/indian-express-malayalam/media/agency_attachments/RBr0iT1BHBDCMIEHAeA5.png)
Follow Us/indian-express-malayalam/media/media_files/2025/01/11/TMglZLdWG93IrYvkD1vO.jpg)
KL Rahul
കെ എല്‍ രാഹുലിനെ ഇംഗ്ലണ്ടിനെതിരെയുള്ള ഏകദിന ടീമിലേക്ക് പരിഗണിക്കുന്ന കാര്യത്തില്‍ തീരുമാനം മാറ്റി ബിസിസിഐ. നേരത്തെ രാഹുല്‍ ഇംഗ്ലണ്ടിനെതിരെയുള്ള പരമ്പരയില്‍ നിന്ന് മാറി നിക്കുമെന്നും, തിരുമാനം ബിസിസിഐ അംഗീകരിച്ചെന്നുമുള്ള റിപ്പോര്‍ട്ടുകള്‍ പുറത്തുവന്നിരുന്നു. എന്നാല്‍ ഏറ്റവും പുതിയ റിപ്പോര്‍ട്ടുകള്‍ പ്രകാരം അജിത് അഗാര്‍ക്കറുടെ നേതൃത്വത്തിലുള്ള സെലക്ഷന്‍ കമ്മിറ്റി രാഹുലിനോട് ഏകദിനത്തില്‍ കളിക്കാന്‍ തയ്യാറാകുവാന്‍ അറിയിച്ചിരിക്കുകയാണ്. ചാമ്പ്യന്‍സ് ട്രോഫിക്കു മുൻപായി മത്സര പരിചയം കിട്ടാന്‍ ഇത് സഹായകരമാവുമെന്നാണ് ബിസിസിഐയുടെ കണക്കുകൂട്ടല്‍.
അടുത്തിടെ അവസാനിച്ച ഓസ്‌ട്രേലിയക്കെതിരെയുള്ള ടെസ്റ്റ് പരമ്പരയില്‍ കുറച്ചെങ്കിലും റണ്ണെടുത്ത താരങ്ങളില്‍ ഒരാളായിരുന്നു രാഹുല്‍. 10 ഇന്നിങ്‌സുകളില്‍ നിന്നായി 276 റണ്ണസ് നേടിയ രാഹുല്‍ പരമ്പരയില്‍ ഇന്ത്യക്കായി ഏറ്റവും കൂടുതല്‍ റണ്‍ നേടിയവരില്‍ മൂന്നാമനായിരുന്നു.
ചാമ്പ്യന്‍സ് ട്രോഫി ടീമില്‍ ഇടംപിടിക്കാന്‍ സാധ്യത കുടുതലുണ്ടെങ്കിലും, വിക്കറ്റ് കീപ്പിങ് സ്ഥാനത്തേക്ക് റിഷഭ് പന്തിന്റെയും സഞ്ജു സാമ്‌സണിന്റെയും കടുത്ത വെല്ലുവിളി രാഹുല്‍ നേരിടുന്നുണ്ട്. വിക്കറ്റ് കീപ്പര്‍ സ്ഥാനത്തേക്ക് ഇത്ര മത്സരം ഉള്ളതുകൊണ്ട് കൂടിയാവണം രാഹുലിനോട് ഏകദിനം കളിക്കാന്‍ ബിസിസിഐ ആവശ്യപ്പെടുന്നത്. ഇംഗ്ലണ്ടിനെതിരെയുള്ള പരമ്പരയിലെ പ്രകടനം കണക്കിലെടുത്ത് ടീമില്‍ ഒരു അന്തിമ തിരുമാനം എടുക്കാനാവും ബിസിസിഐയുടെ തിരുമാനം.
അതിനിടെ ചാമ്പ്യന്‍സ് ട്രോഫി ടീം പ്രഖ്യാപിക്കാന്‍ ഐസിസിയോട് കുറച്ച്കൂടി സമയം ബിസിസിഐ ആവശ്യപ്പെട്ടതായും റിപ്പോര്‍ട്ടുകള്‍ സൂചിപ്പിക്കുന്നു. നിലവില്‍ ജനുവരി 12 വരെയാണ് ചാമ്പ്യന്‍സ് ട്രോഫിക്കായുള്ള ടീം പ്രഖ്യാപിക്കാനുള്ള സമയം ക്രിക്കറ്റ് ബോര്‍ഡുകള്‍ക്ക് ഐസിസി നല്‍കിയിട്ടുളത്.
മുഹമ്മദ് ഷാമി, അര്‍ഷ്ദീപ് സിങ്, സഞ്ജു സാമ്‌സണ്‍, കുല്‍ദീപ് യാദവ് എന്നിവരുടെ പേരുകള്‍ ചാമ്പ്യന്‍സ് ട്രോഫി ടീമിലേക്ക് പരിഗണിക്കുന്നുണ്ടെങ്കിലും ഒരു അന്തിമ തിരുമാനത്തിലേക്കെത്താന്‍ ബിസിസിഐക്ക് ആയിട്ടില്ല. ഇതുകൊണ്ടാണ് ടീം പ്രഖ്യാപിക്കാന്‍ ബിസിസിഐ കൂടുതല്‍ സമയം ചോദിച്ചിരിക്കുന്നത് എന്ന് വേണം കരുതാന്‍. ഫെബ്രുവരി 19ന് തുടങ്ങാനിരിക്കുന്ന ചാമ്പ്യന്‍സ് ട്രോഫിയില്‍ ഇന്ത്യയുടെ ആദ്യ മത്സരം ഫെബ്രുവരി 20ന് ബംഗ്ലാദേശിനെതിരെയാണ്. ഫെബ്രുവരി 23ന് ദുബയില്‍ വെച്ച് പാകിസ്താനെതിരെയാണ് ഇന്ത്യയുടെ രണ്ടാമത്തെ മത്സരം.
Read More
Stay updated with the latest news headlines and all the latest Lifestyle news. Download Indian Express Malayalam App - Android or iOS.