Lunar Eclipse September 2025: സെപ്റ്റംബർ 7 ലെ പൂർണ്ണ ചന്ദ്രഗ്രഹണം: ദോഷഫലങ്ങൾ ഏതൊക്കെ കൂറുകാർക്ക്?

Lunar Eclipse on September 7: 2025 സെപ്തംബർ 7 ന്/ 1201 ചിങ്ങം 22 ന്, ഞായറാഴ്ച രാത്രി 9 മണി 58 മിനിറ്റു മുതൽ 1 മണി 22 മിനിറ്റുവരെ പൂർണ്ണചന്ദ്രഗ്രഹണം നടക്കും. കുംഭക്കൂറിൽ ചതയം/പൂരൂരുട്ടാതി നക്ഷത്രസന്ധികളിൽ ഗ്രഹണം ആരംഭിക്കും. തുടർന്ന് പൂർണ്ണമാകുന്നത് പൂരൂരുട്ടാതി നക്ഷത്രത്തിലായിരിക്കും.

സെപ്തംബർ 7 ലെ ചന്ദ്രഗ്രഹണം ഭാരതത്തിലും ലോകത്തിൻ്റെ മിക്ക ഭാഗങ്ങളിലും ദൃശ്യവും ആചരണീയവുമാകയാൽ ഇതിനെ 'സമ്പൂർണ്ണ ചന്ദ്രഗ്രഹണം' എന്ന് വിശേഷിപ്പിക്കാം. ഏതാണ്ട് രാത്രി 11 മുതൽ 12 മണി വരെ ഗ്രഹണമദ്ധ്യകാലമാണ്. ഗ്രഹണം വ്യക്തമായും ദൃശ്യമാകുമ്പോൾ ചുവന്നനിറത്തിലുള്ള ചന്ദ്രനെ കാണാനാകുന്നതിനാൽ 'Blood Moon Eclipse' എന്ന് ഈ ഗ്രഹണം വിശേഷിപ്പിക്കപ്പെടുന്നു. 

കുംഭക്കൂറിൽ പൂരൂരുട്ടാതി നക്ഷത്രത്തിൽ രാഹു സഞ്ചരിക്കുകയാണ്. ആയതിനാൽ ഈ ഗ്രഹണം 'രാഹുഗ്രസ്ത ചന്ദ്രഗ്രഹണ' മാകുന്നു. പുരാണകഥകൾ പ്രകാരം സൂര്യചന്ദ്രഗ്രഹണങ്ങൾ ഒന്നുകിൽ രാഹു ഇവയെ വിഴുങ്ങുന്നതാവും. അല്ലെങ്കിൽ കേതു ഇവയെ വിഴുങ്ങുന്നതാവും. ഇത്തവണ ചന്ദ്രനെ രാഹു ഗ്രഹിക്കുന്നു അഥവാ ഗ്രസിക്കുന്നു. ആകയാൽ ഇത് 'രാഹുഗ്രസ്തഗ്രഹണ' മായി അറിയപ്പെടും.

ഗ്രഹണഫലങ്ങൾ പ്രായേണ ദോഷപ്രധാനമാണ്. അവ നൽകുന്ന കയ്പൻ അനുഭവങ്ങളും ജീവിതവിഘാതങ്ങളും രാഷ്ട്രത്തിൻ്റെ പ്രവർത്തനങ്ങളെപ്പോലും ബാധിക്കാറുള്ളതായി പണ്ഡിതന്മാർ ചൂണ്ടിക്കാണിക്കുന്നു.

Also Read: ഓഗസ്റ്റ് മാസത്തെ സമ്പൂർണ നക്ഷത്രഫലം, അശ്വതി മുതൽ രേവതിവരെ

ഗ്രഹണഫലം ചില കൂറുകാർക്ക് ആറുമാസത്തോളം അനുഭവത്തിൽ വരും. 2025 സെപ്തംബർ 7ാം തീയതിയിലെ ചന്ദ്രഗ്രഹണഫലം മേടക്കൂറു മുതൽ മീനക്കൂറു വരെയുള്ള കൂറുകാർക്കും അതിലെ നക്ഷത്രങ്ങളിൽ ജനിച്ചവർക്കും ഏതുവിധത്തിലുള്ള ഫലങ്ങളാണ് സൃഷ്ടിക്കുന്നതെന്ന് ഈ ലേഖനം വിശദീകരിക്കുന്നു.

