/indian-express-malayalam/media/agency_attachments/RBr0iT1BHBDCMIEHAeA5.png)
Follow Us/indian-express-malayalam/media/media_files/IiJ4MHgVtHVhxxckC4WK.jpg)
Mars In Mithunam Rashi 2024 Star Predictions
2024 ആഗസ്റ്റ് 26 മുതൽ ഒക്ടോബർ 20 (1200 ചിങ്ങം 10 മുതൽ തുലാം 4 വരെ) ഏകദേശം 54 ദിവസം കുജൻ / ചൊവ്വ (Mars) മിഥുനം രാശിയിൽ സഞ്ചരിക്കുന്നു. ചൊവ്വയുടെ ശത്രുഗ്രഹമായ ബുധൻ്റെ വീടാണ് മിഥുനം രാശി ശത്രുഗ്രഹത്തിലെ ചൊവ്വ ദുർബലനാണ്.
സെപ്തംബർ 5 വരെ ചൊവ്വ മകയിരം നക്ഷത്രത്തിലും സെപ്തംബർ 29 വരെ തിരുവാതിരയിലും തുടർന്ന് പുണർതത്തിലും സഞ്ചരിക്കുന്നു. ഇക്കാലയളവിൽ ചൊവ്വയെ ശുഭഗ്രഹങ്ങളോ പാപഗ്രഹങ്ങളോ ദൃഷ്ടി ചെയ്യുന്നില്ല എന്നതും സ്മരണീയം. ചന്ദ്രനൊഴികെ മറ്റൊരു ഗ്രഹവും മിഥുനം രാശിയിൽ ചന്ദ്രനുമായി ഒത്തു ചേരുന്നുമില്ല എന്നതും പ്രസ്താവ്യമാണ്.
പാപഗ്രഹങ്ങൾ ഏറ്റവും കുറച്ച് രാശികളിൽ സഞ്ചരിക്കുമ്പോൾ മാത്രമേ ഗുണഫലദാതാക്കൾ ആവുന്നുള്ളു. ചൊവ്വ 3, 6, 11 എന്നീ കൂറുകളിൽ ആണ് അനുകൂലനാവുന്നത്. അതായത് ചൊവ്വ മിഥുനത്തിൽ സഞ്ചരിക്കുമ്പോൾ മിഥുനം മൂന്നാം രാശിയായി വരുന്ന മേടക്കൂറുകാർക്കും (അശ്വതി, ഭരണി, കാർത്തിക ഒന്നാം പാദം), മിഥുനം ആറാം രാശിയായി വരുന്ന മകരക്കൂറുകാർക്കും (ഉത്രാടം മുക്കാൽ, തിരുവോണം, അവിട്ടം ആദ്യ പകുതി), മിഥുനം പതിനൊന്നാം രാശിയായി വരുന്ന ചിങ്ങക്കൂറുകാർക്കും ( മകം, പൂരം, ഉത്രം ഒന്നാം കാൽ) മാത്രമാണ് ചൊവ്വ നേട്ടങ്ങൾ സൃഷ്ടിക്കുന്നത്.
മിഥുനക്കൂറ് (ജന്മത്തിൽ ചൊവ്വ), കർക്കടകക്കൂറ് (പന്ത്രണ്ടിൽ ചൊവ്വ), വൃശ്ചികക്കൂറ് (അഷ്ടമത്തിൽ ചൊവ്വ) എന്നിവർക്ക് ദോഷാധിക്യം വരാം. ബാക്കിയുള്ള ആറുകൂറുകാർക്കും - ഇടവക്കൂറ്, കന്നിക്കൂറ്, തുലാക്കൂറ്, ധനുക്കൂറ്, കുംഭക്കൂറ്, മീനക്കൂറ് - ചൊവ്വയുടെ മിഥുനരാശി സഞ്ചാരം ദോഷത്തിന് മുൻതൂക്കമുള്ള ഗുണദോഷ സമ്മിശ്രകാലമായിരിക്കും.
