Navaratri: Durga Ashtami 2025: ദുർഗ്ഗാഷ്ടമി, തീയതി, പ്രാധാന്യം; അറിയേണ്ടതെല്ലാം

Durga Ashtami 2025 Date, Time: നവരാത്രി ആഘോഷങ്ങളിലെ അതിപ്രധാനമായ ദിവസമാണ് ദുർഗ്ഗാഷ്ടമി. ഒമ്പത് രാത്രികളിലായി ദുർഗ്ഗാദേവിയുടെ വിവിധ ഭാവങ്ങളെ ആരാധിക്കുമ്പോൾ, എട്ടാം ദിനമായ ദുർഗ്ഗാഷ്ടമിക്ക് കേരളത്തിൽ സവിശേഷ സ്ഥാനമുണ്ട്. ദേവിയുടെ എട്ടാമത്തെ രൂപമായ മഹാഗൗരിയെയാണ് ഈ ദിവസം ആരാധിക്കുന്നത്. ശുദ്ധിയും ശാന്തതയും ഐശ്വര്യവുമാണ് ഈ ദേവീ ഭാവം പ്രതിനിധീകരിക്കുന്നത്.

Also Read: ഐശ്വര്യത്തിൻ്റേയും അനുഗ്രഹങ്ങളുടേയും ഈ നവരാത്രി ദിനത്തിൽ ഏവർക്കും ആശംസകൾ കൈമാറാം

തീയതിയും പ്രാധാന്യവും

അശ്വിന മാസത്തിലെ ശുക്ലപക്ഷത്തിലെ അഷ്ടമി തിഥിയിലാണ് ദുർഗ്ഗാഷ്ടമി വരുന്നത്. 2025-ൽ സെപ്റ്റംബർ 30നാണ് ദുർഗ്ഗാഷ്ടമി. 2025 സെപ്റ്റംബർ 29 ന് വൈകുന്നേരം 04:31 ന് അഷ്ടമി തിഥി ആരംഭിച്ച് 2025 സെപ്റ്റംബർ 30 ന് വൈകുന്നേരം 06:06 ന് അവസാനിക്കും. ഈ ദിവസം ദുർഗ്ഗാദേവി മഹിഷാസുരനുമായി യുദ്ധം ചെയ്തതിൻ്റെ പാരമ്യത്തെ സൂചിപ്പിക്കുന്നു. എന്നാൽ കേരളത്തിൽ ഈ ദിനം സരസ്വതി പൂജയുടെ ആരംഭമായിട്ടാണ് ആഘോഷിക്കുന്നത്. അജ്ഞാനത്തെ അകറ്റി അറിവിൻ്റെ വെളിച്ചം പകരുന്ന ദേവതയായ സരസ്വതിയെ ഈ ദിവസം വിശേഷാൽ പൂജിക്കുന്നു.

Also Read: ഭക്തിയുടെ നിറവിൽ ഇനി നവരാത്രി ദിനങ്ങൾ; പ്രിയപ്പെട്ടവർക്ക് ആശംസകൾ കൈമാറാം

Also Read: ഭക്തിസാന്ദ്രമായ നവരാത്രി ദിനങ്ങളിൽ ആശംസകൾ നേരാം

പൂജവെയ്പ്

ദുർഗ്ഗാഷ്ടമിയുടെ ഏറ്റവും പ്രധാനപ്പെട്ട ചടങ്ങ് പൂജവെപ്പാണ്. സരസ്വതി ദേവിയെ സങ്കൽപ്പിച്ച്, വീട്ടിലെ പൂജാമുറിയിലോ ക്ഷേത്രങ്ങളിലോ, ഗ്രന്ഥങ്ങളും (വിശേഷിച്ച് ഓല ഗ്രന്ഥങ്ങളും എഴുത്താണി ഉൾപ്പെടെയുള്ളവയും) തൊഴിലുമായി ബന്ധപ്പെട്ട ഉപകരണങ്ങളും പൂജക്കായി സമർപ്പിക്കുന്നു.

ഈ സമയം മുതൽ വിജയദശമി ദിവസം പൂജയെടുക്കുന്ന സമയം വരെ പഠനമോ, തൊഴിൽപരമായ ജോലികളോ ചെയ്യാൻ പാടില്ല. അറിവിനും ഉപജീവനമാർഗ്ഗത്തിനും ഉപയോഗിക്കുന്ന വസ്തുക്കളെ ദേവിയായി കണ്ട് ആരാധിക്കുകയും അവയ്ക്ക് വിശ്രമം നൽകുകയും ചെയ്യുക എന്നതാണ് ഈ ആചാരത്തിൻ്റെ പൊരുൾ.

വ്രതശുദ്ധിയോടും ഭക്തിയോടും കൂടി ദുർഗ്ഗാഷ്ടമി ദിനം ആചരിക്കുന്നത് ജീവിതത്തിൽ ഐശ്വര്യവും വിജ്ഞാനവും നൽകുമെന്നാണ് വിശ്വാസം. ഈ മൂന്ന് ദിവസങ്ങളിലെ (അഷ്ടമി, നവമി, വിജയദശമി) പൂജകൾ വിഘ്നങ്ങൾ നീക്കി വിദ്യാപരമായ കാര്യങ്ങളിൽ വിജയം നേടാൻ സഹായിക്കുമെന്നും ഭക്തർ വിശ്വസിക്കുന്നു.

Read More: നവഭാവങ്ങളെ ആരാധിക്കുന്ന നവരാത്രിയിൽ ആശംസകൾ കൈമാറാം