ഭക്ഷണം കഴിച്ചിട്ട് പാത്രം കഴുകിയില്ല; മകൻ അച്ഛനെ കൊന്നു

കൊച്ചി: ഭക്ഷണം കഴിച്ചിട്ട് പാത്രം കഴുകുന്നതിനെ ചൊല്ലിയുള്ള തർക്കത്തിനൊടുവിൽ മകൻ അച്ഛനെ കൊലപ്പെടുത്തി. ഇടക്കൊച്ചി പാലമുറ്റം എസ്.എ.എസി. റോഡിൽ തൈപ്പറമ്പിൽ ടി.ജി. ജോണി (64) ആണ് കൊല്ലപ്പെട്ടത്. സംഭവത്തിൽ മകൻ ലൈജുവിനെ (33) പൊലീസ് അറസ്റ്റ് ചെയ്തു. 

ശനിയാഴ്ച രാവിലെയാണ് ജോണിയെ വീടിനുള്ളിൽ മരിച്ച നിലയിൽ കണ്ടെത്തിയത്. സംഭവം നടന്ന രാത്രി ജോണി ഭക്ഷണം കഴിച്ച പാത്രം കഴുകി വെയ്ക്കുന്നതിനെചൊല്ലി ജോണിയും ലൈജുവും തമ്മിൽ വഴക്കുണ്ടായിരുന്നു. ഈ വഴക്കാണ് കൊലപാതകത്തിൽ കലാശിച്ചതെന്ന് പൊലീസ് പറഞ്ഞു. അടുക്കളിൽ ഉണ്ടായിരുന്ന ദണ്ഡ് ഉപയോഗിച്ച് ജോണിയുടെ തലയിലും വാരിയെല്ലിലും ലൈജു അടിക്കുകയായിരുന്നുവെന്ന് പൊലീസ് പറഞ്ഞു. ഇതാണ് മരണത്തിലേക്ക് നയിച്ചതെന്നും പൊലീസ് പറഞ്ഞു. 

കൊലപാതകത്തിന് ശേഷം ലൈജു തന്നെയാണ് ജോണിയുടെ മരണവിവരം നാട്ടുകാരെ അറിയിച്ചത്. സംഭവത്തിൽ ദുരൂഹത തോന്നിയ നാട്ടുകാർ പൊലീസിൽ വിവരം അറിയിക്കുകയായിരുന്നു. വെള്ളിയാഴ്ച രാത്രി ലൈജുവും ജോണിയും തമ്മിൽ വാക്കേറ്റമുണ്ടായതിന്റെ ശബ്ദം നാട്ടുകാർ കേട്ടതാണ്. ജോണിയുടെ അലർച്ചയും നാട്ടുകാർ കേട്ടിരുന്നു. ഇതാണ് നാട്ടുകാരിൽ സംശയം ജനിപ്പിച്ചത്. പൊലീസിന്റെ വിശദമായ ചോദ്യം ചെയ്യലിന് ഒടുവിലാണ് ലൈജു കുറ്റം സമ്മതിച്ചത്. 

ജോണിയുടെ സംരക്ഷണത്തിലാണ് കാര്യമായ ജോലിയൊന്നുമില്ലാത്ത ലൈജു കഴിഞ്ഞിരുന്നത്. പണത്തിന്റെ പേരിൽ ലൈജുവും ജോണിയും തമ്മിൽ നിരന്തരം വഴക്കുണ്ടാകാറുണ്ടെന്ന് നാട്ടുകാർ പറഞ്ഞു. സംഭവസമയം ജോണിയുടെ ഭാര്യ ഉൾപ്പടെയുള്ളവർ വീട്ടിൽ ഉണ്ടായിരുന്നില്ല. 

Read More

• കോഴിക്കോട് തീപിടിത്തം; തീ അണച്ചത് പത്ത് മണിക്കൂർ നീണ്ട ശ്രമത്തിനൊടുവിൽ, കോടികളുടെ നഷ്ടം
• കോഴിക്കോട് വൻ തീപിടുത്തം
• ശശി തരൂരിന് പിന്തുണയുമായി ലീഗ്; വിഷയത്തിൽ രാഷ്ട്രീയം നോക്കേണ്ടതില്ലെന്ന് സാദിഖലി തങ്ങൾ
• തപാൽ വോട്ട് പരാമർശം; മുൻകൂർ ജാമ്യാപേക്ഷ നൽകില്ലെന്ന് ജി. സുധാകരൻ; സജി ചെറിയാന് പരോക്ഷ വിമർശനം
• സംസ്ഥാനത്ത് ശക്തമായ മഴയ്ക്ക് സാധ്യത; അഞ്ചു ജില്ലകളിൽ ഇന്ന് മഞ്ഞ അലർട്ട്; അറബിക്കടലിൽ ന്യുനമർദ്ദ സാധ്യത