Kerala Blasters: ഗോൾവേട്ടക്കാരൻ സ്ട്രൈക്കർ ബ്ലാസ്റ്റേഴ്സ് വിടുമോ? റാഞ്ചാൻ മറ്റ് ക്ലബുകൾ

Kerala Blasters: ഐഎസ്എൽ അവസാന ഘട്ടത്തിലേക്ക് കടക്കുകയാണ്. ഈ സമയം സീസണിൽ എട്ടാം സ്ഥാനത്ത് ഫിനിഷ് ചെയ്ത് ടൂർണമെന്റിൽ നിന്ന് പുറത്തായ കേരള ബ്ലാസ്റ്റേഴ്സ് സ്ക്വാഡ് ശക്തിപ്പെടുത്താനുള്ള ശ്രമങ്ങളിലാണ്. മികച്ച കളിക്കാരെ സ്ക്വാഡിലേക്ക് എത്തിച്ചില്ലെങ്കിൽ ആരാധകർ ടീമിൽ നിന്ന് ഇനിയും അകലും എന്ന് വ്യക്തം. നിലവിൽ സൂപ്പർ കപ്പിനുള്ള പരിശീലനങ്ങളിലാണ് കേരള ബ്ലാസ്റ്റേഴ്സ്. അതിന് ഇടയിൽ കേരള ബ്ലാസ്റ്റേഴ്സിന്റെ ഗോൾ വേട്ടക്കാരൻ സ്ട്രൈക്കറെ ടീമിന് നഷ്ടമാവുമോ എന്ന ആശങ്കയും ആരാധകരുടെ ഉള്ളിലുണ്ട്. 

കേരള ബ്ലാസ്റ്റേഴ്സിന്റെ സ്പാനിഷ് മുന്നേറ്റ നിര താരം ഹെസ്യൂസ് ഹിമെനെയെ ലക്ഷ്യമിട്ട് മറ്റ് ഐഎസ്എൽ ക്ലബുകൾ എത്തുന്നതായാണ് സൂചനകൾ. രണ്ട് വർഷത്തെ കരാറിലാണ് 31കാരനായ ഹിമനെ കേരള ബ്ലാസ്റ്റേഴ്സിലേക്ക് എത്തിയത്. 2026 സീസൺ വരെ കേരള ബ്ലാസ്റ്റേഴ്സുമായി ഹിമെനെയ്ക്ക് കരാർ ഉണ്ടെങ്കിലും താരം ക്ലബ് വിട്ടേക്കുമോ എന്ന ആശങ്ക ആരാധകർക്ക് മുൻപിലുണ്ട്. നിലവിൽ ഹിമനെയെ സ്ക്വാഡിൽ നിലനിർത്താൻ ആണ് കേരള ബ്ലാസ്റ്റേഴ്സ് മാനേജ്മെന്റീന്റെ തീരുമാനം എന്നാണ് റിപ്പോർട്ടുകൾ. 

7.2 കോടി രൂപയാണ് സെന്റർ ഫോർവേർഡ് ആയ ഹിമനെയുടെ ട്രാൻസ്ഫർ മൂല്യം. ഈ സീസണിൽ 18 ഐഎസ്എൽ മത്സരങ്ങളിൽ നിന്ന് 11 ഗോളുകളാണ് ഹിമനെ സ്കോർ ചെയ്തത്. ഒരു അസിസ്റ്റും താരത്തിൽ നിന്ന് വന്നു. ഈ സീസണിലെ കേരള ബ്ലാസ്റ്റേഴ്സിന്റെ ടോപ് സ്കോററാണ് ഹിമനെ. ഐഎസ്എൽ സീസണിലെ ഗോൾവേട്ടക്കാരുടെ പട്ടികയിൽ ആദ്യ പത്തിൽ ഇടം നേടാനും ഹിമെനെയ്ക്ക് സാധിച്ചു. 

സെന്റർ ഫോർവേർഡ് ആയും അറ്റക്കിങ് മിഡ്ഫീൽർറായും ഇടത് വിങ്ങറായും ഹിമനെയെ കളിപ്പിക്കാനാവും. ഏതെല്ലാം ഐഎസ്എൽ ടീമുകളാണ് കേരള ബ്ലാസ്റ്റേഴ്സിന്റെ വിദേശ സ്ട്രൈക്കറെ നോട്ടമിട്ടിരിക്കുന്നതെന്ന വിവരങ്ങൾ പുറത്തുവന്നിട്ടില്ല. എന്നാൽ അടുത്ത സീസണിലും കേരള ബ്ലാസ്റ്റേഴ്സിനൊപ്പം തന്നെ തുടരാൻ ഹിമനെ തീരുമാനിക്കും എന്നാണ് മഞ്ഞപ്പടയുടെ പ്രതീക്ഷ. 

Read More

• ISL: ഒരു മയത്തിലൊക്കെ വേണ്ടേ!മുംബൈയെ വീഴ്ത്തി; ബെംഗളൂരു സെമിയിൽ
• പൊന്നും പണം തന്നാൽ എടുത്തോ! ഹോർമിപാമിനെ വിൽക്കാൻ തയ്യാറായി കേരള ബ്ലാസ്റ്റേഴ്സ്; റിപ്പോർട്ട്
• മെസിയും ലാമിൻ യമാലും നേർക്കുനേർ; ഫൈനലിസിമ പോര് എന്ന്?
• Kerala Blasters: ലൊബേറയ്ക്കായി രണ്ട് കോടി; കേരള ബ്ലാസ്റ്റേഴ്സ് രണ്ടും കൽപ്പിച്ച് ഇറങ്ങിയിട്ടും രക്ഷയുണ്ടായില്ല