ദിവസവും അര സ്പൂൺ ഉലുവ പൊടിച്ചത് കഴിച്ചു നോക്കൂ; ആരോഗ്യത്തിൽ മാജിക് തീർക്കും

നമ്മുടെ അടുക്കളയിൽ കാണപ്പെടുന്ന ഉലുവ രുചികരമായൊരു സുഗന്ധവ്യഞ്ജനം മാത്രമല്ല, ഔഷധ ഗുണങ്ങളുടെ ഒരു കലവറ കൂടിയാണ്. ദിവസവും അര സ്പൂൺ ഉലുവപ്പൊടി കഴിക്കുന്നതിലൂടെ അത്ഭുതകരമായ നിരവധി ആരോഗ്യ ഗുണങ്ങൾ ലഭിക്കും. ഉലുവ വറുത്തെടുത്ത് പൊടിച്ച് ഉപയോഗിക്കുന്നത് അതിന്റെ പൂർണ ഗുണങ്ങൾ നേടാൻ സഹായിക്കും. ദിവസവും ഉലുവ പൊടി കഴിച്ചാലുള്ള ആരോഗ്യ ഗുണങ്ങളെക്കുറിച്ച് ഡോ.രതി പറയുന്നത് നോക്കാം.

രക്തത്തിലെ പഞ്ചസാരയുടെ അളവ് നിയന്ത്രിക്കുന്നു: ഉലുവയിലെ നാരുകളും അമിനോ ആസിഡുകളും നമ്മൾ കഴിക്കുന്ന ഭക്ഷണത്തിൽ നിന്ന് ശരീരം പഞ്ചസാര ആഗിരണം ചെയ്യുന്നത് കുറയ്ക്കുന്നു. ഇത് രക്തത്തിലെ പഞ്ചസാരയുടെ അളവ് നിയന്ത്രണത്തിലാക്കുകയും ഇൻസുലിൻ സെൻസിറ്റിവിറ്റി മെച്ചപ്പെടുത്തുകയും ചെയ്യുന്നു. പ്രമേഹരോഗികൾക്ക് ഇത് ഗുണം ചെയ്യും.

Also Read: നടത്തം, ഉറക്കം, പ്രോട്ടീൻ; വണ്ണം പെട്ടെന്ന് കുറയ്ക്കാം, ഈ 5 കാര്യങ്ങൾ ശീലമാക്കൂ

കൊളസ്ട്രോൾ കുറയ്ക്കുന്നു: ഉലുവ പൊടി ദിവസവും കഴിക്കുന്നത് ശരീരത്തിലെ ചീത്ത കൊളസ്ട്രോൾ, ട്രൈഗ്ലിസറൈഡുകൾ എന്നിവ കുറയ്ക്കും. അതേസമയം, നല്ല കൊളസ്ട്രോൾ വർധിപ്പിക്കും. ഇത് രക്തക്കുഴലുകൾ വൃത്തിയായി സൂക്ഷിക്കാനും ഹൃദയാഘാതം, പക്ഷാഘാതം തുടങ്ങിയ ഹൃദ്രോഗങ്ങളിൽ നിന്ന് സംരക്ഷിക്കാനും സഹായിക്കും. 

ശരീരഭാരം കുറയ്ക്കാൻ സഹായിക്കുന്നു: ഉലുവയിലെ നാരുകൾ വയറു നിറയുന്ന ഒരു തോന്നൽ സൃഷ്ടിക്കുന്നു, ഇത് വിശപ്പ് നിയന്ത്രിക്കാൻ സഹായിക്കും. അനാവശ്യമായ ലഘുഭക്ഷണങ്ങൾ ഒഴിവാക്കുന്നതിലൂടെ ശരീരഭാരം കുറയ്ക്കാൻ വളരെയധികം സഹായിക്കും. 

Also Read:കാൻസറിൽനിന്ന് രക്ഷ നേടാൻ മാംസം കഴിക്കുന്നത് സഹായിക്കുമോ?

