രണ്ടാഴ്ചത്തേക്ക് ഉച്ചയ്ക്ക് ശേഷം പഞ്ചസാര ഒഴിവാക്കൂ, ഇതെല്ലാം സംഭവിക്കും?

ഉച്ചയ്ക്ക് 12 മണിക്ക് ശേഷം എല്ലാ രൂപത്തിലുമുള്ള പഞ്ചസാര ഒഴിവാക്കുമ്പോൾ ശരീരം എങ്ങനെ പ്രതികരിക്കുമെന്ന് എപ്പോഴെങ്കിലും ചിന്തിച്ചിട്ടുണ്ടോ?. അങ്ങനെ ചെയ്താൽ ശാരീരികവും ഉപാപചയപരവുമായ നിരവധി മാറ്റങ്ങൾ ഉണ്ടാകുമെന്ന കാര്യം ഉറപ്പാണ്. വിദഗ്ധരുടെ അഭിപ്രായത്തിൽ, രക്തത്തിലെ ഗ്ലൂക്കോസിന്റെ ഏറ്റക്കുറച്ചിലുകൾ സ്ഥിരത കൈവരിക്കുന്നു. കാരണം, ഉച്ചയ്ക്കുശേഷമുള്ള പഞ്ചസാര ഉപഭോഗം പലപ്പോഴും ഭക്ഷണത്തിനു ശേഷമുള്ള ബ്ലഡ് ഷുഗർ വർധനവിന് കാരണമാകുന്നു. പഞ്ചസാര ഒഴിവാക്കുന്നതിലൂടെ വൈകുന്നേരങ്ങളിൽ ഊർജക്കുറവ് അനുഭവപ്പെടുന്നത് കുറയുന്നതായും, മെച്ചപ്പെട്ട ഉറക്കം ലഭിക്കുന്നതായും പലരും പറയുന്നു.

"വൈകുന്നേരം പഞ്ചസാര കഴിക്കുന്നത് രക്തത്തിലെ പഞ്ചസാരയുടെ അളവിൽ പെട്ടെന്നുള്ള വർധനവിനും കുറവിനും കാരണമാകുന്നു. ഇത് നിങ്ങളെ മന്ദതയിലേക്ക് നയിക്കുകയും ആസക്തിയുണ്ടാക്കുകയും ചെയ്യും. ഇത് ഒഴിവാക്കുന്നതിലൂടെ ശരീരത്തിന് കൂടുതൽ സ്ഥിരതയുള്ള ഊർജം ലഭിക്കും," താനെയിലെ കിംസ് ഹോസ്പിറ്റലിലെ ചീഫ് ഡയറ്റീഷ്യൻ ഡി.ടി.ഗുൽനാസ് ഷെയ്ഖ് പറഞ്ഞു.

Also Read: രക്തത്തിലെ പഞ്ചസാരയുടെ അളവ് നിയന്ത്രിക്കാം; രാവിലെ മുരിങ്ങയില ചായ കുടിക്കൂ

മെച്ചപ്പെട്ട ഗ്ലൂക്കോസ് നിയന്ത്രണം ആളുകൾക്ക് അനുഭവപ്പെട്ടേക്കാം, ഇത് ഇൻസുലിൻ റെസിസ്റ്റൻസോ പ്രമേഹമോ ഉള്ള വ്യക്തികൾക്ക് പ്രത്യേകിച്ചും ഗുണം ചെയ്യുമെന്ന് സാൻഡ്ര ഹെൽത്ത്കെയറിലെ ഡോ. രാജീവ് കോവിൽ പറഞ്ഞു. മാത്രമല്ല, പകൽ സമയത്ത് പഞ്ചസാര ഒഴിവാക്കുന്നത് ഉറക്കത്തിന്റെ ഗുണനിലവാരം മെച്ചപ്പെടുത്താൻ സഹായിക്കും. "ഉറക്കസമയത്തിന് തൊട്ടുമുമ്പ് ഉയർന്ന ഗ്ലൂക്കോസ് അളവ് മെലറ്റോണിൻ ഉത്പാദനത്തെയും സർക്കാഡിയൻ റിഥം നിയന്ത്രണത്തെയും തടസപ്പെടുത്തും," ഡോ.കോവിൽ പറഞ്ഞു.

"ദിവസത്തിന്റെ രണ്ടാം പകുതിയിൽ കഴിക്കുന്ന പഞ്ചസാര ഉടനടി ഊർജത്തിനായി ഉപയോഗിക്കാനുള്ള സാധ്യത കുറവാണ്, മാത്രമല്ല കൊഴുപ്പായി സംഭരിക്കപ്പെടാനുള്ള സാധ്യതയും കൂടുതലാണ്. ഇത് ഒഴിവാക്കുന്നത് അനാവശ്യമായ കാലറി ഉപഭോഗം കുറയ്ക്കുകയും വിശപ്പ് നിയന്ത്രിക്കാൻ സഹായിക്കുകയും ചെയ്യുന്നു, കാരണം സ്ഥിരമായ ഗ്ലൂക്കോസ് അളവ് വൈകുന്നേരത്തെ ഭക്ഷണ ആസക്തിയെ കുറയ്ക്കുന്നു," അദ്ദേഹം വ്യക്തമാക്കി.

