ചിങ്ങത്തിൽ അശ്വതിക്കാർക്ക് ഗുണദോഷസമ്മിശ്രം, ഭരണിക്കാർക്ക് സമ്പാദ്യം ഉയരും, കാർത്തികക്കാർക്ക് കടം തീർക്കാൻ വഴി തെളിയും

അശ്വതി

ആദിത്യൻ അഞ്ചിലും ചൊവ്വ ആറിലും ശനി പന്ത്രണ്ടിലും സഞ്ചരിക്കുകയാൽ ഗുണദോഷസമ്മിശ്രമായ കാലമാണ്. പുതിയ കാര്യങ്ങൾ പഠിക്കാൻ സമയം കണ്ടെത്തും. പ്രജ്ഞാശക്തി അവസരോചിതമായി പ്രവർത്തിക്കുന്നതാണ്. ചുമതലകൾ നിർവഹിക്കുന്നതിൽ മേലധികാരികളുടെ ഇടപെടലുകൾ ഉണ്ടായേക്കാം. പുതിയ ജോലി തേടുന്നവർക്ക് അകലങ്ങളിൽ അവസരം ലഭിക്കാനിടയുണ്ട്. 

സുഹൃത്തുക്കളുടെ ഗാർഹിക പ്രശ്നങ്ങൾക്ക് പരിഹാരം നിർദ്ദേശിക്കുന്നതാണ്. ബിസിനസ്സിൽ പാർട്ണർഷിപ്പിന് മുതിരുന്നത് ഇപ്പോൾ ഗുണം ചെയ്തേക്കില്ല. പ്രണയികളുടെ ബന്ധം കൂടുതൽ ഹൃദയപൂർവ്വകമാവും. അറ്റകുറ്റപ്പണി കഴിഞ്ഞ വീട്ടിൽ താമസമാരംഭിക്കാൻ സാധിച്ചേക്കും. രോഗഗ്രസ്തർക്ക് ആശ്വാസം ലഭിക്കുന്നതാണ്. ഏഴരശ്ശനി അലച്ചിലിന് ഇടവരുത്താം.

Also Read: ഓഗസ്റ്റ് മാസത്തെ സമ്പൂർണ നക്ഷത്രഫലം, അശ്വതി മുതൽ രേവതിവരെ

ഭരണി

പഞ്ചമഭാവത്തിൽ ആദിത്യൻ സ്വക്ഷേത്ര ബലവാനാവുകയാൽ ബുദ്ധിശക്തിയാൽ നേട്ടങ്ങളുണ്ടാവും. സമ്പാദ്യം ഉയരുന്നതായിരിക്കും. തൊഴിലിൽ അഭ്യുദയം ഉണ്ടാവുന്ന കാലമാണ്. പ്രൊജക്ടുകൾക്ക് സ്വീകാര്യത കിട്ടും. നിഗമനങ്ങളും നിരീക്ഷണങ്ങളും ശരിയെന്ന് തെളിയിക്കപ്പെടും. കണക്കുകൂട്ടലുകൾ ശരിയായ് വരാം. മക്കൾക്ക് നാനാതരത്തിൽ ശ്രേയസ്സുണ്ടാവുന്നതാണ്. 

ജന്മനാട്ടിലേക്ക് പോകാനും പിതൃമാതൃ ബന്ധുക്കളെ സന്ദർശിക്കാനും സാഹചര്യം ഉരുത്തിരിയും. ഭൂമി/ വസ്തു/ ഗൃഹം ഇവ സംബന്ധിച്ച ചില തീരുമാനങ്ങൾ കൈക്കൊള്ളാനിടയുണ്ട്. എതിർക്കുന്നവരെ തമസ്കരിക്കാനുള്ള മനശ്ശക്തി നേടുന്നതാണ്. പഠിപ്പിൽ ഉന്നമനം ഉണ്ടാവും. ചെറിയ ആരോഗ്യപ്രശ്നങ്ങൾ വലയ്ക്കാം. ഏഴരശ്ശനി തടസ്സങ്ങളുടെ രൂപം കൈക്കൊള്ളാം.

Also Read:സമ്പൂർണ വർഷഫലം; അശ്വതി മുതൽ രേവതി വരെ

കാർത്തിക

നിലവിലെ സാഹചര്യങ്ങൾ തുടരുന്നതാണ്. വലിയ മാറ്റം തൊഴിൽ രംഗത്ത് പ്രതീക്ഷിക്കേണ്ടതില്ല. എന്നാൽ പ്രൈവറ്റ് സ്ഥാപനത്തിൽ ഉത്സവ സീസൺ പ്രമാണിച്ച് താത്കാലിക ജോലി / ദിവസ വേതന ജോലി ലഭ്യമാവും. സംരംഭകർക്ക് ചില നേട്ടങ്ങൾ വന്നെത്തും. ബാങ്കിൽ നിന്നും വായ്പ ലഭിക്കുവാനിടയുണ്ട്. കടബാധ്യത പരിഹരിക്കാൻ വഴി തെളിയുന്നതാണ്. പുതുസൗഹൃദങ്ങൾ ഉദയം ചെയ്യും.  

Also Read: ശുക്രൻ കർക്കടകം, ചിങ്ങം രാശികളിലേക്ക്; അശ്വതി മുതൽ രേവതി വരെ

ബന്ധുഭവനം സന്ദർശിച്ച് രോഗികൾക്ക് ആശ്വാസം പകരും. ജന്മനാട്ടിൽ വരാൻ അമിത തുക നൽകി ടിക്കറ്റെടുക്കുവാൻ നിർബന്ധിതരാവും. മകൻ്റെ ശാഠ്യത്തിന് വഴങ്ങി ഇരുചക്ര വാഹനം വാങ്ങാൻ ഒരുങ്ങും. ചിരകാലാഭിലാഷിതമായ ഗൃഹനിർമ്മാണം സംബന്ധിച്ച ചർച്ചകൾ കുടുംബത്തിൽ സജീവമായേക്കും.

Read More: നിങ്ങളുടെ ജീവിതപങ്കാളി എങ്ങനെയുള്ള ആളാവും?