ഉറുദു കവി ഗുൽസാറിനും സംസ്‌കൃത പണ്ഡിതൻ രാമഭദ്രാചാര്യക്കും ജ്ഞാനപീഠം

ഡൽഹി: പ്രശസ്ത ഉറുദു കവി ഗുൽസാർ, സംസ്‌കൃത പണ്ഡിതൻ ജഗദ്ഗുരു രാമഭദ്രാചാര്യ എന്നിവർക്ക് 58-ാമത് ജ്ഞാനപീഠ പുരസ്‌കാരം. ഇരുവരും പുസ്കാരത്തിന് അർഹരായതായി ജ്ഞാനപീഠ സെലക്ഷൻ കമ്മിറ്റി പ്രഖ്യാപിച്ചു. ഹിന്ദി സിനിമയിലെ കൃതികൾക്ക് പേരുകേട്ട ഗുൽസാർ ഈ കാലഘട്ടത്തിലെ ഏറ്റവും മികച്ച ഉർദു കവികളിൽ ഒരാളായാണ് ഇന്ത്യൻ സാഹിത്യലോകത്ത് വിലയിരുത്തപ്പെടുന്നത്. 

2002-ൽ ഉർദുവിനുള്ള സാഹിത്യ അക്കാദമി അവാർഡ് നേടിയ ഗുൽസാർ, 2013-ൽ ദാദാസാഹിബ് ഫാൽക്കെ അവാർഡിനും അർഹനായിട്ടുണ്ട്. 2004-ൽ പത്മഭൂഷൺ, കൂടാതെ കുറഞ്ഞത് അഞ്ച് ദേശീയ ചലച്ചിത്ര പുരസ്‌കാരങ്ങളും ഗുൽസാറിന്റെ കൃതികൾക്ക് ലഭിച്ചിട്ടുണ്ട്.

ചിത്രകൂടത്തിലെ തുളസി പീഠത്തിന്റെ സ്ഥാപകനും തലവനുമായ രാമഭദ്രാചാര്യ, പ്രശസ്ത ഹിന്ദു ആത്മീയ നേതാവും വിദ്യാഭ്യാസ വിചക്ഷണനും നൂറിലധികം പുസ്തകങ്ങളുടെ എഴുത്തുകാരനും എന്ന നിലയിലാണ് അറിയപ്പെടുന്നത്. 

സംസ്‌കൃത സാഹിത്യകാരൻ ജഗദ്ഗുരു രാമഭദ്രാചാര്യ, പ്രശസ്ത ഉർദു സാഹിത്യകാരൻ ശ്രീ ഗുൽസാർ എന്നിങ്ങനെ രണ്ട് ഭാഷകളിൽ നിന്നുള്ള പ്രമുഖ എഴുത്തുകാർക്ക് പുരസ്‌കാരം (2023-ലേക്ക്) നൽകാൻ തീരുമാനിച്ചതായി ജ്ഞാനപീഠം സെലക്ഷൻ കമ്മിറ്റി പ്രസ്താവനയിൽ പറഞ്ഞു. ഗോവൻ എഴുത്തുകാരൻ ദാമോദർ മൗസോയ്ക്കായിരുന്നു 2022 ലെ ജ്ഞാനപീഠ  അവാർഡ് ലഭിച്ചത്.

Read More:

• ഇന്ത്യയുടെ കാലാവസ്ഥാ നിരീക്ഷണ ഉപഗ്രഹം വിജയകരമായി വിക്ഷേപിച്ച് ഐഎസ്ആർഒ
• റബ്ബർ ബുള്ളറ്റുകൾ സുരക്ഷിതമോ? കാഴ്ചനഷ്ടപ്പെടുന്നത് തുടർക്കഥ
• പ്രസിഡന്റ് സ്ഥാനത്ത് തുടരണം; പാലോട് രവിയുടെ രാജി തള്ളി ഡിസിസി
• പശുവിന്റെ ജഡം ജീപ്പിനു മുകളിൽ കെട്ടി; പുൽപ്പള്ളിയിൽ ജനരോഷം