Also Read: വണ്ണം കുറയ്ക്കുകയെന്ന ലക്ഷ്യം കൈയെത്തും ദൂരത്ത്; ഈ 2 കാര്യങ്ങൾ ചെയ്ത് നോക്കൂ

ഉച്ചയ്ക്കുശേഷം പഞ്ചസാര അടങ്ങിയ ഭക്ഷണങ്ങൾ ഒഴിവാക്കുന്നത് ശൂന്യമായ കാലറികൾ കുറയ്ക്കുമെന്ന് ഷെയ്ഖ് പറഞ്ഞു. ഇത് ക്രമേണ ശരീരഭാരം കുറയ്ക്കാൻ സഹായിച്ചേക്കാം. മാത്രമല്ല, രാത്രിയിലെ ലഘുഭക്ഷണ ശീലങ്ങൾ കുറയ്ക്കാൻ സഹായിക്കുന്നുവെന്ന് ഷെയ്ഖ് അഭിപ്രായപ്പെട്ടു. കൂടാതെ, സ്ഥിരമായ ഊർജം, ക്ഷീണം കുറയൽ, മെച്ചപ്പെട്ട മാനസിക വ്യക്തത എന്നിവ സാധാരണയായി ലഭിക്കുന്ന ഫലങ്ങളാണ്. 

ഉച്ചയ്ക്ക് ശേഷം പഞ്ചസാര കുറയ്ക്കുന്നത് പലപ്പോഴും ദഹനം മെച്ചപ്പെടുത്താനും, വയറു വീർക്കുന്നത് കുറയ്ക്കാനും, ചർമ്മത്തെ ശുദ്ധീകരിക്കാനും സഹായിക്കും. കാരണം വൈകിയുള്ള പഞ്ചസാരയുടെ ഉപഭോഗം വർധിക്കുന്നത് ഹോർമോൺ മാറ്റങ്ങൾക്ക് കാരണമാകുമെന്ന് ഷെയ്ഖ് പറഞ്ഞു. 

Also Read: ഭക്ഷണം കഴിച്ചശേഷം മധുരം കഴിക്കാറുണ്ടോ? പ്രമേഹം വരാമെന്ന് ഡോക്ടറുടെ മുന്നറിയിപ്പ്

ഇത് എല്ലാവർക്കും സുരക്ഷിതമാണോ?

ആരോഗ്യമുള്ള മിക്ക മുതിർന്നവർക്കും ഇത് സുരക്ഷിതമായി പരീക്ഷിക്കാവുന്നതാണ്. “പ്രമേഹമോ ഹൈപ്പോഗ്ലൈസീമിയയോ ഉള്ളവർക്ക് മാത്രമേ ഈ മുന്നറിയിപ്പ് ബാധകമാകൂ; അവർ പഞ്ചസാരയുടെ അളവ് കൂടുതൽ ശ്രദ്ധാപൂർവ്വം നിയന്ത്രിക്കേണ്ടതുണ്ട്, മാർഗനിർദ്ദേശമില്ലാതെ പെട്ടെന്ന് മാറ്റങ്ങൾ വരുത്തരുത്,” ഷെയ്ഖ് പറഞ്ഞു.

എന്താണ് ശ്രദ്ധിക്കേണ്ടത്?

"ഒരു പെട്ടെന്നുള്ള പരിഹാരത്തിനുപകരം ഒരു ജീവിതശൈലി പരീക്ഷണം ആയി ഇത് ചെയ്യുക. ഉച്ചയ്ക്ക് ശേഷം പഞ്ചസാര ഒഴിവാക്കുന്നത് ഭക്ഷണരീതികൾ പുനഃക്രമീകരിക്കാനും, ആസക്തി കുറയ്ക്കാനും, ഭാരം കുറയ്ക്കാനുമുള്ള ഒരു ലളിതമായ മാർഗമാണ്. രണ്ടാഴ്ചയ്ക്കുള്ളിൽ നിങ്ങളുടെ വികാരം മെച്ചപ്പെട്ടാൽ, അത് ദീർഘകാലത്തേക്ക് തുടരുന്നതിനുള്ള ഒരു നല്ല സൂചനയാണ്," ഷെയ്ഖ് പറഞ്ഞു.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: വണ്ണം കുറയാൻ ജിമ്മിൽ പോകേണ്ട; 25 കിലോ കുറച്ച യുവതിയുടെ 5 ടിപ്‌സുകൾ