ഹെയർ കണ്ടീഷ്ണർ സ്വയം തയ്യാറാക്കാൻ 7 വിദ്യകൾ

ആരോഗ്യവും കരുത്തുമുള്ള മുടി നേടാൻ വളരെ ശ്രദ്ധയോടെയുള്ള പരിചരണം ആവശ്യമാണ്. തലമുടി കഴുകുന്നതിലാണ് ഏറെ കരുതൽ ആവശ്യം. അതിനായി കടകളിൽ ധാരാളം ഉത്പന്നങ്ങൾ ലഭ്യമാണ്. എന്നാൽ ഇവയിൽ ചേർത്തിരിക്കുന്ന കെമിക്കലുകൾ മുടിയുടെ സ്വാഭാവിക പ്രകൃതം തന്നെ മാറ്റിയേക്കാം.

എന്നാൽ ഷാമ്പൂ, ഹെയർ കണ്ടീഷ്ണർ പോലെയുള്ളവ വീട്ടിൽ തന്നെ തയ്യാറാക്കാവുന്നതേയുള്ളൂ. ചെമ്പരത്തി ഒരു പ്രകൃതിദത്ത ഷാമ്പൂ തന്നെയാണ്, ഇതിനു അനുയോജ്യമായ കണ്ടീഷ്ണർ ഏതാണെന്ന് ചിന്തിച്ചിട്ടുണ്ടോ?. വളരെ എളുപ്പത്തിൽ സ്വയം തയ്യാറാക്കാൻ സാധിക്കുന്ന കണ്ടീഷ്ണറുകൾ പരിചയപ്പെടാം.

വെളിച്ചെണ്ണ തേൻ

രണ്ട് ടേബിൾസ്പൂൺ വെളിച്ചെണ്ണയിലേയ്ക്ക് ഒരു ടേബിസ്പൂൺ തേൻ ചേർത്തിളക്കി യോജിപ്പിക്കാം. നനഞ്ഞ മുടിയിലേയ്ക്ക് ഇത് പുരട്ടാം. 20 മിനിറ്റിനു ശേഷം തണുത്ത വെള്ളത്തിൽ കഴുകി കളയാം. 

അവക്കാഡോ ഒലിവ് എണ്ണ

ഒരു ടേബിൾസ്പൂൺ പഴുത്ത അവക്കാഡോയിലേയ്ക്ക് രണ്ട് ടേബിൾസ്പൂൺ ഒലിവ് എണ്ണ ചേർത്തിളക്കി യോജിപ്പിക്കാം. ഇത് തലമുടിയുടെ വേരുകളിൽ നിന്ന് അറ്റം വരെ പുരട്ടാം. ശേഷം 30 മിനിറ്റ് വിശ്രമിക്കുക. തണുത്ത വെള്ളം ഉപയോഗിച്ച് കഴുകി കളയാം.

പഴം തൈര്

നന്നായി പഴുത്ത ഒരു പഴത്തിലേയ്ക്ക് രണ്ട് ടേബിൾസ്പൂൺ തൈര് ചേർത്തിളക്കി ഉടച്ചെടുക്കാം. ഈ മിശ്രിതം തലമുടിയിൽ പുരട്ടി 15 മിനിറ്റ് വിശ്രമിക്കാം. ശേഷം തണുത്ത വെള്ളത്തിൽ കഴുകി കളയാം. ഇത് മുടി വരണ്ട് കെട്ടുപിണയുന്നത് തടയും. 

ആപ്പിൾ സിഡാർ വിനാഗിരി

ഒരു കപ്പ് വെള്ളത്തിലേയ്ക്ക് രണ്ട് ടേബിൾസ്പൂൺ ആപ്പിൾ സിഡാർ വിനാഗിരി ചേർത്ത് ഡയല്യൂട്ട് ചെയ്തെടുക്കാം. ഷാമ്പൂ കഴുകി കളയാൻ ഈ വെള്ളം ഉപയോഗിക്കാം. ഇത് തലയോട്ടിയിലെ പിഎച്ച് ബാലൻസ് ചെയ്യാൻ ഗുണകരമാണ്. 

കറ്റാർവാഴ ഒലിവ് എണ്ണ

രണ്ട് ടേബിൾസ്പൂൺ കറ്റാർവാഴ ജെല്ലിലേയ്ക്ക് ഒരു ടേബിൾസ്പൂൺ ഒലിവ് എണ്ണ ചേർത്തിളക്കി യോജിപ്പിക്കാം. ഇത് നനഞ്ഞ മുടിയിൽ പുരട്ടി 20 മിനിറ്റ് വിശ്രമിക്കാം. ശേഷം തണുത്ത വെള്ളത്തിൽ കഴുകി കളയാം. 

തേൻ ആപ്പിൾ സിഡാർ വിനാഗിരി

ഒരു ടേബിൾസ്പൂൺ​ തേനിലേയ്ക്ക് ഒരു ടേബിൾസ്പൂൺ ആപ്പിൾ സിഡാർ വിനാഗിരിയും ഒരു കപ്പ് വെള്ളവും ചേർത്തിളക്കി യോജിപ്പിക്കാം. ഇത് മുടിയിൽ പുരട്ടി അൽപ സമയം മാറ്റി വയ്ക്കാം. ശേഷം കഴുകി കളയാം. തേൻ മുടിയെ മോയ്സ്ച്യുറൈസ് ചെയ്യുമ്പോൾ, ആപ്പിൾ സിഡാർ വിനാഗിരി തലമുടി മൃദുവും തിളക്കമുള്ളതുമാക്കി തീർക്കുന്നു. 

മുട്ട ഒലിവ് എണ്ണ

ബൗളിലേയ്ക്ക് ഒരു മുട്ട പൊട്ടിച്ചുടച്ചെടുക്കാം. അതിലേയ്ക്ക് ഒരു ടേബിൾസ്പൂൺ ഒലിവ് എണ്ണ ചേർത്തിളക്കി യോജിപ്പിക്കാം.​ഇത് മുടിയിൽ പുരട്ടി 20 മിനിറ്റ് വിശ്രമിക്കാം. ശേഷം തണുത്ത വെള്ളത്തിൽ കഴുകി കളയാം. ഒരു മികച്ച പ്രോട്ടീൻ ട്രീറ്റ്മെൻ്റ് കൂടിയാണിത്. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• മുറ്റത്ത് നിൽക്കുന്ന തുളസി ഇനി മുഖക്കുരുവിന് പ്രതിവിധി
• വിണ്ടുകീറിയ ചുണ്ടുകൾക്കും വെളിച്ചെണ്ണ, ഇതാ ചില നുറുങ്ങു വിദ്യകൾ
• തലമുടി അഴകിന് 10 എണ്ണകൾ, ഇതിൽ ഒന്ന് തിരഞ്ഞെടുക്കാം: Natural Hair Oils
• വരണ്ട ചർമ്മത്തിന് വിട, ഈ ബാം വീട്ടിൽ തയ്യാറാക്കി ഉപയോഗിക്കൂ