മലപ്പുറം എസ്‍പിയുടെ ഔദ്യോഗിക വസതിക്ക് മുന്നില്‍ പി.വി.അൻവർ എംഎൽഎയുട കുത്തിയിരുപ്പ് സമരം

മലപ്പുറം: മലപ്പുറം എസ്‌പി എസ്.ശശിധരന്റെ ഔദ്യോഗിക വസതിക്കു മുൻപിൽ പ്രതിഷേധ സമരവുമായി പി.വി.അൻവർ എംഎൽഎ. എസ്‌പി ഓഫീസിലെ മരങ്ങൾ മുറിച്ചു കടത്തിയത് കോടതിയുടെ നിരീക്ഷണത്തിൽ ക്രൈം ബ്രാഞ്ച് അന്വേഷിക്കണം എന്നാവശ്യപ്പെട്ടാണ് അൻവർ എംഎൽഎ കുത്തിയിരുപ്പ് സമരം നടത്തുന്നത്. പരാതി കിട്ടിയിട്ടും നടപടിയെടുക്കാത്ത മലപ്പുറം എസ്‌പിക്കെതിരെ നടപടിയെടുക്കണമെന്നും എംഎൽഎ ആവശ്യപ്പെട്ടു.

എസ്‌പി ഔദ്യോഗിക വസതിയിൽനിന്ന് മരം മുറിച്ചു കടത്തിയെന്നും അതിന്റെ രേഖകൾ കാണിക്കണമെന്നും ആവശ്യപ്പെട്ട് അൻവർ എംഎൽഎ ഇന്നലെ എസ്‌പിയുടെ വീട്ടിൽ എത്തിയിരുന്നു. എന്നാൽ, മേലുദ്യോഗസ്ഥരുടെ അനുവാദം വാങ്ങിയാല്‍ മാത്രമേ എംഎൽഎയെ അകത്തേക്ക് കടത്തി വിടൂവെന്ന് പറഞ്ഞ് പൊലീസ് ഉദ്യോഗസ്ഥൻ അൻവറിനെ തടയുകയായിരുന്നു. ഇതിൽ പ്രതിഷേധിച്ചാണ് എംഎൽഎ എസ്‌പിയുടെ വസതിക്കു മുൻപിൽ ഇന്ന് കുത്തിയിരുപ്പ് സമരം നടത്തുന്നത്. 

അതിനിടെ, ജില്ലാ പൊലീസ് മേധാവിയുടെ വസതിയിൽ നിന്ന് മരങ്ങൾ മുറിച്ച് മാറ്റിയെന്ന എംഎൽഎയുടെ വാദങ്ങൾ തെറ്റെന്ന് തെളിയിക്കുന്ന രേഖകൾ പുറത്തു വന്നിട്ടുണ്ട്. മരങ്ങൾ മുറിച്ച് മാറ്റിയിട്ടില്ലെന്നും അപകടഭീഷണി ഉയർത്തിയ ചില മരങ്ങളുടെ ശിഖരങ്ങൾ മാത്രമാണ് രണ്ടര വർഷം മുമ്പ് മുറിച്ച് മാറ്റിയതെന്നുമാണ് പൊലീസ് രേഖകളിലുളളത്. ശശിധരനായിരുന്നില്ല അന്നത്തെ മലപ്പുറം എസ്‌പിയെന്നും രേഖകളിലുണ്ട്. 

Read More

• നടൻ ജയസൂര്യയ്‌ക്കെതിരെ ഒരുകേസ് കൂടി രജിസ്റ്റർ ചെയ്തു
• മുകേഷിനെതിരായ പ്രതിഷേധത്തിനിടെ സിപിഎം സെക്രട്ടറിയേറ്റ് യോഗം ഇന്ന്
• മുകേഷിനെതിരായ അന്വേഷണം; എസ്പി പൂങ്കുഴലി നേതൃത്വം നൽകും
• മുകേഷിന്റെ രാജി: ഇടതുപക്ഷത്ത് ഭിന്നത
• മുകേഷിന്റെ അറസ്റ്റ്; അഞ്ച് ദിവസത്തേക്ക് കോടതി തടഞ്ഞു