ചൊവ്വയെ ഭൂമിപുത്രനായി വിശേഷിപ്പിക്കുന്നു. ദേവലോകത്തിലെ സർവ്വസൈന്യാധിപൻ ചൊവ്വയാണ്. തരുണമർത്തിയും ക്രൂരേക്ഷണനുമാണ്. തീക്കനലിൻ്റെ ശോഭയാണ്. ആട് വാഹനമാകുന്നു. മേടം, വൃശ്ചികം എന്നീ രാശികളുടെ അധിപനാണ്. മകരം ഉച്ചരാശി; കർക്കടകം നീചരാശി. മകയിരം, ചിത്തിര, അവിട്ടം എന്നിവ ചൊവ്വയുടെ നക്ഷത്രങ്ങൾ. ചൊവ്വാദശ ചെറിയ ദശകളിൽ ഉൾപ്പെടും. ഏഴുവർഷമാണ് ദശാകാലം.
കുജൻ എന്ന പേരിലെ ആദ്യ അക്ഷരമായ 'കു' എന്നാണ് ഗ്രഹനിലയിൽ ചൊവ്വയെ രേഖപ്പെടുത്തുക. മംഗളൻ, ലോഹിതൻ, അംഗാരകൻ മാഹേയൻ, ആരൻ, രുധിരൻ, വക്രൻ തുടങ്ങിയവ ചൊവ്വയുടെ ചില പര്യായ നാമങ്ങളാണ്. ചൊവ്വയുടെ മിഥുന രാശി സഞ്ചാരത്തിൻ്റെ ഫലം മേടക്കൂറു മുതൽ മിഥുനക്കൂറുവരെയുള്ള ഓരോ കൂറുകാരെയും എങ്ങനെ സ്വാധീനിക്കുന്നുവെന്ന് ഇവിടെ വിശദീകരിക്കുന്നു.
മേടക്കൂറിന് (അശ്വതി ഭരണി, കാർത്തിക ഒന്നാം പാദം)
ചൊവ്വ സഞ്ചരിക്കുന്നത് മൂന്നാമെടമായ മിഥുന രാശിയിലാണ്. ചൊവ്വ ഗോചരത്തിൽ മൂന്നാം ഭാവത്തിൽ അനുകൂലാവസ്ഥയിൽ സഞ്ചരിക്കുന്നു. കഴിവുകൾ വർദ്ധിക്കും. അവ പ്രവൃത്തിയെ സഹായിക്കും. ജീവിത നിലവാരം ഉയർത്താൻ ഉതകുകയും ചെയ്യുന്നതാണ്. എതിർക്കുന്നവരുടെ പ്രത്യക്ഷവും പരോക്ഷവുമായ പ്രവർത്തനങ്ങളെ കൃത്യമായി തിരിച്ചറിയാനും പ്രതിരോധം സൃഷ്ടിക്കാനുമാവും. സാമ്പത്തിക ക്ലേശങ്ങൾക്ക് പരിഹാരം വന്നു ചേരും. പിണങ്ങിക്കഴിഞ്ഞ സഹോദരർക്കിടയിൽ വീണ്ടും സൗഭാത്രം തെളിയും. ചൊവ്വ ഭൂമികാരകഗ്രഹം ആകയാൽ വസ്തു വാങ്ങുക, വിൽക്കുക തുടങ്ങിയവയിലെ തടസ്സങ്ങൾ നീങ്ങുന്നതാണ്. കർമരംഗം ഉണരും. പദവി ഉയരാനോ അധികാരമുള്ള ചുമതല ലഭിക്കാനോ സാധ്യതയുണ്ട്. മനസ്സിലെ സന്ദിഗ്ദ്ധതകൾ അകലും. ഏതു വിഷയത്തെക്കുറിച്ചായാലും ശക്തമായ തീരുമാനം കൈക്കൊള്ളാനും പ്രാവർത്തികമാക്കാനും മടിക്കില്ല. മാനസിക ബലം ജീവിത പുരോഗതിക്ക് സഹായകമാവുന്നതാണ്.
