ഇൻസ്റ്റഗ്രാം പരസ്യങ്ങളിലൂടെ ഓഫർ ലെറ്ററുകൾ നൽകി തട്ടിപ്പ്; കാനഡയിൽ ജോലി വാഗ്ദാനം ചെയ്ത് പറ്റിച്ചത് 150-ലധികം പേരെ

ഡൽഹി: ഇൻസ്റ്റാഗ്രാം പരസ്യങ്ങൾ, ഒരു ഹോട്ടലിലെ മനോഹരമായ ഓഫീസ്, നിയമാനുസൃതമായി കാണപ്പെടുന്ന ഓഫർ ലെറ്ററുകൾ ഒരു തൊഴിൽ തട്ടിപ്പിന്റെ പശ്ചാത്തലങ്ങളാണ് ഇവ. ഉത്തരേന്ത്യയിലും നേപ്പാളിലുമുള്ള 150-ലധികം ആളുകളെ കാനഡയിൽ തൊഴിലവസരങ്ങൾ വാഗ്ദാനം ചെയ്ത് പണം തട്ടിയത് ഈ പശ്ചാത്തലങ്ങളുടെ വിവരണത്തിലൂടെയായിരുന്നു. ഇവയെല്ലാം കണ്ട് പണം കൊടുത്ത് തട്ടിപ്പിനിരയായവർ ജോലിയൊന്നും ലഭിക്കാതെ കാത്തുകെട്ടി കിടന്നത് എട്ടു മാസത്തിലേറെയായിരുന്നു. 

 മാർച്ചിൽ, രാജസ്ഥാൻ, ഹരിയാന, യുപി, പഞ്ചാബ് എന്നിവിടങ്ങളിൽ നിന്നുള്ള 23 പരാണ് തട്ടിപ്പ് സംബന്ധിച്ച് ഡൽഹി പോലീസ് സാമ്പത്തിക കുറ്റകൃത്യ വിഭാഗത്തിന് (ഇഒഡബ്ല്യു) പരാതി നൽകിയത്. ഇതേ തുടർന്ന് സ്ഥാപനവുമായി ബന്ധപ്പെട്ട മൂന്ന് പേർക്കെതിരെ വഞ്ചന, ക്രിമിനൽ ഗൂഢാലോചന തുടങ്ങിയ ഐപിസി വകുപ്പുകൾ പ്രകാരം എഫ്ഐആർ രജിസ്റ്റർ ചെയ്തു. ഈ ആഴ്ച ആദ്യം പഞ്ചാബിലെ സിരാക്പൂരിൽ നിന്ന് തട്ടിപ്പിലെ പ്രധാന പ്രതിയായ സ്ത്രീയെ പോലീസ് അറസ്റ്റ് ചെയ്തിരുന്നു.

എന്നാൽ ഇഒഡബ്ല്യു നടത്തിയ അന്വേഷണത്തിൽ ഇരകളുടെ എണ്ണം വളരെ വലുതാണെന്നാണ് കണ്ടെത്തിയിരിക്കുന്നത്. അവരിൽ 29 പേരും നേപ്പാളിൽ നിന്നുള്ളവരാണ്. മൊത്തം 5 കോടി രൂപയുടെ തട്ടിപ്പ് നടന്നതായി പോലീസ് ഉദ്യോഗസ്ഥർ കണക്കാക്കുന്നു. കബളിപ്പിക്കപ്പെട്ടവരിൽ നിശാന്ത് സിംഗ് തന്റെ അനുഭവം വിവരിച്ചു. 2023-ൽ, 29-കാരനായ നിഷാന്ത് ഇനി ഒരു കർഷകനായി തുടരാൻ ആഗ്രഹിക്കുന്നില്ലെന്ന് തീരുമാനിച്ചു. അമൃത്‌സർ സ്വദേശിയായ അദ്ദേഹം തന്റെ സുഹൃത്തുക്കളിൽ പലരും ജോലിക്കായി വിദേശത്തേക്ക് പോകുന്നത് കണ്ടിട്ടുണ്ട്. അപ്പോഴാണ് ഒരു സുഹൃത്ത് സ്ഥാപനത്തെ ശുപാർശ ചെയ്യുകയും നിഷാന്ത് അവരെ സമീപിക്കുകയും ചെയ്തത്. അവർ സംസാരിക്കുന്ന രീതി ഇഷ്ടപ്പെട്ടുവെന്നും അവർ വളരെ പ്രൊഫഷണലായി തോന്നിയെന്നും നിഷാന്ത് പറഞ്ഞു.

