Ashwani Kumar: അശ്വനിക്ക് അഞ്ചാം വിക്കറ്റ് നിരസിച്ചത് ഹർദിക്; ആഞ്ഞടിച്ച് ഹർഭജൻ സിങ്

Ashwani Kumar IPL 2025 Mumbai Indians: ഐപിഎല്ലിലെ അരങ്ങേറ്റ മത്സരത്തിലെ ആദ്യ പന്തിൽ വിക്കറ്റ്. മൂന്ന് ഓവറിൽ പിഴുതത് നാല് വിക്കറ്റ്. ഐപിഎല്ലിലെ അരങ്ങേറ്റ മത്സരത്തിൽ നാല് വിക്കറ്റ് വീഴ്ത്തുന്ന ആദ്യ ഇന്ത്യൻ ബോളർ എന്ന നേട്ടം ആണ് മുംബൈ ഇന്ത്യൻസിന്റെ അശ്വനി കുമാർ സ്വന്തമാക്കിയത്. എന്നാൽ അരങ്ങേറ്റ മത്സരത്തിൽ അഞ്ച് വിക്കറ്റ് എന്ന നേട്ടം അശ്വനിയുടെ മുൻപിൽ നിന്ന് ഹർദിക് തട്ടി അകറ്റുകയായിരുന്നു എന്ന വിമർശനവുമായി എത്തുകയാണ് മുൻ താരം ഹർഭജൻ സിങ്. 

കൊൽക്കത്ത നൈറ്റ്റൈഡേഴ്സിന് എതിരെ മൂന്ന് ഓവർ ആണ് അശ്വനിക്ക് ഹർദിക് പാണ്ഡ്യ നൽകിയത്. തന്റെ ആദ്യ ഓവറിൽ രഹാനെയെയും രണ്ടാമത്തെ ഓവറിൽ റിങ്കു സിങ്ങിനേയും മനേഷ് പാണ്ഡേയേയും മൂന്നാമത്തെ ഓവറിൽ റസലിനേയും അശ്വനി വീഴ്ത്തി. എന്നാൽ റസലിന്റെ വിക്കറ്റ് പിഴുതതിന് പിന്നാലെ പിന്നെ ഒരു ഓവർ അശ്വനിക്ക് ഹർദിക് നൽകിയില്ല. 

അശ്വനിക്ക് പകരം വിഘ്നേഷ് പുത്തൂരിനും മിച്ചൽ സാന്റ്നറിനുമാണ് ഹർദിക് പിന്നെ പന്ത് നൽകിയത്. 16.2 ഓവറിൽ കൊൽക്കത്ത നൈറ്റ്റൈഡേഴ്സ് ഓൾഔട്ടാവുകയും ചെയ്തു. ഇതോടെ അശ്വനിക്ക് അഞ്ച് വിക്കറ്റ് എന്ന നേട്ടം അരങ്ങേറ്റ മത്സരത്തിൽ നേടാനായില്ല. 

ഞാൻ ആയിരുന്നു മുംബൈ ക്യാപ്റ്റൻ എങ്കിൽ...

"അശ്വനിയുടെ ദിവസമായിരുന്നു ഇന്നലെ. ഭാഗ്യം അവനൊപ്പം നിന്നു. ഇതുപോലൊരു മത്സരത്തിൽ​ കളിക്കാനാവുകയും അതിൽ മികച്ച പ്രകടനം പുറത്തെടുക്കാൻ സാധിക്കുകയും ചെയ്തു എന്നത് ചെറിയ കാര്യമല്ല. രഹാനെ, റിങ്കു സിങ് എന്നിരെ പോലുള്ള ബാറ്റർമാരെ വീഴ്ത്തിയാൽ ഏത് ബാറ്ററുടേയും ആത്മവിശ്വാസം ഉയരും. പിന്നാലെ മനീഷ് പാണ്ഡെയേയും റസലിനേയും പുറത്താക്കി അശ്വനി കഴിവ് തെളിയിച്ചു," ഹർഭജൻ സിങ് പറയുന്നു. 

"ഞാൻ മുംബൈ ക്യാപ്റ്റനായിരുന്നു എങ്കിൽ അവന് ഒരിക്കലും നാല് വിക്കറ്റ് കൊണ്ട് കളി അവസാനിപ്പിക്കേണ്ടി വരില്ലായിരുന്നു. ഓരോവർ കൂടി അഞ്ച് വിക്കറ്റ് നേട്ടം തികയ്ക്കാൻ അവന് ഞാൻ അവസരം നൽകുമായിരുന്നു. ഒരു ഓവർ കൂടി ഹർദിക് അശ്വനിക്ക് നൽകിയിരുന്നു എങ്കിൽ ഉറപ്പായും അശ്വനി അഞ്ചാമത്തെ വിക്കറ്റും വീഴ്ത്തുമായിരുന്നു," ഇന്ത്യൻ മുൻ സ്പിന്നർ ഹർഭജൻ സിങ് പറഞ്ഞു. 

Read More

• MI vs KKR: കൊൽക്കത്ത ചാരമായി; ആദ്യ ജയം ആഘോഷമാക്കി മുംബൈ ഇന്ത്യൻസ്
• Ashwani Kumar IPL: ഉച്ചഭക്ഷണം കഴിച്ചില്ല; സമ്മർദമായിരുന്നു; വിക്കറ്റ് വേട്ടയെ കുറിച്ച് അശ്വനി
• MI vs KKR: മുംബൈയുടെ മറ്റൊരു കണ്ടുപിടുത്തം; കൊൽക്കത്തയുടെ തലയറുത്തു; ആരാണ് അശ്വനി കുമാർ?
• IPL 2025: ഗ്രൗണ്ട് സ്റ്റാഫിന്റെ ഫോൺ എറിഞ്ഞ് റിയാൻ പരാഗ്; അഹങ്കാരി എന്ന് വിമർശനം