ഇന്നത്തെ മോദിയുടെ കാര്യപരിപാടികൾ; പ്രധാന നഗരങ്ങളിലെ ഗതാഗത നിയന്ത്രണം

കൊച്ചി: ബുധനാഴ്ച രാവിലെ 7 മണിയോടെ പ്രധാനമന്ത്രി നരേന്ദ്ര മോദി ഹെലികോപ്റ്ററിൽ ഗുരുവായൂരിലേക്ക് പുറപ്പെടും. പ്രധാനമന്ത്രിയുടെ വരവ് പ്രമാണിച്ച് ഗുരുവായൂർ നഗരത്തിൽ ഗതാഗത ക്രമീകരണങ്ങളും ഏർപ്പെടുത്തിയിട്ടുണ്ട്. ശ്രീകൃഷ്ണ കോളേജ് ഗ്രൗണ്ടിൽ ഹെലികോപ്റ്ററിൽ എത്തുന്ന മോദി ശ്രീവത്സം ഗസ്റ്റ് ഹൗസിൽ അൽപ്പനേരം വിശ്രമിച്ച ശേഷമാവും ക്ഷേത്രത്തിലേക്ക് എത്തുക.

രാവിലെ 7.40ന് ഗുരുവായൂർ ക്ഷേത്രത്തിൽ മോദി ദർശനം നടത്തും. തുടർന്ന് 8.45ന് നടക്കുന്ന സുരേഷ് ഗോപിയുടെ മകളുടെ വിവാഹത്തിന് കല്യാണ മണ്ഡപത്തിലെത്തും. സുരേഷ് ഗോപിയുടെ മകളുടേത് ഉൾപ്പെടെ 4 വിവാഹച്ചടങ്ങുകളിൽ അദ്ദേഹം പങ്കെടുക്കും. നാല്‌ മണ്ഡപങ്ങളിൽ ഏറ്റവും മുന്നിലുള്ള മണ്ഡപത്തിലാണ് താലികെട്ട്.

പ്രധാനമന്ത്രിയുടെ ക്ഷേത്രദർശന സമയം ക്ഷേത്രത്തിൽ അത്യാവശ്യം വേണ്ട ജീവനക്കാരേ ഉണ്ടാകൂ. മറ്റു മൂന്ന്‌ മണ്ഡപങ്ങളിലും ഈ സമയം വിവാഹങ്ങൾ നടക്കും. പ്രധാനമന്ത്രി ഈ വിവാഹങ്ങൾക്കും സാന്നിധ്യമാകുമെന്നാണ് കരുതുന്നത്. പ്രധാനമന്ത്രി നരേന്ദ്ര മോദിയുടെ സന്ദര്‍ശനവുമായി ബന്ധപ്പെട്ട് ഗുരുവായൂര്‍ ക്ഷേത്രത്തില്‍ ഒരു വിവാഹം പോലും മാറ്റി വച്ചിട്ടില്ലെന്ന് ഗുരുവായൂർ ദേവസ്വം കഴിഞ്ഞ ദിവസം അറിയിച്ചിരുന്നു.

തൃപ്രയാർ ശ്രീരാമ ക്ഷേത്രത്തിലും ദർശനം നടത്തും

10.15ന് പ്രധാനമന്ത്രി തൃപ്രയാർ ശ്രീരാമ ക്ഷേത്രത്തിലെത്തും. വലപ്പാട് ഗവ. ഹൈസ്കൂളിലെ ഗ്രൗണ്ടിൽ സജ്ജമാക്കുന്ന ഹെലിപാഡിൽ വന്നിറങ്ങുന്ന പ്രധാനമന്ത്രി കിഴക്കേ ടിപ്പു സുൽത്താൻ റോഡിലൂടെ വാഹനവ്യൂഹത്തോടൊപ്പമാണ് ക്ഷേത്രത്തിലെത്തുക. ഇറങ്ങുന്ന ഗ്രൗണ്ട്, കിഴക്കേ ടിപ്പു സുൽത്താൻ റോഡിന്റെ ഇരു ഭാഗങ്ങൾ, പടിഞ്ഞാറേ നട, ക്ഷേത്രത്തിന്റെ ചുറ്റുമതിൽ എന്നിവിടങ്ങളിൽ ബാരിക്കേഡ് സ്ഥാപിക്കും. 11.10 വരെ  പ്രധാനമന്ത്രി ക്ഷേത്രത്തിൽ ഉണ്ടാകും.

