Mohun Bagan vs Bengaluru: സോൾട്ട്ലേക്കിൽ തീപാറും പോരാട്ടം; ഐഎസ്എൽ കിരീടം ആര് ചൂടും? മത്സരം എവിടെ കാണാം?

MBSG vs BFC ISL Final 2024-25: കൊൽക്കത്തയിലെ സോൾട്ട്ലേക്ക് സ്റ്റേഡിയത്തിൽ ഇന്ന് പോരാട്ടം തീപാറും. ഐഎസ്എൽ കലാശപ്പോരിൽ മോഹൻ ബഗാനും ബെംഗളൂരു എഫ്സിയും നേർക്കുനേർ വരുമ്പോൾ പോരാട്ടം കനക്കും എന്നുറപ്പ്. 2023ലെ ഫൈനലിൽ പെനാൽറ്റി ഷൂട്ടൗട്ടിലേക്ക് നീണ്ട പോരിൽ മോഹൻ ബഗാന് മുൻപിൽ വീണതിന്റെ കണക്ക് തീർക്കാൻ ഉറച്ചാവും ബെംഗളൂരു എഫ്സി ഇന്ന് ഇറങ്ങുക. 

ഐഎസ്എൽ ചരിത്രത്തിൽ ഇത് തുടരെ മൂന്നാം വട്ടമാണ് മോഹൻ ബഗാൻ കലാശപ്പോരിലെത്തുന്നത്. രണ്ടാം ഐഎസ്എൽ കിരീടമാണ് മോഹൻ ബഗാൻ ലക്ഷ്യം വയ്ക്കുന്നത്. അവസാന മിനിറ്റിൽ ഗോൾ നേടിയാണ് ബെംഗളൂരുവും മോഹൻ ബഗാനും ജംഷഡ്പൂരിനും എഫ്സി ഗോവയ്ക്കും പുറത്തേക്കുള്ള വഴി തുറന്ന്  ഫൈനലിലേക്ക് എത്തിയത്. 

വിന്നേഴ്സ് ഷീൽഡുമായി കരുത്ത് കാണിച്ച് മോഹൻ ബഗാൻ

ജോസ് മൊളീനയുടെ കീഴിൽ ലീഗ് ഘട്ടത്തിൽ ഒന്നാം സ്ഥാനം പിടിച്ച് വിന്നേഴ്സ് ഷീൽഡ് സ്വന്തമാക്കിയാണ് മോഹൻ ബഗാൻ സീസൺ ആഘോഷിച്ചത്. 24 മത്സരങ്ങളിൽ 17 എണ്ണത്തിലും ജയിച്ചാണ് മോഹൻ ബഗാൻ കരുത്ത് കാണിച്ചത്. തോറ്റത് രണ്ടെണ്ണത്തിൽ മാത്രം. മോഹൻ ബഗാനും ബെംഗളൂരുവും ലീഗ് ഘട്ടത്തിൽ രണ്ട് വട്ടം വീതം ഏറ്റുമുട്ടിയപ്പോൾ ഇരു ടീമും ഓരോ ജയം വീതം നേടി. 

മുന്നേറ്റ നിരയിൽ ജേസൺ കമ്മിങ്സും ജാമി മക്ലാരനുമാണ് മോഹൻ ബഗാന്റെ കരുത്ത്. സീസൺ അവസാനത്തോടെ മികച്ച തിരിച്ചുവരവ് നടത്തിയാണ് ബെംഗളൂരു എഫ്സി കരുത്ത് കാണിച്ചത്. സുനിൽ ഛേത്രി, നൊഗ്വേര എന്നീ കളിക്കാരാണ് ബെംഗളൂരുവിന്റെ കരുത്ത്. 

മൊളീനയുടേയും സരഗോസയുടേയും തന്ത്രങ്ങൾ എങ്ങനെയാവും?

