Weekly Horoscope June 08-June 14: സമ്പൂർണ വാരഫലം, അശ്വതി മുതൽ രേവതി വരെ

ആദിത്യൻ ഇടവം രാശിയിൽ സഞ്ചരിക്കുന്ന അവസാനവാരമാണ്. ഞായറാഴ്ച രാവിലെ മകയിരം ഞാറ്റുവേല ആരംഭിക്കും. ചന്ദ്രൻ വെളുത്ത പക്ഷത്തിലാണ്, വാരാദ്യം. ചൊവ്വ - ബുധൻ ദിവസങ്ങളിലായി ജ്യേഷ്ഠമാസ പൗർണമി വരുന്നു. വ്യാഴാഴ്ച കൃഷ്ണപക്ഷം തുടങ്ങുകയായി. ചൊവ്വ ചിങ്ങം രാശിയിൽ, മകം നക്ഷത്രത്തിലാണ്. ബുധൻ മിഥുനം രാശിയിൽ മകയിരം - തിരുവാതിര നക്ഷത്രങ്ങളിലായി സഞ്ചരിക്കുന്നു.

ബുധന് മൗഢ്യം അവസാനിച്ചു കഴിഞ്ഞു. ശനി മീനം രാശിയിൽ ഉത്രട്ടാതി നക്ഷത്രത്തിലാണ്. ശുക്രൻ മേടം രാശിയിൽ അശ്വതി നക്ഷത്രത്തിലാണ്, തുടക്കത്തിൽ. ശനിയാഴ്ച ഭരണിയിൽ പ്രവേശിക്കും. വ്യാഴം മിഥുനം രാശിയിൽ മകയിരം നക്ഷത്രത്തിലാണ്. വെള്ളിയാഴ്ച  തിരുവാതിര നക്ഷത്രത്തിൽ പ്രവേശിക്കുന്നതാണ്.

ജൂൺ 12 മുതൽ വ്യാഴം മൗഢ്യത്തിലാവുന്നു. കഷ്ടിച്ച് ഒരു മാസക്കാലം വ്യാഴത്തിന് മൗഢ്യം ഉണ്ടാവും. രാഹുവും കേതുവും യഥാക്രമം കുംഭം, ചിങ്ങം രാശികളിലാണ്. രാഹു പൂരൂരുട്ടാതി മൂന്നാം പാദത്തിലും കേതു ഉത്രം ഒന്നാം പാദത്തിലും സഞ്ചരിക്കുകയാണ്. ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ ആയില്യം വരെയുള്ള നാളുകളിൽ ജനിച്ചവരുടെ വാരഫലം ഇവിടെ വിശകലനം ചെയ്യുന്നു.

അശ്വതി

നക്ഷത്രാധിപനായ കേതുവും രാശിയുടെ അധിപനായ ചൊവ്വയും യോഗം ചെയ്യുന്നു. ആത്മവിശ്വാസം വർദ്ധിക്കാം. ഒറ്റയ്ക്കല്ല, പിൻബലമായി ഒരുപാടുപേരുണ്ടെന്ന തോന്നൽ ശക്തമാവും. എങ്കിലും ആലോചനകൾ കാടുകയറാനിടയുണ്ട്. ഭാവന ഉൺമയെ വിഴുങ്ങാം. കർത്തവ്യ നിർവഹണത്തിൽ ഒരുപടി മുന്നേ നിൽക്കുന്നതിനാവും. മറ്റുള്ളവരുടെ കഴിവുകൾ പ്രയോജനപ്പെടുത്താൻ സാധിച്ചേക്കാം. അനുരഞ്ജനശ്രമങ്ങൾ വിജയിക്കുന്നതാണ്. ചൊവ്വയും ബുധനും അഷ്ടമരാശിക്കൂറാകയാൽ സംയമം അനിവാര്യം. സാഹസകർമ്മങ്ങൾ ഒഴിവാക്കണം. മറ്റു ദിവസങ്ങളിൽ മനസ്സുഖം, ഭക്ഷണപ്രീതി, ന്യായമായ വിശ്രമം ഇവയുണ്ടാവുന്നതാണ്.

