പാവപ്പെട്ടവർക്കുള്ള റേഷൻ വിഹിതം 10 കിലോയാക്കും, പാർട്ടിയെ അമ്പരപ്പിച്ച് കോൺഗ്രസ് അധ്യക്ഷന്റെ പ്രഖ്യാപനം

ന്യൂഡൽഹി: ലോക്സഭാ തിരഞ്ഞെടുപ്പ് അവസാന ഘട്ടത്തിലേക്ക് അടുക്കവേ പുതിയ തിരഞ്ഞെടുപ്പ് വാഗ്ദാനവുമായി കോൺഗ്രസ് അധ്യക്ഷൻ. ഇന്ത്യ മുന്നണി അധികാരത്തിലെത്തിയാൽ പാവപ്പെട്ടവർക്ക് ഓരോ മാസവും നൽകുന്ന സൗജന്യ റേഷൻ 10 കിലോയാക്കി ഉയർത്തുമെന്നാണ് കോൺഗ്രസ് അധ്യക്ഷൻ മല്ലികാർജുൻ ഖാർഗെ പറഞ്ഞത്. ബിജെപി സർക്കാർ 5 കിലോയാണ് സൗജന്യ റേഷനായി വിതരണം ചെയ്യുന്നത്.

കോൺഗ്രസിന്റെ തിരഞ്ഞെടുപ്പ് പ്രകടന പത്രികയിൽ സൗജന്യ റേഷനെക്കുറിച്ച് പരാമർശിച്ചിരുന്നില്ല. ഈ സാഹചര്യത്തിൽ കോൺഗ്രസ് അധ്യക്ഷന്റെ ഈ പ്രഖ്യാപനം നിരവധി പാർട്ടി നേതാക്കളെ അമ്പരപ്പിച്ചിട്ടുണ്ട്. 

''സൗജന്യ റേഷൻ തടഞ്ഞാൽ ആർക്കും കോടതിയിൽ പോകാവുന്ന ഭക്ഷ്യസുരക്ഷാ നിയമം ഞങ്ങൾ കൊണ്ടുവന്നു. ബിജെപി സർക്കാർ ഒന്നും നൽകിയില്ല, പക്ഷേ ഇപ്പോഴും 80 കോടി ജനങ്ങൾക്ക് ഭക്ഷണം നൽകുന്നതിനെക്കുറിച്ച് സംസാരിക്കുന്നു. നിങ്ങൾ 5 കിലോ റേഷൻ നൽകുന്നുവെങ്കിൽ, ഞങ്ങളുടെ സഖ്യ സർക്കാർ അധികാരത്തിൽ വരുമ്പോൾ 10 കിലോ നൽകും,'' ഇതായിരുന്നു ലക്‌നൗവിൽ നടത്തിയ വാർത്താസമ്മേളനത്തിൽ ഖാർഗെ പറഞ്ഞത്.

നരേന്ദ്ര മോദി സർക്കാരിന്റെ സൗജന്യ റേഷൻ പദ്ധതിയെക്കുറിച്ച് ചർച്ച ചെയ്തിരുന്നുവെന്ന് കോൺഗ്രസ് നേതാക്കൾ ദ ഇന്ത്യൻ എക്‌സ്പ്രസിനോട് പറഞ്ഞു. എന്നാൽ, ഖാർഗെയുടെ ഈ പ്രഖ്യാപനം ചില നേതാക്കളെയെങ്കിലും അമ്പരപ്പിച്ചിട്ടുണ്ട്. പി.ചിദംബരം അധ്യക്ഷനായ പാർട്ടിയുടെ പ്രകടന പത്രിക കമ്മിറ്റി സൗജന്യ റേഷൻ വിഹിതം ചർച്ച ചെയ്തിരുന്നോ എന്ന ചോദ്യത്തിന് പ്രതികരിക്കാനില്ലെന്നാണ് അദ്ദേഹം നൽകിയ മറുപടി. “ഈ വിഷയം ചർച്ച ചെയ്തിട്ടില്ല, ഒരിക്കലും പരിഗണിച്ചിട്ടില്ല,” പാനലിലെ ഒരു അംഗം ഇന്ത്യൻ എക്സ്പ്രസിനോട് പറഞ്ഞു.

Read More

• നൂറോളം പേരുടെ അപകടത്തിനിടയാക്കിയ പരസ്യ ബോർഡിന് അനുമതിയില്ല; ഉടമ ബലാത്സംഗ കേസിലെ പ്രതി
• പൊതു സംവാദത്തിന് തയ്യാർ; മോദിയെ വെല്ലുവിളിച്ച് രാഹുൽ ഗാന്ധി
• സെക്സ് വീഡിയോ വിവാദം: ബിജെപി നേതാവ് ദേവരാജെ ഗൗഡ അറസ്റ്റിൽ
• 'പ്രധാനമന്ത്രിയായി മോദിക്ക് ഇനിയൊരു തിരിച്ച് വരവുണ്ടാകില്ല'; രാഹുൽ ഗാന്ധി