ഹോം ഗ്രൗണ്ടിൽ ഫൈനൽ കളിക്കുന്നു എന്നത് മോഹൻ ബഗാന്റെ ആത്മവിശ്വാസം കൂട്ടുന്നുണ്ട്. സീസണിൽ സോൾട്ട് ലേക്കിൽ തോറ്റിട്ടില്ല എന്നതും മോഹൻ ബഗാന് മുൻതൂക്കം നൽകുന്നു. എന്നാൽ ഹോം ഗ്രൗണ്ടിൽ ഐഎസ്എൽ ഫൈനൽ കളിച്ച ടീം ഇതുവരെ കിരീടം ചൂടിയിട്ടില്ല എന്നത് മോഹൻ ബഗാന് തിരിച്ചടിയാവുമോ എന്നും അറിയണം. 

കഴിഞ്ഞ വർഷം മുംബൈ സിറ്റിയാണ് മോഹൻ ബഗാന്റെ കിരീട സ്വപ്നങ്ങൾ തകർത്തത്. 2019 സീസണിൽ ആണ് ബെംഗളൂരു എഫ്സി തങ്ങളുടെ കന്നി ഐഎസ്എൽ കിരീടത്തിൽ മുത്തമിട്ടത്. ഇന്ന് സോൾട്ട്ലേക്ക് സ്റ്റേഡിയത്തിൽ ജോസ് മൊളീനയുടേയും ജെറാർഡ് സരഗോസയുടേയും തന്ത്രങ്ങൾ എങ്ങനെയാവും എന്നറിയാനുള്ള ആകാംക്ഷയിലാണ് ആരാധകർ. 

50 ഗോളുകളാണ് ഈ സീസണിൽ മോഹൻ ബഗാൻ അടിച്ചുകൂട്ടിയത്. ബെംഗളൂരുവിൽ നിന്ന് വന്നത് 48 ഗോളുകളും. എന്നാൽ 18 ഗോളുകൾ മാത്രമാണ് മോഹൻ ബഗാൻ ഈ സീസണിൽ വഴങ്ങിയത്. ബെംഗളൂരു വഴങ്ങിയത് 33 ഗോളുകളും.  

മോഹൻ ബഗാൻ ബെംഗളൂരു എഫ്സി ഫൈനൽ മത്സരം എത്ര മണിക്ക് ആരംഭിക്കും? 

മോഹൻ ബഗാൻ ബെംഗളൂരു എഫ്സി കലാശപ്പോരാട്ടം ഇന്ത്യൻ സമയം രാത്രി 7.30ന് ആരംഭിക്കും. 

മോഹൻ ബഗാൻ ബെംഗളൂരു എഫ്സി മത്സരം ടെലിവിഷനിൽ ലൈവായി എവിടെ കാണാം? 

മോഹൻ ബഗാൻ ബെംഗളൂരു എഫ്സി പോര് ലൈവായി സ്റ്റാർ സ്പോർട്സ് 3യിൽ കാണാം. 

മോഹൻ ബഗാൻ ബെംഗളൂരു എഫ്സി മത്സരത്തിന്റെ ലൈവ് സ്ട്രീം എവിടെ? 

മോഹൻ ബഗാൻ ബെംഗളൂരു എഫ്സി മത്സരത്തിന്റെ ലൈവ് സ്ട്രീം ജിയോഹോട്സ്റ്റാർ ആപ്പിലും വെബ്സൈറ്റിലും ലഭ്യമാവും. 

Read More

• ക്രിസ്റ്റ്യാനോ റൊണാൾഡോയെക്കാൾ കുതിച്ചുയർന്ന് ബ്രാൻഡ് സിആർ7
• 'വേട്ട അവസാനിപ്പിച്ചു എന്ന് ഇരയെ വിശ്വസിപ്പിച്ച ശേഷം ഒരു തിരിച്ചുവരവുണ്ട്'; വിട്ടുകൊടുക്കില്ലെന്ന് എംബാപ്പെ
• ഒരൊറ്റ സീസണിൽ 100 സേവ്; ബ്ലാസ്റ്റേഴ്സ് കൈവിട്ട ഗോൾകീപ്പറുടെ മാസ് തിരിച്ചുവരവ്
• വൻലാൽസുയിഡിക ബ്ലാസ്റ്റേഴ്സിലേക്ക് വരുമോ? സ്റ്റാർ റൈറ്റ് ബാക്കിനായി അഞ്ച് ക്ലബുകൾ