ഭരണി

അനാവശ്യമായ തിടുക്കം ഒഴിവാക്കണം. പഞ്ചമഭാവത്തിലെ കേതുകുജയോഗം ആശയക്കുഴപ്പങ്ങൾ സൃഷ്ടിച്ചേക്കാം. തെറ്റായ തീരുമാനങ്ങൾ എടുക്കാനുമിടയുണ്ട്. പ്രവൃത്തിയിൽ ആലസ്യം വരാം. ജന്മരാശിയിൽ ശുക്രൻ സഞ്ചരിക്കുകയാൽ ഭൗതികമായി തരക്കേടില്ലാത്ത കാലമാണ്. ഭോഗസുഖമുണ്ടാവും. നവീന ഗൃഹ / ഇലക്ട്രോണിക് ഉല്പന്നങ്ങൾ വാങ്ങുവാനായേക്കും. ഔദ്യോഗികമായ തിരക്കുകൾ പതിവിലും വർദ്ധിക്കാം. ചൊവ്വ, ബുധൻ ദിവസങ്ങളിൽ അഷ്ടമരാശിയാകയാൽ സാമ്പത്തിക ഇടപാടുകളിൽ വളരെ ശ്രദ്ധ വേണം. പുതുകാര്യങ്ങൾ തുടങ്ങരുത്. 

Also Read: ചൊവ്വ-കേതുയോഗം; ദോഷം ആർക്കൊക്കെ? അശ്വതി മുതൽ രേവതിവരെ

കാർത്തിക

കാര്യകാരണബോധത്തോടെ പ്രവർത്തിക്കുന്നതിൽ വിജയിക്കും. നിലപാടുകൾ ഒപ്പമുള്ളവരെ അസന്ദിഗ്ദ്ധമായി ബോധിപ്പിക്കും. സംഘാടന മികവ് അഭിനന്ദിക്കപ്പെടാം. വിയോജിക്കുന്നവരെ അവഗണിക്കാൻ മടിക്കില്ല. സ്വന്തം തൊഴിലിൽ വളർച്ചയുണ്ടാവുന്ന കാലമാണ്. വിപണിയുടെ സ്പന്ദനം തിരിച്ചറിഞ്ഞുകൊണ്ടുള്ള നീക്കങ്ങൾ നടത്തും. പ്രണയികൾക്ക് സന്തോഷിക്കാനാവും. കുടുംബ ജീവിതത്തിലും പാരസ്പര്യം ദൃഢമാകും. നിക്ഷേപങ്ങൾ കരുതലോടെ വേണം. ചൊവ്വ, ബുധൻ, ശനി ദിവസങ്ങൾക്ക് മേന്മ കുറയുന്നതാണ്.

രോഹിണി

കഴിവും പ്രതിഭാവിലാസവും തെളിയിക്കുന്നതിനുള്ള ധാരാളം അവസരങ്ങൾ മുന്നിലുണ്ടാവും. ചില വിജയങ്ങളെ ആർക്കും തടക്കാനാവില്ല. മേലധികാരികളുടെ അനുമോദനം ലഭിക്കും.  സ്വകാര്യസ്ഥാപനത്തിലെ ജോലിസമയം അല്പം അസൗകര്യം സൃഷ്ടിച്ചേക്കാം. ഉപരിപഠനം സംബന്ധിച്ച് വിദ്യാർത്ഥികൾക്ക് ആശങ്കകളുയരും. നാലാമെടത്തിലെ കേതുകുജയോഗം മനശ്ചാഞ്ചല്യത്തിന് കാരണമാവുന്നതാണ്. ധനവരവ് മോശമാവില്ല. എന്നാൽ ആഢംബരച്ചെലവുകൾ വർദ്ധിക്കുന്നതാണ്. അതുസംബന്ധിച്ച ചില സ്വൈരക്കേടുകൾ വീട്ടിൽ നിന്നുമുയരാം. വ്യാഴം, വെള്ളി ദിവസങ്ങളിൽ ജാഗ്രത കുറയരുത്.

മകയിരം

അനുകൂലതകൾക്ക് മുൻതൂക്കം ലഭിക്കുന്ന വാരമാണ്. അല്പമായ പരിശ്രമം പോലും ഫലവത്താകും. ന്യായമായ ആവശ്യങ്ങൾ നടന്നുകിട്ടുന്നതാണ്.  ഇടവക്കൂറിൽ ജനിച്ചവർക്ക് ചില അവ്യക്തതകൾ വരാം. തീരുമാനം വൈകിയേക്കും. ആഢംബരച്ചെലവുകൾ വർദ്ധിക്കുന്നതാണ്. മിഥുനക്കൂറുകാർക്ക് പ്രണയം സുരഭിലമാവും.  തൊഴിലിടത്തിൽ ആത്മവിശ്വാസത്തോടെ ജോലി ചെയ്യും. മേലധികാരികൾ ആധികാരിക അഭിപ്രായം തേടുന്നതായിരിക്കും. വിരോധികളെ തമസ്കരിക്കുന്നതാണ്. ഞായർ മുതൽ ബുധൻ വരെയുള്ള ദിവസങ്ങൾക്ക് മേന്മയേറുന്നതാണ്. 

