ഫിറോസുമായി വേർപിരിയുന്നു; ഇനി സജ്ന നൂർ, വെളിപ്പെടുത്തലുമായി ബിഗ് ബോസ് താരം

ബിഗ് ബോസ് മലയാളത്തിന്റെ ചരിത്രത്തിലെ ആദ്യത്തെ താരദമ്പതികളായിരുന്നു ഫിറോസും സജ്നയും. സജ്ന-ഫിറോസ് ജോഡികൾ പ്രേക്ഷകർക്കും ഏറെ പ്രിയപ്പെട്ടവരായിരുന്നു. എന്നാൽ ഇപ്പോഴിതാ, ആരാധകരെ സങ്കടപ്പെടുത്തുന്ന ഒരു വെളിപ്പെടുത്തൽ നടത്തിയിരിക്കുകയാണ് സജ്ന. താനും ഫിറോസും ഡിവോഴ്സിനു ഒരുങ്ങുന്നു എന്നാണ് ഒരു യൂട്യൂബ് ചാനലിനു നൽകിയ അഭിമുഖത്തിൽ സജ്ന വെളിപ്പെടുത്തിയത്.

" ആരും പ്രതീക്ഷിക്കാത്ത കാര്യമാണ് പറയാനുള്ളത്. ഞാനും ഫിറോസും മ്യൂചൽ ആയി ഡിവോഴ്സിനു ഒരുങ്ങുകയാണ്. ഒത്തുപോകാൻ പറ്റില്ല എന്നുറപ്പായതിനാൽ ഒന്നിച്ചെടുത്ത തീരുമാനമാണ്. വ്യക്തിപരമായ കാരണങ്ങൾ കൊണ്ടാണ് പിരിയുന്നത്. കാരണങ്ങൾ പുറത്തുപറയാൻ ഞങ്ങൾ ആഗ്രഹിക്കുന്നില്ല. പിരിയുന്നതിൽ വിഷമമുണ്ട്, കുട്ടികളുടെ കാര്യമോർക്കുമ്പോൾ," വെറൈറ്റി മീഡിയക്ക് നൽകിയ അഭിമുഖത്തിൽ സങ്കടത്തോടെ സജ്ന പറയുന്നു. 

"ഡിവോഴ്സിനായി ശ്രമിക്കുമ്പോഴും ഞങ്ങൾ തമ്മിൽ നല്ല സൗഹൃദത്തിലാണ്. ഇപ്പോൾ ഈ അഭിമുഖത്തിനു വരുന്നതിനു മുൻപും സംസാരിച്ചിട്ടാണ് വന്നത്." 

ഫിറോസിനെ മാത്രം ആശ്രയിച്ചു നിന്നൊരു ആളായിരുന്നു താനെന്നും അഭിനയവുമായി ഒരു ബന്ധവുമില്ലായിരുന്ന താൻ ഫിറോസുമായുള്ള വിവാഹത്തിനു ശേഷമാണ് അഭിനയത്തിലേക്ക് വന്നതെന്നും സജ്ന പറയുന്നു. 

പേരിൽ നിന്നും ഫിറോസ് എന്ന പേര് എടുത്തു മാറ്റുകയാണെന്ന് സജ്ന പറയുന്നു. സജ്ന ഫിറോസ് എന്ന പേരു മാറ്റി ഇനി സജ്ന നൂർ എന്നാക്കിയിരിക്കുകയാണ് സജ്ന. നൂർ എന്നത് തന്റെ ഉമ്മയുടെ പേരാണെന്നും സജ്ന വ്യക്തമാക്കുന്നു. 

സീരിയലുകൾ പ്രേക്ഷകർക്ക് സുപരിചിതയായ സജ്ന 'അന്ന കരീന', 'സുമംഗലീ ഭവ', 'ചാക്കോയും മേരിയും' തുടങ്ങിയ പരമ്പരകളിലും വേഷമിട്ടിട്ടുണ്ട്. ഫിറോസിനൊപ്പം സജ്നയും മുൻപ് റിയാലിറ്റി ഷോകളുടെ ഭാഗമായിട്ടുണ്ട്. 'ജോഡി നമ്പർ വൺ', 'സൂര്യ ജോഡി' തുടങ്ങിയ കപ്പിൾ ഷോകളിൽ ഇരുവരും ഒന്നിച്ച് പങ്കെടുത്തിരുന്നു. അതിനു ശേഷമാണ് ഇരുവരും ഒന്നിച്ച് ബിഗ് ബോസിലെത്തിയത്. 

 മലയാള ടെലിവിഷൻ ഇൻഡസ്ട്രിയിൽ അസിസ്റ്റന്റ് ഡയറക്ടർ ആയാണ് ഫിറോസ് തന്റെ കരിയർ ആരംഭിച്ചത്. പിന്നീട് 'ഡേഞ്ചറസ് ബോയ്സ്' എന്ന പരിപാടിയുടെ അവതാരകനായി. 'തില്ലാന തില്ലാന' എന്ന ഡാൻസ് റിയാലിറ്റി ഷോയിൽ മത്സരാർത്ഥിയായി എത്തിയ ഫിറോസ്, ആ ഷോയുടെ ടൈറ്റിൽ വിന്നറായിരുന്നു. 'താരോത്സവം' എന്ന ഷോയിലും ഫിറോസ് പങ്കെടുത്തിരുന്നു. സിനിമയിലും അരങ്ങേറ്റം കുറിച്ച നടനാണ് ഫിറോസ്. മമ്മൂട്ടി ചിത്രം 'ഫേസ് റ്റു ഫേസ്', ഒരു കന്നട ചിത്രം എന്നിവയിലും ഫിറോസ് അഭിനയിച്ചിട്ടുണ്ട്.

Read More Television Stories Here

• എന്റെ അസുഖം മാറാൻ തിരുപ്പതിയ്ക്ക് മുടി നേർന്നതാണിവൾ; ലക്ഷ്മിയെ ചേർത്തുപിടിച്ച് മിഥുൻ
• കുട്ടിത്താരങ്ങൾ വർഷങ്ങൾക്കിപ്പുറം; ചാത്തന്മാർ കൊണ്ടുവന്നു നിർത്തിയതാണെന്ന് ആരാധകർ
• ഹലോ കുട്ടിച്ചാത്തനിലെ കുട്ടിത്താരങ്ങൾ അന്നും ഇന്നും; ചിത്രങ്ങൾ കാണാം
• ജനനം കൊണ്ട് അമേരിക്കക്കാരി, ഹൃദയം കൊണ്ട് മലയാളി; ആളെ മനസ്സിലായോ?
• മമ്മൂക്കയ്ക്ക് നന്ദിപറഞ്ഞ് ഋതു മന്ത്ര ലോക ജുജിറ്റ്സു ചാമ്പ്യൻഷിപ്പിലേക്ക്