ചപ്പാത്തി സോഫ്റ്റ് മാത്രമല്ല ഹെൽത്തിയുമാക്കാം, ഗോതമ്പ് പൊടിക്ക് പകരം ഇനി മാവ് തയ്യാറാക്കാൻ ഇത് ഉപയോഗിക്കൂ

ഇന്ത്യൻ വിഭവങ്ങളിൽ ഏറ്റവും പ്രധാനപ്പെട്ട ഒന്നാണ് ചപ്പാത്തി അല്ലെങ്കിൽ റൊട്ടി. പല കറികളുടെയും പ്രധാന കൂട്ടുകാരനായ ഇത് ലളിതവും എന്നാൽ പോഷകസമൃദ്ധവുമാണ്. എങ്കിലും, എല്ലാവർക്കും ഒരുപോലെ മൃദവായ ചപ്പാത്തി ഉണ്ടാക്കാൻ സാധിക്കാറില്ല. എന്നാൽ അതിനൊരു വഴിയുണ്ട്. അൽപം പോലും ഗോതമ്പ് പൊടി ഉപയോഗിക്കാതെ ചപ്പാത്തി ചുട്ടെടുക്കാം. അതിന് റാഗിപ്പൊടി ഉപയോഗിക്കാം.

Also Read: ഇടിയപ്പം സോഫ്റ്റായി കിട്ടും, അരിപ്പൊടിയിലേയ്ക്ക് ഇത് രണ്ട് സ്പൂൺ ചേർക്കൂ

പോഷക സമ്പന്നമായ റാഗി ഭക്ഷണത്തിൽ ഉൾപ്പെടുത്താനുള്ള ഏറ്റവും നല്ല വഴിയാണ് റാഗി ചപ്പാത്തി. ഗോതമ്പ് ചപ്പാത്തി പോലെ മൃദുവായി ഉണ്ടാക്കാൻ അൽപ്പം ശ്രദ്ധിച്ചാൽ മതി. ധാരാളം കാൽസ്യവും നാരുകളും അടങ്ങിയ റാഗി, പ്രമേഹമുള്ളവർക്കും ഭാരം കുറയ്ക്കാൻ ആഗ്രഹിക്കുന്നവർക്കും ഏറ്റവും മികച്ച ഭക്ഷണമാണ്. ഭുസാനുർ കുക്കിങ് എന്ന യൂട്യൂബ് ചാനലിലൂടെയാണ് ഇത് തയ്യാറാക്കുന്ന വിധം പരിചയപ്പെടുത്തി തരുന്നത്.

Also Read: 4 ചേരുവകൾ കൊണ്ട് 5 മിനിറ്റിൽ ഒരു ക്രിസ്പി സ്നാക് തയ്യാറാക്കാം

ചേരുവകൾ

• റാഗി - 1 കപ്പ്
• വെള്ളം - 1 കപ്പ് 
• ഉപ്പ്
• എണ്ണ/നെയ്യ്

തയ്യാറാക്കുന്ന വിധം

• ഒരു ബൗളിൽ ഒരു കപ്പ് വെള്ളമെടുക്കാം. അത് ചൂടാക്കാം. 
• മറ്റൊരു ബൗളിൽ ഒരു കപ്പ് റാഗിപ്പൊടിയെടുക്കാം. അതിലേയ്ക്ക് ആവശ്യത്തിന് ഉപ്പ് ചേർക്കാം. ചൂട് വെള്ളം ഉപയോഗിച്ച് പൊടി കുഴയ്ക്കാം. 
• മാവ് കട്ടിയായി തുടങ്ങുമ്പോൾ ഒരു ടീസ്പൂൺ നെയ്യ് ചേർത്തിളക്കാം. ചപ്പാത്തി മാവിൻ്റെ പരുവത്തിൽ പൊടി കുഴച്ചെടുക്കാം. മുകളിൽ കുറച്ച് നെയ്യ് പുരട്ടി 10 മിനിറ്റ് അത് അടച്ചു വയ്ക്കാം. 
• ശേഷം അവ ചെറിയ ഉരുളകളാക്കാം. മുകളിൽ കുറച്ച് ഗോതമ്പ് പൊടിയോ റാഗിപ്പൊടിയോ വിതറി പരത്തിയെടുക്കാം. 
• ഒരു പാൻ അടുപ്പിൽ വച്ചു ചൂടാക്കാം. അതിലേയ്ക്ക് പരത്തിയ ചപ്പാത്തി വച്ച് ഇരുവശവും ചുട്ടെടുക്കാം. ഇത് ചൂടോടെ തന്നെ കഴിക്കുന്നതാണ് ഗുണകരം. 

Also Read: അരിപ്പൊടിവേണ്ട, ബ്രേക്ക്ഫാസ്റ്റിന് പാലപ്പം 5 മിനിറ്റിൽ ചുട്ടെടുക്കാൻ ഇതാ ഒരു പൊടിക്കൈ

ഗുണങ്ങൾ

• മറ്റ് ധാന്യങ്ങളെ അപേക്ഷിച്ച് റാഗിയിൽ ധാരാളം കാൽസ്യം അടങ്ങിയിട്ടുണ്ട്. ഇത് എല്ലുകൾക്ക് ഉത്തമമാണ്.
• റാഗിയിലെ നാരുകൾ രക്തത്തിലെ പഞ്ചസാരയുടെ അളവ് നിയന്ത്രിച്ചു നിർത്തുന്നതിന് സഹായിക്കും. 
• നാരുകൾ വിശപ്പ് അകറ്റാനും അമിതമായി വിശപ്പ് ഉണ്ടാകുന്നത് കുറയ്ക്കാനും സഹായിക്കും.
  

ഇക്കാര്യങ്ങൾ ശ്രദ്ധിക്കാം

• ചെറുചൂടുള്ള വെള്ളം ഉപയോഗിച്ചു വേണം മാവ് കുഴയ്ക്കാൻ.
• റാഗിയായതിനാൽ പരത്തുമ്പോൾ അറ്റം വിണ്ടുകീറാനുള്ള സാധ്യതയുണ്ട്. അതിനാൽ മൃദുവായി പരത്തണം. അഷപം അരിപ്പൊടിയോ ഗോതമ്പ് പൊടിയോ ചേർത്താൽ ഈ സാഹചര്യം കുറയ്ക്കാൻ സഹായിക്കും. 

Read More: പച്ചരിയും ഉഴുന്നും കൈയ്യിലില്ലേ? എങ്കിൽ ദോശ മാവ് അരയ്ക്കാൻ ഇത് ഒരു കപ്പ് ഉപയോഗിക്കൂ