ക്ഷേത്രത്തിൽ പ്രത്യേകം സജ്ജീകരിക്കുന്ന വേദിയിൽ നാദോപാസന സമിതിയുടെ നേതൃത്വത്തിൽ ബ്രഹ്മസ്വം മഠത്തിൽ വേദപഠനം നടത്തുന്ന 21 വിദ്യാർഥികളുടെ വേദാർച്ചന, രാമായണത്തെ ആസ്പദമാക്കിയുള്ള ഭജന എന്നിവയുണ്ടാകും. ശേഷം മോദി ഹെലികോപ്റ്ററിൽ കൊച്ചിയിലേക്ക് പുറപ്പെടും. ഉച്ചയ്ക്ക് 12ന് കൊച്ചി വെല്ലിങ്ടൺ ഐലൻഡിൽ എത്തുകയും കൊച്ചി കപ്പൽശാലയിലെ ഇന്റർനാഷണൽ ഷിപ്പ് റിപ്പയർ ഫെസിലിറ്റിയുടേയും ഡ്രൈ ഡോക്കിന്റെയും ഉദ്ഘാടനം നിർവഹിക്കുകയും ചെയ്യും.

വീണ്ടും കൊച്ചിയിലേക്ക് പറക്കും

തുടർന്ന് 1.30ന് മറൈൻ ഡ്രൈവ് ഗ്രൗണ്ടിൽ ബിജെപിയുടെ പാർട്ടി പരിപാടിയായ ശക്തികേന്ദ്ര സമ്മേളനത്തിൽ പങ്കെടുത്ത് സംസാരിക്കും. ബിജെപി ബൂത്ത് കമ്മിറ്റിക്കും, പഞ്ചായത്ത് കമ്മിറ്റിക്കും ഇടയിലുള്ള 5,200 'ശക്തികേന്ദ്ര'ങ്ങളുടെ ഇൻ ചാർജുമാരാണ് സമ്മേളനത്തിൽ പങ്കെടുക്കുക. ഒരു മണിക്കൂർ നീളുന്ന പരിപാടിക്ക് ശേഷം, 2.35ന് പ്രധാനമന്ത്രി ഐഎൻഎസ് ഗരുഡയിലേക്ക് പുറപ്പെടും. തുടർന്ന് അവിടെ നിന്ന് കൊച്ചി അന്താരാഷ്ട്ര വിമാനത്താവളത്തിൽ എത്തുകയും ഡൽഹിയിലേക്ക് മടങ്ങുകയും ചെയ്യും.

കൊച്ചിയിൽ നാളത്തെ ഗതാഗത നിയന്ത്രണം

പ്രധാനമന്ത്രിയുടെ കൊച്ചി സന്ദർശനത്തോടനുബന്ധിച്ച് ബുധനാഴ്ചയും എറണാകുളം നഗരത്തിൽ ഗതാഗത നിയന്ത്രണം ഉണ്ടായിരിക്കുന്നതാണ്. 17ന് അതിരാവിലെ 3 മണി മുതൽ ഉച്ചവരെ ആയിരിക്കും ഗതാഗത നിയന്ത്രണം. കൊച്ചി നഗരത്തിലേക്ക് വരുന്നവർ പൊതുഗതാഗത മാർഗ്ഗമായ കൊച്ചി മെട്രോ ഉപയോഗിക്കുന്നത് തിരക്ക് നിയന്ത്രിക്കാൻ സഹായിക്കും. ബ്ലോക്ക് ഒഴിവാക്കാനും വേഗത്തിൽ ലക്ഷ്യസ്ഥാനത്ത് എത്താനും ഇത് സഹായകരമായിരിക്കും.

