ചപ്പാത്തി ചുട്ടെടുക്കുമ്പോൾ കല്ലുപോലെ ആകുന്നുണ്ടോ? ഗോതമ്പ് പൊടിയിൽ ഇത് കുതിർത്തു ചേർക്കൂ

നമ്മുടെ തീൻമേശയിലെ സ്ഥിരം സാന്നിധ്യമാണ് ചപ്പാത്തി. പക്ഷെ, ഉണ്ടാക്കി കുറച്ച് കഴിയുമ്പോൾ ചപ്പാത്തി കട്ടിയായി പോകുന്നതാണ് പലരുടെയും പ്രധാന പ്രശ്നം. ചപ്പാത്തി എപ്പോഴും നല്ല മൃദുവായി ഇരിക്കാൻ സഹായിക്കുന്ന ഒരു എളുപ്പ വിദ്യയുണ്ട്, അതാണ് അവൽ ചേർക്കുക എന്നത്. ഗോതമ്പ് മാവിൽ അൽപം അവൽ കൂടി ചേർത്താൽ, പിറ്റേന്ന് വരെ കട്ടിയാവാത്ത പഞ്ഞി പോലുള്ള ചപ്പാത്തികൾ തയ്യാറാക്കാം.

Also Read: അരിപ്പൊടി വേണ്ട, മൈദ വേണ്ട; ഇനി ഇഡ്ഡലി ഉണ്ടാക്കാം എളുപ്പത്തിൽ

ചേരുവകൾ

• ഗോതമ്പ് പൊടി- 2 കപ്പ്
• അവൽ- 1/2 കപ്പ്
• ചൂടുവെള്ളം- ആവശ്യത്തിന്
• ഉപ്പ്- ആവശ്യത്തിന്
• എണ്ണ അല്ലെങ്കിൽ നെയ്യ് - 1 ടീസ്പൂൺ

Also Read: എളുപ്പത്തിലുണ്ടാക്കാം കിടിലൻ പൊരിച്ച പത്തിരി, ബാക്കി വന്ന ചോറ് മതി

തയ്യാറാക്കുന്ന വിധം

• അവൽ നന്നായി കഴുകി വൃത്തിയാക്കാം. എന്നിട്ട്, കുറഞ്ഞ അളവിൽ ചൂടുവെള്ളം ഒഴിച്ച് 10 മിനിറ്റ് കുതിർക്കാൻ വെയ്ക്കാം. അവൽ മൃദുവായി ഉടഞ്ഞുപോകുന്ന പരുവത്തിലായിരിക്കണം.
• കുതിർത്ത അവലിലെ അധികമുള്ള വെള്ളം പിഴിഞ്ഞു മാറ്റാം. ശേഷം ഇത് കൈകൊണ്ട് നന്നായി ഉടച്ച് പേസ്റ്റ് രൂപത്തിലാക്കാം. കട്ടകളൊന്നും ഉണ്ടാവാതിരിക്കാൻ ശ്രദ്ധിക്കുക.
• ഒരു വലിയ പാത്രത്തിൽ ഗോതമ്പ് പൊടി എടുക്കാം. ഇതിലേക്ക് ഉടച്ചുവെച്ച അവൽ, ഉപ്പ്, ഒരു ടീസ്പൂൺ എണ്ണ അല്ലെങ്കിൽ നെയ്യ് എന്നിവ ചേർത്ത് നന്നായി ഇളക്കാം.
• ചെറുചൂടുള്ള വെള്ളം കുറച്ചു വീതം ഒഴിച്ച് മാവ് കുഴയ്ക്കാം. മാവ് സോഫ്റ്റാകണം. കുഴച്ചെടുത്ത മാവ് 30 മിനിറ്റെങ്കിലും അടച്ച് മാറ്റി വയ്ക്കണം. 

Also Read: ലഞ്ച് ബോക്സിലേയ്ക്ക് പ്രത്യേകം കറി വേണ്ട, 5 മിനിറ്റിൽ രുചികരമായ റൈസ് തയ്യാറാക്കാം

• ശേഷം മാവ് ചെറിയ ഉരുളകളാക്കിയെടുക്കാം. അധികം കട്ടി കുറയാതെ അത് പരത്തിയെടുക്കാം. 
• ഒരു പാൻ അടുപ്പിൽ വച്ചു ചൂടാക്കാം. അതിലേയ്ക്ക് പരത്തിയ മാവ് വച്ച് ചുട്ടെടുക്കാം. അൽപം നെയ്യ് അതിൽ പുരട്ടാം. 
• ഇരുവശങ്ങളും ചുട്ടെടുത്ത ചപ്പാത്തി ചൂടോടെ കഴിച്ചു നോക്കൂ. 

Read More: ചമ്മന്തിയോ സാമ്പാറോ വേണ്ട, വീണ്ടും കഴിക്കാൻ കൊതിക്കും ഈ ദോശ