തിരുവാതിര

സംതൃപ്തിയുണ്ടാവും, വീട്ടിലും കർമ്മമേഖലയിലും. ദൗത്യങ്ങൾ തടസ്സം കൂടാതെ നിർവഹിക്കുന്നതാണ്. സഹപ്രവർത്തകരുടെ പിന്തുണ കുറയില്ല. മുൻപ് പരിശ്രമിച്ച് പരാജയപ്പെട്ടവയിൽ ഇപ്പോൾ വിജയിക്കാം എന്ന സ്ഥിതി സംജാതമാകും. വിപൽധൈര്യം പ്രശംസിക്കപ്പെടും. അനുരാഗികൾക്ക് ഭാവി പ്രതീക്ഷ ദൃഢമാകുന്നതാണ്. സഹോദരരുടെ പിൻബലം ആശ്വാസം നൽകും. ദാമ്പത്യത്തിൽ സുഖമനുഭവിക്കും. വസ്തുവിൽപ്പനയിലെ വിഘ്നങ്ങൾ ഒഴിയാം. പാരിതോഷികം ലഭിക്കാം. പുതിയ ഫർണീച്ചറുകൾ വാങ്ങിയേക്കും. ഞായർ, തിങ്കൾ, ശനി ദിവസങ്ങൾക്ക് ഗുണം കുറയും.

പുണർതം

പ്രധാന കാര്യങ്ങൾ ഭംഗിയായി നിർവഹിക്കും. സ്വന്തം കഴിവിൽ അഭിമാനിക്കാറാവും. ബിസിനസ്സിൽ വിജയം കണ്ടുതുടങ്ങും. വലിയ പ്രോജക്ടുകൾ ആസൂത്രണം ചെയ്തതുപോലെ ആരംഭിക്കാൻ കഴിയും. സഹായ വാഗ്ദാനങ്ങൾ സമയത്തു തന്നെ കരഗതമാവും. മക്കളുടെ ശ്രേയസ്സിൽ പുറത്തു കാട്ടാതെ ആഹ്ളാദിക്കും. സാമ്പത്തിക നിക്ഷേപങ്ങളിൽ നിന്നും ആദായം കിട്ടിത്തുടങ്ങുന്നതാണ്. അനുരാഗികൾക്ക് നല്ല കാലമാണ്. ദൈവസമർപ്പണങ്ങൾ നിർവിഘ്നം പൂർത്തിയാക്കും. ചൊവ്വ മുതൽ വെള്ളി വരെയുള്ള ദിവസങ്ങളിൽ കൂടുതൽ സൗഖ്യം പ്രതീക്ഷിക്കാം.

പൂയം

ജന്മരാശിയിൽ നിന്നും ചൊവ്വ മാറിയത് ആശ്വാസമേകും. എന്നാലും വാക്സ്ഥാനത്ത് പാപഗ്രഹങ്ങൾ യോഗം ചെയ്യുകയാൽ വാക്കിൽ കരുതൽ വേണം. പ്രതീക്ഷിച്ച വാഗ്ദാനങ്ങൾ ലംഘിക്കപ്പെടാം. പുതിയ കാര്യങ്ങൾ പഠിച്ചറിയാൻ ശ്രമിക്കും. ഇടക്കിടെ ആലസ്യമുണ്ടാവും. സൽകാര്യങ്ങൾക്കായി ധനം ചെലവോയേക്കും. സർക്കാർ ഓഫീസുകളിലെ ദൗത്യം വിജയിക്കുന്നതാണ്. ബന്ധുക്കളുടെ തർക്കത്തിൽ ഇടപെടുന്നത് കരുതലോടെയാവണം. ആരോഗ്യപ്രശ്നങ്ങൾക്ക് വൈദ്യസഹായം വേണ്ടി വരുന്നതാണ്. ഞായർ മുതൽ ചൊവ്വ വരെയുള്ള ദിവസങ്ങൾക്ക് ഗുണം കുറയുന്നതാണ്. 

ആയില്യം

ബുധനും വ്യാഴവും പന്ത്രണ്ടിൽ സഞ്ചരിക്കുകയാൽ കുടുംബ/ദൈവിക കാര്യങ്ങൾക്കായി യാത്രയുണ്ടാവും. തത്സംബന്ധമായ ചെലവുകളും ഭവിക്കുന്നതാണ്. ഉന്നത വിദ്യാഭ്യാസം സംബന്ധിച്ച  അറിയിപ്പുകൾ കിട്ടാം. ഉത്തരവാദിത്വങ്ങൾ ഏറ്റെടുക്കേണ്ടി വരുന്നതാണ്. കച്ചവടത്തിൽ ലാഭം സാമാന്യമായിട്ടാവും. കടം കൊടുത്ത തുക മടക്കിക്കിട്ടാൻ പ്രയത്നം വേണ്ടി വരും. ജന്മനക്ഷത്രത്തിൽ നിന്നും ചൊവ്വ മാറിയതിനാൽ ദേഹക്ലേശത്തിനും മനഃസംഘർഷത്തിനും അയവുണ്ടാവും.  എന്നാൽ വാക്സ്ഥാനത്തിൽ ചൊവ്വ -കേതു സഞ്ചരിക്കുകയാൽ തർക്കങ്ങളിൽ ഏർപ്പെടാം.