ഇടവക്കൂറിന് (കാർത്തിക 2, 3, 4 പാദങ്ങൾ, രോഹിണി, മകയിരം 1, 2 പാദങ്ങൾ)
രണ്ടാം ഭാവമായ മിഥുനത്തിലാണ് ചൊവ്വ സഞ്ചരിക്കുന്നത്. ചൊവ്വ ഒട്ടൊക്കെ അനിഷ്ടകാരിയാണ് രണ്ടാമെടത്തിൽ എന്നുപറയാം. വാക് സ്ഥാനം, വിദ്യാസ്ഥാനം, കുടുംബ സ്ഥാനം, ധനസ്ഥാനം എന്നിങ്ങനെയുള്ള പേരുകളുണ്ട് രണ്ടാമെടത്തിന്. ഈ വിഷയങ്ങളെയെല്ലാം ചൊവ്വ പ്രതികൂലമായി ബാധിച്ചേക്കും. വാക്കുകൾ സ്ഥാനത്തും അസ്ഥാനത്തും പരുഷമാകുന്നതാണ്. വിദ്യാഭ്യാസത്തിത്തിൽ തടസ്സങ്ങളോ ശ്രദ്ധക്കുറവോ വരുന്നതാണ്. കുടുംബ ബന്ധങ്ങളുടെ ദൃഢതയ്ക്ക് ഭംഗം ഭവിക്കാനിടയുണ്ട്. ധനവരവ് പ്രതീക്ഷിച്ച പോലെയാവില്ല. മുൻ കടബാധ്യതകൾ സ്വൈരഭംഗത്തിന് കാരണമാകും. ചൊവ്വ അഷ്ടമത്തിലേക്ക് നോക്കുകയാൽ ആരോഗ്യകാര്യങ്ങളിലും ശ്രദ്ധ വേണം. മറ്റു ഗ്രഹങ്ങളുടെ അനുകൂലത, ദശാപഹാരഫലം എന്നിവയാൽ ചിലപ്പോൾ ചൊവ്വയുടെ ദോഷഫലം ന്യൂനീകരിക്കപ്പെടാം.
മിഥുനക്കൂറിന് (മകയിരം 3, 4 പാദങ്ങൾ, തിരുവാതിര, പുണർതം 1, 2, 3 പാദങ്ങൾ)
ജന്മരാശിയിലാണ് ചൊവ്വയുടെ സഞ്ചാരം. ജന്മരാശി, എട്ടാമെടം, പന്ത്രണ്ടാമെടം എന്നിവയിൽ സഞ്ചരിക്കുമ്പോഴാണ് ഒരു പാപഗ്രഹത്തിൻ്റെ ക്രൗര്യം / ദോഷഫലശക്തി പുറത്തുചാടുന്നത്. അതിനാൽ മിഥുനക്കൂറുകാർ ആരോഗ്യപരമായും മാനസികമായും ഒക്കെ കരുതൽ പുലർത്തേണ്ടതുണ്ട്. ദുഷ്പ്രേരണകൾ ഉണ്ടാവാം. ആട്ടിൻ തോൽ പുതച്ച ചെന്നായ്ക്കളെ തിരിച്ചറിയാൻ കഴിഞ്ഞെന്നു വരില്ല. സാമ്പത്തിക കാര്യങ്ങളിൽ സൂക്ഷ്മത പുലർത്തണം. ദുഷ്കീർത്തിയോ ദുരാരോപണങ്ങളോ വരാം. ഇഷ്ടജനങ്ങളുടെ പിണക്കം സമ്പാദിക്കാൻ ഇടയുണ്ട്. മുതൽമുടക്കുകൾക്ക് കാലം അനുകൂലമല്ല. കുടുംബാംഗങ്ങളുടെ ഐക്യം നിലനിർത്താൻ ക്ലേശിക്കും. വാഹനം, യന്ത്രം, അഗ്നി എന്നിവയുടെ ഉപയോഗത്തിൽ പ്രത്യേക ശ്രദ്ധ പുലർത്തണം. സ്വന്തം ഗ്രഹനില പ്രകാരം നല്ല ദശാപഹാരം നടക്കുകയാണെങ്കിൽ ചൊവ്വയുടെ ഗോചരദോഷം ലഘൂകരിക്കപ്പെടാം.
