Champions Trophy: കറാച്ചി സ്റ്റേഡിയത്തിൽ ഇന്ത്യയുടെ പതാക മാത്രം ഇല്ല; വിമർശനം ശക്തം

ചാംപ്യൻസ് ട്രോഫിക്ക് മുൻപായി കറാച്ചി സ്റ്റേഡിയത്തിന്റെ ഒരു വിഡിയോയാണ് സമൂഹമാധ്യമങ്ങളിൽ വൈറലായത്. ചാംപ്യൻസ് ട്രോഫിയിൽ പങ്കെടുക്കുന്ന രാജ്യങ്ങളുടെ പതാകകൾ കറാച്ചി സ്റ്റേഡിയത്തിൽ വെച്ചപ്പോൾ ഇന്ത്യയുടെ പതാക ഒഴിവാക്കപ്പെട്ടിരുന്നു. എന്തുകൊണ്ട് പാക്കിസ്ഥാൻ ക്രിക്കറ്റ് ബോർഡിന്റെ ഭാഗത്ത് നിന്ന് ഇത്തരം ഒരു നീക്കം വന്നു എന്ന ചോദ്യമാണ് വ്യാപകമായി ഉയർന്നത്. 

ഇന്ത്യ ചാംപ്യൻസ് ട്രോഫിയിലെ തങ്ങളുടെ എല്ലാ മത്സരങ്ങളും ദുബായിൽ കളിക്കുന്നതിനാലായിരിക്കാം ഇതെന്ന വിലയിരുത്തലാണ് ശക്തമായത്. എന്നാൽ സംഭവത്തിൽ ഇപ്പോൾ വിശദീകരണവമായി എത്തുകയാണ് പാക്കിസ്ഥാൻ ക്രിക്കറ്റ് ബോർഡ്. മത്സര ദിവസം നാല് പതാകകൾ മാത്രം ഉയർത്താനാണ് ഐസിസിയുടെ നിർദേശം എന്നാണ് പാക്കിസ്ഥാൻ ക്രിക്കറ്റ് ബോർഡ് വൃത്തങ്ങളെ ഉദ്ധരിച്ച് ഇന്ത്യാ ടുഡേ റിപ്പോർട്ട് ചെയ്യുന്നത്. 

"ചാംപ്യൻസ് ട്രോഫിയുടെ മത്സര ദിവസം നാല് പതാകകൾ മാത്രം ഉയർത്താനാണ് ഐസിസിയുടെ നിർദേശം. ഐസിസിയുടെ പതാക, ആതിഥേയരായ പാക്കിസ്ഥാന്റെ പതാക, അന്ന് മത്സരിക്കുന്ന രണ്ട് ടീമുകളുടെ പതാക എന്നിവ," ഇന്ത്യാ ടുഡേയുടെ റിപ്പോർട്ടിൽ പറയുന്നു. 

No Indian flag in Karachi: As only the Indian team faced security issues in Pakistan and refused to play Champions Trophy matches in Pakistan, the PCB removed the Indian flag from the Karachi stadium while keeping the flags of the other guest playing nations. pic.twitter.com/rjM9LcWQXs

— Arsalan (@Arslan1245) February 16, 2025

എന്നാൽ പാക്കിസ്ഥാനിൽ ചാംപ്യൻസ് ട്രോഫി മത്സരം കളിക്കുന്ന രാജ്യങ്ങളുടെ പതാക മാത്രമാണ് കറാച്ചി സ്റ്റേഡിയത്തിൽ ഉയർത്തിയത് എന്ന് പാക്കിസ്ഥാൻ ക്രിക്കറ്റ് ബോർഡ് പ്രതികരിച്ചതായും റിപ്പോർട്ട് ഉണ്ട്, പാക്കിസ്ഥാൻ ക്രിക്കറ്റ് ബോർഡ് വൃത്തങ്ങളെ ഉദ്ധരിച്ച് വാർത്താ ഏജൻസിയായ ഐഎഎൻഎസ് ആണ് ഈ റിപ്പോർട്ട് നൽകുന്നത്. 

"ചാംപ്യൻസ് ട്രോഫി മത്സരം കളിക്കാൻ ഇന്ത്യ പാക്കിസ്ഥാനിലേക്ക് എത്തുന്നില്ല. കറാച്ചി, റാവൽപിണ്ടി, ഗദ്ദാഫി സ്റ്റേഡിയങ്ങളിൽ അവിടെ കളിക്കുന്ന രാജ്യങ്ങളുടെ പതാകകൾ മാത്രമാണ് ഉയർത്തുന്നത്," പാക്കിസ്ഥാൻ ക്രിക്കറ്റ് ബോർഡ് വൃത്തങ്ങളെ ഉദ്ധരിച്ച് ഐഎഎൻഎസ് റിപ്പോർട്ട് ചെയ്യുന്നു. എന്തുകൊണ്ട് ബംഗ്ലാദേശിന്റെ പതാകയും ഉയർത്തിയിട്ടില്ല എന്ന ചോദ്യത്തിന്, ബംഗ്ലാദേശ് പാക്കിസ്ഥാനിലേക്ക് എത്തിയിട്ടില്ലെന്നും അവർ ആദ്യ മത്സരം കളിക്കുന്നത് ഇന്ത്യക്കെതിരെ ദുബായിലാണെന്നുമാണ് പാക്കിസ്ഥാൻ വൃത്തങ്ങളെ ഉദ്ധരിച്ചുള്ള ഐഎഎൻഎസിന്റെ റിപ്പോർട്ടിൽ പറയുന്നത്. 

Read More

• മുൻപിൽ നിന്ന് നയിച്ച് ക്യാപ്റ്റൻ; വിജയം വേഗത്തിലാക്കി ഡോട്ടിൻ; യുപിയെ തകർത്ത് ഗുജറാത്ത്
• Mumbai Indians: ചെന്നൈക്കെതിരെ രോഹിത് മുംബൈ ക്യാപ്റ്റനാവും? ഹർദിക്കിന് വിലക്ക്
• Rajasthan Royals Schedule: സഞ്ജുവിന്റെ പടയാളികൾ റെഡി; മത്സരക്രമം ഇങ്ങനെ
• Mumbai Indians IPL Schedule: എന്നാണ് എൽ ക്ലാസിക്കോ പോര്? മുംബൈ ഇന്ത്യൻസിന്റെ മത്സരക്രമം