എക്സൈസ് നയ കേസ്: കേജ്രിവാളിന്റെ ഹർജി പരിഗണിക്കുന്നത് സെപ്റ്റംബർ 9 ലേക്ക് മാറ്റി

ഡൽഹി: മദ്യനയ അഴിമതി കേസിൽ എൻഫോഴ്‌സ്‌മെന്റ് ഡയറക്ടറേറ്റ് (ഇഡി) തനിക്ക് സമൻസ് അയച്ച ഇ.ഡി നടപടിയടക്കം ചോദ്യം ചെയ്തുകൊണ്ടുള്ള ഡൽഹി മുഖ്യമന്ത്രി അരവിന്ദ് കേജ്രിവാളിന്റെ ഹർജി പരിഗണിക്കുന്നത് സെപ്റ്റംബർ 9 ലേക്ക് മാറ്റി ഡൽഹി ഹൈക്കോടതി. കേസിലെ കള്ളപ്പണം വെളുപ്പിക്കൽ നിരോധന നിയമത്തിലെ ചില വ്യവസ്ഥകളുടെ സാധുതയും വ്യാഖ്യാനവും സംബന്ധിച്ചുള്ള പരാതിയും കേജ്രിവാൾ ഹർജിയിൽ ഉന്നയിക്കുന്നു. 

വിഷയത്തിൽ ഇ.ഡിയുടെ മറുപടിയിൽ പ്രതികരണം നൽകാൻ കേജ്രിവാളിന് നാലാഴ്ച്ചത്തെ സമയം അനുവദിച്ചുകൊണ്ട് ജസ്റ്റിസ് പ്രതിബ സിംഗ്, ജസ്റ്റിസ് അമിത് ശർമ്മ എന്നിവരടങ്ങിയ ഡിവിഷൻ ബെഞ്ചാണ് ഉത്തരവിട്ടത്. മുഖ്യമന്ത്രിയെ മറ്റൊരു കേസിൽ അറസ്റ്റ് ചെയ്ത നടപടിക്ക് പിന്നിൽ ചില പ്രത്യക ലക്ഷ്യങ്ങളുണ്ടെന്ന് കെജ്രിവാളിന് വേണ്ടി ഹാജരായ മുതിർന്ന അഭിഭാഷകൻ പറഞ്ഞു. തങ്ങൾക്ക് ശരിയായ വിവരങ്ങളിലേക്കെത്താൻ ഒരു റിജൈൻഡർ ഫയൽ ചെയ്യാൻ മൂന്നാഴ്ച്ചത്തെയെങ്കിലും സമയം ആവശ്യമാണന്ന്  കേജ്രിവാളിന്റെ അഭിഭാഷകൻ കോടതിയെ അറിയിച്ചു. ഈ അവശ്യത്തിന്മേലായിരുന്നു കോടതി നാലാഴ്ച്ചത്തെ സമയം അനുവദിച്ചുകൊണ്ട് ഉത്തരവിട്ടത്. 

ഇഡിയുടെ കള്ളപ്പണം വെളുപ്പിക്കൽ കേസിലും എക്സൈസ് നയവുമായി ബന്ധപ്പെട്ട് കേജിരിവാളിനെതിരെയുള്ള സിബിഐ കേസിലും ഡൽഹി മുഖ്യമന്ത്രി നിലവിൽ ജുഡീഷ്യൽ കസ്റ്റഡിയിലാണ്. നേരത്തെ ലോക്സഭാ തിരഞ്ഞെടുപ്പ് പ്രചാരണത്തിനായി മെയ് 10ന് സുപ്രീം കോടതി കെജ്‌രിവാളിന് ചില ഉപാധികളോടെ ജൂൺ 1 വരെ ഇടക്കാല ജാമ്യം അനുവദിച്ചിരുന്നു. ഇടക്കാല ജാമ്യ കാലാവധി അവസാനിച്ച ശേഷം തിഹാർ ജയിലിലേക്ക് മടങ്ങിയ കേജ്രിവാളിന് ഇഡിയുടെ കള്ളപ്പണം വെളുപ്പിക്കൽ കേസിൽ ജൂൺ 20 ന് വിചാരണ കോടതി ജാമ്യം അനുവദിച്ചിരുന്നുവെങ്കിലും ജൂൺ 25 ന് കേന്ദ്ര ഏജൻസി ഹൈക്കോടതിയെ സമീപിച്ചതിനെത്തുടർന്ന് ഹൈക്കോടതി ജാമ്യ ഉത്തരവ് ശരിവെച്ചിരുന്നു. 

ജൂൺ 21 നാണ് ഡൽഹി ഹൈക്കോടതിയിലെ ജസ്റ്റിസ് സുധീർ കുമാർ ജെയിൻ കെജ്‌രിവാളിന് ജാമ്യം അനുവദിച്ച വിചാരണ കോടതി ഉത്തരവ് സ്റ്റേ ചെയ്തത്. അതേ സമയം സിബിഐ പ്രത്യേകമായി അന്വേഷിക്കുന്ന എക്സൈസ് പോളിസി കേസുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ മാർച്ച് 21 ന് ഇഡി അറസ്റ്റ് ചെയ്ത കെജ്‌രിവാൾ ഹൈക്കോടതി വിധിക്കെതിരെ സുപ്രീം കോടതിയെ സമീപിച്ചിരുന്നു.

Read More

• ഇന്ത്യ ലോകത്തിന് നൽകിയത് ബുദ്ധനെ, യുദ്ധമല്ല: നരേന്ദ്ര മോദി
• യുജിസി നെറ്റ് പരീക്ഷ ചോദ്യ പേപ്പർ ചോർന്നുവെന്ന് വരുത്തി തീർക്കാൻ ശ്രമം നടന്നു; സിബിഐ കണ്ടെത്തൽ
• രാഹുൽ ഗാന്ധിക്കെതിരായ വിവാദ പരാമർശം; ബിജെപി എംഎൽഎ അറസ്റ്റിൽ
• ഇത് യുദ്ധത്തിനുള്ള സമയമല്ല; ഭീകരത ഒരു തരത്തിലും അംഗീകരിക്കാനാവില്ല: പ്രധാനമന്ത്രി മോദി