19 മുൻ കേന്ദ്ര മന്ത്രിമാരുടെ സുരക്ഷ പിൻവലിച്ച് ആഭ്യന്തര മന്ത്രാലയം; സ്മൃതി ഇറാനിക്ക് സുരക്ഷ തുടരും

ന്യൂഡൽഹി: 19 മുൻ കേന്ദ്ര സഹമന്ത്രിമാരുടെ (എംഎച്ച്എ) സുരക്ഷ പിൻവലിക്കാൻ ഡൽഹി പോലീസിന് കേന്ദ്ര ആഭ്യന്തര മന്ത്രാലയം നിർദേശം നൽകിയതായി ദി ഇന്ത്യൻ എക്സ്പ്രസിന് വിവരം ലഭിച്ചു. ബിജെപി നേതാവും മുൻ കേന്ദ്രമന്ത്രിയുമായ സ്മൃതി ഇറാനിയുടെ സുരക്ഷ ആറ് മാസത്തേക്ക് കൂടി നീട്ടാൻ കേന്ദ്രം നിർദേശിച്ചിട്ടുണ്ട്.

കാലാവധി പൂർത്തിയായതിനുശേഷവും സുരക്ഷാ പരിരക്ഷയുള്ള മുൻ മന്ത്രിമാരുടെയും പാർലമെന്റ് അംഗങ്ങളുടെയും പട്ടിക ഡൽഹി പോലീസാണ് കേന്ദ്ര ആഭ്യന്തര മന്ത്രാലയത്തിന് സമർപ്പിച്ചത്. കഴിഞ്ഞ വർഷം ഡൽഹി പോലീസിന്റെ സുരക്ഷാ യൂണിറ്റ് നടത്തിയ ഒരു ഓഡിറ്റിന് ശേഷമാണ് പട്ടിക നൽകിയത്. "കാലാവധി കഴിഞ്ഞിട്ടും നിരവധി മുതിർന്ന രാഷ്ട്രീയക്കാർ സുരക്ഷാ പരിരക്ഷ ഉപയോഗിക്കുന്നുണ്ടെന്ന് ഓഡിറ്റിൽ വ്യക്തമായി. പല കേസുകളിലും, വളരെക്കാലമായി സുരക്ഷാ അവലോകനം നടത്തിയിരുന്നില്ല," ഉദ്യോഗസ്ഥൻ പറഞ്ഞു.

ഓഡിറ്റിനെത്തുടർന്ന്, നിരവധി വ്യക്തികളുടെ സുരക്ഷ പിൻവലിച്ചു. എന്നിരുന്നാലും, മുൻ സഹമന്ത്രിമാരിൽ പലരും പദവികൾ വഹിക്കുന്നില്ലെങ്കിലും ഇപ്പോഴും അവർക്ക് സുരക്ഷ തുടരുന്നുണ്ടെന്ന് അവലോകനത്തിൽ കണ്ടെത്തി. അവരുടെ പട്ടിക ആഭ്യന്തര മന്ത്രാലയത്തിന് അയച്ചിട്ടുണ്ടെന്ന് ഉദ്യോഗസ്ഥൻ പറഞ്ഞു. 

വൈ-കാറ്റഗറി സുരക്ഷയുള്ളവരിൽ മുൻ സഹമന്ത്രി ഭാനു പ്രതാപ് സിംഗ് വർമ്മ, മുൻ പഞ്ചായത്രാജ് മന്ത്രി ബിരേന്ദർ സിംഗ്, മുൻ കമ്മ്യൂണിക്കേഷൻസ് സഹമന്ത്രി ദേവുസിങ് ജെസിങ്ഭായ് ചൗഹാൻ, മുൻ ആദിവാസി കാര്യ സഹമന്ത്രി ജസ്വന്ത് സിംഗ് സുമൻഭായ് ഭാഭോർ, മുൻ വിദേശകാര്യ സഹമന്ത്രി രാജ്കുമാർ രഞ്ജൻ സിംഗ് എന്നിവരും ഉൾപ്പെടുന്നു. "മന്ത്രിമാർക്ക് പുറമേ, ചില പാർലമെന്റ് അംഗങ്ങളുടെയും മുതിർന്ന ജഡ്ജിമാരുടെയും പേരുകൾ ആഭ്യന്തര മന്ത്രാലയ പട്ടികയിൽ ഉൾപ്പെടുത്തിയിട്ടുണ്ട്. അതേസമയം, ചില ജഡ്ജിമാരുടെ സുരക്ഷാ പരിരക്ഷ നിലനിർത്തിയിട്ടുണ്ട്," ഉദ്യോഗസ്ഥൻ പറഞ്ഞു.

Read More

• എഫ്‌ഡികളും പിപിഎഫും, വീടുകളും ഓഹരികളും: ജഡ്ജിമാരുടെ സ്വത്തു വിവരങ്ങൾ പ്രസിദ്ധികരിച്ച് സുപ്രീം കോടതി
• ജഡ്ജിയുടെ വീട്ടിൽ പണം കണ്ടെത്തിയ സംഭവം: ചീഫ് ജസ്റ്റിസിന് അന്വേഷണ റിപ്പോർട്ട് കൈമാറി
• Pahalgam Terror Attack: കുറ്റവാളികളെയും പിന്തുണച്ചവരെയും നിയമനത്തിനു മുന്നിൽ കൊണ്ടുവരണം; മോദിയെ ഫോണിൽ വിളിച്ച് പുടിൻ
• Jammu Kashmir Terror Attack: പഹൽഗാം ഭീകരാക്രമണത്തിനു മുൻപ് ലക്ഷ്യമിട്ടത് ശ്രീനഗറിലെ വിനോദസഞ്ചാരികളെയെന്ന് ഉന്നത ഉദ്യോഗസ്ഥർ