മേടക്കൂറുകാർക്ക് (അശ്വതി, ഭരണി, കാർത്തിക ഒന്നാം പാദം)

പതിനൊന്നാം ഭാവത്തിൽ ചന്ദ്രഗ്രഹണം നടക്കുന്നതിനാൽ ഗ്രഹണദോഷം ഏറ്റവും കുറവ് ബാധിക്കുന്നത് മേടക്കൂറുകാരെയാണ് എന്നുപറയാം. ഗ്രഹണം മൂലം നിലവിലെ ജീവിത സാഹചര്യങ്ങളിൽ കാര്യമായ കോട്ടം ഉണ്ടാവുകയില്ല. പ്രതീക്ഷിച്ച കാര്യങ്ങൾ തടസ്സപ്പെടുന്നതല്ല. എങ്കിലും ചന്ദ്രൻ നാലാം ഭാവത്തിൻ്റെ അധിപനാകയാൽ മനസ്സിൽ കുറച്ചെങ്കിലും സംശയഗ്രസ്തതയുണ്ടാവും. ഭയക്കുന്ന ശീലം തെല്ല് കൂടിയേക്കാം. കുറച്ചുദിവസത്തേക്ക് ഉറക്കം കുറയാനുള്ള സാധ്യതയുണ്ട്. കൂട്ടുകെട്ടുകളിൽ ജാഗ്രത പുലർത്തണം. അകലയാത്രകൾ ഒഴിവാക്കുന്നത്/ കുറയ്ക്കുന്നത് ഉചിതമായിരിക്കും. വളർത്തുമൃഗങ്ങളുടെ പരിപാലനം ക്ലേശിപ്പിക്കുന്നതാവും. ദീർഘയാത്രകളുടെ തീയതി പ്രതീക്ഷിച്ചതിൽ നിന്നും നീളാനിടയുണ്ട്. കുടുംബത്തിലെ സ്ത്രീകളുടെ കാര്യത്തിൽ കരുതലുണ്ടാവണം. രോഗഗ്രസ്തർക്ക് വൈദ്യസഹായം ഏർപ്പാടാക്കാൻ മടിക്കരുത്. ഊഹക്കച്ചവടത്തിൽ നഷ്ടം വരാനിടയുണ്ട്. അക്കാര്യത്തിൽ കരുതൽ വേണം.

ഇടവക്കൂറിന് (കാർത്തിക 2,3,4 പാദങ്ങൾ, രോഹിണി, മകയിരം 1,2 പാദങ്ങൾ)

ഗ്രഹണം നടന്നത് പത്താം ഭാവത്തിലാണ്. തൊഴിലും തൊഴിലിടവുമാണ് പത്താംഭാവം. ആകയാൽ ഗ്രഹണത്തിൻ്റെ അനന്തരഫലമെന്ന നിലയ്ക്ക് കർമ്മരംഗത്ത് ചില ശൈഥില്യങ്ങൾ വരാം. ലക്ഷ്യത്തിലെത്താൻ വൈകുന്നതായിരിക്കും. മേലധികാരികൾ / സഹപ്രവർത്തകർ ഒക്കെയായി തർക്കത്തിലേർപ്പെടാം. അധികച്ചുമതലകൾ ഏറ്റെടുക്കേണ്ട സാഹചര്യം ഉദയം ചെയ്താൽ അത്ഭുതപ്പെടാനില്ല.  വിദേശത്ത് പോകാനാഗ്രഹിക്കുന്നവർക്കും നാട്ടിലേക്ക് വരാൻ ഒരുങ്ങുന്നവർക്കും തടസ്സങ്ങളുണ്ടാവും. നവസംരംഭങ്ങൾ തുടങ്ങാൻ അല്പം കൂടി കാത്തിരിക്കുക ഉചിതം. സഹായിക്കാമെന്നേറ്റവർ പിൻവാങ്ങാം. പഠിപ്പിലും ഗവേഷണത്തിലും ഏകാഗ്രത കുറയുന്നതാണ്. സഹോദരരുമായി പിണക്കമുണ്ടാവാം. അകാരണമായ വിഷാദമോ ഭയമോ ഉണ്ടാവാം.  ജോലി മാറുന്നതിന് ഇപ്പോൾ ഗ്രഹാനുകൂല്യമില്ല. സാമ്പത്തിക കാര്യങ്ങളിൽ ഏറെ ശ്രദ്ധ ആവശ്യമുണ്ട്. തീർത്ഥാടനം മാറ്റിവെക്കാനുള്ള സാഹചര്യം ഉദയം ചെയ്തെന്നുവരാം.