മകം

ഭാവി സംബന്ധിച്ച പ്രധാനപ്പെട്ട തീരുമാനങ്ങൾ കൈക്കൊള്ളുവാൻ സാധ്യതയുണ്ട്. ഈ വാരം ഔദ്യോഗികമോ/വ്യക്തിപരമോ ആയ യാത്രകൾ വേണ്ടിവരുന്നതാണ്.  സുഹൃൽസംഗമത്തിൽ സംബന്ധിക്കും. ബിസിനസ്സിൽ കൂടുതൽ ധനം മുതലിറക്കുന്നത് നന്നായി ആലോചിച്ചാവണം. സാമ്പത്തികമായ അമളികൾ വരാനിടയുണ്ട്. പണയവസ്തുക്കളുടെ വായ്പാ തിരിച്ചടവ് വൈകുന്നതാണ്. ജന്മരാശിയിലെ ചൊവ്വയും കേതുവും അനാവശ്യ ക്ഷോഭങ്ങൾ സൃഷ്ടിക്കാം. വാരത്തിൻ്റെ ആദ്യ - അവസാന ദിവസങ്ങൾക്കാവും മേന്മ കൂടുതൽ.

പൂരം

സ്വസ്ഥതയും അസ്വസ്ഥതയും ആവർത്തിച്ചു കൊണ്ടിരിക്കും. ബന്ധുസമാഗമം സന്തോഷമേകും. ധനവരവ് തൃപ്തികരമാവും. എന്നാൽ ചെലവും കൂടുന്നതാണ്. മേലധികാരികളുടെ പ്രീതി നേടും. സഹപ്രവർത്തകരുടെ പിന്തുണ കുറയുന്നതായി അനുഭവപ്പെടുന്നതാണ്. ഗൃഹത്തിന് ചെറിയ തോതിൽ അറ്റകുറ്റപ്പണി വേണ്ടിവന്നേക്കും. വാഹനം ഉപയോഗിക്കുന്നതിൽ കരുതലുണ്ടാവണം. മകം നാളിൽ സഞ്ചരിക്കുന്ന ചൊവ്വയും ഉത്രം നാളിൽ സഞ്ചരിക്കുന്ന കേതുവും അക്ഷരാർത്ഥത്തിൽ തന്നെ ചെകുത്താനും കടലിനും ഇടയിൽ എന്ന സ്ഥിതിയിൽ കൊണ്ടു ചാടിക്കാം. 

ഉത്രം

കേതു ജന്മനക്ഷത്രത്തിൽ സഞ്ചരിക്കുകയാണ് എന്നത്  ഓർമ്മയിലുണ്ടാവണം. ദുസ്സാഹസങ്ങൾക്ക് മുതിരരുത്. അമിതമായ ആത്മവിശ്വാസം നന്നല്ല. ഇഷ്ടവസ്തുക്കൾ വാങ്ങാൻ ചെലവുണ്ടാവും. വേണ്ടപ്പെട്ടവരെ കാണാനും അവരുമായി ആഹ്ളാദം പങ്കിടാനും സന്ദർഭം വന്നെത്തും. വിദേശത്തു നിന്നും മകൻ്റെ/മകളുടെ ധനം വന്നുചേരുന്നതാണ്. വിദ്യാർത്ഥികൾക്ക് പുതിയ കോഴ്സുകൾകളിലേക്ക് പ്രവേശനത്തിനുള്ള അറിയിപ്പ് ലഭിക്കാം. ജോലിസ്ഥലത്ത് പൂർണ തൃപ്തിയുണ്ടാവും എന്നുപറയാനാവില്ല.

