Yashaswi Jaiswal: യശസ്വി ജയ്സ്വാളിന്റെ ഞെട്ടിക്കുന്ന നീക്കം; ഗോവ ടീമിലേക്ക് മാറുന്നു

Yashaswi Jaiswal: ഡൊമസ്റ്റിക് ക്രിക്കറ്റിൽ വമ്പൻ നീക്കവുമായി യശസ്വി ജയ്സ്വാൾ. മുംബൈ ക്രിക്കറ്റ് ടീമിൽ നിന്ന് ഗോവയിലേക്ക് മാറാൻ അനുവദിക്കണം എന്ന് ആവശ്യപ്പെട്ട് യശസ്വി ജയ്സ്വാൾ മുംബൈ ക്രിക്കറ്റ് അസോസിയേഷനെ സമീപിച്ചതായി ദ് ഇന്ത്യൻ എക്സ്പ്രസ് റിപ്പോർട്ട് ചെയ്യുന്നു. വ്യക്തിപരമായ കാരണങ്ങൾ ചൂണ്ടിയാണ് മാറ്റം ആവശ്യപ്പെടുന്നത് എന്നാണ് യശസ്വി മുംബൈ ക്രിക്കറ്റ് അസോസിയേഷനെ അറിയിച്ചു. 

ഗോവയുടെ ഡൊമസ്റ്റിക് ടീമിലേക്ക് മാറാൻ അനുമതി തേടി മുംബൈ ക്രിക്കറ്റ് അസോസിയേഷനോട് യശസ്വി ജയ്സ്വാൾ എൻഓസി ആവശ്യപ്പെട്ടു. "യശസ്വി ജയ്സ്വാൾ എഒസി ആവശ്യപ്പെട്ടതായും ഗോവയിലേക്ക് മാറാനുള്ള തീരുമാനം വ്യക്തിപരമാണ് എന്ന് അറിയിക്കുകയും ചെയ്തു," മുംബൈ ക്രിക്കറ്റ് അസോസിയേഷൻ വൃത്തങ്ങളെ ഉദ്ധരിച്ച് ദ് ഇന്ത്യൻ എക്സ്പ്രസ് റിപ്പോർട്ട് ചെയ്യുന്നു. 

ജയ്സ്വാളുമായി ബന്ധപ്പെട്ട അടുത്ത വൃത്തങ്ങളെ ദ് ഇന്ത്യൻ എക്സ്പ്രസ് ബന്ധപ്പെട്ടപ്പോൾ മുംബൈ ടീമിൽ നിന്ന് ഗോവയിലേക്ക് മാറാനുള്ള നീക്കത്തിലാണ് യശസ്വി ജയ്സ്വാൾ എന്നാണ് പ്രതികരണം ലഭിച്ചത്. ഇന്ത്യൻ ടെസ്റ്റ് ഓപ്പണിങ് ബാറ്ററെ സംബന്ധിച്ച് മുംബൈ ടീമിൽ നിന്ന് ഗോവയിലേക്ക് മാറാനുള്ള തീരുമാനം ഏറെ നിർണായകമാണ്. 

ബോർഡർ ഗാവസ്കർ ട്രോഫിക്ക് പിന്നാലെ എല്ലാ ഇന്ത്യൻ കളിക്കാരും ഡൊമസ്റ്റിക് ക്രിക്കറ്റ് കളിക്കണം എന്ന ബിസിസിഐ നിർദേശം വന്നതിന് പിന്നാലെയാണ് യശസ്വി അവസാനമായി കഴിഞ്ഞ സീണിൽ മുംബൈക്ക് വേണ്ടി കളിച്ചത്. ജമ്മുകശ്മീരിന് എതിരായ മുംബൈയുടെ രഞ്ജി ട്രോഫി മത്സരം യശസ്വി കളിച്ചെങ്കിലും രണ്ട് ഇന്നിങ്സിലുമായി 30 റൺസ് മാത്രമാണ് നേടാൻ സാധിച്ചത്. 