മിഥുനക്കൂറിന് (മകയിരം 3, 4 പാദങ്ങൾ, തിരുവാതിര, പുണർതം 1, 2, 3 പാദങ്ങൾ)

ഒമ്പതാമെടത്ത് ഗ്രഹണം വരികയാൽ ഭാഗ്യാനുഭവങ്ങൾക്ക് ഭ്രംശം വരാനിടയുണ്ട്. ഉറപ്പിച്ച കാര്യങ്ങൾ തടസ്സപ്പെടാം. അല്ലെങ്കിൽ നീട്ടിവെക്കാം. പൈതൃക സ്വത്തിന്മേൽ തർക്കത്തിന് സാധ്യതയുണ്ട്. ഏകോപനത്തിലെ മിടുക്കിനെ ആലസ്യം ബാധിക്കാം.  ഉപാസനാദികൾക്ക് ഭംഗം വരുന്നതാണ്. ക്ഷേത്രാടനത്തിൽ അലംഭാവം ഭവിക്കും. നീതിബോധത്തോടെ പ്രവർത്തിച്ചാലും വേണ്ടപ്പെട്ടവർ പക്ഷപാതം ആരോപിച്ചേക്കും. കച്ചവടരംഗത്ത് രൊക്ക വ്യാപാരം തുടരുകയാവും അഭിലഷണീയം. കടം വാങ്ങിയവർ കടം വീട്ടുന്നതിൽ വിമനസ്കരായി കാണപ്പെടുന്നതാണ്. മാതാപിതാക്കളുടെ ആരോഗ്യസംരക്ഷണത്തിൽ ജാഗരൂകരാവണം. ഭൂമിവിൽപ്പനയിൽ നഷ്ടം വന്നേക്കും. പ്രണയികൾക്കിടയിൽ വിപ്രതിപത്തി ഉദയം ചെയ്താൽ അത്ഭുതപ്പെടാനില്ല. കുടുംബ പ്രശ്നങ്ങൾ പരിഹരിക്കാൻ ശ്രമിക്കുന്നതാണ്. നിലവിലെ ജോലി തത്കാലം ഉപേക്ഷിക്കാതിരിക്കുക ശ്ളാഘ്യം. പുതിയത് ഉടൻ കിട്ടിക്കൊള്ളണം എന്നില്ല.

കർക്കടകക്കൂറിന് (പുണർതം നാലാം പാദം, പൂയം, ആയില്യം)