Also Read: ശുക്രൻ മേടം രാശിയിലേക്ക്; അശ്വതി മുതൽ രേവതി വരെ

അത്തം

കാര്യനിർവഹണത്തിൽ ശുഷ്കാന്തിയുണ്ടാവും. ആസൂത്രണ മികവിന് മേലധികാരികളുടെ അംഗീകാരം ലഭിക്കും. ഒപ്പമുള്ളവരുടെ സഹകരണക്കുറവിൽ വിഷമിക്കാം. വായ്പാ തിരിച്ചടവുകൾ മുടങ്ങില്ല. ധനകാര്യത്തിൽ ശ്രദ്ധയുണ്ടാവണം. പന്ത്രണ്ടിൽ ചൊവ്വയും കേതുവും സഞ്ചരിക്കുകയാൽ പാഴ്ച്ചെലവുകൾ വന്നേക്കാം. ഉപാസന, ദൈവസമർപ്പണം ഇവയ്ക്ക് നേരം കണ്ടെത്തുന്നതാണ്. പുതിയ കാര്യങ്ങൾ പഠിച്ചറിയാൻ ഉത്സാഹിക്കും. കുടുംബകാര്യങ്ങളിൽ ജീവിത പങ്കാളിയുടെ നിർദ്ദേശങ്ങൾ അപ്രായോഗികമായി അനുഭവപ്പെടാം. വാരാദ്യത്തെക്കാൾ ചൊവ്വ, ബുധൻ, വ്യാഴം ദിവസങ്ങൾ ഗുണകരമാവും.

ചിത്തിര

തുലാക്കൂറുകാർക്ക് ഗുണാനുഭവങ്ങൾ കൂടാം. സംഘടനകളിൽ നേതൃപദവി ലഭിക്കും. മത്സരങ്ങളിൽ വിജയിക്കുന്നതാണ്. പ്രതീക്ഷിച്ച സാമ്പത്തിക സഹായം സിദ്ധിക്കും. സുഖഭക്ഷണ യോഗം, ന്യായമായ വിശ്രമം ഇവ ലഭിക്കും. കുടുംബാംഗങ്ങളുടെ ആവശ്യങ്ങൾ നിറവേറ്റും. ഭൂമി വിൽക്കുന്നതിൻ്റെ അഡ്വാൻസ് തുക കിട്ടാം. സാമൂഹിക മാധ്യമങ്ങളിൽ പിൻതുടരുന്നവരുടെ എണ്ണം കൂടും. കന്നിക്കൂറുകാർ വരവും ചെലവും പൊരുത്തപ്പെടുത്താൻ കഴിയാതെ വിഷമിക്കും. സാംക്രമിക രോഗങ്ങൾ വലയ്ക്കാനിടയുണ്ട്. ഉദ്ദേശരഹിതമായ യാത്രകളിൽ ഏർപ്പെടാം. 

ചോതി

ന്യായമായ ആവശ്യങ്ങൾ നിഷ്പ്രയാസം സാധിക്കും. മുൻപ് പിണക്കത്തിൽ കഴിഞ്ഞവർ ഇണക്കത്തിലാവും. ലോണിനുള്ള അപേക്ഷ പരിഗണിക്കപ്പെടാം. രോഗക്ലേശിതർക്ക് ആശ്വസിക്കാനാവും. ഇഷ്ടവസ്തുക്കൾ പാരിതോഷികമായി ലഭിക്കാം. ബന്ധുകലഹങ്ങൾക്ക് ന്യായമായ പരിഹാരം നിർദ്ദേശിക്കുന്നതാണ്. ഉപരിപഠനത്തിനുള്ള അറിയിപ്പ് ലഭിക്കാം. വിദേശത്തുള്ളവരുടെ തൊഴിൽ പ്രശ്നങ്ങൾക്ക് ഉചിതമായ പോംവഴി കിട്ടിയേക്കാം. പ്രണയികൾക്ക് അത്ര നല്ല വാരമല്ല. അകാരണമായ പിണക്കം ഉണ്ടാവാം.

വിശാഖം

ആദിത്യൻ്റെ അനിഷ്ടസ്ഥിതി ആലസ്യത്തിനിടയാക്കും. പൂർത്തിയാക്കാം എന്നേറ്റ കാര്യങ്ങൾ പകുതിയിൽ ഉപേക്ഷിക്കേണ്ടി വരാം. രാഷ്ട്രീയക്കാർക്ക് എതിരാളികളെ ഭയക്കേണ്ട സ്ഥിതിയുണ്ടാവും. പ്രൈവറ്റ് സ്ഥാപനങ്ങളിൽ ജോലി ചെയ്യുന്നവർക്ക് ഉചിതമല്ലാത്ത ഷിഫ്റ്റ് കിട്ടിയേക്കും. പണമെടപാടുകളിൽ ജാഗ്രത വേണം. ഭൂമിയിൽ നിന്നുള്ള ആദായം അത്യാവശ്യ കാര്യങ്ങൾക്ക് ഉതകാം. വൃശ്ചികക്കൂറുകാർക്ക് ജീവകാരുണ്യ കർമ്മങ്ങൾക്ക് നേരം കണ്ടെത്താൻ കഴിഞ്ഞേക്കും. നാലാംഭാവത്തിലെ രാഹു മനക്ലേശത്തിന് കാരണമാകും. മകൻ്റെ പ്രവർത്തനങ്ങൾ നിരീക്ഷിക്കണം.