കർക്കടകക്കൂറിന് (പുണർതം നാലാം പാദം, പൂയം, ആയില്യം)
പന്ത്രണ്ടാം ഭാവത്തിലാണ് ചൊവ്വ. അനിഷ്ടഫലങ്ങളാവും പ്രായേണ നൽകുക. അപ്രതീക്ഷിതമായ യാത്രകൾ ഉണ്ടാവും. കബളിപ്പിക്കപ്പെടാൻ സാധ്യതയുണ്ട്. ശത്രുക്കളുടെ ഉപദ്രവത്തെ കരുതണം. സാമ്പത്തികമായി അച്ചടക്കം ഏറ്റവും അനിവാര്യമാണ്. പുതുസംരംഭങ്ങൾക്ക് മുതലിറക്കുന്നത് ആലോചിച്ചാവണം. ബിസിനസ്സിൽ അല്പമാത്രമായ ലാഭം പ്രതീക്ഷിക്കാം. സഹോദരാനുകൂല്യം ലഭിക്കണമെന്നില്ല. ഔദ്യോഗിക രഹസ്യങ്ങൾ മറ്റുള്ളവരോട് പങ്കുവെക്കരുത്. വിദേശത്ത് ജീവിക്കുന്നവർക്ക് വിസ മൂലം ഉള്ള പ്രശ്നങ്ങൾ വരാം. ഭൂമിയുടെ ക്രയവിക്രയത്തിന് തത്കാലം തുനിയാതിരിക്കുകയാവും ഉചിതം. ദേഹക്ലേശം വർദ്ധിക്കുന്നതാണ്. ആരോഗ്യ പരിശോധനകളിൽ അമാന്തമരുത്. ദശാപഹാരമനുസരിച്ച് ദോഷഫലങ്ങൾ കുറയാം.
ചിങ്ങക്കൂറിന് (മകം, പൂരം, ഉത്രം ഒന്നാം പാദം)
പതിനൊന്നാമെട ത്തിൽ സഞ്ചരിക്കുന്നു, ചൊവ്വ. മിഥുനം രാശിയിലെ ചൊവ്വയുടെ ഈ ഗോചരത്തിൻ്റെ ഏറ്റവും അനുകൂല ഫലം കിട്ടുന്നവർ ചിങ്ങക്കൂറുകാരാണ്. വിദ്യാർത്ഥികൾക്ക് മികച്ച വിജയം സിദ്ധിക്കും. ഉദ്യോഗാർത്ഥികൾക്ക് പ്രതീക്ഷിച്ച അവസരം വന്നുചേരുന്നതാണ്. കമിതാക്കളുടെ വിവാഹസ്വപ്നം സഫലമാവാം. കുടുംബ ബന്ധങ്ങൾ കൂടുതൽ ദൃഢമാകും. ബിസിനസ്സിലെ മാന്ദ്യം നീങ്ങി വളർച്ച പ്രകടമായിത്തുടങ്ങും. ഭൂമിയിൽ നിന്നും പ്രതീക്ഷിച്ചതിലധികം വരുമാനം കിട്ടുന്നതാണ്. കടബാധ്യതകൾ കുറച്ചൊക്കെ പരിഹരിക്കാൻ വഴിതെളായും. സ്ഥലംമാറ്റം, പദവിയിൽ ഉയർച്ച എന്നിവ ഉദ്യോഗസ്ഥന്മാർക്ക് സാധകമാവും. പൊതുപ്രവർത്തകർ സംഘടനകളുടെ നേതൃപദവിയിൽ വന്നെത്തുന്നതാണ്. എതിർപ്പുകളെ മറി കടക്കും. മനസ്സിനും ദേഹത്തിനും ഉണർവ് അനുഭവപ്പെടും.
കന്നിക്കൂറിന് (ഉത്രം 2,3,4 പാദങ്ങൾ, അത്തം, ചിത്തിര 1,2 പാദങ്ങൾ)
പത്താം ഭാവത്തിലാണ് ചൊവ്വ സഞ്ചരിക്കുന്നത്. അനുകൂലവും പ്രതികൂലവും ആയ ഫലങ്ങൾ പ്രതീക്ഷിക്കാം. ഉദ്യോഗസ്ഥർക്ക് ചില അധികാരങ്ങൾ ലഭിക്കാം. എന്നാൽ ദുർഘടമായ ചുമതലകൾ വരാം. സഹപ്രവർത്തകരുടെ സഹകരണം വേണ്ടത്ര കിട്ടുന്നില്ലെന്ന തോന്നൽ ശക്തമാകും. എന്നാൽ കാര്യസാധ്യത്തിനായി അവരെ ആശ്രയിക്കേണ്ടിവരും. രാഷ്ട്രീയത്തിൽ ശത്രുക്കളെ നേരിടേണ്ട സ്ഥിതി ഭവിക്കാം. നേതൃപദവി ഒഴിയാൻ സമ്മർദ്ദമേറും. സ്വാശ്രയ തൊഴിൽ ചെയ്യുന്നവർക്ക് ഉപഭോക്താക്കളെ ആകർഷിക്കാൻ പരസ്യങ്ങളെ ഒരുപാട് ആശ്രയിക്കേണ്ട നിലയുണ്ടാവുന്നതാണ്. തന്മൂലം ലാഭം കുറയും. ഗൃഹത്തിലും ചെറുകലഹങ്ങൾ വരാം. കടബാധ്യത ഗഡുക്കളായി തീർക്കാൻ ശ്രമം തുടരുന്നതാണ്. തീർത്ഥയാത്രകൾ നീട്ടിവെക്കാനുള്ള സാധ്യതയുണ്ട്.