• ഹൈക്കോടതി ജംഗ്ഷൻ, എംജി റോഡ് രാജാജി ജംഗ്ഷൻ, കലൂർ ജംഗ്ഷൻ, കടവന്ത്ര ജംഗ്ഷൻ, തേവര- മട്ടുമ്മൽ ജംഗ്ഷൻ, തേവര ഫെറി, BOT ഈസ്റ്റ്, CIFT ജംഗ്ഷൻ എന്നീ ഭാഗങ്ങളിൽ നിന്നും വാഹനങ്ങൾ വഴി തിരിച്ച് വിടുന്നതായിരിക്കും. സിറ്റിയിലേക്ക് വാഹനങ്ങൾക്ക് പ്രവേശനം ഉണ്ടായിരിക്കുന്നതല്ല.
• പശ്ചിമ കൊച്ചി ഭാഗത്തു നിന്നും ആശുപത്രി ആവശ്യങ്ങൾക്കായി വരുന്ന എമർജൻസി വാഹനങ്ങൾ, തേവര ഫെറിയിൽ നിന്നും ഇടത്തേക്ക് തിരിഞ്ഞ് മട്ടുമ്മൽ ജങ്ഷനിലെത്തി വലത്തേക്ക് തിരിഞ്ഞ്, കോന്തുരുത്തി റോഡിലൂടെ പനമ്പളളി നഗർ വഴി മോനരമ ജങ്ഷനിലെത്തി മെഡിക്കൽ ട്രസ്റ്റിലേക്കും, വളഞ്ഞമ്പലത്ത് നിന്നും വലത്തേക്ക് തിരിഞ്ഞ് ചിറ്റൂർ റോഡിലൂടെ ഇയ്യാട്ടുമുക്ക്, മഹാകവി ജി റോഡിലൂടെ കാരിക്കാമുറി റോഡിൽ കയറി ഇടത്ത് തിരിഞ്ഞ് അമ്മൻ കോവിൽ റോഡ് വഴി ഷേണായീസ് തിയ്യേറ്റർ റോഡ് വഴി എംജി റോഡിൽ യു ടേൺ എടുത്ത് മുല്ലശേരി കനാൽ റോഡിലൂടെ ടി ഡി റോഡ് വഴി ജനറൽ ആശുപത്രിയുടെ കിഴക്കേ വശത്തെ ഗേറ്റ് വഴി ആശുപത്രിയിൽ പ്രവേശിക്കേണ്ടതാണ്.
• വൈപ്പിൻ ഭാഗത്തു നിന്നും കലൂർ ഭാഗത്തു നിന്നും വരുന്ന എമർജൻസി വാഹനങ്ങൾ ടി ഡി റോഡ്- കാനൻ ഷെഡ് റോഡ് വഴി ജനറൽ ആശുപത്രിയുടെ കിഴക്കേ ഗേറ്റ് വഴി ആശുപത്രിയിൽ പ്രവേശിക്കേണ്ടതാണ്. ജനറൽ ആശുപത്രിയുടെ തെക്ക് വശത്തുളള ഹോസ്പിറ്റൽ റോഡിൽ 16ന് വൈകിട്ട് 3 മണി മുതൽ 6 മണി വരെ വാഹന ഗതാഗതം അനുവദിക്കുന്നതല്ല.

കൊച്ചി നഗരത്തിലേക്ക് വരുന്നവർ പൊതുഗതാഗത മാർഗ്ഗമായ കൊച്ചി മെട്രോ ഉപയോഗിക്കുന്നത് തിരക്ക് നിയന്ത്രിക്കാൻ സഹായിക്കും. ബ്ലോക്ക് ഒഴിവാക്കാനും വേഗത്തിൽ ലക്ഷ്യസ്ഥാനത്ത് എത്താനും ഇത് സഹായകരമായിരിക്കും.

Read More