യഥാർഥ മതം മറച്ചുവെച്ച് വിവാഹം; യുവാവിന് ജീവപര്യന്തം തടവ്

ലഖ്നൗ: യഥാർഥ മതം മറച്ചുവെച്ച് ഇരുപതുകാരിയെ വിവാഹം ചെയ്ത യുവാവിന് ജീവപര്യന്തം തടവുശിക്ഷ വിധിച്ചു. ഉത്തർപ്രദേശിലെ ബറേലിയിലാണ് സംഭവം. മുഹമ്മദ് ആലിം അഹമ്മദ്, തന്റെ മതം മറച്ചുവെച്ച് ഹിന്ദുവാണെന്ന് പെൺകുട്ടിയെ തെറ്റിദ്ധരിപ്പിച്ച് വിവാഹം കഴിച്ചതിനാണ് ബറേലി ഫാസ്റ്റ് ട്രാക്ക് കോടതി ജീവപര്യന്തം തടവുശിക്ഷ വിധിച്ചത്. ഇയാളുടെ പിതാവ് സാബിർ അലിക്ക് രണ്ട് വർഷം തടവും ഒരുലക്ഷം രൂപ പിഴയും കോടതി വിധിച്ചു. ഉത്തർപ്രദേശ് സർക്കാർ ഈ വർഷമാദ്യം നിയമവിരുദ്ധ മതപരിവർത്തന ഭേദഗതി ബിൽ പാസാക്കിയതിന് പിന്നാലെയാണ് കോടതി വിധി.

കംപ്യൂട്ടർ പരിശീലന കേന്ദ്രത്തിൽ യുവതിക്കൊപ്പം പഠിച്ച യുവാവ് ആനന്ദ് കുമാറെന്ന പേരിലാണ് യുവതിയുമായി സൗഹൃദം പാലിച്ചത്. ഇത് പിന്നാലെ പ്രണയമായി വളരുകയായിരുന്നു. ഇതിനിടയിൽ യുവാവ് യുവതിയെ ഹോട്ടലിൽ കൊണ്ടുപോവുകയും അവിടെ വെച്ച് യുവതിയുടെ ദൃശ്യങ്ങൾ മൊബൈൽ ഫോണിൽ പകർത്തിയെന്നും യുവതിയുടെ ഹർജിയിൽ പറയുന്നു. പിന്നീട് 2022 മാർച്ച് 13-ന് ബറേലിയിലെ ഒരു ക്ഷേത്രത്തിൽ ഇരുവരും പോയി വിവാഹം കഴിച്ചെന്നുമാണ് യുവതിയുടെ മൊഴി. 

വിവാഹശേഷം വരന്റെ വീട്ടിലെത്തിയപ്പോഴാണ് വരന്റെ യഥാർഥ പേരും മതവും സംബന്ധിച്ചുള്ള വിവരങ്ങൾ അറിയുന്നതെന്ന് യുവതി മൊഴി നൽകി. വിവാഹം നിയമപരമായി രജിസ്റ്റർ ചെയ്യുന്നതിന് മുമ്പേ മതപരിവർത്തനത്തിന് വരന്റെ കുടുംബം തന്നെ നിർബന്ധിച്ചെന്നും യുവതി പറഞ്ഞു. ഇതിനെതുടർന്നാണ് യുവതി നിയമനടപടിയുമായി മുന്നോട്ട് നീങ്ങിയത്.

ക്ഷേത്രത്തിൽ വെച്ച് നടന്ന വിവാഹം അസാധുവാണെന്ന് വിധിച്ച് കോടതി, ബോധപൂർവ്വം മറ്റൊരു മതത്തിലേക്ക് മാറ്റാനുള്ള സമ്മർദ്ദ തന്ത്രമാണ് ഇതിന് പിന്നിലെന്നും നിരീക്ഷിച്ചു. സംഭവം, ലൗ ജിഹാദാണെന്ന് നിരീക്ഷിച്ച കോടതി ഇത്തരം സംഭവങ്ങളിൽ ആശങ്ക പ്രകടിപ്പിച്ചു. ഇത്തരം സംഭവങ്ങൾ തടയാൻ കർശന നടപടി സ്വീകരിക്കണമെന്നും കോടതി ഉത്തരവിട്ടു. 

Read More

• യുവതികളെ സന്യാസത്തിനു നിർബന്ധിച്ചെന്ന പരാതി; സദ്‌ഗുരുവിൻ്റെ ഇഷ ഫൗണ്ടേഷനിൽ പൊലീസ് പരിശോധന
• ലൈഫ് ഇൻഷുറൻസ് പോളിസികൾ ഇടയ്ക്ക് നിർത്തിയാലും ഉയർന്ന തുക ലഭിക്കും; പുതിയ നിമയ മാറ്റങ്ങളെക്കുറിച്ച് അറിയാം
• ലെബനനിൽ ഇസ്രായേൽ കരയുദ്ധം തുടങ്ങി, ഹിസ്ബുല്ല കേന്ദ്രങ്ങളെ ലക്ഷ്യമിട്ട് ശക്തമായ ആക്രമണം
• രജനീകാന്തിനെ ആശുപത്രിയിൽ പ്രവേശിപ്പിച്ചു, പ്രാർത്ഥനയോടെ ആരാധകർ
• പ്രളയക്കെടുതിയിൽ നേപ്പാൾ; മരണസംഖ്യ 193
• ഇന്ത്യക്കാർക്കായി 2.5 ലക്ഷം വിസാ സ്ലോട്ടുകൾ തുറന്ന് അമേരിക്ക