MI vs KKR: അരങ്ങേറ്റക്കാരൻ അശ്വനിക്ക് നാല് വിക്കറ്റ്; 116ന് കൊൽക്കത്ത ഓൾഔട്ട്

MI vs KKR IPL 2025: ഐപിഎൽ പതിനെട്ടാം സീസണിലെ ആദ്യ ജയം തേടി ഇറങ്ങിയ മുംബൈ ഇന്ത്യൻസ് വാങ്കഡെയിൽ കൊൽക്കത്ത നൈറ്റ്റൈഡേഴ്സ് ബാറ്റർമാരെ എറിഞ്ഞിട്ടു. 16.2 ഓവറിൽ 116 റൺസിന് ആണ് കൊൽക്കത്ത നൈറ്റ്റൈഡേഴ്സ് ഓൾഔട്ടായത്. അരങ്ങേറ്റത്തിൽ നാല് വിക്കറ്റ് പിഴുത അശ്വനി കുമാർ ആണ് കൊൽക്കത്ത ബാറ്റർമാരെ തുടരെ വീഴ്ത്തിയത്. 26 റൺസ് എടുത്ത രഘുവൻഷിയാണ് കൊൽക്കത്തയുടെ ടോപ് സ്കോറർ.

മുംബൈ ഇന്ത്യൻസിന് 117  റൺസ് വിജയ ലക്ഷ്യം. ടോസ് നേടിയ മുംബൈ ഇന്ത്യൻസ് കൊൽക്കത്തയെ ബാറ്റിങ്ങിന് അയക്കുകയായിരുന്നു. കൊൽക്കത്ത ഇന്നിങ്സിലെ ആദ്യ ഓവറിലെ നാലാമത്തെ പന്തിൽ സുനിൽ നരെയ്നെ വീഴ്ത്തി ട്രെന്റ് ബോൾട്ട് ആണ് മുംബൈയുടെ വിക്കറ്റ് വേട്ടയ്ക്ക് തുടക്കമിട്ടത്. രണ്ട് പന്തിൽ ഡക്കായാണ് നരെയ്ൻ മടങ്ങിയത്. കൊൽക്കത്ത ഓപ്പണറെ ബോൾട്ട് ക്ലീൻ ബൗൾഡ് ആക്കുകയായിരുന്നു. 

നരെയ്ൻ മടങ്ങിയതിന് ശേഷം കൊൽക്കത്ത സ്കോർ ബോർഡിലേക്ക് ഒരു റൺസ് കൂടി കൂട്ടിച്ചേർത്തപ്പോഴേക്കും ഓപ്പണർ ഡികോക്കിനെ വീഴ്ത്തി ദീപക് ചഹറിന്റെ പ്രഹരം. പിന്നെ മുംബൈയുടെ അരങ്ങേറ്റക്കാരൻ അശ്വനി കുമാറിന്റെ ഊഴമായിരുന്നു. ദീപക് ചഹറിനെ മാറ്റി നാലാം ഓവറിൽ അശ്വനി കുമാറിന്റെ കൈകളിലേക്ക് പന്ത് നൽകി ഹർദിക് നടത്തിയ ബോളിങ് ചെയിഞ്ച് ഫലം കണ്ടു. 

അരങ്ങേറ്റ മത്സരത്തിലെ ആദ്യ ഓവറിലെ ആദ്യ പന്തിൽ അശ്വനി കുമാറിന് വിക്കറ്റ്. 11 റൺസ് എടുത്ത് നിന്ന കൊൽക്കത്ത ക്യാപ്റ്റൻ രഹാനെയാണ് ഐപിഎല്ലിലെ അശ്വനിയുടെ ആദ്യ ഇര. വെങ്കടേഷ് അയ്യരെ വീഴ്ത്തി ദീപക് ചഹറിന്റെ പ്രഹരം വീണ്ടും എത്തിയതിന് പിന്നാലെ 16 പന്തിൽ നിന്ന് 26 റൺസ് എടുത്ത് നിന്ന രഘുവൻഷിയെ ഹർദിക് പാണ്ഡ്യയും മടക്കി. ഇതോടെ 45-5ലേക്ക് കൊൽക്കത്ത നൈറ്റ്റൈഡേഴ്സ് വീണു. 

അശ്വനി കുമാറിന്റെ രണ്ടാം ഓവറിൽ റിങ്കു സിങ്ങും മനേഷ് പാണ്ഡേയും ഡ്രസ്സിങ് റൂമിലേക്ക് മടക്കി. തന്റെ മൂന്നാമത്തെ ഓവറിൽ റസലിനെ അശ്വനി ക്ലീൻ ബൗൾഡാക്കി. അരങ്ങേറ്റത്തിൽ മൂന്ന് ഓവറിൽ 24 റൺസ് മാത്രം വഴങ്ങിയാണ് അശ്വനി നാല് വിക്കറ്റ് പിഴുതത്. 12 പന്തിൽ നിന്ന് 22 റൺസ് എടുത്ത് രമൺദീപ് സിങ് കൊൽക്കത്തയുടെ സ്കോർ 100 കടത്താൻ സഹായിച്ചു. 

View this post on Instagram

A post shared by Mumbai Indians (@mumbaiindians)

വിഘ്നേഷിന് ഒരു വിക്കറ്റ്

മലയാളി താരം വിഘ്നേഷ് പുത്തൂർ ഒരു വിക്കറ്റ് പിഴുതു. വിഘ്നേഷിന്റെ ആദ്യ ഓവർ മികച്ചതായിരുന്നില്ല. എന്നാൽ തന്റെ രണ്ടാം ഓവറിൽ ഹർഷിത് റാണയെ വിഘ്നേഷ് വീഴ്ത്തി. ഇതോടെ രണ്ട് കളിയിൽ നിന്ന് വിഘ്നേഷിന്റെ വിക്കറ്റ് വേട്ട നാലായി. ദീപക് ചഹർ രണ്ട് വിക്കറ്റും ബോൾട്ട്, ഹർദിക് പാണ്ഡ്യ, മിച്ചൽ സാന്റ്നർ എന്നിവർ ഓരോ വിക്കറ്റും വീഴ്ത്തി. 

Read More

• RR Vs CSK: ധോണി നേരത്തെ ഇറങ്ങിയിട്ടും രക്ഷയില്ല; ആദ്യ ജയം തൊട്ട് രാജസ്ഥാൻ റോയൽസ്
• Sanju Samson: ഒന്ന് മുതൽ ആറ് വരെയുള്ള ഓവർ; സഞ്ജുവിന്റെ റൺവേട്ട ഞെട്ടിക്കുന്നത്
• SRH vs DC IPL 2025: വീണ്ടും തോറ്റ് ഹൈദരാബാദ്; ഡൽഹിക്ക് അനായാസ ജയം
• SRH vs DC: ആരാണ് സീഷാൻ അൻസാരി? പട്ടിണിയോട് പടവെട്ടി വരവ്; ലെഗ് ബ്രേക്ക് ഗൂഗ്ലി വജ്രായുധം