മനാട്ടിലെത്തി കുടുംബത്തോടൊപ്പം ചേരാനാവും. കലാസാഹിത്യ പ്രവർത്തകർക്ക് ഭാവനയുണരും. സക്രിയവും പ്രവൃത്തികളിൽ നിന്നും ലാഭം പ്രതീക്ഷിക്കാവുന്നതും ആയ ആഴ്ചയാവും.

ഉത്രാടം

ഒപ്പമുള്ളവരിൽ ചിലരുടെ അവസരവാദം തിരിച്ചറിയുന്നതാണ്. വാരാദ്യ ദിവസങ്ങളിൽ പ്രവർത്തനങ്ങൾക്ക് മന്ദത അനുഭവപ്പെടും. പ്രോജക്ടുകളെക്കുറിച്ച് ആവർത്തിച്ചുള്ള വിശദീകരണം ആവശ്യമായേക്കും. ബുധനാഴ്ച മുതൽ കർമ്മരംഗത്ത് ഉത്സാഹമേറുന്നതാണ്. ധനപരമായി ആശ്വാസമുണ്ടാവും. സ്വകാര്യസ്ഥാപനത്തിൽ ജോലി തേടുന്നവർക്ക് അവസരങ്ങൾ ലഭ്യമാവാം. സ്വാശ്രയ ബിസിനസ്സിൽ സാമാന്യമായ സംതൃപ്തി പ്രതീക്ഷിച്ചാൽ മതി. വായ്പക്കുള്ള അപേക്ഷ സഫലമാവുന്നതാണ്. ആരോഗ്യ കാര്യത്തിൽ ജാഗ്രതയുണ്ടാവണം.

തിരുവോണം

സാഹചര്യങ്ങൾ സംതൃപ്തി നൽകുന്നതായിരിക്കും. കരാർ പണികളിൽ തുടർച്ച ലഭിക്കുന്നതാണ്. വീട് മോടിപിടിപ്പിക്കാൻ വിദഗ്ദ്ധരെ സന്ദർശിക്കും. ജോലിസ്ഥലത്ത് ചെറിയ ചെറിയ സമ്മർദ്ദങ്ങൾ ഉണ്ടായിക്കൊണ്ടിരിക്കും. അതുകാര്യമാക്കാതെ മുന്നോട്ടുപോകും. നവീനസാങ്കേതിക വിദ്യ പഠിക്കുവാനുള്ള മകൻ്റെ ആഗ്രഹം അംഗീകരിക്കും. ചെലുവകളെക്കുറിച്ച് ഉൽക്കണ്ഠപ്പെടും. ബന്ധുസമാഗമം, ലഘുയാത്രകൾ, പുറമേ നിന്നും ഭക്ഷണം, ഷോപ്പിംഗ് എന്നിവയുണ്ടാവും.  തന്മൂലം മനസ്സന്തോഷം ഭവിക്കും. തിങ്കൾ, ചൊവ്വ ദിവസങ്ങളിൽ ആരോഗ്യ ജാഗ്രത പുലർത്തണം.

Also Read: രാഹു കേതു രാശി മാറുന്നു, അശ്വതി മുതൽ രേവതിവരെ

അവിട്ടം

അപ്രിയസത്യങ്ങൾ വിളിച്ചു പറയുകയാൽ പലരുടെയും ശത്രുത നേടുന്നതാണ്. ഭൂമി വ്യവഹാരം നീളുന്നതിൽ ആശങ്കയുണ്ടാവും. സഹോദരാനുകൂല്യം കുറയാം. സൗഹൃദങ്ങളിൽ വിശ്വാസം നഷ്ടപ്പെടും. താത്കാലിക ജോലി തരപ്പെടുന്നത് ആശ്വാസമാവും. അധികാരപൂർവമായി പെരുമാറുന്നതാണ്. സംഘടനകളുടെ നേതൃത്വത്തെ വിമർശിക്കുവാൻ സന്നദ്ധതയുണ്ടാവും. കുടുംബാംഗങ്ങളുടെ ന്യായമായ ആവശ്യങ്ങൾ നിറവേറ്റുന്നതാണ്. ജീവിത പങ്കാളിയുടെ നിർദ്ദേശപ്രകാരം പുതിയ ഗൃഹോപകരണങ്ങൾ വാങ്ങുന്നതാണ്.

