ഉച്ചഭക്ഷണത്തിന് മുമ്പ് സാലഡ് കഴിച്ചാൽ എന്ത് സംഭവിക്കും? 5 അത്ഭുതകരമായ ഗുണങ്ങൾ

ജനപ്രിയ ഭക്ഷണ തിരഞ്ഞെടുപ്പുകളിൽ ഒന്നായി സാലഡുകൾ മാറിയിരിക്കുന്നു. അവ മിനിറ്റുകൾക്കുള്ളിൽ വീട്ടിൽ തന്നെ തയ്യാറാക്കാം എന്നതാണ് മറ്റൊരു കാര്യം. പലരും ഭക്ഷണത്തോടൊപ്പമോ വിശക്കുമ്പോൾ ലഘുഭക്ഷണമായോ സാലഡുകൾ കഴിക്കുന്നു. പോഷകങ്ങളാൽ സമ്പുഷ്ടമായ സാലഡ് ആരോഗ്യകരമായൊരു ഭക്ഷണമാണ്. 

ആരോഗ്യ വിദഗ്ധർ ഉച്ചഭക്ഷണത്തിന് മുമ്പ് സാലഡ് കഴിക്കാൻ നിർദേശിക്കുന്നത് എന്തുകൊണ്ടാണെന്ന് എപ്പോഴെങ്കിലും ചിന്തിച്ചിട്ടുണ്ടോ?. ഭക്ഷണത്തിനു മുൻപായി ആദ്യം പച്ചക്കറികൾ കഴിക്കുന്നത് നല്ലൊരു ശീലം മാത്രമല്ല, ദഹനം മെച്ചപ്പെടുത്താനും, വിശപ്പ് നിയന്ത്രിക്കാനും, ദിവസം മുഴുവൻ ഊർജം നിലനിർത്താനും സഹായിക്കും. ഉച്ചഭക്ഷണത്തിന് മുമ്പ് സാലഡ് കഴിക്കുന്നതിന്റെ അഞ്ച് അത്ഭുതകരമായ ആരോഗ്യ ഗുണങ്ങൾ അറിയാം.

Also read: മരുന്നുകൾ വേണ്ട, 14 ദിവസം കൊണ്ട് ബ്ലഡ് ഷുഗർ നിയന്ത്രിക്കാം; ഇവ ശീലമാക്കൂ

1. വളരെ കുറച്ച് ഭക്ഷണം കഴിക്കുന്നു 

സാലഡ് ഉപയോഗിച്ച് ഭക്ഷണം ആരംഭിക്കുന്നത് സ്വാഭാവികമായും വിശപ്പ് നിയന്ത്രിക്കും. പച്ചക്കറികളിലെ ഉയർന്ന നാരുകളുടെ അളവ് വയർ നിറയ്ക്കുന്നു, അതിനാൽ കുറച്ച് മാത്രമേ കഴിക്കൂ. ഭക്ഷണത്തിന് മുമ്പ് നാരുകൾ അടങ്ങിയ ഭക്ഷണങ്ങൾ കഴിക്കുന്നത് മൊത്തത്തിലുള്ള കാലറി ഉപഭോഗം കുറയ്ക്കുകയും ശരീരഭാരം നിയന്ത്രിക്കാൻ സഹായിക്കുകയും ചെയ്യുമെന്ന് ഗവേഷണങ്ങൾ കാണിക്കുന്നു.

2. രക്തത്തിലെ പഞ്ചസാരയുടെ നിയന്ത്രണം മെച്ചപ്പെടുത്തുന്നു

കാർബോഹൈഡ്രേറ്റ് അടങ്ങിയ ഉച്ചഭക്ഷണത്തിന് മുമ്പ് നാരുകൾ അടങ്ങിയ സാലഡുകൾ കഴിക്കുന്നത് അന്നജത്തിന്റെയും പഞ്ചസാരയുടെയും ദഹനത്തെ മന്ദഗതിയിലാക്കുന്നു. ഇത് രക്തത്തിലെ പഞ്ചസാരയുടെ പെട്ടെന്നുള്ള കുതിച്ചുചാട്ടം തടയാൻ സഹായിക്കും, ഉച്ചകഴിഞ്ഞ് ക്ഷീണം തോന്നുന്നതിനുപകരം നിങ്ങൾക്ക് ഊർജവും ശ്രദ്ധയും ലഭിക്കുന്നു.

