Bigg Boss Malayalam 6: ആരും എന്റെ കളി കളിക്കരുത്, എനിക്ക് തെറ്റുപറ്റി: ബിഗ് ബോസ് ഹൗസിൽ നിന്നും പടിയിറങ്ങി രതീഷ്

Bigg Boss malayalam 6: മാർച്ച് 10നായിരുന്നു ബിഗ് ബോസ് മലയാളം ആറാം സീസണിനു തുടക്കം കുറിച്ചത്. 19 മത്സരാർത്ഥികളാണ് ഇത്തവണ മത്സരിക്കാനായി ബിഗ് ബോസ് ഹൗസിലെത്തിയത്. അതിൽ നിന്നും ഒരാൾ ആദ്യ എവിക്ഷനിലൂടെ പുറത്തായിരിക്കുകയാണ്. തൃശൂരിൽ നിന്നെത്തിയ രതീഷ് കുമാറാണ് ആദ്യ എവിക്ഷനിൽ തന്നെ പുറത്തേക്ക് പോയിരിക്കുന്നത്. 

സാധാരണ ആദ്യ ആഴ്ചയിലെ എവിക്ഷനിൽ പുറത്തുപോവാറുള്ളത്, വീടിനകത്ത് വലിയ ആക്റ്റീവ് അല്ലാത്ത മത്സരാർത്ഥികളാണ്. എന്നാൽ, വന്ന നാൾ മുതൽ വീടിനകത്ത് ഹൈപ്പർ ആക്റ്റീവായി പെരുമാറിയൊരു മത്സരാർത്ഥിയായിരുന്നു രതീഷ്. വന്ന ദിവസം മുതൽ തന്നെ ആവശ്യത്തിനും അനാവശ്യത്തിനുമൊക്കെ വഴക്കടിച്ചും സഹമത്സരാർത്ഥികളെ പ്രകോപിപ്പിച്ചും അസ്വസ്ഥരാക്കിയും വീടിനകത്തുള്ളവരുടെ ഇഷ്ടക്കേട് സമ്പാദിച്ച മത്സരാർത്ഥിയായ രതീഷ് കുമാർ പല തവണ ബിഗ് ബോസിൽ നിന്നും താക്കീത് ഏറ്റുവാങ്ങിയിരുന്നു. 

എന്തായാലും എല്ലാവരെയും വെറുപ്പിച്ച് കണ്ടന്റ് ഉണ്ടാക്കാനുള്ള രതീഷ് കുമാറിന്റെ ശ്രമങ്ങൾ തന്നെയാണ് ഇപ്പോൾ തിരിച്ചടിയായിരിക്കുന്നത്. ആവശ്യത്തിനും അനാവശ്യത്തിനും വഴക്കുണ്ടാക്കുന്ന രതീഷിന്റെ പ്രകൃതം പ്രേക്ഷകർക്കിടയിൽ വലിയ നെ​ഗറ്റീവ് ഇമേജാണ് ഉണ്ടാക്കിയത്. ജാൻമണി, സുരേഷ് കുമാർ എന്നിവരെ കുറിച്ച് രതീഷ് നടത്തിയ ചില പരാമർശങ്ങളും സഹമത്സരാർത്ഥികൾ രതീഷിനെ വിമർശിക്കാൻ കാരണമായി മാറിയിരുന്നു. 

ബിഗ് ബോസ് ഹൗസിൽ നിന്നും സഹ മത്സരാർത്ഥികളോട് യാത്ര പറഞ്ഞ് മോഹൻലാലിനു അരികിലെത്തിയ രതീഷ്, എവിക്റ്റ് ആവുമെന്ന് ഒട്ടും വിചാരിച്ചിരുന്നില്ല എന്ന കാര്യം തുറന്നു പറഞ്ഞു. "ഇതിൽ നിന്നും മനസിലാക്കേണ്ടത് നാവ് നമ്മൾ ശ്രദ്ധിക്കണം എന്നാണ്. ഒരോന്ന് പറയുമ്പോഴും ശ്രദ്ധിക്കണം. അതുപോലെ ഒരാഴ്ചകൊണ്ട് ഒരുപാട് കാര്യങ്ങൾ ഞാൻ‌ പഠിച്ചു. ഇനി ഒരു ചാൻസ് കിട്ടിയാൽ ഞാൻ പൊളിക്കും. എനിക്ക് ചില തെറ്റുകൾ പറ്റി. നമ്മൾ വിചാരിക്കുന്നതുപോലെയല്ല ബി​ഗ് ബോസ്," എന്നായിരുന്നു രതീഷ് പറഞ്ഞത്. 

"ആരും എന്റെ കളി കളിക്കരുത്, എനിക്ക് തെറ്റുപറ്റി," സഹമത്സരാർത്ഥികൾക്ക് ഉപദേശമായി രതീഷ് പറഞ്ഞതിങ്ങനെ. 

Read More Entertainment Stories Here

• പ്രെഷർ ഉണ്ടെങ്കിൽ വീട്ടിലിരിക്കണം; രതീഷിനോട് പൊട്ടിത്തെറിച്ച് ലാലേട്ടൻ
• അർജുൻ അർഹതപ്പെടാത്ത ക്യാപ്റ്റൻസിയുമായാണ് നിൽക്കുന്നത്: ഫിറോസ് ഖാൻ
• ആദ്യം ചായ ഉണ്ടാക്കാൻ പഠിക്ക്, എന്നിട്ട് ഇണ്ടാക്ക് നിലയും വിലയും: ട്രോൾമഴയിൽ നനഞ്ഞ് ബിഗ് ബോസ്
• Bigg Boss Malayalam 6: ഇവിടെ അതിജീവനം ഇത്തിരി കടുപ്പമാണ്; ഇതുവരെ കാണാത്ത നിയമങ്ങളുമായി ബിഗ് ബോസ്