അനിഴം

ഞായറും തിങ്കളും ലഘുയാത്രകൾ ഉണ്ടാവുന്നതാണ്. ചെലവിന് പല വഴികൾ വന്നേക്കും. ചുമതലകൾ മറ്റുള്ളവരെ ഏൽപ്പിക്കാൻ തയ്യാറാകും. ആരോഗ്യശ്രദ്ധ വേണ്ടതുണ്ട്. ചൊവ്വ  ബുധൻ ദിവസങ്ങളിൽ കൃതാർത്ഥത അനുഭവപ്പെടും. ചുമതലകൾ ഭംഗിയായി നിറവേറ്റുവാൻ കഴിയുന്നതാണ്. ധനവിനിയോഗത്തിൽ  ഇഷ്ടജനങ്ങളെ പരിഗണിക്കുന്നതിനാൽ ആരോപണത്തിന് വിധേയരാകുന്നതാണ്. വ്യാഴം, വെള്ളി, ശനി ദിവസങ്ങളിൽ അപകർഷത തോന്നും. ചിലരോട് കയർത്തു സംസാരിക്കുന്നതാണ്.

തൃക്കേട്ട

മികച്ച അവസരങ്ങൾക്കായി കാത്തിരിക്കും.  വിദ്യാർത്ഥികൾ ഇടക്കാല കോഴ്സുകൾ പഠിക്കാൻ ചേരുന്നതാണ്. ബിസിനസ്സ് കാര്യങ്ങൾക്കായി പകരക്കാരെ നിയോഗിക്കും. സംഘടനാ പ്രവർത്തനം പരിമിതപ്പെടുത്താൻ വീട്ടിൽ നിന്നും സമ്മർദ്ദം ഉണ്ടാവുന്നതാണ്. അയൽ തർക്കങ്ങൾ പരിഹരിക്കും. താലൂക്ക് -വില്ലേജ് ഓഫീസുകളിൽ നിന്നും സർട്ടിഫിക്കറ്റ് ലഭിക്കാൻ ശ്രമം തുടരും. സാമ്പത്തിക അമളികൾ പറ്റാതിരിക്കാൻ കരുതൽ വേണ്ടതുണ്ട്. ജീവകാരുണ്യത്തിൽ താത്പര്യമേറുന്നതാണ്. വ്യാഴം, വെള്ളി ദിവസങ്ങളിൽ വാഗ്ദാനം പാലിക്കാനാകാതെ വിഷമിക്കും. ആരോഗ്യശ്രദ്ധ വേണം.

മൂലം

ചൊവ്വ അഷ്ടമ ഭാവത്തിൽ നിന്നും മാറിയത് ഒട്ടൊക്കെ ആശ്വാസമാണ്. എന്നാൽ ഭാഗ്യഭാവത്തിലെ ചൊവ്വ -കേതു യോഗം ഭാഗ്യഭ്രംശത്തിന് കാരണമാകാം. പ്രതീക്ഷിച്ച നേട്ടം കരഗതമാവാൻ വിളംബമുണ്ടാവും. ആത്മിക കാര്യങ്ങൾ മുടങ്ങിയേക്കും. വാരാദ്യത്തിന് ഗുണമേറുന്നതാണ്. ധനാഗമം, ബന്ധു സന്ദർശനം, വിരുന്നുകൾ എന്നിവയ്ക്ക് സാധ്യത കാണുന്നു. ചൊവ്വ, ബുധൻ ദിവസങ്ങളിൽ അലച്ചിലുണ്ടാവും. സമയനിഷ്ഠ പാളുന്നതാണ്. മറ്റുള്ള ദിവസങ്ങളിൽ ഗുണദോഷസമ്മിശ്ര ഫലങ്ങൾ വന്നെത്തും. കായികാധ്വാനം വേണ്ടി വരും.

പൂരാടം

കർമ്മമേഖലയിൽ ഊർജ്ജസ്വലതയുണ്ടാവുന്നതായിരിക്കും. നിർദ്ദേശങ്ങൾക്ക് സഹപ്രവർത്തകരിൽ നിന്നും സ്വീകാര്യത കിട്ടുന്നതാണ്. ക്രിയാത്മകത, ചിന്തയിലും പ്രവൃത്തിയിലും തെളിയും. ഏല്പിക്കപ്പെട്ട ദൗത്യങ്ങൾ സമയബന്ധിതമായി നിർവഹിക്കുന്നതാണ്. ഏജൻസി/ കമ്മീഷൻ ലഭിക്കുന്ന ജോലി എന്നിവയിൽ നിന്നും ആദായമുയരും. മകൻ്റെ/മകളുടെ ജോലിക്കാര്യത്തിൽ ശുഭവാർത്ത കേൾക്കാനാവും. വൃദ്ധജനങ്ങളെ സന്ദർശിച്ച് അവർക്ക് സമാശ്വാസം പകരും. ചൊവ്വ, ബുധൻ, ശനി ദിവസങ്ങളിൽ ദേഹക്ലേശമുണ്ടാവാം. ചെലവധികരിക്കുന്നതാണ്.