കർക്കടകക്കൂറിൻ്റെ അഷ്ടമഭാവത്തിലാണ് ചന്ദ്രഗ്രഹണം ഭവിക്കുന്നത്. ഈ ഗ്രഹണത്തിൻ്റെ ദോഷഫലങ്ങൾ ഏറവും കൂടുതൽ അനുഭവിക്കാനിടയുള്ള കൂറുകളിൽ ഒന്ന് കർക്കടകമാണ്. കൂടാതെ കൂറിൻ്റെ അധിപനുമാണ് ചന്ദ്രൻ. തന്മൂലം വ്യക്തിത്വപ്രതിസന്ധി ഭവിക്കാം.  മുൻകൂട്ടി ആസൂത്രണം ചെയ്താലും പലതും പൂർത്തിയാക്കാൻ വിഷമിക്കുന്നതാണ്. ധനവിനിമയത്തിൽ ശ്രദ്ധയുണ്ടാവണം. കടം വാങ്ങി ചെലവു നടത്തുന്ന രീതി ദോഷം ചെയ്തേക്കും. എല്ലാവരെയും 'കണ്ണടച്ച് വിശ്വസിക്കുന്ന' സ്വഭാവം ക്ലേശം സൃഷ്ടിക്കുന്നതാണ്. ആരോഗ്യപ്രശ്നങ്ങൾ നിസ്സാരീകരിക്കരുത്. ജീവിതശൈലീ രോഗങ്ങൾക്ക് കൃത്യമായ പരിശോധന ആവശ്യമാണ്. പ്രണയത്തിലെ പ്രശ്നങ്ങൾ കുടുംബ ബന്ധങ്ങളെ ബാധിച്ചെന്നു വരാം. പുതിയ കരാറുകളിൽ ഏർപ്പെടുന്നത് വ്യവസ്ഥകൾ കൃത്യമായി മനസ്സിലാക്കിയിട്ടാവണം. ഗൃഹനിർമ്മാണത്തിൽ തടസ്സങ്ങളേർപ്പെടും. രാഷ്ട്രീയ പ്രവർത്തകർ ഉപജാപങ്ങളെ നേരിടുന്നതാണ്. വാഹനം, വൈദ്യുതി തുടങ്ങിയവയുടെ ഉപയോഗത്തിൽ കരുതലുണ്ടാവണം.

Also Read: സമ്പൂർണ വർഷഫലം; അശ്വതി മുതൽ രേവതി വരെ

ചിങ്ങക്കൂറിന് (മകം, പൂരം, ഉത്രം ഒന്നാം പാദം)

ഏഴാമെടത്തിലാണ് ഗ്രഹണമെന്നതിനാൽ വഴിയാത്രകൊണ്ട് ക്ലേശമുണ്ടാവും. കൂടുകച്ചവടത്തിൽ ഭിന്നപക്ഷങ്ങൾ ഉടലെടുക്കാം. തീരുമാനങ്ങൾ ഏകപക്ഷീയമായി എന്ന് ഒപ്പമുള്ളവർ തർക്കിക്കാനിടയുണ്ട്. അനുരാഗത്തിൽ വിഘ്നങ്ങൾ ഏർപ്പെടാം. അനുരഞ്ജനമില്ലായ്മ ദാമ്പത്യത്തെയും പ്രതികൂലമായി ബാധിക്കുന്നതാണ്. അവിവാഹിതരുടെ വിവാഹാലോചനകളിൽ തീരുമാനം നീളാം.  തയ്യാറെടുപ്പ് വേണ്ടത്രയുണ്ടായാലും അഭിമുഖങ്ങളിൽ തിളങ്ങാനായേക്കില്ല. വാഗ്വാദങ്ങൾക്ക് മുതിരരുത്. കോടതി വ്യവഹാരങ്ങൾ നീണ്ടുപോകുന്നതാണ്. ചെലവുകളിൽ നല്ല നിയന്ത്രണം പുലർത്തണം. ചീത്ത കൂട്ടുകെട്ടുകളിൽ നിന്നും വിട്ടുമാറാൻ സ്വയം ശ്രമിക്കേണ്ടതുണ്ട്. ഉപാസനകൾക്കും ആത്മീയശീലങ്ങൾക്കും തടസ്സം വരാം. സാഹസങ്ങൾ ഒഴിവാക്കണം. ദുഷ്പ്രേരണകളെ തിരിച്ചറിയേണ്ടതുണ്ട്.  സർക്കാരിൽ നിന്നുമുള്ള അനുമതി നേടാൻ ആവർത്തിത ശ്രമം വേണ്ടിവന്നേക്കും.

