'ഇന്ത്യ അഭിമാനിക്കുന്നു;' ശുഭാംശു ശുക്ലയെ നേരിൽ കണ്ട് പ്രധാനമന്ത്രി

ഡൽഹി: ആക്സിയം - 4 ദൗത്യത്തിന്റെ ഭാഗമായി അന്താരാഷ്ട്ര ബഹിരാകാശ നിലയത്തിൽ 18 ദിവസം താമസിച്ച് ചരിത്രം സൃഷ്ടിച്ച് ഇന്ത്യയിലേക്ക് തിരിച്ചെത്തിയ ഗ്രൂപ്പ് ക്യാപ്റ്റൻ ശുഭാംശു ശുക്ല പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തി. പ്രധാനമന്ത്രിയുമായി സംസാരിച്ച അദ്ദേഹം യാത്രയിലെ അനുഭവങ്ങളും ദൗത്യത്തിന്റെ പ്രധാനഭാഗങ്ങളും പ്രധാനമന്ത്രിയുമായി പങ്കുവയ്ക്കുകയും ചെയ്തു.

ഡൽഹിയിൽ നടന്ന കൂടിക്കാഴ്ചയിൽ, പ്രധാനമന്ത്രിയ്ക്ക് ശുഭാംശു മെമന്റോ സമ്മാനിക്കുകയും അന്താരാഷ്ട്ര ബഹിരാകാശ നിലയത്തിൽ നിന്ന് പകർത്തിയ ഭൂമിയുടെ ചിത്രങ്ങൾ പങ്കുവെക്കുകയും ചെയ്തു. ദൗത്യത്തിനിടെ ഓർബിറ്റൽ ലാബിൽ കൊണ്ടുപോയ ദേശീയ പതാകയുമായി ഇരുവരും നിൽക്കുന്ന ചിത്രങ്ങൾ പ്രധാനമന്ത്രി എക്സിൽ പങ്കുവച്ചു.

Had a great interaction with Shubhanshu Shukla. We discussed a wide range of subjects including his experiences in space, progress in science & technology as well as india's ambitious Gaganyaan mission. India is proud of his feat.@gagan_shuxpic.twitter.com/RO4pZmZkNJ

— Narendra Modi (@narendramodi) August 18, 2025

Also Read: അഭിമാന താരകം,' ഇന്ത്യയിൽ മടങ്ങിയെത്തിയ ശുഭാംശു ശുക്ലയ്ക്ക് ഗംഭീര സ്വീകരണം

ബഹിരാകാശ മേഖലയിലെ അനുഭവങ്ങൾ ശുഭാംശു ശുക്ല പങ്കുവച്ചതായും, ശാസ്ത്ര സാങ്കേതിക മേഖലയിലെ പുരോഗതിയെക്കുറിച്ചും ഗഗൻയാൻ ദൗത്യം ഉൾപ്പെടെയുള്ള വിഷയങ്ങളെക്കുറിച്ചും ചർച്ച ചെയ്തതായും പ്രധാനമന്ത്രി എക്സിൽ കുറിച്ചു. ശുഭാംശുവിന്റെ നേട്ടത്തിൽ രാജ്യം അഭിമാനിക്കുന്നുവെന്നും അദ്ദേഹം പറഞ്ഞു.

ദൗത്യത്തിനു ശേഷമുള്ള നടപടിക്രമങ്ങൾ പൂർത്തിയാക്കി ഞായറാഴ്ച പുലർച്ചെയാണ് ശുഭാംശു ഇന്ത്യയിലേക്ക് തിരിച്ചെത്തിയത്.  ഡൽഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ എത്തിയ ശുഭാംശു ശുക്ലയെ, ഗംഭീര സ്വീകരണം ഒരുക്കിയാണ് വരവേറ്റത്. കുടുംബാംഗങ്ങളും കേന്ദ്രമന്ത്രി ജിതേന്ദ്ര സിംഗ്, ഡൽഹി മുഖ്യമന്ത്രി രേഖ ഗുപ്ത തുടങ്ങിയവരും ശുഭാംശുവിനെ സ്വീകരിക്കാൻ വിമാനത്താവളത്തിൽ എത്തിയിരുന്നു.

Also Read: ട്രംപുമായുള്ള കൂടിക്കാഴ്ചയ്ക്കു പിന്നാലെ പ്രധാനമന്ത്രിയെ നേരിട്ടു വിളിച്ച് പുടിൻ; വിശദാംശങ്ങൾ പങ്കുവച്ചു

ബഹിരാകാശ യാത്രയ്ക്ക് ശേഷം ജൂലൈ 15 നാണ് ഗ്രൂപ്പ് ക്യാപ്റ്റൻ ശുഭാൻശു ശുക്ല സുരക്ഷിതമായി ഭൂമിയിൽ തിരിച്ചെത്തിയത്. ജൂൺ 25 നാണ് ആക്സിയം -4 ന്റെ മിഷൻ പൈലറ്റായി അദ്ദേഹം ബഹിരാകാശത്തേയ്ക്ക് പോകുന്നത്. ജൂൺ 26ന് അന്താരാഷ്ട്ര ബഹിരാകാശ നിലയത്തിൽ എത്തിയ ദൗത്യസംഘം നേരത്തെ നിശ്ചയിച്ചതിനേക്കാൾ നാല് ദിവസം അധികം നിലയത്തിൽ ചെലവഴിച്ചാണ് ഭൂമിയിലേക്ക് മടങ്ങിയത്. ഏകദേശം ഒരു വർഷത്തിനു ശേഷമാണ് ശുഭാംശു ഇന്ത്യയിലേക്ക് തിരികെയെത്തുന്നത്. 

Read More: മഴയിൽ മുങ്ങി മുംബൈ; നഗരത്തിലെങ്ങും വെള്ളക്കെട്ട്; ദുരിതാശ്വാസ പ്രവർത്തനങ്ങൾക്ക് സൈന്യവും