തുലാക്കൂറിന് (ചിത്തിര 3, 4 പാദങ്ങൾ, ചോതി, വിശാഖം 1,2,3 പാദങ്ങൾ)
തുലാക്കൂറുകാർക്ക് ഭാഗ്യസ്ഥാനമായ ഒമ്പതാം ഭാവത്തിലാണ് കുജൻ സഞ്ചരിക്കുന്നത്. ആയതിനാൽ ഭാഗ്യാനുഭവങ്ങൾ തടസ്സപ്പെടാനോ ശുഷ്കമാവാനോ ഇടയുണ്ട്. കുജസഞ്ചാരം ധർമ്മ പ്രവൃത്തികൾക്ക് തുരങ്കം വെക്കാം. ഭാഗ്യപരീക്ഷണങ്ങൾക്ക് അനുകൂലമല്ലാത്ത കാലമാണിതെന്ന് പ്രത്യേകം ഓർക്കണം. പ്രതീക്ഷിച്ച നേട്ടം, പദവി എന്നിവ വൈകാൻ സാധ്യതയുണ്ട്. തീർത്ഥാടനത്തിനുള്ള ആസൂത്രണം മാറ്റിവെക്കപ്പെടാം. ദൈവിക സമർപ്പണം നീണ്ടുപോകുന്നതാണ്. പിതാവിനോ ഗുരുവിനോ ക്ലേശങ്ങൾ ഉണ്ടാവാം. തൻ്റെ വാക്കുകൾ കാരണവരുടെ മനസ്സിനെ വേദനിപ്പിക്കുന്നതാവാം. പുതുജോലിയിൽ പ്രവേശിക്കാൻ തടസ്സങ്ങൾ വന്നെത്തിയേക്കും. ചെറിയ ദൗത്യങ്ങൾ വിജയിക്കുന്നതാണ്. ലഘു സംരംഭങ്ങൾ ലാഭകരമാവാം. കടബാധ്യത പെരുകാതിരിക്കാൻ ശ്രദ്ധവെക്കണം.
വൃശ്ചികക്കൂറിന് (വിശാഖം നാലാം പാദം, അനിഴം, തൃക്കേട്ട)
അഷ്ടമസ്ഥാനത്തിലാണ് ചൊവ്വ സഞ്ചരിക്കുന്നത്. പ്രതികൂല ഭാവമായി അഷ്ടമം പരിഗണിക്കപ്പെടുന്നു. ആ ഭാവത്തിലൂടെ പാപഗ്രഹങ്ങൾ കടന്നു പോകുന്നത് സകാരണവും അകാരണവുമായ മാനസിക സമ്മർദ്ദം സൃഷ്ടിക്കും. കലഹ പ്രേരണ, ദുർവാസനകൾ എന്നിവ നിയന്ത്രിക്കപ്പെടണം. വാഹനം, വൈദ്യുതി, അഗ്നി, യന്ത്രം എന്നിവയുടെ ഉപയോഗത്തിൽ ശ്രദ്ധ വേണ്ടതുണ്ട്. പഠനാർത്ഥികൾക്ക് ഗ്രഹണശക്തി കുറയാം. തുല്യരല്ലാത്തവരോട് മത്സരിക്കരുത്. സഹോദരരുടെ കാര്യത്തിൽ അനാവശ്യമായ ഇടപെടൽ നടത്തുന്നത് കലഹത്തിന് വഴിവെക്കാം. ഭൂമി വ്യാപാരത്തിൽ അമളി പറ്റാനിടയുണ്ട്. അത്യദ്ധ്വാനത്തിന് എളിയ ലാഭം മാത്രമാണ് വന്നെത്തുക. അത്യാവശ്യങ്ങൾക്ക് ധനം കൈവശമെത്തും. എന്നാൽ ദുർവ്യയം ഉണ്ടാവാതെ നോക്കണം. സ്വന്തം ജാതകമനുസരിച്ച് അനുകൂലമായ ദശാപഹാരങ്ങൾ നടക്കുകയാണെങ്കിൽ ചൊവ്വയുടെ പ്രഹരശേഷി അനുഭവപ്പെടുകയില്ല.