കന്നിക്കൂറിന് (ഉത്രം 2, 3, 4 പാദങ്ങൾ, അത്തം, ചിത്തിര 1,2 പാദങ്ങൾ)

ഗ്രഹണം ആറാമെടത്തിലാണ് നടക്കുന്നതെന്നതിനാൽ വലിയ ദോഷഫലങ്ങൾ ഉണ്ടാവില്ല. പ്രണയബന്ധത്തിൽ ശൈഥില്യം വരാനിടയുണ്ട്. ദാമ്പത്യത്തിലും പൊരുത്തപ്പെടലുകൾ കുറയുന്നതായി തോന്നും. ജീവിതപങ്കാളിയുടെ തൊഴിൽമേഖലയിൽ സമ്മർദ്ദങ്ങൾ വരാം. അതിൻ്റെ പ്രതിഫലനം ഗാർഹസ്ഥ്യത്തിലും പ്രതീക്ഷിക്കാം. ചെയ്തുപോരുന്ന ബിസിനസ്സിൽ വിപുലീകരണം സാധ്യമാവും. എന്നാൽ അതിനായി കടം വാങ്ങി ചെലവു ചെയ്യുന്നത് ആശാസ്യമാവില്ല. രാഷ്ട്രീയ നിലപാടുകളും സംഘടനാ പ്രവർത്തനങ്ങളും വിമർശിക്കപ്പെടാം. മേലധികാരികൾക്ക് നൽകുന്ന വിശദീകരണം തൃപ്തികരമായേക്കില്ല. ആരോഗ്യകാര്യത്തിൽ കരുതലുണ്ടാവണം. ജീവിതശൈലീ രോഗങ്ങൾക്ക് കൃത്യമായ പരിശോധന ആവശ്യമാണ്.  വീടുനിർമ്മാണത്തിലും വിളംബമനുഭവപ്പെടും. എല്ലാക്കാര്യവും പുനരാലോചനയിലൂടെ നിർവഹണത്തിൽ കൊണ്ടെത്തിക്കുകയാവും സമുചിതം.

തുലാക്കൂറിന് (ചിത്തിര 3,4 പാദങ്ങൾ, ചോതി, വിശാഖം 1,2,3 പാദങ്ങൾ)

പഞ്ചമഭാവത്തിൽ ഗ്രഹണം നടക്കുകയാൽ പുണ്യകാര്യങ്ങൾ മുടങ്ങാനിടയുണ്ട്. സന്താനങ്ങളെച്ചൊല്ലി കുടുംബാംഗങ്ങൾക്കിടയിൽ കലഹം ഉയരാം. അനാവശ്യമായ / അകാരണമായ ഉൽക്കണ്ഠകൾ സ്വസ്ഥത നശിപ്പിക്കും. വരവും ചെലവും പൊരുത്തപ്പെടുത്താൻ ക്ലേശിച്ചേക്കും. വ്യക്തിപരമായി ഏറെ ആഗ്രഹിച്ച കാര്യങ്ങൾ മാറ്റിവെക്കേണ്ടി വരാം. യാത്രകളിൽ സന്തോഷം കുറയുന്നതാണ്. ശ്രാദ്ധാദികർമ്മങ്ങൾ തടസ്സപ്പെടാനിടയുണ്ട്. പ്രത്യുല്പന്നമതിത്വം ഉണ്ടാവില്ല. തെറ്റായ ചില തീരുമാനങ്ങൾ എടുത്തേക്കാം. വീഴ്ച, മുറിവ്, ആരോഗ്യപ്രശ്നങ്ങൾ ഇവ വലയ്ക്കാനിടയുണ്ട്. കുടുംബത്തിലെ മുതിർന്ന അംഗങ്ങളുടെ കാര്യത്തിൽ പ്രത്യേകമായ ശ്രദ്ധ അനിവാര്യമാണ്. കർമ്മരംഗത്ത് മാറ്റം കൊണ്ടുവരാൻ വളരെയധികം ആഗ്രഹിക്കും. എന്നാൽ പ്രാവർത്തികമാക്കുക എളുപ്പമല്ലെന്നറിയും. എഴുത്തുകാർക്ക് സർഗാത്മകതയിൽ വിഘ്നങ്ങൾ ഏർപ്പെടുന്നതാണ്. പ്രണയത്തിൽ വിരക്തിയേർപ്പെട്ടാൽ അത്ഭുതപ്പെടാനില്ല.