ഇന്ത്യയുടെ ചാംപ്യൻസ് ട്രോഫി സ്ക്വാഡിൽ ഇടം നേടാൻ യശസ്വിക്ക് സാധിച്ചിരുന്നില്ല. പിന്നാലെ നോൺ ട്രാവലിങ് സബ്സ്റ്റിറ്റ്യൂട്ട് ലിസ്റ്റിൽ ഇടം നേടി. വിദർഭയ്ക്ക് എതിരായ മുംബൈയുടെ സെമി ഫൈനൽ സ്ക്വാഡിൽ യശസ്വിയുടെ പേര് ഉൾപ്പെടുത്തി എങ്കിലും മത്സരത്തിന്റെ തലേന്ന് താരം പിന്മാറി. കണങ്കാലിലെ വേദന ചൂണ്ടിയായിരുന്നു പിന്മാറ്റം. 

മുംബൈക്കായി കളിച്ച് ഇന്ത്യൻ ടീമിലേക്ക്

അണ്ടർ 19 മുതൽ മുംബൈക്ക് വേണ്ടിയാണ് യശസ്വി ജയ്സ്വാൾ കളിക്കുന്നത്. വിജയ് ഹസാരെ ട്രോഫിയിൽ മുംബൈക്കായി ഇരട്ടശതകം നേടിയതോടെയാണ് ഇന്ത്യൻ ക്രിക്കറ്റ് ലോകത്തിന്റെ ശ്രദ്ധയിലേക്ക് യശസ്വി എത്തിയത്. മുംബൈക്കായി ഡൊമസ്റ്റിക് ക്രിക്കറ്റിൽ മികവ് കാണിച്ചതോടെ പിന്നെ യശസ്വിക്ക് ഇന്ത്യൻ ടീമിലേക്കും വിളിയെത്തി. ഇതോടെ യശസ്വിക്ക് തിരിഞ്ഞുനോക്കേണ്ടി വന്നിട്ടില്ല. 

നേരത്തെ മുംബൈ ഡൊമസ്റ്റിക് ടീമിൽ നിന്ന് അർജുൻ ടെണ്ടുൽക്കറും സിദ്ധേഷ് ലാഡും ഗോവ ടീമിലേക്ക് പോയിരുന്നു. എന്തുകൊണ്ട് ആണ് യശസ്വി ജയ്സ്വാൾ മുംബൈ ടീമിൽ നിന്ന് ഗോവയിലേക്ക് മാറാൻ തീരുമാനിച്ചത് എന്നതിലെ കാരണം തിരയുകയാണ് ആരാധകർ. ക്രിക്കറ്റ് ലോകത്തെ സംബന്ധിച്ച് അമ്പരപ്പിക്കുന്ന നീക്കം ആണ് ഇപ്പോൾ യശസ്വിയിൽ നിന്ന് വരുന്നത്. 

ബോർഡർ ഗാവസ്കർ ട്രോഫിയിൽ യശസ്വി ജയ്സ്വാൾ നിരാശപ്പെടുത്തിയിരുന്നില്ല. അഞ്ച് ടെസ്റ്റിൽ നിന്ന് 391 റൺസ് ആണ് യശസ്വി ജയ്സ്വാൾ കണ്ടെത്തിയത്. 43.44 ആണ് യശസ്വിയുടെ പരമ്പയിലെ ബാറ്റിങ് ശരാശരി. ഒരു സെഞ്ചുറിയും രണ്ട് അർധ ശതകവും യശസ്വി നേടി. 

Read More

• PBKS vs LSG: ഓയ് ബല്ലേ ബല്ലേ..പവറില്ലാതെ ലക്നൗ; പഞ്ചാബിന് തുടരെ രണ്ടാം ജയം
• Rishabh Pant IPL: 27 കോടി വെള്ളത്തിലായി; മൂന്ന് മത്സരം 17 റൺസ്; മാക്സിയെ പേടിച്ച് ഋഷഭ് പന്ത്
• Ashwani Kumar: അശ്വനിക്ക് അഞ്ചാം വിക്കറ്റ് നിരസിച്ചത് ഹർദിക്; ആഞ്ഞടിച്ച് ഹർഭജൻ സിങ്
• Virat Kohli: പ്രായം 39 ആവും; 2027 ലോകകപ്പ് വരെ കളിക്കുമെന്ന് വിരാട് കോഹ്ലി