Also Read: ഇടവ മാസത്തെ നക്ഷത്രഫലം, അശ്വതി മുതൽ രേവതിവരെ

ഉത്രാടം

ധനുക്കൂറുകാർക്ക് സമ്മിശ്ര ഫലം ഉണ്ടാവുന്ന വാരമാണ്. തൊഴിലിടത്തിൽ അവഗണിക്കപ്പെടും.  കായികാധ്വാനം ക്ലേശിപ്പിക്കുന്നതാണ്. അനാവശ്യമായ പിടിവാശി കാട്ടും. കലാകാരന്മാർക്ക്  തിളങ്ങാനാവും. ഭാവനാത്മകത കൂടും. സഹായ വാഗ്ദാനം കൈവശമെത്തില്ല. മകരക്കൂറുകാർക്ക് ഗുണാനുഭവങ്ങൾ കൂടുന്നതായിരിക്കും. കർമ്മമണ്ഡലത്തിൽ സമാധാനം പുലരും. കുടുംബ ജീവിതത്തിൽ അനുരഞ്ജന ശ്രമങ്ങൾ ഫലവത്തായേക്കും. അഷ്ടമഭാവത്തിലെ പാപഗ്രഹങ്ങളാൽ ദേഹക്ലേശം അനുഭവപ്പെടുന്നതാണ്.  വൃദ്ധജനങ്ങളുടെ കാര്യത്തിൽ കരുതലുണ്ടാവണം.

തിരുവോണം

കർമ്മരംഗത്ത് അംഗീകരിക്കപ്പെടും. കാര്യസാദ്ധ്യത്തിന് കാലവിളംബം വരില്ല. മുൻകൂട്ടി ആസൂത്രണം ചെയ്തിട്ടുള്ള  പലതും അനായാസം ആവിഷ്കരിക്കും. ബിസിനസ്സുകാരുടെ വിപണന തന്ത്രങ്ങൾ ഫലം കാണുന്നതാണ്. കിട്ടാക്കടങ്ങൾ ഭാഗികമായി ലഭിക്കാം. ഗൃഹാന്തർഭാഗത്ത് മിനുക്കുപണികൾ നടത്തുന്നതാണ്. തിങ്കൾ മുതൽ ബുധൻ വരെയുള്ള ദിവസങ്ങൾക്ക് മെച്ചമേറും. സുഹൃൽ/ബന്ധുസമാഗമം സന്തോഷമേകും. വ്യാഴം, വെള്ളി അലച്ചിലുണ്ടാവും. ചൊവ്വയും കേതുവും അഷ്ടമത്തിലാണെന്നതിനാൽ എല്ലാക്കാര്യത്തിലും ജാഗ്രത വേണ്ടതുണ്ട്.

അവിട്ടം

മകരക്കൂറുകാർക്ക് കൂടുതൽ പ്രയത്നിക്കേണ്ടിവരും, ലക്ഷ്യപ്രാപ്തിക്ക്. അപേക്ഷകളും നിവേദനങ്ങളും ബധിരകർണ്ണങ്ങളിൽ പതിച്ചേക്കും. ഉന്മേഷക്കുറവ് അനുഭവപ്പെടും. അകാരണമായ ദേഷ്യത്തിനിടയുണ്ട്. ദാമ്പത്യസൗഖ്യമുണ്ടാവുന്നതാണ്. കുംഭക്കൂറുകാർക്ക് പ്രണയ നിരാസം ഭവിക്കും. കുടുംബ ജീവിതത്തിൽ അനൈക്യം പ്രകടമാവും. മേലധികാരികൾ തൃപ്തിപ്പെടുംവിധം പ്രവർത്തിക്കും. പൊതുവേ ധനസ്ഥിതി ഉയരുന്നതായിരിക്കും. പണയ വസ്തുക്കളുടെ തിരിച്ചടവ് സാധ്യമാകും. വിദ്യാർത്ഥികളുടെ ഉപരിപഠന കാര്യത്തിൽ കൂടുതൽ വ്യക്തത വരുന്നതായിരിക്കും.