വൃശ്ചികക്കൂറിന് (വിശാഖം നാലാം പാദം, അനിഴം, തൃക്കേട്ട)

നാലാം ഭാവത്തിലാണ് ഗ്രഹണം ഭവിക്കുന്നത്. വീടും നാടും വിട്ട് പഠിത്തം /ജോലി ഇത്യാദികൾക്കായി അകലങ്ങളിൽ പോകാൻ സാധ്യതയുണ്ട്. മനസ്സിൻ്റെ മേലുള്ള നിയന്ത്രണം പലപ്പോഴും നഷ്ടപ്പെടാം. പുതുവാഹനങ്ങൾ വാങ്ങാൻ ആഗ്രഹിക്കുന്നവർ അല്പം കൂടി കാത്തിരിക്കുക അഭികാമ്യം. കെട്ടിടം / വീട് ഇവയുടെ നിർമ്മാണത്തിൽ തടസ്സങ്ങൾ വരുന്നതാണ്. പല കാര്യങ്ങളും വൈകിമാത്രമാവും നടപ്പിലാക്കാൻ കഴിയുക. കലാപ്രവർത്തനത്തിന് പ്രതീക്ഷിച്ച അവസരം കിട്ടിയേക്കില്ല. ബന്ധുകലഹങ്ങളിൽ കഴിവതും ഇടപെടരുത്. സുഹൃത്തുക്കളുടെ ഉപദേശങ്ങൾ കണ്ണടച്ച് വിശ്വസിക്കുന്ന പ്രവണത തിരുത്തപ്പെടണം. മാതാപിതാക്കളുടെ ആരോഗ്യകാര്യത്തിൽ ശ്രദ്ധ വേണ്ടതുണ്ട്. ഭാര്യാഭർത്താക്കന്മാർ പരസ്പരം മനസ്സിലാക്കാൻ ശ്രമിക്കാത്തത് ദാമ്പത്യത്തെ ക്ലേശിപ്പിച്ചേക്കാം. വ്യായാമം, ദിനചര്യ ഇവകളിൽ അലംഭാവമരുത്. അധികാരികളുടെ തെറ്റുകൾ ചൂണ്ടിക്കാട്ടുക മൂലം തൊഴിലിടം അശാന്തമായേക്കും.

Also Read: ചിങ്ങ മാസത്തെ സമ്പൂർണ്ണ നക്ഷത്രഫലം, അശ്വതി മുതൽ രേവതി വരെ

ധനുക്കൂറിന് (മൂലം, പൂരാടം, ഉത്രാടം ഒന്നാംപാദം)

മൂന്നാമെടത്തിലാണ് ഗ്രഹണം സംഭവിക്കുന്നത്. അനുകൂലഫലമില്ല. എന്നാൽ കഠിനദോഷഫലങ്ങളുമില്ല എന്നത് ആശ്വാസകരമാണ്. സഹായ വാഗ്ദാനങ്ങൾ പാലിക്കാൻ ക്ലേശിച്ചേക്കും. തനിക്ക് ലഭിക്കേണ്ടതായ സഹായവും വൈകും. സമയബന്ധിതമായി തീർക്കേണ്ട ചുമതലകളിൽ കാലതാമസം ഏർപ്പെടുന്നതാണ്. കാര്യക്ഷമതയ്ക്ക് കുറവു വരാം. പരാശ്രയം ഇഷ്ടപ്പെടാത്തവരെങ്കിലും കാര്യസാധ്യത്തിന് ചിലരുടെ സഹായസഹകരണങ്ങൾ കൂടിയേ കഴിയൂ എന്ന നില ഭവിക്കാം. ഏകാഗ്രത  ശിഥിലമാവാനിടയുണ്ട്. സഹോദരരുമായി  ഏതെങ്കിലും തരത്തിൽ തെറ്റിദ്ധാരണകൾ രൂപപ്പെടാം. സഹപ്രവർത്തകരുമായി ആശയവിനിമയത്തിൽ പാളിച്ചകൾ വന്നെന്നുവരും. സാഹസകർമ്മങ്ങളിൽ നിന്നും പിന്തിരിയുന്നത് നന്നായിരിക്കും.  പുതിയ സംരംഭങ്ങൾ തുടങ്ങാൻ ആഗ്രഹിക്കുന്നവർ കുറച്ചുനാൾകൂടി കാത്തിരിക്കുന്നത് ഉചിതം. ദാമ്പത്യത്തിൽ മുൻനില തുടരപ്പെടും. പ്രണയാഭ്യർത്ഥനയ്ക്ക് ഉത്തരം വൈകുന്നതാണ്.