ചതയം

കാലാവസ്ഥയുടെ പ്രതികൂലത വകവെക്കാതെയും കായികാധ്വാനം വേണ്ടിവരുന്നതാണ്. സ്ഥാനപരിവർത്തനത്തിന് സാധ്യതയുണ്ട്. ആത്മാർത്ഥത അംഗീകരിക്കപ്പെടും. സ്ത്രീകളിൽ നിന്നും സുഹൃത്തുക്കളിൽ നിന്നും ശക്തമായ പിന്തുണ ലഭിക്കുന്നതാണ്. വിദ്യാഭ്യാസപരമായ കാര്യങ്ങൾക്കായി യാത്ര വേണ്ടിവരും. ദാമ്പത്യരംഗത്ത് സമാധാനം പുലരാൻ അനുരഞ്ജനം ആവശ്യമാവും. സാമ്പത്തിക അമളി പിണയാതിരിക്കാൻ ശ്രദ്ധയുണ്ടാവണം. രാഹുവിൻ്റെ ജന്മരാശി സഞ്ചാരം ഇടക്കിടെ ദേഹാലസ്യത്തിന് കാരണമാകാം.

പൂരൂരുട്ടാതി

എടുത്തുചാട്ടവും സാഹസ കർമ്മങ്ങളും ഒഴിവാക്കണം. ആലോചനകൂടാതെ പ്രവർത്തികൾ തുടങ്ങരുത്. രാഹു ജന്മനക്ഷത്രത്തിൽ സഞ്ചരിക്കുകയാൽ എത്ര കരുതലോടെ ചെയ്യുന്ന കാര്യത്തിലും പരാജയം വരാം. അക്കാര്യം മനസ്സിലുണ്ടാവണം. മേലധികാരികളെ ഉപദേശിക്കുന്നത് ഒഴിവാക്കണം. രോഗലാഞ്ഛനകൾക്ക് വൈദ്യസഹായം സ്വീകരിക്കുന്നത് ഉത്തമമായിരിക്കും. സമൂഹം അംഗീകരിക്കാത്ത ചിന്തകൾ/ പ്രവൃത്തികൾ രൂപപ്പെടാം. പ്രത്യക്ഷ ശത്രുക്കളുണ്ടാവില്ല. എന്നാൽ എതിർപ്പ് പരോക്ഷമായിട്ടാവും. ധനവിനിമയത്തിൽ മിതത്വം പാലിക്കണം.

ഉത്രട്ടാതി

ഞായറാഴ്ച അല്പം ആശയക്കുഴപ്പം ഉണ്ടാവും. ചിന്ത കാടുകയറും. സ്വതേയുള്ള ആലസ്യം ഉച്ചഘട്ടത്തിലാവും. തിങ്കൾ മുതൽ വെള്ളി വരെ കർമ്മഗുണം പ്രതീക്ഷിക്കാം. ഊർജ്ജസ്വലത കൈവരുന്നതാണ്. ഔദ്യോഗിക മീറ്റിംഗുകളിൽ ശോഭിക്കും. അസ്വീകാര്യമായവ തുറന്നുപറയും. തന്മൂലം ശത്രുക്കളുണ്ടായേക്കാം. വാഗ്ദാനങ്ങൾ എല്ലാം പാലിക്കാനാവില്ലെന്നത് ഓർമ്മയിലുണ്ടാവണം.  മംഗളകർമ്മങ്ങളിൽ പങ്കെടുക്കും. ആഢംബരച്ചെലവുകൾ അധികരിച്ചേക്കും. സ്വാശ്രയ ബിസിനസ്സിൽ അല്പം ലാഭം കുറയും. വലിയതോതിലുള്ള മുതൽമുടക്കുകൾക്ക് മുതിരരുത്.

രേവതി

ഗ്രഹാനുകൂല്യം കുറഞ്ഞ ഒരു കാലഘട്ടമാണ് പൊതുവേ രേവതി നാളുകാർക്കിപ്പോൾ. നവസംരംഭങ്ങൾ തുടങ്ങിയാൽ മുന്നോട്ടു പോവുക പ്രയാസകരമാവും.  കാലത്തിൻ്റെ മാറ്റങ്ങൾ ഉൾക്കൊള്ളാനുള്ള  മാനസികാവസ്ഥയും ഉണ്ടാവില്ല.  അറ്റകുറ്റപ്പണി കഴിഞ്ഞ് വാഹനം നിലത്തിറക്കാറാവും. കുടുംബ ജീവിതത്തിൽ സുഖം പ്രതീക്ഷിക്കാം. ജോലിസ്ഥലത്ത് സ്വസ്ഥതയുണ്ടാവും.  ആത്മാർത്ഥത മേലധികാരിയെ തൃപ്തിപ്പെടുത്തും. ദൂരയാത്രകൾ ഒഴിവാക്കുന്നതാണ് ഉത്തമം. സാമൂഹമാധ്യമങ്ങളിൽ അഭിപ്രായപ്രകടനം കരുതലോടെ വേണം.

Read More: June Month Horoscope 2025: ജൂൺ മാസത്തെ നക്ഷത്രഫലം, അശ്വതി മുതൽ രേവതിവരെ