രോഹിണിയിലെ അവരുടെ ഓഫീസിൽ എല്ലാ നടപടിക്രമങ്ങളും പൂർത്തിയാക്കാൻ സിംഗ് പോയപ്പോൾ, അവർ ജിഎസ്ടി നമ്പറുള്ള ഒരു സ്ലിപ്പ് നൽകി. രജിസ്‌ട്രേഷൻ ഫീസായി 5,900 രൂപയും ബയോമെട്രിക്‌സിന് 20,000 രൂപയും എടുക്കാമെന്ന് അവർ പറഞ്ഞു. എന്നാൽ ഒരു മാസത്തിനുശേഷം, അവർ കൂടുതൽ തുക ആവശ്യപ്പെടാൻ തുടങ്ങി - ആരോഗ്യ ഇൻഷുറൻസിനായി 30,000 രൂപ, പിന്നെ സ്പോൺസർഷിപ്പ് ചാർജിനായി 70,000 രൂപ, വിമാനക്കൂലിക്ക് 1.05 ലക്ഷം രൂപ എന്നിങ്ങനെയാണ് പലപ്പോഴായി ആവശ്യപ്പെട്ടത്.  എന്തോ പന്തികേട് തോന്നിയ താൻ വിസ പോലും ലഭിക്കാത്തപ്പോൾ എങ്ങനെയാണ് ടിക്കറ്റ് ബുക്ക് ചെയ്യുന്നതെന്ന് ചോദിച്ചുവെന്നും നിഷാന്ത് സിംഗ് പറഞ്ഞു. 

ബൾക്ക് ബുക്കിംഗ് ചെയ്യുന്നതിന് കിഴിവ് ലഭിക്കുമെന്നും ടിക്കറ്റ് നിരക്ക് ഇപ്പോൾ കുറവാണെന്നുമാണ് അവർ മറുപടി നൽകിയത്. എന്നാൽ ടിക്കറ്റ് തുക താൻ നോക്കാമെന്ന് പറഞ്ഞ് നിരസിക്കാൻ ശ്രമിച്ചപ്പോൾ അവർ തന്റെ ഫയൽ അടച്ചുപൂട്ടുമെന്ന് ഭീഷണിപ്പെടുത്തിയെന്നും സിംഗ് പറയുന്നു. ഏകദേശം 3.20 ലക്ഷം രൂപയാണ് സിംഗ് കമ്പനിക്ക് നൽകിയത്.

Read More

• മതം പറഞ്ഞ് വോട്ട് തേടി: ബിജെപി യുവനേതാവ് തേജസ്വി സൂര്യക്കെതിരെ കേസെടുത്ത് തിരഞ്ഞെടുപ്പ് കമ്മീഷൻ
• 'കൈയ്യടിക്കാനും പാത്രം കൊട്ടാനുമൊക്കെ പറയും' ; ഇനി മോദി കരയുമെന്നും രാഹുൽ ഗാന്ധി
• മോദിയുടേയും രാഹുലിന്റേയും പെരുമാറ്റചട്ട ലംഘനം; പാർട്ടി അദ്ധ്യക്ഷൻമാർക്ക് തിരഞ്ഞെടുപ്പ് കമ്മീഷന്റെ നോട്ടീസ്
• പ്രഖ്യാപിച്ച സ്ഥാനാർത്ഥിയെ പിൻവലിച്ച് അഖിലേഷ് കളത്തിലേക്ക്; യു.പിയിൽ എസ്.പിയുടെ അപ്രതീക്ഷിത ട്വിസ്റ്റ്