ധനുക്കൂറിന് (മൂലം, പൂരാടം, ഉത്രാടം ഒന്നാം പാദം)
ചൊവ്വ ഏഴാം ഭാവത്തിൽ സഞ്ചരിക്കുന്നു. പ്രണയികൾക്ക് പ്രതികൂലമായ കാലമാണ്. ഇക്കാലത്തിൽ പ്രണയ ഭംഗത്തിലേക്ക് കാര്യങ്ങൾ പോയേക്കാം അല്ലെങ്കിൽ പ്രണയത്തിൽ വീട്ടുകാരുടെ ഇടപെടൽ ഭവിച്ചേക്കാം. ദാമ്പത്യത്തെയും ഏഴിലെ ചൊവ്വ ബാധിക്കും. ഭാര്യാഭർത്താക്കന്മാർക്കിടയിൽ പരസ്പരവിശ്വാസം കുറയുന്നതാണ്. അന്യോന്യം കുറ്റപ്പെടുത്തുന്ന രീതിയിലേക്ക് നീങ്ങാം. അനുരഞ്ജനം അനിവാര്യമായ ഘട്ടമാണിത്. കൂട്ടുകച്ചവടക്കാർ തമ്മിൽ ഐക്യം നഷ്ടമാകാനിടയുണ്ട്. ആകയാൽ സംയുക്ത സംരംഭങ്ങളിൽ നിന്നും പിന്മാറാൻ നിർബന്ധിതരാവും. വിദേശ യാത്രയ്ക്ക് ഒരുങ്ങുന്നവർക്ക് തടസ്സങ്ങൾ വന്നെത്താം. മറ്റുള്ള ഗ്രഹങ്ങളുടെ ഗോചര അനുകൂലത ചൊവ്വ സൃഷ്ടിക്കുന്ന പ്രശ്നങ്ങളെ മറികടക്കാൻ സഹായിച്ചെന്നു വരാം.
മകരക്കൂറിന് (ഉത്രാടം 2,3,4 പാദങ്ങൾ, തിരുവോണം, അവിട്ടം 1,2 പാദങ്ങൾ)
ചൊവ്വ ഇഷ്ടഭാവമായ ആറാമെടത്തിൽ സഞ്ചരിക്കുന്നു. അതിനാൽ നേട്ടങ്ങൾ വർദ്ധിക്കുന്നതാണ്. ലഘു പ്രയത്‌നത്താൽ കാര്യസാദ്ധ്യം വന്നുചേരും. ബന്ധുക്കൾ പിണക്കം മാറി ഐക്യത്തിലാവും. സ്വതന്ത്ര ചിന്താഗതി മറ്റുള്ളവരാൽ അംഗീകരിക്കപ്പെടും. ശത്രുക്കളെ പിന്തള്ളി ഏറ്റെടുത്ത ദൗത്യങ്ങൾ വിജയ പഥത്തിലെത്തിക്കും. ഭൂമിയുടെ ക്രയവിക്രയം ലാഭകരമാവുന്നതാണ്. ഗൃഹനിർമ്മാണത്തിലെ തടസ്സങ്ങൾ മാറാം. പുതിയ സംരംഭങ്ങൾ സാക്ഷാൽകരിക്കും. സഹോദരരുടെ പിന്തുണയുണ്ടാവും. പുതുവാഹനം വാങ്ങാൻ സാധിക്കുന്നതാണ്. ആരോഗ്യ പരിശോധനകൾ തൃപ്തിയേകും. കടക്കെണിയിൽ നിന്നും പുറത്തുവരാനുള്ള വഴി തെളിയാം. സാമ്പത്തിക സമാശ്വാസം പ്രതീക്ഷിക്കാം. പൊതുവേ കർമ്മരംഗത്തും ഉയർച്ചയുണ്ടാവുന്ന സന്ദർഭമാണ്. മനസ്സമാധാനം പുലരും.
