Happy Navaratri 2025: നവഭാവങ്ങളെ ആരാധിക്കുന്ന നവരാത്രിയിൽ ആശംസകൾ കൈമാറാം

Navaratri 2025 Best Wishes and Greetings: നവരാത്രിയില്‍ രണ്ടാം ദിവസമായ ഇന്ന് ദുർഗ ദേവിയെ ബ്രഹ്മചാരിണി ഭാവത്തില്‍ ആരാധിക്കുന്നു. ഇടതുകയ്യില്‍ കമണ്ഡലുവും വലതുകയ്യില്‍ അക്ഷമാലയും ഏന്തി ശുഭ്രവസ്ത്രം ധരിച്ചതാണ് ദേവിയുടെ രൂപം. ഹിമവാന്റെ പുത്രിയായ് ജനിച്ച ദേവി, ശിവന്റെ പത്നിയാകാൻ നാരദമുനിയുടെ നിർദേശപ്രകാരം തപസു ചെയ്തു. കഠിന തപസ് അനുഷ്ഠിച്ചതിനാൽ ദേവിക്ക് ബ്രഹ്മചാരിണി എന്ന നാമം ലഭിച്ചു.

ദേവീ പ്രീതിക്ക് ഉത്തമമാണ് നവരാത്രി വ്രതം. ദേവിയുടെ അനുഗ്രഹത്തിനായി ഒൻപതു ദിവസം നീണ്ടു നിൽക്കുന്ന വ്രതം അനുഷ്ഠിക്കാം. ഒൻപതു ദിവസം വ്രതം അനുഷ്ഠിക്കുവാൻ കഴിയാത്തവർക്കു 7, 5, 3, 1 എന്നീ ക്രമത്തിലും അനുഷ്ഠിക്കാം. വ്രതം നോൽക്കുന്ന ദിവസങ്ങളിൽ പച്ചക്കറികളും പഴവർഗങ്ങളും പാൽ ഉത്പന്നങ്ങളുമാണ് പ്രധാനമായും കഴിക്കുക. ഏതു പ്രായത്തിലുളളവർക്കും നവരാത്രി വ്രതമെടുക്കാമെന്നു പറയാറുണ്ട്. 

വീട്ടിലെ മുതിർന്നവർക്കൊപ്പം കുട്ടികളും വ്രതം അനുഷ്ഠിക്കാറുണ്ട്. കുട്ടികൾ വ്രതം അനുഷ്ഠിക്കുന്നുണ്ടെങ്കിൽ പ്രഭാത ഭക്ഷണം ഒരിക്കലും ഒഴിവാക്കരുത്. 

Also Read: ഭക്തിയുടെ നിറവിൽ ഇനി നവരാത്രി ദിനങ്ങൾ; പ്രിയപ്പെട്ടവർക്ക് ആശംസകൾ കൈമാറാം

ശാക്തേയ സങ്കൽപത്തിന്റെ അടിസ്ഥാനത്തില്‍ ആദ്യത്തെ മൂന്ന് ദിവസം പാർവതി ദേവിയേയും അടുത്ത മൂന്ന് ദിവസം ലക്ഷ്മി ദേവിയേയും അവസാന മൂന്നു ദിവസം സരസ്വതി ദേവിയേയും സങ്കൽപിച്ചാണ് പൂജകൾ. 

ഈ വർഷം 2025 സെപ്റ്റംബർ 22 മുതൽ ഒക്ടോബർ 2 വരെയാണ് നവരാത്രി ആഘോഷങ്ങൾ. 

കേരളത്തില്‍ ദുര്‍ഗാഷ്ടമി ദിവസത്തെ പൂജ വയ്പോടെയാണ് നവരാത്രി ആഘോഷങ്ങളുടെ തുടക്കം. വിവിധ തൊഴിലുകളിൽ ഏർപ്പെട്ടിരിക്കുന്നവർ പണിയായുധങ്ങളും വിദ്യാർഥികൾ പാഠപുസ്തകങ്ങളും ഗ്രന്ഥങ്ങളും എല്ലാം സരസ്വതീ വിഗ്രഹത്തിനു മുന്നില്‍ പൂജയ്ക്കായി സമർപ്പിക്കും. വീടുകളിലോ ക്ഷേത്രങ്ങളിലോ പൂജ വയ്ക്കാം.

Read More: ആദിപരാശക്തിയുടെ വിവിധ ഭാവങ്ങളെ ആരാധിക്കുന്ന 9 ദിവസം