Also Read:35 കഴിഞ്ഞ സ്ത്രീകൾക്കും വയർ കുറച്ച് ആകൃതിയിലാക്കാം; ഈ 2 കാര്യങ്ങൾ ചെയ്യൂ

3. പോഷകങ്ങളുടെ ആഗിരണം വർധിപ്പിക്കുന്നു 

പച്ചക്കറികൾ ആദ്യം കഴിക്കുന്നതിലൂടെ ശരീരം അവശ്യ വിറ്റാമിനുകളും ധാതുക്കളും ആഗിരണം ചെയ്യുന്നുവെന്ന് ഉറപ്പാക്കുന്നു. സ്പിനച്, കാലെ തുടങ്ങിയ ഇലക്കറികളിൽ വിറ്റാമിൻ കെ, വിറ്റാമിൻ സി, ആന്റിഓക്‌സിഡന്റുകൾ എന്നിവ അടങ്ങിയിട്ടുണ്ട്. ഇത് ഹൃദയാരോഗ്യം, പ്രതിരോധശേഷി, തിളക്കമുള്ള ചർമ്മം എന്നിവയ്ക്ക് സഹായിക്കുന്നു. 

4. മെച്ചപ്പെട്ട ദഹനം 

അസംസ്കൃത പച്ചക്കറികളിൽ നിന്ന് ഭക്ഷണം ആരംഭിക്കുന്നത് ദഹനത്തെ സഹായിക്കുന്ന എൻസൈമുകളും നാരുകളും നൽകുന്നു. ഇതിലൂടെ ദഹനം എളുപ്പമാക്കുകയും വയറു വീർക്കുന്നത് തടയുകയും അസ്വസ്ഥത കുറയ്ക്കുകയും ചെയ്യുന്നു. നാരുകൾ അടങ്ങിയ ഭക്ഷണങ്ങൾ പതിവായി കഴിക്കുന്നത് കുടലിന്റെ ആരോഗ്യത്തെയും സുഗമമായ മലവിസർജനത്തെയും പ്രേത്സാഹിപ്പിക്കുന്നു. 

Also Read:പഞ്ചസാര ഞാൻ തൊടാറില്ല, സാലഡുകൾ ഇഷ്ടമല്ല: ആലിയ ഭട്ടിന്റെ ഡയറ്റ്

5. ജലാംശം, ഡീറ്റോക്സ് ഗുണങ്ങൾ 

വെള്ളരിക്ക, ലെറ്റൂസ്, സെലറി തുടങ്ങിയ പല സാലഡ് ചേരുവകളിലും ഉയർന്ന അളവിൽ ജലാംശം അടങ്ങിയിട്ടുണ്ട്. ആദ്യം ഇവ കഴിക്കുന്നത് ശരീരത്തെ ജലാംശം നിലനിർത്താനും വിഷവസ്തുക്കളെ സ്വാഭാവികമായി പുറന്തള്ളാനും സഹായിക്കുന്നു. ദിവസം മുഴുവൻ നിങ്ങളെ ഉന്മേഷത്തോടെ നിലനിർത്തുന്നു. ഭക്ഷണത്തിൽ നിന്നുള്ള ജലാംശം വൃക്കകളുടെയും കരളിന്റെയും പ്രവർത്തനത്തെ പിന്തുണയ്ക്കുന്നു. ജലാംശം കൂടുതലുള്ള ഈ പച്ചക്കറികൾ പതിവായി കഴിക്കുന്നത് ആരോഗ്യകരമായ ചർമ്മം നിലനിർത്താനും നിർജലീകരണം മൂലമുണ്ടാകുന്ന ക്ഷീണം തടയാനും സഹായിക്കും.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: നെയ്യ് കഴിക്കുന്നത് നിർത്തിയാൽ ശരീരത്തിന് എന്ത് സംഭവിക്കും?