കുംഭക്കൂറിന് (അവിട്ടം 3,4 പാദങ്ങൾ, ചതയം, പൂരൂരുട്ടാതി 1,2,3 പാദങ്ങൾ)
ചൊവ്വ അഞ്ചാം ഭാവത്തിലായി സഞ്ചരിക്കുന്നു. ആശയക്കുഴപ്പം സാർവ്വത്രികമായി അനുഭവപ്പെടും. വേണോ വേണ്ടയോ എന്ന സന്ദിഗ്ദ്ധത പുലരും. തീരുമാനങ്ങൾ നീളുന്നതാണ്. വിദ്യാർത്ഥികൾ ഒരു പക്ഷേ കാലഹരണപ്പെട്ട വിഷയങ്ങളുടെ പഠനത്തിന് സമയം ചെലവഴിക്കാം. കാര്യാലോചനായോഗങ്ങളിൽ ശോഭിക്കണമെന്നില്ല. അടിച്ചേല്പിക്കപ്പെട്ട കാര്യങ്ങൾ നിർവഹിക്കാൻ ബാദ്ധ്യസ്ഥരാവും. പ്രത്യുല്പന്നമതിത്വത്തിനു പകരം വൈകാരിക പ്രതികരണങ്ങൾക്ക് മുതിരുന്നതാണ്. മക്കളുടെ ഭാവികാര്യങ്ങളെച്ചൊല്ലി തർക്കം വരാം. ചിലപ്പോൾ ശത്രുക്കളുടെ ധനം ഉപയോഗിച്ച് കാര്യം നേടേണ്ട അവസ്ഥ വന്നു ചേരാം. ഭൂമിയിൽ നിന്നും പേരിനെങ്കിലും ആദായം പ്രതീക്ഷിക്കാം. സഹോദരരുടെ പിന്തുണയുണ്ടാവും.
മീനക്കൂറിന് (പൂരുരുട്ടാതി നാലാം പാദം, ഉത്രട്ടാതി, രേവതി)
ചൊവ്വ നാലാം ഭാവത്തിലൂടെ കടന്നു പോകുന്നു. മന:ക്ഷോഭം ഉയരും. ബൗദ്ധികമായി തീരുമാനിക്കേണ്ടവ വൈകാരികമായി പരിഗണിക്കും. സുഹൃത്തുക്കളുമായി കലഹം വരാതെ നോക്കേണ്ടതുണ്ട്. അടുത്ത ബന്ധുക്കളോട് കയർത്തു സംസാരിക്കാൻ സന്ദർഭം ഉണ്ടായേക്കാം. ഗാർഹികാന്തരീക്ഷത്തിൽ സമാധാനം കുറയന്നതാണ്. നിസ്സാരകാര്യങ്ങളാൽ ശാന്തതയ്ക്ക് ഭംഗം വരാനിടയുണ്ട്. പ്രണയത്തിലും ദാമ്പത്യത്തിലും സ്വൈരക്കേടുകൾ വന്നെത്താം. ഗൃഹനിർമ്മാണം മെല്ലെയാകുന്നതാണ്. പാരമ്പര്യ വസ്തുക്കളുമായി ബന്ധപ്പെട്ട് വ്യവഹാരത്തിന് സാധ്യതയുണ്ട്. സാമ്പത്തികമായി സാമാന്യമായ നേട്ടം പ്രതീക്ഷിച്ചാൽ മതി. വാഹനം ഉപയോഗിക്കുന്നതിൽ ശ്രദ്ധ വേണ്ടതുണ്ട്. സാഹസ കർമ്മങ്ങൾക്ക് മുതിരരുത്. മാതാവിൻ്റെ ആരോഗ്യ പരിശോധനകളിൽ വിളംബമരുത്.
Read More
Stay updated with the latest news headlines and all the latest Lifestyle news. Download Indian Express Malayalam App - Android or iOS.