ദഹനം മെച്ചപ്പെടുത്തുന്നു: ദഹനക്കേട്, അസിഡിറ്റി, നെഞ്ചെരിച്ചിൽ, മലബന്ധം തുടങ്ങിയ പ്രശ്നങ്ങൾക്ക് ഉലുവ ഒരു മികച്ച പരിഹാരമാണ്. ഇത് കുടലിൽ ഒരു സംരക്ഷണ പാളി സൃഷ്ടിക്കുകയും ദഹനനാളത്തെ ശമിപ്പിക്കുകയും ചെയ്യുന്നു.

ഹോർമോൺ പ്രശ്നങ്ങൾക്ക് പരിഹാരം: പിസിഒഎസ്, ക്രമരഹിതമായ ആർത്തവം, ആർത്തവ വേദന തുടങ്ങിയ പ്രശ്നങ്ങൾ ഉള്ള സ്ത്രീകൾക്ക് ഉലുവ സഹായിക്കും. ഈസ്ട്രജന്റെ അളവ് സന്തുലിതമാക്കാനുള്ള ശക്തി ഇതിനുണ്ട്. മുലയൂട്ടുന്ന അമ്മമാരിൽ പാൽ ഉൽപാദനം വർധിപ്പിക്കുകയും ചെയ്യുന്നു. പുരുഷന്മാരിൽ സ്വാഭാവികമായും ടെസ്റ്റോസ്റ്റിറോൺ അളവ് വർധിപ്പിക്കുകയും ശാരീരിക ശക്തി മെച്ചപ്പെടുത്തുകയും ചെയ്യുന്നു.

മുടിയുടെയും ചർമ്മത്തിന്റെയും ആരോഗ്യം: ഉലുവയിലെ ആന്റിഓക്‌സിഡന്റുകൾ വാർധക്യത്തിന്റെ ലക്ഷണങ്ങൾ വൈകിപ്പിക്കുന്നു. താരൻ കുറയ്ക്കുകയും മുടി കൊഴിച്ചിൽ തടയുകയും ചെയ്യുന്നു. ചർമ്മത്തിന് സ്വാഭാവിക തിളക്കം നൽകുന്നു.

Also Read:അത്താഴം വൈകി കഴിക്കരുത്, വെറും വയറ്റിൽ പഴങ്ങൾ വേണ്ട; പ്രമേഹമുള്ളവർ ഈ 5 കാര്യങ്ങൾ ശ്രദ്ധിക്കണം

വൃക്കകളെയും കരളിനെയും സംരക്ഷിക്കുന്നു: ഉലുവ പൊടി ശരീരത്തിൽ നിന്ന് വിഷവസ്തുക്കളെ പുറന്തള്ളാൻ സഹായിക്കുന്നു. കരളിൽ കൊഴുപ്പ് അടിഞ്ഞുകൂടുന്നത് തടയുകയും വൃക്കകളെ സംരക്ഷിക്കുകയും ചെയ്യുന്നു.

ഉലുവ പൊടി എങ്ങനെ ഉപയോഗിക്കാം

ഒരു പാനിൽ ഉലുവ നിറം മാറുന്നതുവരെവറുക്കുക. തണുത്തശേഷം മിക്സിയിൽ നന്നായി പൊടിക്കുക. ഈ പൊടി ഒരു കുപ്പിയിൽ സൂക്ഷിച്ച് എല്ലാ ദിവസവും രാവിലെ അര സ്പൂൺ ഉലുവ പൊടി ഒരു ഗ്ലാസ് ചെറുചൂടുള്ള വെള്ളത്തിൽ കലർത്തി കുടിക്കുക.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: ആരോഗ്യത്തിന് അപകടം; എന്റെ വീട്ടിൽനിന്നും ഞാൻ ഒഴിവാക്കിയ 6 വസ്തുക്കൾ; ഡോക്ടർ പറയുന്നു