മകരക്കൂറിന് (ഉത്രാടം 2, 3,4 പാദങ്ങൾ, തിരുവോണം, അവിട്ടം 1,2 പാദങ്ങൾ)

ചന്ദ്രഗ്രഹണം സംഭവിക്കുന്നത് രണ്ടാംകൂറിലാകയാൽ ദോഷഫലങ്ങളുണ്ട്. രണ്ടാമെടത്തിന് ധനസ്ഥാനമെന്നും പേരുള്ളതിനാൽ ധനകാര്യത്തിൽ നല്ല ജാഗ്രത ആവശ്യമാണ്. കൊടുക്കൽ വാങ്ങലുകളുടെ രേഖകൾ സൂക്ഷിക്കണം. പ്രതീക്ഷിക്കുന്ന വായ്പ കിട്ടാൻ വൈകിയേക്കും. വായ്പയുടെ തിരിച്ചടവിനും ക്ലേശിക്കുന്നതാണ്. ബിസിനസ്സുകാർക്ക് ആദായം കുറയും. വിപണന തന്ത്രങ്ങൾ വേണ്ടത്ര ഏശുകയില്ല. വിദ്യാർത്ഥികൾക്ക് പഠനത്തിൽ പരാങ്മുഖത്വമുണ്ടാവാം. പഠനവൈകല്യം ഒരു സാധ്യതയാണ്. ഗവേഷകർക്ക് പ്രബന്ധരചനക്കാവശ്യമായ ഉപാദാനങ്ങൾ ലഭിച്ചേക്കില്ല. വാഗ്വാദങ്ങളിൽ നിന്നും ഒഴിഞ്ഞുനിൽക്കുന്നത് അഭികാമ്യം. കോടതി വ്യവഹാരങ്ങൾ നീളുന്നതായിരിക്കും. ആരോഗ്യപരിശോധനകളിൽ അലംഭാവമരുത്. സൗഹൃദങ്ങൾക്ക് മുന്നത്തെ മുറുക്കം ഉണ്ടാവില്ല. ചിലരുടെ ഉപദേശങ്ങൾക്ക് ചെവികൊടുക്കരുത്. നിയമനോത്തരവ് കൈപ്പറ്റാൻ വൈകും. കുടുംബ ബന്ധങ്ങൾ, അനുരാഗം ഇവയിൽ ഊഷ്മളത കുറയാം.

കുംഭക്കൂറ് (അവിട്ടം 3,4 പാദങ്ങൾ, ചതയം, പൂരൂരുട്ടാതി 1,2,3 പാദങ്ങൾ)

