ലാലേട്ടനൊപ്പം അടുത്ത ചിത്രം വരുന്നുവെന്ന് വി.എ ശ്രീകുമാർ

ഒടിയൻ എന്ന ചിത്രം സംവിധാനം ചെയ്തു കൊണ്ടായിരുന്നു മലയാളസിനിമയിലേക്ക് വി.എ.ശ്രീകുമാർ അരങ്ങേറ്റം കുറിച്ചത്. മോഹൻലാലിന്റെ ബ്രഹ്മാണ്ഡ ചിത്രം എന്ന രീതിയിൽ വലിയ പ്രതീക്ഷകളോടെ തിയേറ്ററുകളിലേക്ക് എത്തിയ ചിത്രമായിരുന്നു ഒടിയൻ. 

ആറു വർഷങ്ങൾക്കിപ്പുറം മോഹൻലാലിനൊപ്പം വീണ്ടും കൈകോർക്കാൻ ഒരുങ്ങുകയാണ് ശ്രീകുമാർ. ഫെയ്സ്ബുക്ക് പോസ്റ്റിൽ മോഹൻലാലിനൊപ്പമുള്ള ചിത്രം പങ്കിട്ടുകൊണ്ട് ശ്രീകുമാർ തന്നെയാണ് ഇക്കാര്യം കുറിച്ചത്.

"ലാലേട്ടനൊപ്പം എന്റെ അടുത്ത ചിത്രം," എന്നാണ് ശ്രീകുമാർ കുറിച്ചത്. എന്നാൽ പ്രൊജക്റ്റിന്റെ കൂടുതൽ വിവരങ്ങളൊന്നും വ്യക്തമല്ല. 

അതേസമയം, ഇതു സിനിമയല്ല, പരസ്യചിത്രമാണെന്നും റിപ്പോർട്ടുകളുണ്ട്. മോഹന്‍ലാല്‍  ബ്രാന്‍ഡ് അംബാസിഡര്‍ ആവുന്ന ഒരു കമ്പനിയുടെ പരസ്യചിത്രത്തിനുവേണ്ടിയാണ് ഷൂട്ടെന്നാണ് വിവരം.

മോഹൻലാലിനൊപ്പം മഞ്ജു വാര്യർ, പ്രകാശ് രാജ് എന്നിവരും പ്രധാന വേഷങ്ങളെ അവതരിപ്പിച്ച ചിത്രമായിരുന്നു  ‘ഒടിയന്‍’. പ്രേക്ഷകരിൽ നിന്നും  സമ്മിശ്ര പ്രതികരണം ഏറ്റുവാങ്ങിയപ്പോഴും ചിത്രം ബോക്‌സ് ഓഫീസിൽ വലിയ വാണിജ്യ വിജയം നേടിയിരുന്നു.ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ   നിർമ്മിച്ച ചിത്രത്തിന്റെ തിരക്കഥ ഒരുക്കിയത് ഹരികൃഷ്ണന്‍ ആയിരുന്നു. പീറ്റർ ഹെയ്ൻ സംഘട്ടനവും സാം സി.എസ്. പശ്ചാത്തല സംഗീതവുമൊരുക്കി.  റഫീഖ് അഹമ്മദ്, ലക്ഷ്മി ശ്രീകുമാർ എന്നിവരുടെ വരികൾക്ക് എം.ജയചന്ദ്രൻ സംഗീത സംവിധാനം നിർവ്വഹിച്ചു.  ശ്രേയ ഘോഷാൽ, സുദീപ്കുമാർ, ശങ്കർ മഹാദേവൻ, എം.ജി.ശ്രീകുമാർ തുടങ്ങിയ ഗായകർക്കൊപ്പം മോഹൻലാലും ചിത്രത്തിനു വേണ്ടി പാടിയിരുന്നു. 

ഇടക്കാലത്ത്, 'രണ്ടാമൂഴം' സിനിമയാക്കാൻ  ശ്രീകുമാർ പ്ലാൻ ചെയ്തിരുന്നെങ്കിലും ചില നിയമപ്രശ്നങ്ങൾ കാരണം ആ പ്രൊജകറ്റ് നിന്നുപോവുകയായിരുന്നു. 2014ല്‍ ആയിരുന്നു 'രണ്ടാമൂഴം' സിനിമയാക്കാന്‍ എം ടി വാസുദേവന്‍ നായരും ശ്രീകുമാറും കരാറില്‍ ഒപ്പു വെച്ചത്. മൂന്നു വര്‍ഷത്തിനുള്ളില്‍ സിനിമ പൂർത്തിയാക്കണമെന്നായിരുന്നു കരാർ. എന്നാല്‍, കരാറിലെ കാലാവധി കഴിഞ്ഞ് ഒരു വര്‍ഷം കഴിഞ്ഞിട്ടും സിനിമ യാഥാര്‍ഥ്യമായില്ല. ഒടുവിൽ രണ്ടാമൂഴം സിനിമയാക്കുന്നതില്‍ നിന്ന് ശ്രീകുമാറിനെ തടയണമെന്നാണ് എം.ടി.വാസുദേവന്‍ നായര്‍ സുപ്രീം കോടതിയെ സമീപിക്കുകയായിരുന്നു. 

Read More Entertainment Stories Here

• കാത്തിരുന്ന കല്യാണം ഇങ്ങെത്തി; ഭാഗ്യയുടെ സംഗീത് ചടങ്ങ് ആഘോഷമാക്കി സുരേഷ് ഗോപിയും കുടുംബവും
• ഓസ്ലറിലെ ഒന്നൊന്നര എൻട്രി; തിയേറ്ററിനെ ഇളക്കി മറിച്ച് മമ്മൂട്ടി
• നയൻതാര ചിത്രം 'അന്നപൂരണി' നെറ്റ്ഫ്ലിക്സിൽ നിന്ന് നീക്കം ചെയ്തത് എന്തുകൊണ്ട്?
• ജയറാമിന്റെ തിരിച്ചു വരവ്, പതിവ് മിഥുൻ മാനുവൽ പറ്റേൺ സിനിമ, ഓസ്ലർ റിവ്യൂ; Abraham Ozler Review
• ഏതാണീ കൊച്ചു പയ്യൻ; പുതിയ ലുക്കിൽ വിജയ്, ചിത്രങ്ങൾ, വീഡിയോ
• വിമാനം മേടിച്ചാൽ അടുത്ത ചിത്രം; ഷാരൂഖിന് വാഗ്ദാനവുമായി മണിരത്നം