Vignesh Puthur: ഇനി വിഘ്നേഷ് പുത്തൂരിന് മുംബൈക്കായി കളിക്കാനായേക്കില്ല; കാരണം

Vignesh Puthur Mumbai Indians IPL 2025: ഐപിഎല്ലിൽ ഇതുവരെ ആറ് വിക്കറ്റാണ് മുംബൈ ഇന്ത്യൻസിന്റെ മലയാളി റിസ്റ്റ് സ്പിന്നർ വിഘ്നേഷ് പുത്തൂർ വീഴ്ത്തിയത്. എന്നാൽ മുംബൈ ഇന്ത്യൻസിന്റെ ഇനിയുള്ള മത്സരങ്ങളിൽ വിഘ്നേഷിനെ കാണാനുള്ള സാധ്യത കുറവാണ് എന്ന വിലയിരുത്തലുകളാണ് ഉയരുന്നത്. ഡൽഹിക്കെതിരായ മത്സരത്തിൽ ഇംപാക്ട് പ്ലേയറായി പോലും വിഘ്നേഷിനെ കളിപ്പിച്ചിരുന്നില്ല. പകരം മുംബൈ കളിപ്പിച്ചത് സ്പിന്നർ കരൺ ശർമയെ. കരൺ മുംബൈയെ വിജയത്തിലെത്തിക്കുകയും ചെയ്തു. ഇതോടെ വിഘ്നേഷിന്റെ വഴി അടയുമോ എന്ന ചോദ്യമാണ് ഉയരുന്നത്. 

മുംബൈ ഇന്ത്യൻസിന്റെ റോയൽ ചലഞ്ചേഴ്സ് ബെംഗളൂരുവിന് എതിരായ മത്സരത്തിൽ തന്റെ ആദ്യ ഓവറിൽ തന്നെ വിഘ്നേഷ് വിക്കറ്റ് വീഴ്ത്തിയിരുന്നു. എന്നാൽ രണ്ടാമത് പന്ത് വിഘ്നേഷിന്റെ കൈകളിലേക്ക് നൽകാൻ ഹർദിക് പാണ്ഡ്യ തയ്യാറായില്ല. എതിർനിരയുടെ കൂട്ടുകെട്ട് തകർത്ത് മുംബൈ ഇന്ത്യൻസിന് ബ്രേക്ക് നൽകി കഴിഞ്ഞ മത്സരങ്ങളിൽ കയ്യടി നേടിയിട്ടും വിഘ്നേഷിനെ വേണ്ടവിധം ഉപയോഗിക്കുന്നില്ലെന്ന വിമർശനം ശക്തമാണ്.  

ഡൽഹിക്കെതിരായ കളിയിൽ കരൺ ശർമയെ കളിപ്പിച്ച മുംബൈയുടെ തീരുമാനം ശരിയായതോടെ വിഘ്നേഷിന് കാര്യങ്ങൾ പ്രയാസമാവുകയാണ്.  ഡല്‍ഹിയെ മുംബൈ ഇന്ത്യന്‍സ് തോൽപ്പിച്ചപ്പോൾ കളിയിലെ താരമായത് 37കാരനായ കരണ്‍ ശര്‍മയാണ്. നാലോവറില്‍ 36 റണ്‍സ് വഴങ്ങി മൂന്ന് നിർണായക വിക്കറ്റുകളാണ് കരൺ ശർമ വീഴ്ത്തിയത്. അഭിഷേക് പൊറെല്‍, കെഎല്‍ രാഹുല്‍, ട്രിസ്റ്റണ്‍ സ്റ്റബ്‌സ് എന്നിവരെ മടക്കിയാണ് കരൺ മുംബൈയെ കളിയിലേക്ക് തിരികെ കൊണ്ടുവന്നത്. മറ്റൊരു സ്പിന്നറായ മിച്ചൽ സാന്റ്നറും ബോളിങ്ങിൽ ഡൽഹിക്കെതിരെ തിളങ്ങി. രണ്ടു വിക്കറ്റാണ് സാന്റ്നർ വീഴ്ത്തിയത്. ബാറ്റിങ്ങിൽ കൂടി മുംബൈക്ക് സാന്റ്നറിനെ ആശ്രയിക്കാം എന്നതിനാൽ ന്യൂസിലൻഡ് താരത്തിന് മുൻതൂക്കം ലഭിക്കും.

ഡൽഹിക്കെതിരെ മികവ് കാണിച്ചതോടെ കരൺ ശർമയ്ക്ക് ആയിരിക്കും ഇനി വിഘ്നേഷിനേക്കാൾ പരിഗണന നൽകുന്നതെന്നുറപ്പ്. ചെന്നൈ സൂപ്പര്‍ കിങ്‌സിനെ എതിരെ ഇംപാക്ട് പ്ലേയറായി ഇറങ്ങി വിക്കറ്റ് പിഴുതാണ് വിഘ്നേഷ് ഇന്ത്യൻ ക്രിക്കറ്റ് ലോകത്തെ അമ്പരപ്പിച്ചത്. ചെന്നൈക്കെതിരായ ആദ്യ മത്സരത്തിൽ മുംബൈയെ നയിച്ചത് സൂര്യകുമാര്‍ യാദവ് ആയിരുന്നു. വിഘ്നേഷിന് സൂര്യകുമാർ നാലോവറും നൽകി. എന്നാൽ ഹർദിക് പാണ്ഡ്യ ക്യാപ്റ്റനായി എത്തിയതിന് ശേഷം വിഘ്നേഷിന് വേണ്ടവിധം അവസരം ലഭിച്ചിട്ടില്ല. 

Read More

• 55 പന്തിൽ 141; റെക്കോർഡുകൾ കടപുഴക്കി അഭിഷേക്; ഉദിച്ചുയർന്ന് ഹൈദരാബാദ്
• ബെംഗളൂരുവിന്റെ നെഞ്ചുപിളർത്തി മക്ലാരന്റെ ഗോൾ; ഐഎസ്എൽ കിരീടം മോഹൻ ബഗാന്
• മൂന്ന് വർഷമായി പ്രണയത്തിൽ? ആരാണ് മാഡി? യശസ്വിക്കായി പറന്നെത്തുന്ന യുവതി
• ഫിറ്റ്നസൊക്കെ എന്തിന്! ആവി പറക്കും മട്ടൻ ബിരിയാണി ആസ്വദിച്ച് പാക്കിസ്ഥാൻ താരങ്ങൾ