ജന്മരാശിയിലെ നക്ഷത്രങ്ങളായ ചതയം, പൂരൂരുട്ടാതി എന്നിവയിലാണ് ഗ്രഹണം സംഭവിക്കുന്നത്. അതിനാൽ ഈ ചന്ദ്രഗ്രഹണം ഏറ്റവും ദോഷപ്രദമാകുന്നത് കുംഭക്കൂറുകാർക്കാണ്. സുഗമമായ കാര്യങ്ങൾ ദുർഗ്ഗമമാവും. അതുപോലെ സുലഭവസ്തുക്കൾ ദുർലഭമാവുന്നതാണ്. കാര്യനിർവഹണത്തിൽ തടസ്സങ്ങളേർപ്പെടും. അടുത്ത ബന്ധുക്കളുമായി പിണക്കമേർപ്പെടാം. രാഷ്ട്രീയ നേതൃത്വവുമായി ഭിന്നതയുണ്ടാവാൻ സാധ്യത കാണുന്നു. മത്സരങ്ങളിലും അഭിമുഖങ്ങളിലും ശോഭിക്കാനായേക്കില്ല. ദൂരദിക്കിൽ നിന്നും ജന്മനാട്ടിലേക്ക് മാറ്റം പ്രതീക്ഷിക്കുന്നവർക്ക് അനുകൂലമാം വിധത്തിൽ ഉത്തരവ് ഇറങ്ങിയേക്കില്ല. പണം വെച്ചുള്ള ചൂതുകളി പോലുള്ള പ്രലോഭനങ്ങളെ ചെറുക്കേണ്ടതുണ്ട്. ഏല്പിച്ച ദൗത്യങ്ങളിൽ പരാജയപ്പെടാനിടയുണ്ട്. മനസ്സമാധാനം കിട്ടാതെ വിഷമിക്കും. വാഹന യാത്രകളിൽ ഏറ്റവും കരുതൽ വേണ്ടതുണ്ട്. വിശ്വാസികൾക്ക് ഗ്രഹണദോഷ പരിഹാരങ്ങൾ  പിന്തുടരാവുന്നതാണ്.

മീനക്കൂറിന് (പൂരൂരുട്ടാതി 4-ാം പാദം, ഉത്രട്ടാതി, രേവതി)

പന്ത്രണ്ടാം രാശിയിൽ ഗ്രഹണം  സംഭവിക്കുന്നു. അപ്രതീക്ഷിത യാത്രകൾ വേണ്ടിവന്നേക്കും. പല കാരണങ്ങളാൽ വീടുവിട്ടുനിൽക്കേണ്ടതായി വരുന്നതാണ്. സഹായ വാഗ്ദാനങ്ങൾ ലംഘിക്കപ്പെടാം. അമിതവ്യയത്തിന് സാഹചര്യമൊരുങ്ങും. കച്ചവടം നടത്തുന്നവർ പുതിയതരം ഉപഭോക്തൃ സംസ്കാരവുമായി പൊരുത്തപ്പെടാനാവാതെ കുഴങ്ങിയേക്കും. ദൗത്യങ്ങൾ വിചാരിച്ചതിനെക്കാൾ വിഷമകരമാവും. പ്രമാണങ്ങളിൽ / വ്യവസ്ഥകളിൽ ഒപ്പിടുമ്പോൾ സേവന-വേതന നിയമങ്ങൾ അറിയാൻ മറക്കരുത്. കുടുംബത്തിൻ്റെ ആവശ്യങ്ങളോട് പരാങ്മുഖത്വം പുലർത്തിയേക്കും. സംഘടനകളിൽ ശത്രുക്കളേറുന്നതാണ്. പരീക്ഷകളിൽ കരുതിയത്ര മാർക്ക്നേടാൻ കഴിയാത്തത് വിഷമമുണ്ടാക്കും. നിക്ഷേപങ്ങൾ സംബന്ധിച്ച രേഖകൾ സൂക്ഷിക്കാൻ മറക്കരുത്. ആരോഗ്യപരിശോധനകൾ ഒഴിവാക്കുക നന്നല്ല. രോഗങ്ങൾ സ്വയം ചികിത്സിക്കരുത്.  വിലപ്പെട്ട വസ്തുക്കൾ യാത്രകളിൽ / അല്ലാതെ നഷ്ടപ്പെടാൻ സാധ്യതയുളളതിനാൽ കരുതൽ വേണം.

Read More: ശുക്രൻ കർക്കടകം, ചിങ്ങം രാശികളിലേക്ക്; അശ്വതി മുതൽ രേവതി വരെ