വോട്ടെണ്ണൽ ആദ്യ 6 മണിക്കൂർ: മൂന്ന് ലക്ഷം വോട്ടിന്റ ലീഡുമായി രാഹുൽ, തിരുവനന്തപുരത്ത് ലീഡ് തിരിച്ച് പിടിച്ച് തരൂർ

തിരുവനന്തപുരം: വോട്ടെണ്ണലിന്റെ ആദ്യ ആറ്   മണിക്കൂർ പിന്നിടുമ്പോൾ ദേശീയ തലത്തിൽ ബി ജെ പിയുടെ സ്വപ്നത്തിന് തിരിച്ചടിയാണെന്ന സൂചനകളാണ് പുറത്തുവരുന്നത്. സഖ്യകക്ഷികളുടെ തണലിൽ മാത്രമാണ് നിലവിൽ അവരുടെ നേട്ടം. ബി ജെ പി സഖ്യത്തിനെതിരെ കരുത്തുറ്റ പോരാട്ടം നടത്താൻ  ഇന്ത്യാ സഖ്യത്തിന് സാധിച്ചുവെന്നതാണ് ഈ സമയം പുറത്തുവരുന്ന തിരഞ്ഞെടുപ്പ് ചിത്രത്തിൽ തെളിയുന്നത്.

കേരളത്തിൽ രാഹുൽ ഗാന്ധി മൂന്ന് ലക്ഷത്തിലേറെ ലീഡ് നേടി കുതിപ്പ് തുടരുന്നു. രണ്ട് മണ്ഡലങ്ങളിൽ രണ്ട് ലക്ഷത്തിലേറെ, അഞ്ച് മണ്ഡലത്തിൽ ഒരു ലക്ഷത്തിലേറെ ലീഡുമായി യു ഡി എഫ് തകർപ്പൻ പ്രകടനമാണ് കാഴ്ചവെക്കുന്നത്.

ഹൈബി ഈഡൻ, ഇ ടി മുഹമ്മദ് ബഷീർ എന്നിവർ ഭൂരിപക്ഷം രണ്ട് ലക്ഷത്തിൽ കൂടുതലാക്കി. അബ്ദുൾ സമദ് സമദാനി ലീഡ് ഒന്നരലക്ഷത്തിലേറെയാക്കി. ഡീൻ കുര്യാക്കോസ് ലീഡ് ഒന്നേകാൽ ലക്ഷം പിന്നിട്ട് മുന്നോട്ട് കുതിക്കുകയാണ്. കൊല്ലത്തും കോഴിക്കോടും യു ഡി എഫ് സ്ഥാനാർത്ഥികളായ എൻ കെ പ്രേമചന്ദ്രനും എം കെ രാഘവനും  ലീഡ് ഒരു ലക്ഷം കടന്നു.

ബി ജെ പി യുടെ ബാലികേറാമലയെന്ന് വിശേഷിപ്പിക്കപ്പെട്ട കേരളത്തിൽ ഒരു മണ്ഡലത്തിൽ ലീഡ് നിലനിർത്തുന്നു. തൃശൂരിൽ സുരേഷ് ഗോപി തുടക്കം മുതൽ വ്യക്തമായ ലീഡ് നിലനിർത്തുന്നു. അരലക്ഷം കവിഞ്ഞു സുരേഷ് ഗോപിയുടെ ഭൂരിപക്ഷം. തിരുവനന്തപുരത്ത് രാജീവ് ചന്ദ്രശേഖറിന്റെ ലീഡ് നഷ്ടമായി. ശശി തരൂർ ലീഡ് വീണ്ടും ഉയർത്തി പതിനായിരത്തിന് മുകളിലായി. തൃശൂരിൽ കോൺഗ്രസ് കൊണ്ടു നിർത്തിയ കറുത്ത കുതിരയെന്ന് വിശേപ്പിക്കപ്പെട്ട കെ മുരളീധരൻ നിലവിൽ മൂന്നാം സ്ഥാനത്താണ്.

എൽ ഡി എഫ് ആലത്തൂരിൽ മാത്രം നേരിയ ലീഡ് നിലനിർത്തുന്നു. തിരുവനന്തപുരം ഒഴികെ മറ്റ് മണ്ഡലങ്ങളിൽ രണ്ടാം സ്ഥാനത്ത് തുടരുന്നുവെന്നതാണ് എൽ ഡി എഫിന് ആറ്  മണിക്കൂർ പിന്നിടുമ്പോഴുള്ള ആശ്വാസം.

നാല് മണിക്കൂർ പിന്നിടുമ്പോൾ രണ്ട് സീറ്റ് ലീഡ് നിലനിർത്തിയ ബി ജെ പിക്ക് അഞ്ചാം മണിക്കൂർ കഴിഞ്ഞപ്പോൾ ഒരു സീറ്റിൽ മാത്രമായി ലീഡ് ചുരുങ്ങി. ആറാം മണിക്കൂർ ആയപ്പോഴും ആ സ്ഥിതി തുടരുകയാണ്.

അഞ്ച് മണിക്കൂർ കഴിയുമ്പോൾ രണ്ട് ലക്ഷത്തിലേറെ മണ്ഡലത്തിൽ വോട്ട് ലീഡുമായി രണ്ട് മണ്ഡലത്തിൽ കോൺഗ്രസ് ജയം ഉറപ്പിച്ചു.  എങ്കിൽ ആറ് മണിക്കൂർ കഴിയുമ്പോൾ ഒരു ലക്ഷത്തിലേറെ ഭൂരിപക്ഷം നേടി വിജയം ഉറപ്പിച്ച മണ്ഡലങ്ങളുടെ എണ്ണം യു ഡി എഫ് ഉയർത്തി. 

Read More

• KeralaLok Sabha Election Result 2024 Live: കേരളത്തിൽ യുഡിഎഫ് തരംഗം
• Lok Sabha Election Result 2024 Live: എക്സിറ്റ് പോളുകളെ എഴുതിത്തള്ളുന്ന പ്രകടനവുമായി ഇന്ത്യാ സഖ്യം; ഉത്തർ പ്രദേശിലടക്കം അട്ടിമറി മുന്നേറ്റം
• Lok Sabha Top Constituencies Result 2024 Live: തൃശൂരിൽ മുന്നേറ്റവുമായി സുരേഷ് ഗോപി, കേരളത്തിൽ താമര വിരിയുമോ?
• വോട്ടെണ്ണല്‍ കേന്ദ്രത്തിൽ നടക്കുന്നത് എന്തെല്ലാമാണ്?