സഞ്ജു അല്ല, ഋഷഭ് പന്ത് ആണ് മികച്ച വിക്കറ്റ് കീപ്പർ: സുനിൽ ഗാവസ്കർ

എന്തുകൊണ്ട് ചാംപ്യൻസ് ട്രോഫി സ്ക്വാഡിൽ സഞ്ജു സാംസണിന് പകരം വിക്കറ്റ് കീപ്പറായി ഋഷഭ് പന്തിനെ തിരഞ്ഞെടുത്തു എന്നതിൽ പ്രതികരണവുമായി ഇന്ത്യൻ മുൻ ക്യാപ്റ്റൻ സുനിൽ ഗാവസ്കർ. സഞ്ജുവിനേക്കാൾ മികച്ച വിക്കറ്റ് കീപ്പർ ഋഷഭ് പന്ത് ആണ് എന്നാണ് പന്തിനെ സ്ക്വാഡിൽ ഉൾപ്പെടുത്തിയ സെലക്ടർമാരുടെ തീരുമാനത്തെ ന്യായീകരിച്ച് ഗാവസ്കർ പറഞ്ഞത്. 

'തുടരെ സെഞ്ചുറികൾ അടിച്ച് നിൽക്കുന്ന സഞ്ജുവിനെ ഒഴിവാക്കുക എന്നത് പ്രയാസകരമായ തീരുമാനമായിരുന്നിരിക്കും. കാരണം തുടരെ സഞ്ജു സെഞ്ചുറികൾ നേടി. എന്നാൽ നമുക്ക് അറിയാം ഋഷഭ് പന്ത് ഗെയിം ചെയിഞ്ചറാണ്. കൂടാതെ പന്തിന്റെ സാന്നിധ്യത്തിലൂടെ സ്ക്വാഡിലേക്ക് ഇടംകയ്യൻ ബാറ്ററും എത്തുന്നു. സഞ്ജുവിനേക്കാൾ മികച്ച ബാറ്റർ ആയിരിക്കില്ല പന്ത്. പക്ഷേ സഞ്ജുവിനേക്കാൾ മികച്ച വിക്കറ്റ് കീപ്പറാണ് പന്ത്, ഗാവസ്കർ പറഞ്ഞു. 

പന്തിന് വളരെ വേഗം കളിയുടെ ഗതി തിരിക്കാൻ സാധിക്കും. അത് പരിഗണിച്ചായിരിക്കണം സഞ്ജുവിനെ സ്ക്വാഡിൽ ഉൾപ്പെടുത്താതിരുന്നത്. എന്നാൽ സ്ക്വാഡിൽ ഉൾപ്പെടാതിരുന്നതിന് സഞ്ജുവിന് നിരാശയുടെ ആവശ്യം ഇല്ല. കാരണം സഞ്ജുവിന്റെ ഇതുവരെയുള്ള നേട്ടങ്ങൾ എല്ലാ ഇന്ത്യൻ ആരാധകരുടേയും മനസിലുണ്ട്, ഗാവസ്കർ പറഞ്ഞു. 

ദക്ഷിണാഫ്രിക്കയ്ക്ക് എതിരായ കഴിഞ്ഞ ട്വന്റി20 പരമ്പരയിൽ രണ്ട് സെഞ്ചുറി നേടിയതോടെ സഞ്ജു ട്വന്റി20 ടീമിലെ സ്ഥാനം ഉറപ്പിച്ചിരുന്നു. 16 ഏകദിനമാണ് സഞ്ജു ഇതുവരെ ഇന്ത്യക്കായി കളിച്ചത്. നേടിയത് 510 റൺസ്. ബാറ്റിങ് ശരാശരി 56.66. 99.60 ആണ് ഏകദിനത്തിലെ സഞ്ജുവിന്റെ സ്ട്രൈക്ക്റേറ്റ്. ഒരു സെഞ്ചുറിയും മൂന്ന് അർധ ശതകവും സഞ്ജു ഏകദിനത്തിൽ നേടി. 2023 ഡിസംബറിൽ ദക്ഷിണാഫ്രിക്കയ്ക്ക് എതിരെ നേടിയ 108 റൺസ് ആണ് ഏകദിനത്തിലെ സഞ്ജുവിന്റെ ഉയർന്ന സ്കോർ. 

ഇന്ത്യയുടെ ചാംപ്യൻസ് ട്രോഫി സ്ക്വാഡ്

രോഹിത് ശർമ(ക്യാപ്റ്റൻ), ശുഭ്മാൻ ഗിൽ(വൈസ് ക്യാപ്റ്റൻ), വിരാട് കോഹ്ലി, ശ്രേയസ് അയ്യർ, കെഎൽ രാഹുൽ, ബുമ്ര, മുഹമ്മദ് ഷമി, അർഷ്ദീപ് സിങ്, യശസ്വി ജയ്സ്വാൾ, ഋഷഭ് പന്ത്, രവീന്ദ്ര ജഡേജ. 

Read More

• 10 വര്‍ഷത്തിന് ശേഷം രോഹിത് ശര്‍മ്മ രഞ്ജിയിലേക്ക്
• പുജാരയെ പോലെ കളിക്കൂ: കോഹ്ലിക്ക് മഞ്ജരേക്കറുടെ ഉപദേശം
• Champions Trophy 2025: സഞ്ജു ഇല്ല; ചാമ്പ്യൻസ് ട്രോഫിയിൽ ഇന്ത്യയെ രോഹിത് നയിക്കും
• പരുക്ക് വില്ലനായി; കോഹ്‌ലിയും രാഹുലും രഞ്ജി കളിക്കില്ല