ചതയം

ജീവിത യാഥാർത്ഥ്യങ്ങളോട് എളുപ്പം പൊരുത്തപ്പെടില്ല. മനസ്സ് സങ്കല്പലോകത്തിലായിരിക്കും. ഉദ്യോഗസ്ഥർക്ക് ജോലിഭാരം കൂടുന്നതാണ്. എന്നാൽ സംതൃപ്തിയുണ്ടാവില്ല. പ്രണയികൾക്കിടയിൽ തർക്കം ഏർപ്പെടാം. ബിസിനസ്സുകാർക്ക് ധനലാഭമുണ്ടാവും. വായ്പകളുടെ തിരിച്ചടവ് മുടങ്ങാതിരിക്കാൻ ക്ലേശിച്ചേക്കും. മകൻ്റെ മേൽപഠിപ്പ് സംബന്ധിച്ചുള്ള അറിയിപ്പ് ലഭിക്കാം. ഗവേഷകർക്ക് പ്രബന്ധരചനയിൽ പുരോഗതി ദൃശ്യമാകുന്നതാണ്. ദേഹക്ലേശമുണ്ടാവും. വിരുന്നുകളിൽ പങ്കെടുക്കുന്നതാണ്.

പൂരൂരുട്ടാതി

പലതും ആലോചിച്ചു കൂട്ടും.  അനാവശ്യമായ ആധി ഒഴിവാക്കണം. ആത്മവിശ്വാസം കുറയുവാനിടയുണ്ട്. ക്രിയാകുശലത വേണ്ടത്രയുണ്ടാവില്ല. കൂടുതൽ പ്രവർത്തിക്കും. അതിനനുസരിച്ച് ഫലം ഉണ്ടായെന്നു വരില്ല. വാഹനത്തിൻ്റെ കേടുപാടുകൾ തീർത്ത് നിരത്തിലിറക്കും. സ്വയം വിമർശനത്തിൽ ആനന്ദിക്കും. കുംഭക്കൂറുകാർക്ക് ദാമ്പത്യത്തിൽ സ്വൈരം കുറയുന്നതാണ്. മീനക്കൂറുകാർക്ക് ശത്രുക്കളെ പരാജയപ്പെടുത്താനാവും. ധനപരമായി തരക്കേടില്ലാത്ത കാലമാണ്. ജീവകാരുണ്യത്തിന് നേരം കണ്ടെത്തും. ആരാധനാലയങ്ങൾ സന്ദർശിക്കും.

ഉത്രട്ടാതി

ജീവിതം കൂടുതൽ ചലനാത്മകമാക്കാൻ ആഗ്രഹിക്കും. എന്നാൽ ഉദ്ദേശിച്ച ഗതിവേഗം ഒരു കാര്യത്തിലും കൈവരിക്കാനാവില്ല. ചൊവ്വയും കേതുവും ആറാം ഭാവത്തിൽ സഞ്ചരിക്കുകയാൽ ജോലിയിൽ അഭിവൃദ്ധിയുണ്ടാവും. ബിസിനസ് മോശമല്ലാത്ത നിലയിൽ തുടരുന്നതാണ്. എന്നാൽ കൂടുതൽ ധനം നിക്ഷേപിക്കരുത്. രോഗക്ലേശാദികൾക്ക് അല്പം ശമനം വരാം. കൈവായ്പകൾ മടക്കാനായേക്കും. വിദ്യാഭ്യാസ കാര്യത്തിൽ കൃത്യമായ തീരുമാനം കൈക്കൊള്ളും. ബന്ധുക്കളിൽ നിന്നും പ്രതീക്ഷിച്ച പിന്തുണ ലഭിക്കുന്നതാണ്.  ഭൂമി വിൽപ്പനയിലെ തടസ്സം നീങ്ങുന്നതായിരിക്കും.

രേവതി

നക്ഷത്രനാഥനായ ബുധന് വ്യാഴയോഗം വന്നതും സ്വക്ഷേത്രസ്ഥിതിയുണ്ടായതും ജീവിതത്തിൽ സ്വൈരം അനുഭവിക്കുകയാണ് എന്നതിൻ്റെ തെളിവാണ്. രാഹുവും ശനിയും വിപരീതഭാവങ്ങളിലാണെങ്കിൽ കൂടിയും കാര്യതടസ്സം ഉണ്ടാവില്ല. നിക്ഷേപങ്ങളിൽ നിന്നും കൂടുതൽ ആദായം പ്രതീക്ഷിക്കാം. സുഹൃത്തുക്കളുടെ ഉപദേശം ഗുണത്തിനായിട്ടാവും. ഉദ്യോഗസ്ഥർക്ക് താത്കാലികമായ തസ്തിക മാറ്റം സാധ്യമായേക്കും. കർമ്മരംഗത്ത് ഉത്സാഹമുണ്ടാവും. കലാകാരന്മാർക്ക് ശുക്രൻ്റെ അനുകൂലത മൂലം ശോഭിക്കാൻ കഴിഞ്ഞേക്കും.

Read More: ജൂൺ മാസത്തെ നക്ഷത്രഫലം, അശ്വതി മുതൽ രേവതിവരെ